1 ဇဝ်ဖြာ ဝီ ကာလာင် ဒီ အာမုဝ်ဆဲ ဒေါ ကွယ် အန် ဒဲင် နွန်။ အန် တဝ်း၊ “အာနီ မဲ လုဝ် ဘူင် တဲး အာရူန် ဂေ ဂွန် အန် ဘဲန် ဒူအီ လှူ ဒီ အုဝ် ဘော တဲး ဂေ ဘဲန် ဒူအီ အီ ဆီငါ ဘွတ်၊ တဲး ဂေ ပွိုန် ဒီ ဘူင် ဂါန် အုဝ်။ ဘေ လုဝ် ဒိုဝ်း မက် အာလူင့် အူ ဒုဝ် အီ နှိုမ်၊ ဘော ဒိုဝ်း မာဘူ အာလူင့် အာ ဒုဝ် အီ တူ မိုဝ်း ဒူင် စှေ မာဆေ။ 2 ဘေ လုဝ် ဒိုဝ်း ဘော ကာပဲ့ ခဝ်ချုင် အီ ကာမုန်၊ ဘူင် ခါမုန် အီ တူ မိုဝ်း ဆီနမ် ဘြး။ ဘေ လုဝ် ဘူင် ဘော ခါမုန် အီ ဒီဖ့လ ဘော ခါမုန် အီ ခြဲမ် အီ ကာဝ်ု နာမန်၊ ယီ တူ ဟပ် ဆီနမ် ဘြး။ 3 ခါမုန် တွိုန် ဘေ လုဝ် အုန် ခဲင် ဆီဘ့လုဝ်း၊ တဲး ဘေ အာပ် ဘော ခါမုန် ဘော မက် အာလူင့် ဘော မာဘူ အာလူင့် အာ ဒုဝ် တွိုန်၊ ဝီ လှူ ဒီ အုဝ်။ 4 ဝါယ် အန် တီ ဘေ လုဝ် တိုယ် အာရူန် ဂေ ဂွန် အန်၊ တဲး ဂေ တး ဇမ် ဒီ အာတ့် မာလုဝ်း ထိုပ် ဘိက် ဘွတ် အီ မုး ဒူင် ကာတုန့် အုဝ် ဇဝ်ဖြာ ဒီ ဒူအီ။ ဝါယ် အန် တီ ဘေ လုဝ် တဲး ဂေ ဘာယ် ပ့လဝ် ဘော ဒဲ ဂေ ဒီ အိုမ်၊ တဲး ဂေ ဆီငါ ဘွတ်။ 5 ဝါယ် အန် တီ ဘေ လုဝ် တဲး အာရူန် စှိုပ် ခြိုင် ဘွတ် တွိုန်၊ တဲး အန် စှိုပ် ဆီတုဝ် တုန် ဒီ အာတ့်။ ဝါယ် အန် တီ တဲး အန် ဝီ စှိုပ် ဆီတုဝ် တိူ့ ဘော ဆီတုဝ် အေဖူတ်။ ဟဲ့ ဟွတ့် အန် လုဝ် ဒိုက် ဟူ ပီ ဘ့လေး ဒဲင် ဘင်နဝ်း။ တဲး မဲ ဒိုဝ်း ဝန် ဘိက် အီ စှိတ် ပီ ဒိုက် ဂေ ဒီ ဆီတုဝ် အေဖူတ်၊ တဲး မဲ ပက် ဒီ ညွယ် အန်၊ တဲး န့ ကွယ် ဆီချာ။ 6 မဲ လုဝ် ဝီ ဘြဝ့် ကာမဲ့ ဒီ ဂိန့် အန်။ ဟဲ့ ဟွတ့် ဝီ ပက် ဘ့လ ခြိဝ် တွိုန် နာ အာတ့် ကာမဲ့ အန်။ 7 မဲ လုဝ် လှုဝ် နာမန် ဘွတ် ဒီ ဂိန့် အာရူန်၊ တဲး အန် ခမ် ဒီ ဘဲန် ဒူအီ အီ လှူ ဒီ အုဝ်။ 8 ဝါယ် အန် တီ မဲ လုဝ် ဝီ တိုယ် ဂေ ဂွန် အီမာယ် အာရူန် တွိုန်၊ တဲး ဘော ဂေ တး ဇမ် ဒူင် ကွယ် မဲ၊ တဲး ဂေ ဘော စှိုပ် ဆီတုဝ် ပီ လုဝ် စှိုပ် ဂေ၊ ဘော ဆီတုဝ် တုန် ဘော ကာမဲ့။ 9 ဟဲ့ ဟွတ့်၊ မဲ လုဝ် ဒိုဝ်း ဆာဘြွတ်၊ ပက် ဒီ ညွယ် ဂေ၊ တဲး ဂွန် အာရူန် စှိုပ်။ ဟဲ့ ဟွတ့်၊ ဂေ ဒီ ဘဲန် ဒူအီ လှူ ဒီ အုဝ် ဆေဆေ။ ပါယ် တီ မဲ လုဝ် ဘူင် ဒေါ ခမ် အာရူန် ဂေ ဂွန် အန် ဒီ ဘဲန် ဒူအီ ဘွတ် အီ ပွိုန် ဒီ ဘူင် ဂါန် ဇဝ်ဖြာ။

10 ဝါယ် အန် တီ မဲ လုဝ် ဝီ တိုယ် မက် အာလူင့် တွိုန်၊ တဲး အန် တး ဇမ် ဒီ အာတ့် ထိုပ် ဘိက် ဘွတ် အီ မုး ဒူင် ကာတုန့် အုဝ် ဇဝ်ဖြာ ဒီ ဒူအီ။ တဲး အာရူန် ဘော ဂွန် အန် ဘ့လေး ဒဲ ဂေ ဒဲင် ဂိန့် မက် အာလူင့် တွိုန်။ 11 ဝါယ် အန် တီ ဘေ လုဝ် ငဝ်း မက် အာလူင့် တွိုန် ဒီ အာတ့် မာလုဝ်း ထိုပ် ဘိက် ဘွတ်၊ တဲး ဇဝ်ဖြာ ယိုဝ်။ 12 မဲ လုဝ် စိုပ် ကာနူ ခဲင် နှာမ် မက်၊ ဖဝ်း ဒူင် ကာတူတ့် ဘတ့် အီ ကွယ် ဒီ ကာတုဝ့် ကာစှူင့် လှူ။ နှာမ် အီ ကာလူယ် မဲ လုဝ် လှုဝ် တူတ့် ဒီ ကာဒမ် ကာစှူင့် လှူ။ 13 ပန် တီ မဲ လုဝ် ဒိုဝ်း ဘျြီင် အီ ဒိုက် ဒီ ခူင်န်ု မက် တွိုန်။ ဘော ဘျြီင် အီ ဒိုက် ဒီ ကာဒူမ် ဂေ ဘ့လေ လမ် ဘော အာ ဘ့လာက် မဲ လုဝ် ဒိုဝ်း လှူ ဒုဝ့် ဒဲင် ကာစှူင့် လှူ တွိုန် တဲး ငဝ် ကာဆိုမ်။ 14 အီ မုး ယင် ဂေ ဟုန် အန် ဘော အျီင် အန်၊ မဲ လုဝ် ဂူင့် လေး နာ ရေတ့် ဒူင် ချ ဘေ၊ ဒုဝ့် ကာဆိုမ် တူတ့်။ ပါယ် တီ န့ မုး ပီ လှူ ဘေ အီ တဲး အုဝ် ဂဝ်း ဝဲန် မှာပ် ဂေ ဒူအီ အီ လှူ ဒီ အုဝ်။

15 ဝါယ် အန် တီ မဲ လုဝ် ဝီ ဒိုဝ်း မာဘူ အာလူင့် အူ ဒုဝ်၊ စ်ု အာရူန် ဘော ဂွန် အန် ဘ့လေး ဒဲ ဂေ ဒဲင် ဂိန့် အန်။ 16 ဟဲ့ ဟွတ့်၊ မဲ လုဝ် ဝီ ငဝ်း ယမ် မာဘူ တွိုန်။ နှာမ် အန် မဲ လုဝ် ကာထေတ့် ဒီ ကာစှူင့် လှူ တွိုန်၊ တဲး န့ ကော ဇမ် ဒွန် ဘ့လာက်။ 17 ဒုဝ် မာဘူ တီ မဲ လုဝ် ကာဒဲပ် ဘဲန် ဒီဂ်ု ဘဲန် ဒီဂ်ု၊ ဟဲ့ ဟွတ့် ဘော ဘာယ် ခူင်န်ု ဘော ပ့လဝ် အန်။ ပန် တီ မဲ လုဝ် ဘ့လေး အုန် ကြုဝ် ဇိုဝ် တီ ဘော ဂိန့် အန် ဒဲင် ကာစှူင့် လှူ။ 18 ဝါယ် အန် တီ မဲ လုဝ် လှူ မာဘူ တွိုန် ဘော ဒုဝ် ဒဲင် ကာစှူင့် လှူ၊ တဲး ငဝ် ကာဆိုမ် ဟူမ် တူတ့်။ ပါယ် တီ န့ ဒီ ဘဲန် ပီ ဒီ လှူ ဒီ ဇဝ်ဖြာ အီ ဒုဝ့် ဒီ ငဝ်၊ တဲး ငဝ် ကာဆိုမ်။ န့ ဘဲန် အီ အုး ငှုန် ဒီ ဇဝ်ဖြာ၊ တဲး န့ လဝ့် နဝ်း အန်။

19 ဟဲ့ ဟွတ့် ပန် တီ မဲ လုဝ် ဝီ ဒိုဝ်း မာဘူ အာလူင့် ပေါ အူ ဒုဝ်၊ ဝီ တဲး အာရူန် ဂေ ဂွန် အန် ဘ့လေး ဒဲ ဂေ ဒဲင် ဂိန့် အန်။ 20 ဟဲ့ ဟွတ့် မဲ လုဝ် ငဝ်း ယမ် ဘော မာဘူ တီ။ မဲ လုဝ် ဒိုဝ်း နှာမ် မာဘူ တီ၊ ဖဝ်း ဒီ လှာ ဟျုဝ့် အာရူန် ဘ့လာက် အာအး ဂေ ဂွန် အန် ဒွန် အီ။ မဲ ဘော လုဝ် ဖဝ်း နှာမ် အန် ဒီ ကာနူ မာ ဒဲ ဘော ကာနူ မာ ပ့လဝ် ဘ့လာက် အာအး ဂေ။ ဝါယ် အန် တီ မဲ လုဝ် ဝီ ကာထေတ့် ဒီ ကာစှူင့် လှူ ဒွန် ဘ့လာက်။ 21 နှာမ် ပီ ဘ့လေး အုန် မဲ ဒဲင် ကာစှူင့် လှူ တွိုန် ဘော နာမန် ဘွတ် တွိုန်၊ မဲ လုဝ် ဝီ ဒိုဝ်း အီ စဲက်၊ ကာထေတ့် ဒီ အာရူန် ဘော ဒီ ခြိုင် ဘွတ် ပီ စှိုပ် အန် တွိုန်။ မဲ ဘော လုဝ် ကာထေတ့် နှာမ် ဘော နာမန် ဘွတ် တီ ဒီ ဂွန် အာရူန် ဘော ဒီ ခြိုင် ဘွတ် ပီ စှိုပ် ဂေ။ ပါယ် တီ အာရူန် ဂေ ဂွန် အန်၊ ဂေ ဒီ ဘဲန် ဒူအီ ဆီငါ ဘွတ် ဒီ အာတ့် ဇဝ်ဖြာ။ ဘော ခြိုင် ပီ စှိုပ် ဂေ ဝီ ဘဲန် ခြိုင် ဘွတ်။

22 မဲ လုဝ် ဒိုဝ်း ဘျြီင် မာဘူ အာလူင့် တီ။ န့ မုး ဘော ဘျြီင် အီ ဒိုက် ဒီ ဆီဒါ အန်၊ ဘော ဆီဒါ ဘော ဘျြီင် အီ ဒိုက် ဒီ ခူင်န်ု အန်၊ ဘျြီင် အီ ဒိုက် ဒီ ကာဒူမ် အန် ဘော ဒီ ဘ့လေ လမ် အန် ဘော အာ ဘ့လာက်။ ဇိုဝ် တီ မဲ လုဝ် ဒိုဝ်း တူတ့်၊ ဘော ဂိုမ် ဘ့လာက် အာအး အန်။ ပီ လုဝ် လှူ မာဘူ တီ၊ န့ မုး ပီ ဒီ လှူ ဒေါ ခမ် ဒူအီ ဘဲန် ဒူအီ လှူ ဒီ ဇဝ်ဖြာ။ 23 ဟဲ့ ဟွတ့်၊ မဲ လုဝ် ဒိုဝ်း ဘော ခါမုန် အူ ဘူင့်၊ ဘော ခါမုန် ပီ ဟပ် ဘေ နာမန်၊ ဘော ခါမုန် ဒီဖ့လ အူ ဒီဖ့လ ပဲ့ ဟဲ့ ဒိုဝ်း အုန် ဒူအီ ခဲင် ဆီဘ့လုဝ်း တွိုန်၊ အီ မုး ဆီဘ့လုဝ်း ပီ အုန် ဂေ ခါမုန် အီ တူ မိုဝ်း ဆီနမ် ဘြး တွိုန်။ 24 မဲ လုဝ် ဒိုဝ်း ဒွန် မျုဝ် ဇိုဝ် တီ၊ ဒွါ ဒီ အာရူန် ဂေ ဂွန် အန်၊ တဲး ဂေ မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ၊ တဲး န့ ဘဲန် ပီ လှူ ဒီ ဇဝ်ဖြာ အီ မာဝတ် ဝိဝ် မာဝတ် ဝေန့်။ 25 ဝါယ် အန် တီ မဲ လုဝ် ဝီ ဒိုဝ်း ဒွန် မျုဝ် ပီ အာပ် မဲ ဒီ ဒဲ ဂေ၊ ဝီ လှူ တူတ့် ဒွန် မျုဝ်၊ ဝီ ဒုဝ့် ငဝ်၊ တဲး ငဝ် ဝီ ဟူမ် ကာဆိုမ် တူတ့်၊ ဘော ပီ လှူ အီ မာဝတ် ဝိဝ် မာဝတ် ဝေန့် ဘော ပီ လှူ အီ တဲး ငဝ် ကာဆိုမ် တွိုန်၊ တဲး အန် ဘဲန် တူတ့် ပီ ကာဆိုမ် ငဝ်၊ အီ အုး ငှုန် ဒီ အာတ့် ဇဝ်ဖြာ၊ တဲး န့ လဝ့် နဝ်း အန်။ 26 ဝါယ် အန် တီ မဲ လုဝ် ဒိုဝ်း ဘင်နဝ်း မာဘူ အာလူင့် တွိုန် ပီ လုဝ် လှူ မဲ ဒေါ ခမ် အာရူန် ဘဲန် ဒူအီ လှူ ဒီ ဇဝ်ဖြာ။ ဘော ဘင်နဝ်း မာဘူ တီ၊ မဲ လုဝ် ဝီ အာပ် လှူ ဒီ ဇဝ်ဖြာ၊ တဲး န့ ဘဲန် ပီ ဒီ လှူ အီ မာဝတ် ဝိဝ် မာဝတ် ဝေန့်။ မဲ ဟဲ့ ဟွတ့် မာဝတ် ဝိဝ် မာဝတ် ဝေန့် ဘင်နဝ်း တီ၊ မဲ ဟဲ့ ဝီ ပွိုန် ဟူမ်။

27 ဒေါ လှူ ဘေ မာဘူ အီ မုး ပီ လှူ ဒေါ ခမ် အာရူန် ဂေ ဂွန် အန် ဒီ ဘဲန် ဒူအီ ဆီငါ ဘွတ် ဒီ အာတ့် ဇဝ်ဖြာ၊ အာရူန် ဂေ ဂွန် အန် ဘော ပွိုန် ဒီ ဟူမ် ဘင်နဝ်း မာဘူ အာလူင့် တီ ဝါယ် ဟဲ့ ဟွတ့် မာဝတ် ဝိဝ် မာဝတ် ဝေန့် ဂေ။ ဂေ ဘော ပွိုန် ဒီ ဟူမ် ဂိုမ် မာဘူ တီ ဝါယ် ဟဲ့ ဟွတ့် အာပ် ဒီ ဇဝ်ဖြာ။ 28 ခဲ့ တီ အာရူန် ဂေ ဂွန် အန် ပွိုန် ဒီ ဟူမ် ဆေဆေ၊ ဒေါ ဒွါ ဂေ ဒူအီ အီဆာရေလ ပီ ဒီ လှူ ဂေ ဒီ အုဝ် အီ မုး ဇဝ်ဖြာ။ ဆေ ဂေ ဒူအီ အီဆာရေလ ဘော ဘူင် ဘ့လွယ် ပီ ဒီ လှူ ဒီ ဇဝ်ဖြာ၊ အီ မုး ဘ့လွယ် ကွယ် ကာဇု ဟူမ် ရိုမ်၊ ဂေ လုဝ် ဒွါ ခဲ့ တီ ဒီ အာရူန် ဘော ဒီ ဂွန် အန် ဆေဆေ။

29 န့ ယီ မုး ခြိုင် ဘွတ် တွိုန် ပီ စှိုပ် အာရူန်၊ ဂေ လှုက်လှာန် အန် အီ မုး ဂွန် အီမာယ်၊ ဂေ အီ ဒီ ဝီ ပ့လု အန်၊ ဂေ ဒီ ဝီ ပွိုန် ဒီ စှိုပ် ခြိုင် တီ ဒေါ ခမ် ဂေ ဒီ ဘဲန် ဒူအီ လှူ ဒီ ဇဝ်ဖြာ။ 30 ဂွန် အာရူန် အီ ပ့လု အန် ဘဲန် ဒါ တာင် အီ လှူ ဒီ ဇဝ်ဖြာ၊ အန် လုဝ် တး ဇမ် ဒီ အာတ့် ထိုပ် ဘိက် ဘွတ်၊ စှိုပ် ခြိုင် ဘွတ် တီ ဒေါ ဘူင် အန် ဂါန် အုဝ်။ အာဒါ ဘူ ဆီငဲ အန် လုဝ် စှိုပ် ခြိုင် တီ။

31 ဘေ လုဝ် ဒိုဝ်း မာဘူ အာလူင့် ပီ လုဝ် လှူ ဘေ ဒေါ ခမ် ဒူအီ ကာမာယ် ဒီ ဘဲန် ဒူအီ လှူ ဒီ ဇဝ်ဖြာ။ ဟဲ့ ဟွတ့် ဘေ လုဝ် ဒင် မာဘူ တီ ဒီ ဒူင် ဘွတ်။ 32 ဝါယ် အန် တီ ဘေ လုဝ် တဲး အာရူန် ဂေ ဂွန် အန် ပွိုန် ဒီ ဟူမ် ဘော ယင် အန် ဘော ခါမုန် ပီ ဒွိုမ် အုန် ဘေ ခဲင် ဆီဘ့လုဝ်း တွိုန်။ ဒေါ ကွယ် ဂေ ဒီ အာတ့် မာလုဝ်း ထိုပ် ဘိက် ဘွတ် တွိုန်၊ ဂေ လုဝ် ဟူမ် အာတီ။ 33 ဘော မာဘူ ဘော ခါမုန် ပီ လှူ ဒူအီ တွိုန် ဟဲ့ ဘဲန် ပီ ဒီ လှူ အီ တဲး ဂေ ဘွတ် ဒီ အာတ့် ဇဝ်ဖြာ ဒေါ ခမ် ဂေ ဘဲန် ဒူအီ လှူ ဒီ ဇဝ်ဖြာ။ ခုဝ် အန် တီ၊ မီ ဂေ ပွိုန် ဒီ ဟူမ် အာတီ။ အီ ဟဝ် ယီ တူ ပွိုန် ဟူမ်။ 34 ပါ ခဲညှာ ဆိန့်ဝး၊ ဆေ န့ ယီ မိုဝ်း ကာလူယ် အန်၊ ဘေ လုဝ် ဒုဝ့် ခဲင် ငဝ်။ ကွဲ့ တဲး ဒူအီ ဟူမ် ကာလူယ် တီ အီ မုး ပီ ဒီ ဟူမ် အီ ဘွတ်။

35 န့ ယီ မုး အာရူန် ဂေ ဂွန် အန်၊ မဲ လုဝ် လိုမ်လာ ဘော ဘူင် တူတ့် ဒွန် မျုဝ် ပဲ့ ဟဲ့ တဝ်း အုဝ် ဒီ မဲ။ အာဒါ ဘူ ဆီငဲ ဘေ လုဝ် ဘူင် တူတ့် ဒွန် မျုဝ် ပီ လုဝ် ဘူင် ဘေ၊ တဲး ဂေ ခမ် ဒီ ဘဲန် ဒူအီ လှူ ဒီ အုဝ် အီ မုး ဇဝ်ဖြာ။ 36 ဒေါ ဘူ ဆီငဲ တီ ဒွန် ဆီငဲ၊ ဘေ လုဝ် လှူ မက် အာလူင့် အူ ဆီငဲ အူ ဒုဝ်။ န့ လုဝ် ဘဲန် ပီ ဒီ လှူ တဲး ဇဝ်ဖြာ ဂဝ်း ဝဲန် မှာပ် ဘေ။ ဘေ လုဝ် ဘူင် ပါယ် တီ တဲး ကာစှူင့် လှူ ဆီငါ ဘွတ် ဒီ အာတ့် ဇဝ်ဖြာ။ ဟဲ့ ဟွတ့် မဲ လုဝ် ဝီ ဖဝ်း နာမန် ဒီ ကာစှူင့် လှူ၊ တဲး ဘေ ပွိုန် ဒီ လှူ နာ ဒဲင်။ 37 ဘူ ဆီငဲ ဘေ လုဝ် ဘူင် ပါယ် တီ တဲး ကာစှူင့် လှူ တွိုန် ဘဲန် ကာစှူင့် အီ ဆီငါ ဘွတ် ကာဆဝ် ဘော ဘဲန် ကာစှူင့် ပီ ပွိုန် လှူ ဒီ ဇဝ်ဖြာ။ ဝါယ် အန် တီ ဆေ န့ ဘော မိုဝ်း ပီ ဒီ လှူ မာဆေ၊ ပီ ဘ့လေး ဘေ ဒဲင် ကာစှူင့် လှူ တီ ဒီ ဘဲန် ကြုဝ် အီ ဆီငါ ဘွတ် ပီ ကာစှူင့် လှူ ဟဲ့ ဆီငါ ဘွတ်။

38 ပီ ဒီ လုဝ် လှူ ဘေ ဒဲင် ကာစှူင့် လှူ တီ၊ န့ ပါယ် နီ။ ဒွန် ဆီငဲ ဒွန် ဆီငဲ ဘေ လုဝ် လှူ ဂွန် မာဘူ အာ ဒုဝ် အီ မိုဝ်း အာဆာက် အူ ဆီနမ်။ 39 ဆိန့်ဝး ဘေ လုဝ် လှူ အူ ဒုဝ် ဘော ဘာ ဒီ အပ် ဘေ လုဝ် ဝီ လှူ ပေါ အူ ဒုဝ်။ 40 ဒေါ လှူ ဘေ မာဘူ ဆိန့်ဝး၊ ဘေ လုဝ် ဒိုဝ်း ဘော ကာပဲ့ အူ ဘ့လဲ ဒီ အူ ခ့ဝါက်၊ ဝီ ဟပ် နာမန် အူ ကာပဝ်။ ဘေ လုဝ် လှူ ဘော အိုမ် မာငုန် အူ ကာပဝ်၊ တဲး ဘေ လှူ ပီ ဒီ ဒျီင်။ 41 ဒေါ လှူ ဘေ မာဘူ ဘာ ဒီ အပ်၊ ဘေ လုဝ် ဒိုဝ်း ဘော ကာပဲ့ ဘော နာမန်၊ ဘော အိုမ် မာငုန်၊ တဲး န့ ပီ ပီ လှူ ဘေ ဆိန့်ဝး။ ဘေ လုဝ် လှူ တူတ့်၊ တဲး ငဝ် ကာဆိုမ်၊ တဲး န့ ဘဲန် အီ အုး ငှုန် ဒီ အာတ့် ဇဝ်ဖြာ၊ တဲး န့ လဝ့် နဝ်း အန်။

42 ဒွန် စုဝ် ဒွန် ဘာန် ဂေ ဒူအီ အီဆာရေလ လုဝ် လှူ ဒီ အုဝ် ပီ ဒီ လှူ ဇိုဝ် တီ။ ဂေ လုဝ် တး လှူ ဒီ ကာစှူင့် လှူ အီ ကွယ် ကာတတ် မာလုဝ်း ထိုပ် ဘိက် ဘွတ် တွိုန်။ န့ မုး ဒူင် ကွယ် အုဝ် အီ မုး ဇဝ်ဖြာ၊ တဲး ဂေ ဒူအီ အီဆာရေလ ဝီ ကာတုန့် အုဝ်။ 43 အုဝ် ဒီ တး ဇမ် ဒူင် ကွယ် ဂေ ဒူအီ အီဆာရေလ တွိုန်၊ ကာလာင် ဂြုဝ်း ဒီ ဂေ။ ဒူင် တီ အုဝ် ဒီ ဘော ဘျ အာဖုင် ဒင်ခုဝ် အုဝ် ဘော အာရူင် ဘ့လာင် အုဝ်၊ တဲး န့ ဘဲန် ဒူင် ဘွတ်။

44 ပါယ် တီ အုဝ် ဒီ ဘော တဲး ထိုပ် ဘိက် ဘွတ် ဘော ကာစှူင့် လှူ တွိုန် ဘဲန် ကာစှူင့် ဘွတ်။ အုဝ် ဒီ တဲး ဘော အာရူန် ဂေ ဂွန် အန် ဘဲန် ဒူအီ အီ ဆီငါ ဘွတ်၊ တဲး ဂေ ဘဲန် ဒူအီ အီ ပွိုန် ဒီ ဘူင် ဂါန် အုဝ်။ 45 အုဝ် ဒီ ကွယ် ကာတဲ ဒူင် ကွယ် ဂေ ဒူအီ အီဆာရေလ။ အုဝ် ဒီ ဘဲန် ဇဝ်ဖြာ ပီ ကြိုပ် ဂေ။ 46 ဂေ ဒီ ဘော နပ်၊ န့ မုး အုဝ် အီ မုး ဇဝ်ဖြာ ပီ ကြိုပ် ဂေ၊ အုဝ် ဟဲ့ တိုယ် ဂေ လေး ခဲင် မိူင် အဲဂိုပ်၊ တဲး အုဝ် ကွယ် ကာတဲ ဒူင် ကွယ် ဂေ၊ တဲး အုဝ် ဘဲန် အန် ဇဝ်၊ အီ မုး ဇဝ်ဖြာ ပီ ကြိုပ် ဂေ။” အာတီ ဒွန် မျုဝ် ဇဝ်ဖြာ ဟဲ့ ဟွတ့် ကာလာင် ဒီ အာမုဝ်ဆဲ ဘော စ်ု အန် ဝီ ဘူင်။