1 ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ ဒဲ့ အာရူန် အီ မုး အီကတ် မဲ ဘော ဂွန် အန်၊ အီ စိူဝ် အာနာဒါပ်၊ အာဘီဟူ၊ အာလေအာဆာ ဘော အာအီထာမာ၊ တဲး ဂေ ဘူင် ဂါန် အုဝ်၊ ဘဲန် ဒူအီ အီ လှူ ဒီ အုဝ်။ 2 ဝါယ် အန် တီ မဲ လုဝ် စ်ု ဂေ ဘူင် ခြိုင် ဘွတ် အူ ဇိုမ် တဲး အာရူန် တာ၊ တဲး အန် မိုဝ်း ဆာရေ၊ တဲး ဒူအီ ရုဝ်ဆေ အန်။ 3 န့ မိုဝ်း ဂေ ဒူအီ ပဲ့ ဟဲ့ ဒွါ အုဝ် အာငျာန် တဲး ဂေ လှဲဝ် ဒီ ဘူင် ခြိုင် ဇိုဝ် တီ။ မဲ မိူဝ် လုဝ် စ်ု ဂေ တဲး ဂေ ဘူင် ခြိုင် ဘွတ် အူ ဇိုမ် ပီ လုဝ် စှိုပ် အာရူန်၊ တဲး အန် ဘွတ်၊ တဲး အန် ပွိုန် ဒီ လှူ ဒီ အုဝ်။ 4 ခြိုင် ပီ လုဝ် ဂေ ဘူင်၊ ဂေ ပါယ် နီ။ ဂေ လုဝ် ဘူင် ဟူ ပီ ဘ့လေး အာရူန် ဒီ ဘင်နဝ်း အန်။ ဘော ဆီတုဝ် ဒီကြး၊ အီ စိူဝ် ဆီတုဝ် အေဖူတ်၊ ဘော ဆီတုဝ် တိူ့ ဂါယ် ဆီတုဝ် တုန်၊ ဘော ကာမဲ့ ဘော ဆာဘြွတ် ပီ ပက် ဒီ ညွယ် အန်၊ ဂေ လုဝ် ဘူင် တဲး န့ ဘဲန် အူ ဇိုမ်။ ခြိုင် ဘွတ် ဇိုဝ် တီ၊ ဂေ လုဝ် ဘူင် တဲး ဘော အီကတ် မဲ အီ စိူဝ် အာရူန်။ ဘော ဂွန် အီမာယ် အန် ပွိုန် ဒီ တာ ဒေါ ဘူင် ဂေ ဂါန် အုဝ်၊ ဘဲန် ဒူအီ အီ လှူ ဒီ အုဝ်။ 5 ဂေ လုဝ် ဘူင် ခြိုင် ဇိုဝ် တီ ဒွန် မျုဝ် တာ ခြိဝ် ဂေ ဆေန့် အီ ခွင်၊ အီ ဂုယ် ခွန် ဘော အီ ရေန့် ဂဲ။ တဲး ဂေ တာ ဘော ဘိက် ကာတမ် လုယ်၊ ဘူင် ခဲ့ ပီ စ်ု အုဝ် ဂေ ဘူင်။”

6 ဝါယ် အန် တီ ဇဝ်ဖြာ ဝီ တဝ်း၊ “ဂေ ဒူအီ အီ လှဲဝ် ဒီ ဘူင် ဆီတုဝ် အေဖူတ် တွိုန်၊ တဲး ဂေ တာ ခြိဝ် ဘော ဆေန့် အီ ခွင်၊ အီ ဂုယ် ခွန် ဘော အီ ရေန့် ဂဲ။ တဲး ဂေ တာ ဘော ဘိက် ကာတမ် လုယ် ပီ ဒဝ့် ဂေ တာ ဆေန့် ဘတ်။ 7 ဆီတုဝ် အေဖူတ် တွိုန် ဘဲန် ဆီတုဝ် ဒီကြး။ ဘေ လုဝ် ဘူင် ဘိက် တဲး န့ ကာဒိုက် ဘော နာ အာတ့် နာ ပန် ဒီ အာ ကာတုဝ့်။ 8 ဘေ လုဝ် ဒဝ့် ဝန် ပီ လုဝ် ပက် ဒီ ညွယ်၊ တဲး အန် ဒိုက် ဒီ ဆီတုဝ် အေဖူတ် တီ၊ တဲး န့ ဘဲန် ခြိုင် အူ ဖိူန်။ ဘေ လုဝ် တာ ဆေန့် ခြိဝ် ဂေ ဆေန့် အီ ခွင်၊ အီ ဂုယ် ခွန် ဘော အီ ရေန့် ဂဲ၊ တဲး ဂေ တာ ဆေန့် ကာတမ် လုယ် အီ ဘတ်။

9 ဘေ ဘော လုဝ် ဒိုဝ်း ဆဲန့် ဝွင့် လုယ် အာ ဘူင့်၊ ဒဲမ် အုန် စိူဝ် ခြိုဝ် အီဆာရေလ ဘော ဂိုဝ် ဒီ အာ မျုဝ်။ 10 ဆဲန့် အူ ဘူင့် လုဝ် ဒဲမ် စိူဝ် ဂေ ဂွန် အီမာယ် အာကူပ် ဒဝ် ဝီ။ ဆဲန့် ပေါ အူ ဘူင့် လုဝ် ဒဲမ် စိူဝ် ဂေ ပေါ ဒဝ် ဝီ။ တဲး ဂေ ဒဲမ် လာယ် ဒါမ်။ စိူဝ် အီ ဂွိုတ် ဒီ အာတ့် လုဝ် ဒဲမ် ဒီ အာတ့်။ စိူဝ် အီ ဂွိုတ် ဒီ ပန် လုဝ် ဒဲမ် ဒီ ပန်။ 11 ဒါ ဇာင် ခမ် အီ ရန့် ဆဲန့်၊ အန် လုဝ် ဒွက် ဆဲန့် အာ ဘူင့်၊ တဲး န့ လေး စိူဝ် ဂွန် အာကူပ် တွိုန်။ အန် လုဝ် ဘူင် ဇိုဝ် တီ တဲး န့ ပီ ပီ ဘူင် အန် ဇိုမ်။ ဝါယ် အန် တီ အန် ဝီ လုဝ် ဘူင် ကာင် ဆဲန့် အာ ဘူင့် တီ၊ တာ ခြိဝ် အီ ဟပ် ဘုဝ်း။ 12 ဆဲန့် အာ ဘူင့် တီ ဘေ လုဝ် ဒိုက် ဒီ ယ ဆီတုဝ် အေဖူတ် တွိုန်၊ တဲး န့ မိုဝ်း အူ ဘ့လာက် အူ ဘူင့်။ ဆဲန့် အာ ဘူင့် တီ တဲး အုဝ် ဇဝ်ဖြာ လှုဝ်း ဂေ ဒူအီ အီဆာရေလ ဂိုဝ် ဒီ အာ ခြိုဝ်။ ပါယ် တီ အာရူန် လုဝ် ဘ့လေး စိူဝ် ဂေ ခြိုဝ် အီဆာရေလ ဒီ ယ အန်၊ တဲး အုဝ် ပွိုန် ဒီ လှုဝ်း ဂေ ဘောကာဂ့လျီတ် ဒေါ တး ဇမ် အန် ဒီ အာတ့် အုဝ် ဘော လှူ ဒီ အုဝ်။ 13-14 ပါယ် တီ ဘေ လုဝ် ဘူင် ကာင် ဆဲန့် အာ ဘူင့်၊ တာ ခြိဝ် ပီ ဟပ် ဘေ ဘုဝ်း။ ဟဲ့ ဟွတ့် ဘေ ဘော လုဝ် ဝီ ဒိုဝ်း ခြိဝ် ဘွတ်၊ ဘူင် ဝန် ခြိဝ် အာ ညွင့်၊ တဲး ဘေ ဝီ ဒိုက် ဝန် တီ ဒီ ကာင် ဆဲန့် တွိုန်။” ပါယ် တီ ဇဝ်ဖြာ စ်ု ဂေ ဘူင် ဆီတုဝ် ဒီကြး အီ စိူဝ် ဆီတုဝ် အေဖူတ် တွိုန်။

15 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “ဘေ လုဝ် ဘူင် ဟူ ပီ ဘ့လေး အာရူန် ဒီ ဘင်နဝ်း အန်၊ တဲး န့ စွယ် ဘေ ဒေါ လုဝ် ဘေ ဆုင်ဖျာတ် ဘဲန် မျုဝ် ဘဲန် မျုဝ်။ တဲး ဘေ စ်ု ဒူအီ လှဲဝ် ဒီ ဘူင် ဒွန် မျုဝ်။ အန် လုဝ် ဒိုဝ်း တာ ကြုဝ် ပီ တာ ဂေ ဒေါ ဘူင် ဂေ ဆီတုဝ် အေဖူတ် တွိုန်။ တဲး အန် တာ ခြိဝ် ဂေ ဆေန့် အီ ခွင်၊ အီ ဂုယ် ခွန် ဘော အီ ရေန့် ဂဲ။ တဲး ဂေ တာ ဘိက် ကာတမ် လုယ် ပီ ဒဝ့် ဂေ တာ ဆေန့် ဘတ်။ 16 ဟူ တီ၊ ဘေ လုဝ် ဘူင် တဲး အန် ဘဲန် ဖွုန် ဆီနာ ကာလင်၊ တဲး ဒွန် ဘ့လာက် ဘဲန် အူ ကာဆာန်။ ဘေ ဘော လုဝ် ဒိုဝ်း ဘိက်၊ ဘ့လး တဲး န့ ဘဲန် အာ ထာပ်၊ ပီ ဟူ။ 17 ဘ့လာက် နာ ဒဲင် ဘေ လုဝ် ဒိုက် ဆဲန့် ဂိုဝ် ဒီ အာ ဘူင့်၊ တဲး ဂေ ကွယ် မ့ပြဲင် ဖွုန် မ့ပြဲင်။ မ့ပြဲင် လှေး ဘေ လုဝ် ဘ့လေး ဆဲန့် ရေန့် ဒေန့်၊ ဆဲန့် ဒေန့် ဘ့လာင် ဘော ဆဲန့် ရေန့်။ 18 မ့ပြဲင် ဟာအာ လုဝ် ဘ့လေး ဆဲန့် ငျီန် ခွင်၊ ဆဲန့် ငျီန် ဘ့လေန့် ဘော ဆဲန့် ရေန့် ဝွင့်။ 19 မ့ပြဲင် ဟာအူယ် လုဝ် ဘ့လေး ဆဲန့် မာဘြိဝ်၊ ဆဲန့် ပယ့် ဘော ဆဲန့် ဂုယ် ခွန်။ 20 မ့ပြဲင် န့ ဖွုန် လုဝ် ဘ့လေး ဆဲန့် ငျီန် ဝွင့်၊ ဆဲန့် ဝွင့် လုယ် ဘော ဆဲန့် ငျီန် ဒေန့် ဒီပုန်။ ဆဲန့် ဇိုဝ် တီ ဒွန် ဘူင့် ဘေ လုဝ် ဝီ ဒိုဝ်း ခြိဝ် ဘူင် ကာင် အန်။ 21 ဆဲန့် ဂိုဝ် ဒီ အာ ဘူင့် တီ ဘူင် ပီ ဂွန် အာကူပ် ဂိုဝ် ဒီ အာ ဝီ။ ဆဲန့် ဒွန် ဘူင့် လုဝ် မိုဝ်း စိူဝ် ခြိုဝ် ဂေ ဒူအီ အီဆာရေလ၊ အူ မျုဝ် အူ ခြိုဝ်၊ တဲး န့ ကော နုဝ့် ဂိုဝ် ဒီ အာ ခြိုဝ်။ 22 ဘေ ဘော လုဝ် ဘူင် ဝန် ခြိဝ် ဇဲတ် အာ ညွင့်။ 23 ဟဲ့ ဟွတ့် ဘေ လုဝ် ဘူင် ခ့ဝင် ခြိဝ် အာ ဘူင့်၊ ဒိုက် ဒီ အာ ကာတုဝ့် ဟူ တွိုန် ဘ့လာက် နာ ကွာ။ 24 ဝန် ခြိဝ် တွိုန် ဘေ လုဝ် ဒိုက် ဒင် အန် ဒီ ခ့ဝင် ခြိဝ် အီ ကွယ် ဒီ ကာတုဝ့် ဟူ တွိုန် ပီ လုဝ် ဘ့လေး ဒါ တာင် အီ လှူ ဒီ ဇဝ်ဖြာ ဒဲင် ဘင်နဝ်း အန်။ 25 ကာဒဲ့ ဝန် ခြိဝ် တီ၊ ဘေ ဝီ လုဝ် ဒိုက် ဒီ ကာင် ဆဲန့် ဝွင့် လုယ် အာ ဘူင့် အီ ကွယ် ဒီ ယ ဆီတုဝ် အေဖူတ် တွိုန်။ 26 ပန် တီ ဘေ ဘော လုဝ် ဘူင် ခ့ဝင် ခြိဝ် ပေါ အာ ဘူင့်၊ ဒိုက် ဒီ ကာတုဝ့် ဘ့လာက် နာ တေတ့် ဟူ တွိုန် ဘော အာ ကာတုဝ့်၊ တဲး န့ ကွယ် ကာတတ် ဝန် ပီ ပက် ဒီ ညွယ် အီ ကွယ် ဒီ ဆီတုဝ် အေဖူတ် တွိုန်။ 27 ဘေ လုဝ် ဘူင် ဘော ခ့ဝင် ခြိဝ် ပေါ အာ ဘူင့်၊ ဒိုက် ဒီ ဆီတုဝ် အေဖူတ် တဲး န့ ကွယ် ဒူင် ကွယ် နာ ခြိုမ် ဟူ တွိုန်၊ တဲး န့ ကွယ် ကာတတ် ဝန် အီ ဒိုက် ဒီ ညွယ် တွိုန်။ 28 ဘေ လုဝ် ဝီ ဒိုဝ်း ဝန် ဘိက် အီ ခွင်၊ စှိုပ် ခဲင် ခ့ဝင် အီ ဒိုက် ဒီ ဟူ ဘော ခ့ဝင် အီ ဒိုက် ဒီ ဆီတုဝ် အေဖူတ် တွိုန်၊ တဲး ဟူ တွိုန် ဒိုက် ရိတ် ဒီ ဆီတုဝ် အေဖူတ်၊ ကွဲ့ တဲး န့ ရး။

29 ဝါယ် အန် တီ ဒွန် ဇေန့်၊ ဒေါ လိုပ် အာရူန် ခဲင် ထိုပ် ဘိက် ဘွတ်၊ အန် ဒီ စှိုပ် ဟူ အီ မိုဝ်း စိူဝ် ဂေ ခြိုဝ် ဒူအီ အီဆာရေလ တွိုန်၊ တဲး န့ ကွယ် ဒီ ဘင်နဝ်း အန်၊ တဲး ဇဝ်ဖြာ ဝီ လှုဝ်း ဂေ ဆေဆေ။ 30 ဘေ လုဝ် အုန် မာဝ် အာ ဘူင့် အီ စိူဝ် အူရိမ် ဂါယ် ထူမိမ် နာ ခဲင် ဟူ တွိုန်။^a ပါယ် တီ မာဝ် အာ ဘူင့် တီ ကွယ် ဒီ ဘင်နဝ်း အာရူန် ဒွန် ဇေန့် ဒွန် ဇေန့် ဒေါ လိုပ် အန် ဒူင် ကွယ် ဇဝ်ဖြာ ခဲင် ထိုပ် ဘိက် ဘွတ်။ ပါယ် တီ ကြုဝ် အီ တဲး ဒူအီ အီဆာရေလ နပ် ပီ လုဝ် ပီ အိုင် ဇဝ်ဖြာ၊ န့ ဒီ ကွယ် ဒီ ဘင်နဝ်း အာရူန် ဆေဆေ ဒေါ ကွယ် အန် ဒီ အာတ့် ဇဝ်ဖြာ။”

31 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “ဘေ ဘော လုဝ် ဝီ ဒိုဝ်း ဘိက် အီ ခွင်၊ ဘူင် ဆီတုဝ် တိူ့ ပီ လုဝ် စှိုပ် နာ ခဲင် ဆီတုဝ် အေဖူတ် တွိုန်။ 32 ဘေ လုဝ် ဒိုဝ်း ဘိက် တူင့် အူ ဖိူန်။ နာ ကာတဲ အန် ဘေ လုဝ် ဂွဲ့ မဲင် အန်။ ဝါယ် အန် တီ ဘေ လုဝ် ဒဝ့် ပြာင် ဝီ စိန့် ဒီ မဲင် အန်၊ ကွဲ့ တဲး အန် ကာယာတ့် လိုဝ်။ 33 ဘေ ဘော လုဝ် ဘူင် ရာင် ဘ့လေ မာစက်၊ တာ ဆေန့် အီ ခွင်၊ အီ ဂုယ် ခွန် ဘော အီ ရေန့် ဂဲ၊ တဲး ဘေ ဒိုက် ဒီ ဘြုဝ် ဆီတုဝ် တီ။ ဘော ဟိင် ခြိဝ် ဘေ လုဝ် ဘူင်၊ ဒိုက် နာ ကာတဲ ရာင် ဘ့လေ မာစက် ဒွန် ဘူင့်။ 34 ရာင် ဘ့လေ မာစက် ဂေ ဟိင် ခြိဝ် ဘေ လုဝ် ဒိုဝ်း ဒိုက် ဒီ ဘြုဝ် ဆီတုဝ်၊ တဲး န့ လာယ် ကာခန်။ 35 အာရူန် လုဝ် စှိုပ် ဘော ဆီတုဝ် တီ ဒေါ ဘူင် အန် ဂါန် ဇဝ်ဖြာ။ ဒေါ ဟာဝ် လိုပ် အန် ခဲင် ထိုပ် ဘိက် ဘွတ်၊ အီ မုး ဒူင် ကွယ် ဇဝ်ဖြာ၊ ဘော ဒေါ လေး အန် ခဲင် ဒူင် ဘွတ် တီ၊ ဂေ ဒူအီ ဘ်ု ဒီ ထူမ် ဟမ် ဟိင် တီ၊ တဲး ဂေ နပ် အာရူန် တူ ယမ် ဒေါ ကွယ် အန် ဒီ အာတ့် ဇဝ်ဖြာ။

36 ဘေ လုဝ် ဝီ ဒိုဝ်း ခြိဝ် ဘွတ် အူ ဘ့လ၊ ဒွက် ပယ့် နာ ဒဲင်၊ တဲး န့ တဝ်း၊ ဟဲ့ ဘွတ်၊ မီ အာဒါ ဇဝ်ဖြာ။” 37 ဘေ လုဝ် ဒိုဝ်း ဝန် အီ ခွင်၊ ဒိုက် ဒီ ဘ့လ ခြိဝ် တွိုန်၊ တဲး န့ ပွိုန် ဒီ ပက် ဒီ ကာတဝ်း ဒူအီ အီ လှူ ဒီ ဇဝ်ဖြာ၊ တဲး န့ ကွယ် နာ ရေတ့် ကာမဲ့ အန်။ 38 ဘ့လ ခြိဝ် တီ လုဝ် ကွယ် ဒီ ကာတဝ်း အာရူန်။ ပါယ် တီ အန် လုဝ် ဒိုဝ်း နာ တူ မွှိုမ် ပီ ဘူင် ဒူအီ၊ အီ ဒိုက် ဒီ ပီ ဒီ လှူ ဂေ ဒွန် မျုဝ်။ ဂေ ဘော လှူ မာဆေ၊ မှာပ် ဂေ ဒီ ဘော ဒိုက် ဒီ ပီ ဒီ လှူ ဂေ တီ ဆေဆေ။ ဆေ အာရူန် ယီ မိုဝ်း ဘ့လ ခြိဝ် တီ၊ န့ ဒီ တဲး ဇဝ်ဖြာ ဝဲန် မှာပ် အီ ဒိုက် ဒီ ပီ လှူ ဂေ။

39 ဝါယ် အန် တီ ဘေ လုဝ် ဝီ ဒဝ့် ဘိက် ကာတမ် လုယ်၊ တာ ဆေန့် ဘတ်၊ ဝီ ဘူင် ဆီတုဝ် တုန် အာဒါ အာရူန်။ ဘော ကာမဲ့ ဘေ လုဝ် ဘူင် တာ ဆေန့် ကာတမ် လုယ် အီ ဟဲ့ ဘတ်။ ဘော ဆာဘြွတ် ပီ ပက် ဒီ ညွယ်၊ ဘေ လုဝ် ဘူင်။ ဒူအီ လှဲဝ် ဒီ စိန့်၊ တဲး မဲ စ်ု အန် စိန့် ဂဲ့၊ တဲး အန် ဘူင် ဆာဘြွတ် တီ။ 40 မဲ ဘော လုဝ် တဲး ဂေ ဘူင် ဆီတုဝ် တုန် ဘော ဆာဘြွတ် ဘော ကာမဲ့၊ တဲး ဘော ဂွန် အီမာယ် အာရူန် ပွိုန် ဒီ စှိုပ်၊ တဲး ဘော ဂေ မိုဝ်း ဆာရေ၊ တဲး ဂေ ဒူအီ ရုဝ်ဆေ ဘော ဂေ။ 41 ဘေ ဟဲ့ ဟွတ့် ဘူင် ခြိုင် ဘွတ် တီ၊ တဲး ဘော အာရူန် အီ မုး အီကတ် မဲ ဘော ဂေ ဂွန် အီမာယ် အန် ဝီ စှိုပ် ခြိုင် တီ။ ဝါယ် အန် တီ ဘေ လုဝ် ဖဝ်း နာမန် ဘွတ် ဒီ ဂိန့် ဂေ၊ ဒါင် တဲး ဂေ ဘဲန် ဒူအီ အီ ဘူင် ဂါန် အုဝ်။

42 ဘေ ဘော လုဝ် ဘူင် ဆီလာ ဘွာ့၊ တဲး ဘော အာရူန် ဘော ဂွန် အန် စှိုပ်၊ တဲး န့ ကာဘိတ် ဒုဝ် ဂေ။ ဆီလာ တီ ဘေ လုဝ် ဘူင် တာ ကာတမ် လုယ်။ ဘေ လုဝ် ဘူင် တဲး န့ စုး ဒီ ညွယ် ကော ဇမ် ဒီ ဂိုမ်၊ ကာဘိတ် ဂိုမ် ဂေ။ 43 အာရူန် ဘော ဂွန် အန် လုဝ် စှိုပ် ဆေဆေ ဆီလာ တီ ဒေါ လိုပ် ဂေ ခဲင် ထိုပ် ဘိက် ဘွတ် ဘော ဒေါ ဟာဝ် ကာတတ် ဂေ ကာစှူင့် လှူ၊ တဲး ဂေ ဘူင် ဂါန် အုဝ်။ ဒေါ ကွယ် ဂေ ဒီ ဒူင် ဘွတ် ဒွန် မျုဝ်၊ ဆေ ဂေ စှိုပ် ခြိုင် ပါယ် တီ န့ တူ တဲး ဂေ မိုဝ်း မှာပ်၊ တူ တဲး ဂေ လုဝ် ယမ်။

မဲ လုဝ် တဲး အာရူန် ဂေ လှုက်လှာန် အန် ဘူင် ဆေဆေ ပီ စ်ု အုဝ် ဇိုဝ် တီ ဒွန် မျုဝ်၊ တဲး ဂေ ဒူပ် ဆီချာ ဒွန် စုဝ် ဒွန် ဘာန်။” ပါယ် တီ ဇဝ်ဖြာ ကာလာင် ဒီ အာမုဝ်ဆဲ ဒေါ ကွယ် အန် ဒဲင် နွန် ဇဝ်ဖြာ တွိုန်။