1 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “မဲ လုဝ် ဝီ ဟာဝ် ဇမ် ဒူင် ကွယ် ခုန်ဒီခမ် ဖာရုဝ်။ အုဝ် ဟဲ့ တဲး နဝ်း အန် ဘော နဝ်း ဂေ အာမူ အာမာတ် အန် တူ ဘျွင် မာဆေ။ ပါယ် တီ အုဝ် ဒီ ပွိုန် ဒီ ဘူင် နာ မွှိုမ် အာမ် ကာဆဝ် ဒီ အာတ့် ဂေ။ 2 ပန် တီ ဘေ ဒီ ဘော နပ် ဒီ ကာလာင် ဒီ ဂွန် ဘော လှုက်လှာန် ဘေ လွင် ပီ ဒွါ အုဝ် ဒုက် ဒီ ဂေ ဒူအီ အဲဂိုပ် ဘော လွင် နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ် ပဲ့ ဟဲ့ ဘူင် အုဝ်။ ဘေ ဒီ ဘော နပ်၊ အုဝ် မုး ဇဝ်ဖြာ။”

3 အာမုဝ်ဆဲ ဂါယ် အာရူန် ဝီ ဟာဝ် ဇမ် ဒူင် ကွယ် ခုန်ဒီခမ် ဖာရုဝ် ဘော တဝ်း ဒီ အန်၊ “ဇဝ်ဖြာ ပီ ကြိုပ် ယေ ဒူအီ ဟဲဘြဲ တဝ်း ဒီ မဲ၊ ‘ပေါ ခဲ့ မှဝ် န့ ဒီ လှေန့်၊ မဲ ဒီ ဘျွင် နဝ်း မဲ၊ တဲး န့ ဘဲန် နဝ်း ဂူမ် ဒီ အာတ့် အုဝ်။း တဲး မဲ ဘ့လေး ဒူအီ အာမျုဝ် အုဝ်၊ တဲး ဂေ ပွိုန် ဒီ ဟာဝ် ကြိုပ် အုဝ်။ 4 ဆေ မဲ တူ တဲး ဂေ ဟာဝ်၊ ခဲညှာ အုဝ် ဒီ တဲး မာ အာဇူင့် တး ဇမ် ခဲင် မိူင် မဲ။ 5 ဂေ ဒီ တး ဘဲန် ဖိုင် ဘဲန် ဖိုင်၊ ကွဲ့ ဟူ တဲး ဘေ ပွိုန် ဒီ ယိုဝ် ကာဒါယ်။ ဂေ ဒီ ဟူမ် တူတ့် ဒွန် မျုဝ် ခဲ့ ပီ ဆီ မိုဝ်း ဝါယ် ဟဲ့ စုဝ်း ဘျြီ တွိုန်။ ဂေ ဒီ ဘော ဟူမ် ဒွန် မျုဝ် အီ ပု လေး ခဲင် မာန် ခဲင် မိူင်။ 6 မာ အာဇူင့် တီ၊ ဂေ ဒီ ဘော လိုပ် ကော နုဝ့် ခဲင် ကာင် မဲ ဘော ခဲင် ကာင် ဂေ အာမူ အာမာတ် မဲ ဘော ခဲင် ကာင် ဂေ ဒူအီ ကိူန် ခဲင် မိူင် မဲ။ အူ ဆိန့် ဒေါ ကွယ် ဂုန့် ဒင် ဘေ အီ တး ကွယ် ခဲင် မိူင် နီ၊ ကော ဇမ် အာတိုဝ်၊ အာဝ် မိုဝ်း ဒူအီ အီ ဟဲ့ ဒွိုမ် ယိုဝ် ဒုက် ဇိုဝ် နီ။’” ဝါယ် ဟဲ့ ဟွတ့် ကာလာင် အာမုဝ်ဆဲ ပါယ် တီ အန် ဝီ လေး ဒူင် ကွယ် ခုန်ဒီခမ် ဖာရုဝ် တွိုန်။

7 ပန် တီ ဂေ အာမူ အာမာတ် ခုန်ဒီခမ် ဖာရုဝ် တဝ်း ဒီ အန်၊ “န့ ဟဲ့ လှေန့်၊ ဒူအီ တီ ဟဲ့ တဲး အေ ကာဒုး ဒုက် တာင် ကာဆဝ်။ ယေ မှာန့်၊ တဲး မဲ ခ့ဝါင် ဂေ အီမာယ် လေး ဟာဝ်၊ တဲး ဂေ ဟာဝ် ကြိုပ် ဇဝ်ဖြာ ဂေ။ တဲး မဲ ယွတ်၊ မိူင် အဲဂိုပ် ဘော မိူင် ဟဲ့ စှိုမ် တူတ့် ဒွန် မျုဝ်။ ခုဝ် အန် တီ၊ တဲး မဲ ခ့ဝါင် ဂေ လေး ဟာဝ်။”

8 ပန် တီ ဒူအီ မင် အီ ဝီ ဟာဝ် ဒဲ့ အာမုဝ်ဆဲ ဂါယ် အာရူန်၊ တဲး ဂါယ် ဝီ တး ဇမ် ဒူင် ကွယ် ခုန်ဒီခမ်။ ခုန်ဒီခမ် ဝီ တဝ်း ဒီ ဂါယ်၊ “ဟာဝ် လှူ ဒီ ဇဝ်ဖြာ ပီ ကြိုပ် ဘေ။ မာလဲ အုဝ် ဒီ ကာလာင် အာဆေ ဒီ ပွိုန် ဟာဝ်။”

9 အာမုဝ်ဆဲ တွိုန် ဝီ တဝ်း ဒီ အန်၊ “ယေ ဘောကာဂ့လျီတ် လုဝ် ဟာဝ်။ ဘော ဒူအီ တာင်၊ ဘော ဒူအီ တျီ့၊ ဘော ဂွန် အီမာယ် ဘော ဂွန် အီဘိုန့်၊ ဘော မာမက်၊ ဘော မာဘူ ဂေ မာပဲ၊ ခဲ့ ပီ မိုဝ်း ယေ၊ ယေ ဒီ လုဝ် ဒိုဝ်း ဟာဝ် တူတ့်။ ခုဝ်၊ ယေ လုဝ် ဘူင် ဘ့လွယ် ဇဝ်ဖြာ။”

10 ခုန်ဒီခမ် ဖာရုဝ် ဝီ တဝ်း ဒီ အန်၊ “အိုဝ်၊ ဟဲ့ မှာန်၊ ဟဲ့ မုး၊ အုဝ် တူ တဲး အီဘိုန့် ဂေ ဂွန် ဘေ ဟာဝ်။ အုဝ် တူ တဲး ဘေ ဘောကာဂ့လျီတ် ဟာဝ် ဒေါ မှဝ်။ န့ ဟဲ့ လိုဝ်း ဆီချာ ဒီ အုဝ်။ ပီ မှာန့် ဘေ အာဝ် အး၊ အာဝ် မွှိုမ်။ 11 အုဝ် တူ တဲး ဘော အီဘိုန့် ဂေ ဂွန် ဟာဝ်။ တဲး မီ ဘေ အီမာယ် ဟာဝ် လှူ ဒီ ဇဝ်ဖြာ ပီ ကြိုပ် ဘေ။ အာတီ ဘေ ဟဲ့ မှာန့်၊ တဲး အုဝ် ခ့ဝါင် အူ ဆိန့် ဒေါ ဂုဝ် အန်။” ခုန်ဒီခမ် ဖာရုဝ် ဟဲ့ ဟွတ့် တဝ်း ပါယ် တီ အန် ဝီ စ်ု ဂါယ် ဟာဝ်၊ ဝီ ဆုတ့် လေး ဂါယ် ဒူင် ကွယ် အန်။

12 ဝါယ် အန် တီ ဇဝ်ဖြာ တဝ်း ဒီ အာမုဝ်ဆဲ၊ “မဲ လုဝ် စုဝ့် ဒဲ မဲ ဒဲင် မိူင် အဲဂိုပ်၊ တဲး မာ အာဇူင့် တး ကာဒိုမ် မိူင် အဲဂိုပ် နီ၊ တဲး ဂေ ဟူမ် ဒွန် မျုဝ် အီ မိုဝ်း အီ ကွယ် ခဲင် မာန် ခဲင် မိူင် ဘော ခဲင် ကာပိုမ်။ တဲး ဂေ ဟူမ် တူတ့် အီ ဆီ ဂိတ် ဝါယ် စုဝ်း ဘျြီ တာင် တွိုန်။”

13 အာမုဝ်ဆဲ ဝီ စုဝ့် န့ကြွုန် အန်။ ဟဲ့ ဟွတ့်၊ ဇဝ်ဖြာ တဲး ခုန် တး နာ လေး ဆီငဲ၊ တဲး အန် ဘုတ် အာဒါ အူ ဆီငဲ ဒီ အူ မှိုဝ်။ ဝါယ် အန် တီ ပြဲ ဝီ ဘ့လာင်၊ ခုန် ဟဲ့ ဘုတ်၊ ဟဲ့ ဝီ တိုယ် မာ အာဇူင့် တး။ 14 မာ အာဇူင့် တွိုန် ဘော တး ဇမ် ခဲင် မိူင် အဲဂိုပ် ဘော မိူင်၊ ကွယ် ဒွန် နာ ဒွန် ပ့လုဝ့်။ အူ ဆိန့် ဒေါ ဂုဝ် အန်၊ န့ တူ ဒွိုမ် မိုဝ်း မာ အာဇူင့် ကိူန် ခဲ့ နီ တး။ ဘော နာ အာတ့် နီ ဟာဝ် န့ တူ ဝီ ဘဲန် ဒုက် တာင် ဒီ မာ အာဇူင့် ပါယ် တီ ဒေါ မှဝ်။ 15 မာ အာဇူင့် တွိုန် ဘဲန် ဖိုင် ဘဲန် ဖိုင် ကော နုဝ့် ဒဲင် ကာဒါယ် ကော အပ် ဝွင့်။ ဂေ ဘော ဟူမ် တူတ့် ဒွန် မျုဝ် အီ ဆီ ဂိတ် ခဲင် မာန် ခဲင် မိူင်။ အီ တူ စှိုမ် ခါ အာတ့် ဒေါ စုဝ်း ဘျြီ၊ မာ အာဇူင့် ဝီ ဟူမ် ဒေါ တီ နီ၊ ကွဲ့ ဟူ တဲး န့ ဂိတ် မာဆေ။ ဘော ပီ ဆမ် ဂေ ခဲင် နာ၊ ဘော ဘ့လေ အီ ကွယ် ဒဲင် ဟေ၊ ဂေ ဟူမ်။ ဘော လှာ ဟေ အီ ငျီန် ဘော ဘ့လေ ဒဲင် ဟေ၊ န့ အာဝ် ဟူ ဂိတ် မာဆေ ခဲင် မိူင် အဲဂိုပ် ဘော မိူင်။

16 ဒေါ အန် တီ ခုန်ဒီခမ် ဖာရုဝ် ပီခြန် အန်၊ ဒဲ့ အာမုဝ်ဆဲ ဂါယ် အာရူန် တး ဇမ် ဒူင် ကွယ် အန်။ အန် ဝီ တဝ်း ဒီ ဂါယ်၊ “အုဝ် ဟဲ့ ဘူင် မှာပ် ဒီ အာတ့် ဇဝ်ဖြာ။ အုဝ် မိူဝ် ဟဲ့ ဘူင် နာ တူ မွှိုမ် ဒီ ဘာယ်။ 17 အုဝ် မှာန့်၊ တဲး ဘာယ် ဘ့လွာ့ ဝဲန် မှာပ် အုဝ် ခါ နီ။ ဟဲ့ ဟွတ့်၊ တဲး ဘာယ် ဆာခိုဝ် ဒီ ဇဝ်ဖြာ ပီ ကြိုပ် ဘေ၊ တဲး အန် ဝဲန် ဒုက် တာင် နီ၊ ဒုက် အီ တဲး ဒူအီ ယမ်။”

18 ဟဲ့ ဟွတ့် ကာလာင် ပါယ် တီ အာမုဝ်ဆဲ ဝီ လေး ဒူင် ကွယ် ခုန်ဒီခမ် ဖာရုဝ်၊ ဟာဝ် ဆာခိုဝ် ဒါင် အန်။ 19 ဇဝ်ဖြာ ဝီ တဲး ခုန် ဝီ ဘုတ့် ဝိဝ် နာ ဂေတ့် ဆီငဲ၊ တဲး မာ အာဇူင့် ဟာဝ် စုဝ်း ခဲင် အိုမ် ဒီနှူင် အီ စိူဝ် ဒီနှူင် ရေန့်။ ပန် တီ ခဲင် မိူင် အဲဂိုပ် တွိုန် အာဝ် ဟူ မိုဝ်း မာ အာဇူင့်။ အူ ဒုဝ် မိူဝ် အာဝ် ဟူ မိုဝ်း။ 20 ဇဝ်ဖြာ ယီ တဲး နဝ်း ခုန်ဒီခမ် ဖာရုဝ် ဝီ ပီ ဘြိမ်။ အန် တူ ဝီ ခ့ဝါင် ဂေ ဟာဝ်။

21 ဒေါ အန် တီ ဇဝ်ဖြာ တဝ်း ဒီ အာမုဝ်ဆဲ၊ “တဲး မဲ စုဝ့် ဒဲ မဲ၊ ဆီကူ ဂါင်ဟြာဝ်။ ဟဲ့ ဟွတ့်၊ န့ ဒီ အပ် ဝွင့် ခဲင် မိူင် အဲဂိုပ် ဘော မိူင်။ အပ် ဝွင့် ဇိုဝ် တီ ဒီ ဒိုဝ် နဝ်း ဒူအီ၊ တဲး န့ အာဝ် ဒါခိုယ် ဒီ ဂေ။” 22 အာမုဝ်ဆဲ ဝီ စုဝ့် ဒဲ အန်၊ ဆီကူ ဂါင်ဟြာဝ်။ အူ ဇေန့် မိူင် အဲဂိုပ် ဘော အပ် ဝွင့် အာဒါ အူယ် ဆီငဲ ဒီ အူယ် မှိုဝ်။ 23 အူယ် ဆီငဲ တီ၊ အာဝ် မိုဝ်း ဒူအီ ပွိုန် လာယ် ယိုဝ်။ ဂေ ဒူအီ မိူဝ် တူ ပွိုန် လေး ခဲင် ကာင် ဂေ။ ဒူင် ကွယ် ဂေ ဒူအီ အီဆာရေလ ယီ ဘ့လာင် ဒါခိုယ် ပီ ဘြိမ်။

24 ဒေါ အန် တီ ခုန်ဒီခမ် ဖာရုဝ် ဝီ ဒဲ့ အာမုဝ်ဆဲ ဟာဝ် ဇမ် ဒူင် ကွယ် အန်။ အန် ဝီ တဝ်း၊ “လေး ဟာဝ်။ ဟာဝ် လှူ ဒီ ဇဝ်ဖြာ ပီ ကြိုပ် ဘေ။ တဲး ဘေ ဒဲ့ ဘော ဂေ အီဘိုန့် ဘော ဂွန် ဘေ။ မီ ဒုဝ် ဆတ်ဒါဝါ ပီ ဟျီင် ဘေ၊ ဘေ ယီ လုဝ် ဘ့လေး အုန်၊ ဘေ တူ ပွိုန် ဒိုဝ်း ဟာဝ်။”

25 အာမုဝ်ဆဲ ဝီ တဝ်း၊ “မဲ လုဝ် တဲး ယေ ပွိုန် ဒိုဝ်း ဘော ဒုဝ် ဆတ်ဒါဝါ ယေ၊ တဲး ယေ ပွိုန် ဒီ ငဝ်း၊ တဲး ယေ ဝီ လှူ ဒီ ဇဝ်ဖြာ။ 26 ဘော ဒုဝ် ဆတ်ဒါဝါ ဒွန် ဒုဝ် လုဝ် လေး ဟာဝ် ရိုမ် ဒူပ် ယေ။ အာဒါ အူ ဒုဝ် မိူဝ် အာဝ် ပွိုန် အုန် ခဲင် မိူင် နီ။ ယေ ဒီ လုဝ် ရဝ်း မင် ဒုဝ်၊ တဲး ဂေ ဘဲန် ပီ လှူ ဒီ ဇဝ်ဖြာ။ အာတ့် တး ဇမ် ယေ ဒူင် ပီ လုဝ် လှူ ယေ၊ ယေ ညှမ် နပ် ဒုဝ် မှဝ် ပီ ဒီ လုဝ် လှူ ယေ။ ဇဝ်ဖြာ တူ ကာလာင် ဒီ ယေ ဒီ အာတ့် လွင် အန် တီ။”

27 ဇဝ်ဖြာ ယီ တဲး နဝ်း ခုန်ဒီခမ် ဖာရုဝ် တူ ဘျွင်၊ တဲး န့ ပီ ဘြိမ်။ ခုန်ဒီခမ် ဖာရုဝ် တူ ဝီ တဲး ဂေ ဟာဝ်။ 28 အန် ဝီ တဝ်း ဒီ အာမုဝ်ဆဲ၊ “ဟာဝ် လေး ဒူင် ကွယ် အုဝ်။ ကွဲ့ ဟူ ဝီ တး ဒူင် ကွယ် အုဝ် ပေါ အူ ဇေန့်။ အူ ဆိန့် အာတိုဝ် ဟာဝ် နာ အာတ့်၊ ကွဲ့ ဟူ တဲး အုဝ် ယိုဝ် မဲ ဒေါ မှဝ်။ ဆေ အုဝ် ယိုဝ် မဲ ပေါ အူ ဇေန့်၊ မဲ ဒီ ယမ်။”

29 အာမုဝ်ဆဲ ဝီ တဝ်း ဒီ အန်၊ “န့ ဒီ ဘဲန် ပီ တဝ်း မဲ ဒေါ တီ နီ။ အုဝ် မိူဝ် တူ တဲး မဲ ပွိုန် ဒီ ဝီ ယိုဝ် အုဝ်။”