1 ဇဝ်ဖြာ ဝီ တဝ်း ဒီ အာမုဝ်ဆဲ၊ “န့ ဒီ မိုဝ်း ဒုက် တာင် ပေါ အူ မျုဝ် ပီ ဒီ တိုယ် အုဝ်၊ တဲး ခုန်ဒီခမ် ဖာရုဝ် ဘော မိူင် အဲဂိုပ် လုဝ် ခမ်။ ဝါယ် အန် တီ ခုန်ဒီခမ် ဖာရုဝ် ဒီ ခ့ဝါင် ဘေ၊ တဲး ဘေ ဟာဝ်။ ဒဲင် တီ၊ အန် ဒီ ဆုတ့် ဘေ လေး အူ ဇေန့်၊ တူ တဲး ဘေ ဝီ တး ဒေါ မှဝ်။ 2 မဲ လုဝ် စ်ု ဂေ ဒူအီ အီဆာရေလ ဘော ဂေ အီမာယ် အီဘိုန့်၊ တဲး ဂေ မှာန့် ဒီ ဒူအီ အဲဂိုပ် ဒွါ ရွိုန် ဂေ ခြိဝ်၊ တဲး န့ ဘဲန် ခေါဆွင် ပီ ဒွါ ဂေ ဒီ ဘေ။” 3 ဒေါ မှာန့် ဂေ ပါယ် တီ ဇဝ်ဖြာ ဒီ တဲး ဂေ ဒူအီ အဲဂိုပ် မိုဝ်း နဝ်း ဒီဟာင် ဒီ ဒူအီ အီဆာရေလ။ ဂေ အာမူ အာမာတ် ခုန်ဒီခမ် ဘော ဂေ ဒူအီ ကိူန်၊ ဂေ ရုဝ်ဆေ အာမုဝ်ဆဲ တွိုန်။ ဂေ တဝ်း၊ အန် မုး ဒါ တာင်။ ဇဝ်ဖြာ မိူဝ် တဲး ဂေ ဒူအီ အဲဂိုပ် မိုဝ်း နဝ်း ဆီ စွယ် ဂေ ဒူအီ အီဆာရေလ။

4 ပန် တီ အာမုဝ်ဆဲ ဝီ တဝ်း ဒီ ခုန်ဒီခမ်၊ “ဇဝ်ဖြာ ဟဲ့ တဝ်း၊ ‘ခဲင် မှိုဝ် နီ ကာတဲ ဆွိုမ် အုဝ် ဒီ ဟာဝ် လိုပ် ဒွန် ကာင် ခဲင် မိူင် အဲဂိုပ် နီ။ 5 ခဲင် မိူင် အဲဂိုပ် ဘော မိူင်၊ ခဲ့ မိုဝ်း ဂွန် ဂိန့်၊ ဆေ န့ မုး ဂွန် အီမာယ်၊ အုဝ် ဒီ ငဝ်း ယမ် ဒွန် ဝီ။ အုဝ် ဒီ ကာစုး ဒီ ငဝ်း ဂွန် ခုန်ဒီခမ် အီ ကွယ် ဒီ မာလာင် ဂုန့် အန်။ ဟဲ့ ဟွတ့်၊ အုဝ် ဒီ ငဝ်း ဟာဝ် တဲး ကော ဇမ် ဂွန် မှာယ် အီ ကြိတ် ခဝ်ချုင် ခုန်ဒီခမ်။ အုဝ် ဒီ ငဝ်း ဝဲန် ဂေ ဘောကာဂ့လျီတ်။ ဘော ဂွန် ဂိန့် ဂေ ဒုဝ် ဆတ်ဒါဝါ၊ ဂေ ဒီ ယမ် တူတ့်။ 6 ဂေ ဒူအီ ခဲင် မိူင် အဲဂိုပ် ဘော မိူင်၊ ဂေ ဒီ ယာမ် တာင်၊ ယာမ် လှေန့် လွင် အန် တီ။ အူ ဆိန့် ဒေါ ဂုဝ် အန် ကော ဇမ် အာတိုဝ်၊ ဂေ တူ ဒွိုမ် ယာမ် တာင် ခဲ့ တီ။ ဘော နာ အာတ့် ဟာဝ် ဂေ တူ ဝီ လုဝ် ယာမ် တာင် ပီ ခဲင် မှိုဝ် နီ။ 7 ဒူင် ကွယ် ဂေ ဒူအီ အီဆာရေလ ယီ ယေန် ဒါခိုယ်။ ဘော ဂေ ဒူအီ ဘော ဂေ ဒုဝ် ဆတ်ဒါဝါ တူ ယုဝ် မာဆေ။ မာဆုဝ် အူ ဒုဝ် မိူဝ် တူ ပြုဝ်း။ ပါယ် တီ မဲ ခုန်ဒီခမ်၊ မဲ ဒီ ဘော နပ် လွင် ဇဝ်ဖြာ။ အန် နပ် ဒီ ကာယဝ်း ဂေ ဒူအီ အီဆာရေလ ဘော ဂေ ဒူအီ အဲဂိုပ်၊ တူ တဲး ဂေ ကာဒုး ဒုက် အူ မျုဝ်။ 8 ဂေ အာမူ အာမာတ် မဲ တွိုန်၊ ဂေ ဘောကာဂ့လျီတ် ဒီ တး ဇမ် ဒူင် ကွယ် အုဝ်။ ဂေ ဒီ ဂူမ် ဂိုပ် ဒီ အာတ့် အုဝ်။ ဂေ ဒီ မှာန့် ဒီ အုဝ် တဝ်း၊ “တဲး ဘေ လေး ဟာဝ်၊ ဘော မဲ ဘော ဂေ ဒွန် အီ၊ အီ ဒူပ် မဲ။” ဒေါ အန် တီ အုဝ် ဒီ လေး ဟာဝ် ဒူင် ကွယ် မဲ။’” အာမုဝ်ဆဲ ဟဲ့ ဟွတ့် ကာလာင် ပါယ် တီ အန် ဝီ လေး ဒူင် ကွယ် ခုန်ဒီခမ် ဖာရုဝ်။ နဝ်း အန် ဘော ရူ ကာဆဝ် ဒီ ခုန်ဒီခမ်။

9 ခါ အာတ့် ဇဝ်ဖြာ ဟဲ့ ဒွိုမ် ကာလာင် ဒီ အာမုဝ်ဆဲ။ အန် ဟဲ့ တဝ်း၊ “ခုန်ဒီခမ် ဖာရုဝ် တူ ထူမ် ဂြုဝ်း မဲ။ ပါယ် တီ အုဝ် ဒီ ပွိုန် ဘျ နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ် လွှိုမ် ခါ အာတ့် ခဲင် မိူင် အဲဂိုပ်။” 10 ခုဝ် အန် တီ အာမုဝ်ဆဲ ဂါယ် အာရူန် ဟဲ့ ဘူင် နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ် ဒီ အာတ့် ခုန်ဒီခမ် ဖာရုဝ်။ ဇဝ်ဖြာ ယီ တဲး နဝ်း ခုန်ဒီခမ် ဖာရုဝ် တူ ဘျွင်၊ တူ ဘူင် ပီ စ်ု အန်။ အန် တူ တဲး ဒူအီ အီဆာရေလ လေး ဟာဝ် ခဲင် မိူင် အန်။