ခါန် 12
ဝါယ် အန် တီ ဇဝ်ဖြာ ဝီ ကာလာင် ဒီ အာမုဝ်ဆဲ ဂါယ် အာရူန် တဝ်း၊ 2 “ပူင့် အာတိုဝ် နီ ဟာဝ် နာ အာတ့်၊ မာဂျီန် နီ၊ န့ ဒီ လုဝ် ဘဲန် မာဂျီန် ဒေါ ဂုဝ် ဒင် ခဲင် ဆီနမ် ဘေ၊ ဆေ တိး ဘေ အာခြာဝ် ဘေ။ 3 ဘာယ် လုဝ် တဝ်း ပါယ် တီ ဒီ ဂေ ဒူအီ အီဆာရေလ ဘော ဖိုင်။ မာဂျီန် နီ၊ ဟီ ဇမ် ဂိုဝ် ဆီငဲ၊ အီမာယ် ဒွန် အီ အီ မုး ဂိန့် န့ဟူမ်၊ အန် လုဝ် ရဝ်း ဂွန် မာဘူ အူ ဒုဝ်၊ တဲး ဂေ ဟူမ် အူ ကာင် အူ ဒုဝ်။ 4 ဆေ န့ မိုဝ်း ကာင် အီ တူ မိုဝ်း ဒူအီ ကိူန်၊ ဆေ ဂေ တူ တူတ့် ဒီ ဟူမ် ဂွန် မာဘူ အူ ဒုဝ် တွိုန်၊ တဲး ဂေ ဘာင် ဒူအီ အီ ကွယ် ကာတတ် ကာင် ဂေ၊ တဲး ဂေ ဟူမ် ရိုမ် ဟာပ် ယင် မာဘူ အူ ဒုဝ် တွိုန်၊ တဲး ဂေ တူတ့်၊ ကွဲ့ တဲး န့ ကာလူယ်။ 5 ဘေ လုဝ် ရဝ်း မာဘူ အာလူင့် အူ ဒုဝ်၊ အာဆာက် အန် အီ နုဝ့် အူ ဆီနမ်။ ဆေ အာဝ် မိုဝ်း ဂွန် မာဘူ၊ ပွိုန် ဒိုဝ်း ဂွန် မာပဲ ကာဒါင်။ ဒုဝ် ပီ ရဝ်း ဘေ ယီ လုဝ် တဲး န့ မုး ဒုဝ် အီ ပ့လူမ် ခ။ ဆေ န့ မိုဝ်း ဒူင် စှေ ခေါ အီ စဲက်၊ အာဝ် ပွိုန် ဒိုဝ်း။ 6 ဘေ ဟဲ့ ဟွတ့် ရဝ်း အူ ဒုဝ် ပါယ် တီ ဘေ ဝီ လုဝ် လိုမ်လာ ယွတ် ဆီချာ ဒုဝ် အန် တီ၊ တဲး န့ ကော ဇမ် ဆီငဲ ဂိုဝ် ဒီ မ့ဖွုန် ခဲင် မာဂျီန် နီ။ ဆီငဲ အန် တီ ဘာ ဒီ အပ်၊ ဘေ ဒူအီ အီဆာရေလ ဘော မိူင်၊ ဘေ လုဝ် ငဝ်း ဒုဝ် ပီ ရဝ်း ဘေ ခဲင် ကာင် ဒွန် ကာင်၊ တဲး ဘေ ငဝ်း အူ ကာင် အူ ဒုဝ်။ 7 ဒေါ ငဝ်း ဘေ ဒုဝ် တွိုန်၊ ဘေ လုဝ် ဒိုဝ်း နှာမ် အန် အီ စဲက်၊ ဖဝ်း ဒီ မာ မာလုဝ်း ကာင်၊ ဘော နာ ဒဲင် ဘော ဒီ ခူပ် မာလုဝ်း၊ အူယ် ဘ့လာက်။ လုဝ် ဖဝ်း ဒီ ကာင် ဒွန် ကာင် အီ မုး ဒူင် ဟာပ် ဒူအီ မာဘူ ပီ ငဝ်း ဂေ တွိုန်။ 8 ခဲင် မှိုဝ် တီ၊ ဂေ ဒူအီ ဒွန် အီ လုဝ် ဟာပ် ယင် မာဘူ တာတ် ဒဲင် ငဝ်။ ဘေ ဘော လုဝ် ဟူမ် ခါမုန် အီ တူ မိုဝ်း ဆီနမ် ဘြး။ လုဝ် ဟာပ် ဘော ဒဝ် ဆွင့်။ 9 ကွဲ့ ဟူမ် ယင် အိမ်။ ကွဲ့ ဒင်။ ဘေ လုဝ် တာတ် ယင် ဒဲင် ငဝ်၊ ဘော ဂိန့် ဘော ပ့လဝ် ဘော ဒွန် မျုဝ် အီ ကွယ် ခဲင် ဝတ့်။ 10 ကွဲ့ အုန် ဒီ ဟူမ် ပါ ခဲညှာ။ ဆေ န့ ကာလူယ်၊ ဘေ လုဝ် ဒုဝ့် ခဲင် ငဝ်၊ တဲး န့ ကာဆိုမ်။ 11 ဒေါ ဟူမ် ဘေ မာဘူ တီ၊ ဘေ လုဝ် စှိုပ် ခြိုင် ပီ တာ ဘေ ဒေါ ဟာဝ် ဘေ ဒူပ် န့တေန့်။ ဘေ ဘော လုဝ် စှိုပ် ခူဒိန့် ဘေ၊ ဂူင့် န့ကြွုန် ဘေ။ ပါယ် တီ ဘေ လုဝ် ပီခြန် ဘေ ဟူမ် ဘော ဟူမ် ဟဲ ဟဲ။ ဒေါ ဟူမ် ဘေ ပါယ် တီ န့ မုး အာခြာဝ် ဒေါ ကာလုဝ်း ဇဝ်ဖြာ ကာင် ဘေ၊ ကွဲ့ တဲး ဘေ ကာဒုး ဒုက်။”
12 ဇဝ်ဖြာ ဟဲ့ ဟွတ့် ကာလာင် ပါယ် တီ အန် ဝီ တဝ်း၊ “ခဲင် မှိုဝ် နီ အုဝ် ဒီ လိုပ် ခဲင် ကာင် ဒွန် ကာင် ခဲင် မိူင် အဲဂိုပ် ဘော မိူင်။ အုဝ် ဒီ ငဝ်း ယမ် ဂွန် အီမာယ် ဒွန် အီ အီ မုး ဂွန် ဂိန့်။ ဘော ဒူအီ ဘော ဒုဝ် ဆတ်ဒါဝါ အီ ကွယ် ဒွန် မာန် ဒွန် မိူင်၊ ဂေ ဂွန် ဂိန့် ဒီ ဘော ယမ်။ အုဝ် မုး ဇဝ်ဖြာ အာခါခ်ု။ ခုဝ်၊ အုဝ် ဒီ ဘူင် တဲး ဂေ ဒူအီ အဲဂိုပ် ကော နပ်၊ ဇဝ် ပီ ကြိုပ် ဂေ ဘဲန် မျုဝ် ဘဲန် မျုဝ်၊ ဂေ ဟဲ့ စှိုမ်၊ အာဝ် မိုဝ်း ပွုန်။ 13 နှာမ် မာဘူ ပီ ဖဝ်း ဘေ ဒီ ကာင် ဘေ၊ န့ ဒီ ဘဲန် လက်ဆာနာ ဒီ အုဝ်။ ဒေါ ငဝ်း အုဝ် ဂေ ဒူအီ အဲဂိုပ်၊ ဆေ အုဝ် ယိုဝ် နှာမ် ဒီ မာလုဝ်း ကာင်၊ အုဝ် ဒီ ကာလုဝ်း ကာင် တီ။ ပါယ် တီ န့ ဒီ ဘဲန် ဒုက် တာင် ဒီ ဂေ ဒူအီ အဲဂိုပ်။ ဘေ ယီ တူ ကာဒုး ဒုက် မာဆေ။
14 ဆီငဲ ဒီ ဘူင် အုဝ် ဇိုဝ် တီ၊ န့ မုး ဆီငဲ ပီ လုဝ် လှုဝ်း ဘေ ဆေဆေ။ ဒွန် ဘာန် ဒွန် ဇာတ် ဟာဝ် နာ အာတ့်၊ ဘေ လုဝ် လှုဝ်း ဆီငဲ တီ၊ ဘူင် ဘ့လွယ်၊ တဲး ဘေ လှုဝ်း ဆီငဲ ကာလုဝ်း အုဝ် ကာင် ဘေ။ 15 ဒေါ ဘူင် ဘေ ဘ့လွယ် တီ၊ အာဒါ ဘူ ဆီငဲ ဘေ လုဝ် ဟူမ် ခါမုန် အီ တူ မိုဝ်း ဆီနမ် ဘြး။ ဟီ ဇမ် ဆီငဲ ဒေါ ဂုဝ် အန်၊ ဘေ လုဝ် ဝဲန် တူတ့် ဆီနမ် ဘြး ခါမုန် အီ ကွယ် ခဲင် ကာင် ဘေ။ ဘူ ဆီငဲ တွိုန် ဒေါ ဘူင် ဘေ ဘ့လွယ် တီ၊ အာဆေ ဟူမ် ခါမုန် အီ မိုဝ်း ဆီနမ် ဘြး၊ ဘေ လုဝ် ဝဲန် ဝီ တီ၊ ကွဲ့ ဟူ မာတ် အန် မုး ဒူအီ အာမျုဝ် အီဆာရေလ။ 16 ဆီငဲ ဒေါ ဂုဝ် အန်၊ ဘော ဆီငဲ ကာဒဲ့၊ ဘေ လုဝ် တး ကာဇု ကြိုပ် အုဝ်။ ဘေ ကွဲ့ ဘူင် ဂါန် မာဆေ ဒဲင် မိုင် ပီ ဒီ ဟူမ်။ ခဲ့ တီ ဘေ လုဝ် ဘူင်။
17 ပါယ် တီ ဘေ လုဝ် ဘူင် ဘ့လွယ် တူ ဟူမ် ခါမုန် ဘြး။ ခုဝ်၊ ဘေ လုဝ် လှုဝ်း ဆီငဲ ပီ တိုယ် အုဝ် ဘေ ဒွန် အီ၊ တဲး ဘေ လေး ခဲင် မိူင် အဲဂိုပ်။ ပါယ် တီ န့ ဒီ ဘဲန် ဘ့လွယ် ပီ လုဝ် ဘူင် ဟာဝ် ဘေ နာ အာတ့် ဒွန် ဇာတ် ဒွန် ဘာန်။ 18 ဆေ န့ ဇမ် မာဂျီန် ဒင် ခဲင် ဆီနမ် ကာမာယ်၊ ဟီ ဇမ် ဆီငဲ ဂိုဝ် ဒီ မ့ဖွုန်၊ ခဲင် မှိုဝ် ဘေ လုဝ် စုး ဒီ ဟူမ် ခါမုန် အီ တူ မိုဝ်း ဆီနမ် ဘြး၊ တဲး န့ ကော ဇမ် ဆီငဲ အာ ဂိုဝ် ဒီ လှေး ခဲင် မှိုဝ်။ အာဒါ ဘူ ဆီငဲ တီ၊ ဘေ လုဝ် ဟူမ် ခါမုန် အီ တူ မိုဝ်း ဆီနမ် ဘြး။ 19 ဒေါ ဘူ ဆီငဲ တီ အာဝ် ပွိုန် အုန် ဆီနမ် ဘြး ခဲင် ကာင် ဘေ။ ဆေ န့ ယီ မိုဝ်း ဒူအီ အီ ဟူမ် ခါမုန် အီ မိုဝ်း ဆီနမ် ဘြး၊ ဘေ လုဝ် ဆုတ့် လေး ဒူအီ တီ ခဲင် မိူင် ဘေ။ အာဆေ တူ ဒူပ် ပီ စ်ု အုဝ် တီ၊ န့ ဘော မုး ဒူအီ အီဆာရေလ အူ ဆိန့် ဒေါ ဂွိုတ် အန်၊ န့ ဘော မုး ဒူအီ အာမျုဝ် ဟဝ် အီ လိုပ် ကွယ် ရိုမ် ဒူပ် ဘေ၊ ဘေ လုဝ် ဆုတ့် လေး ဒူအီ ဇိုဝ် တီ ဒွန် အီ။ 20 ဘေ ဘော ကွယ် ဒီ မှဝ်၊ ဒေါ ဇမ် အာခြာဝ် ဘ့လွယ် တီ၊ ဘေ ကွဲ့ ဟူမ် မာဆေ အီ မိုဝ်း ဆီနမ် ဘြး။” ပါယ် တီ ဇဝ်ဖြာ ကာလာင် ဒီ အာမုဝ်ဆဲ ဂါယ် အာရူန် တွိုန်။
21 ပန် တီ အာမုဝ်ဆဲ ဒဲ့ ဂေ ဒါ တာင် ဒူအီ အီဆာရေလ တဲး ဂေ တး ဇမ် ဒူင် ကွယ် အန်။ အန် ဝီ တဝ်း ဒီ ဂေ၊ “တဲး ဘေ ဟာဝ် အူ ဇေန့်၊ ရဝ်း ဂွန် မာဘူ ဂွန် မာပဲ၊ တဲး န့ ဂ့လိုမ် အာဒါ န့ဟူမ် ဘေ။ တဲး ဘေ ငဝ်း ဒုဝ် အန် တီ။ 22 ဟဲ့ ဟွတ့် ငဝ်း၊ ဘေ လုဝ် ဒိုဝ်း ဒဝ် ဟူဆူပ်၊ ပက် မ့ပူင့်၊ စိုပ် ခဲင် နှာမ် တွိုန်၊ ဖဝ်း ဒီ မာ မာလုဝ်း ကာင် ဘေ၊ ဘော နာ ဒဲင် ဘော ဒီ ခူပ် မာလုဝ်း ဘော အာ ဘ့လာက်။ ပန် တီ ကွဲ့ ဟူ တဲး ဒူအီ အီ ကွယ် ခဲင် ကာင် ဘေ ဝီ လေး ဟာဝ် နာ ရေတ့် ကာင်၊ တဲး န့ ကော ဇမ် ပါ ခဲညှာ ဆိန့်ဝး။ 23 ခဲင် မှိုဝ် ဇဝ်ဖြာ ဒီ ဝိန် ဒီ လဲ ခဲင် မိူင် အဲဂိုပ်၊ ငဝ်း ယမ် ဂေ ဒူအီ အဲဂိုပ်။ ဒေါ ယိုဝ် အန် နှာမ် ပီ ဖဝ်း ဘေ ဒီ မာလုဝ်း ကာင် ဘေ၊ အန် ဒီ ကာလုဝ်း ကာင် တီ။ န့ ဒီ မိုဝ်း အာမူ အာမာတ် ဇဝ်ဖြာ အူ ကာဒင်၊ အန် ဒီ တး ငဝ်း ယမ် ဒူအီ။ ဇဝ်ဖြာ ယီ တူ တဲး အာမူ အာမာတ် အန် တွိုန် လိုပ် ခဲင် ကာင် ဘေ၊ တူ တဲး အန် ငဝ်း ယမ် ဘေ။
24 တဲး ဘေ ဝီ လှုဝ်း ဆီချာ လွင် အန် တီ၊ တဲး ဘေ ဝီ ဒူပ် ဘူင် ပါယ် တီ။ ဘော ဘေ၊ ဘော လှုက်လှာန် ဘေ၊ ဘော ဂေ ဒူအီ အီ ဒီ ဂွိုတ် ဒီ ပန် ဘေ၊ ဘေ လုဝ် ဘူင် ဘ့လွယ် တီ ဆေဆေ။ 25 ဆေ ဘေ ဟာဝ် လိုပ် ခဲင် မိူင် ပီ ဒွိုမ် တဝ်း ဇဝ်ဖြာ ဒီ ဒွါ ဒီ ဘေ၊ ဘေ ဘော လုဝ် ဘူင် ဘ့လွယ် တီ။ 26-27 ဒေါ အန် တီ ဆေ ဂွန် ဘေ ဒီမွှတ် ဘေ လွင် ဆီဖဝ် အန် တီ၊ ဘေ လုဝ် တဝ်း ဒီ ဂေ၊ ‘ပီ ဟူမ် အေ ပါယ် နီ၊ န့ မုး ကူပ် လှုဝ်း အေ အာခြာဝ် ဒေါ မွိုန် ဒေါ ကာလုဝ်း ဇဝ်ဖြာ ကာင် အေ။ ဒေါ ဟာဝ် အန် ခဲင် မိူင် အဲဂိုပ် တွိုန်၊ အန် ဟဲ့ ငဝ်း ယမ် ဂွန် ဒူအီ အဲဂိုပ်။ အန် ယီ ဟာဝ် ကာလုဝ်း ကာင် အေ၊ တူ ဘူင် မာဆေ ခဲင် ကာင် အေ ဒွန် ကာင်။’” အာမုဝ်ဆဲ ဟဲ့ ဟွတ့် ကာလာင် ဂြုဝ်း တီ ဒီ ဂေ ဒူအီ အီဆာရေလ၊ ဂေ ဝီ ဂူမ် ဂိုပ် ဒီ အာတ့် ဇဝ်ဖြာ။ 28 ဟဲ့ ဟွတ့် ပန် တီ ဂေ ဒူအီ အီဆာရေလ ဘူင် ဆီချာ ပီ တဝ်း ဇဝ်ဖြာ ဒီ အာမုဝ်ဆဲ ဂါယ် အာရူန်၊ ပီ စ်ု ဇဝ်ဖြာ ဂေ ဘူင်။
29 ဆီငဲ အန် တွိုန် ခဲင် မှိုဝ် ကာတဲ ဆွိုမ်၊ ဇဝ်ဖြာ ငဝ်း ယမ် ဂေ ဂွန် အီမာယ် ဒူအီ အီ မုး ဂွန် ဂိန့်။ အန် ကာစုး ဒီ ငဝ်း ယမ် ဂွန် ခုန်ဒီခမ် ဖာရုဝ် အီ ဒီ ပ့လု ဂုန့် အန် ဘဲန် ခုန်ဒီခမ်။ ဟဲ့ ဟွတ့်၊ အန် ဟာဝ်၊ တဲး အန် ကော ဇမ် ဒီ ဒူအီ အီ ကွယ် ခဲင် ကာပိုမ် အီ မုး ဂွန် ဂိန့်။ ဂွန် ဂိန့် ဒွန် အီ အီ ကွယ် ဒွန် နာ ဒွန် ပ့လုဝ့်၊ ဂေ ဘော ယမ် တူတ့်။ ဘော ဂေ ဂွန် ဒုဝ် ဆတ်ဒါဝါ အီ မုး ဂွန် ဂိန့်၊ ဂေ ဒွန် ဒုဝ် ဘော ယမ်။ 30 ခဲင် မှိုဝ် တီ၊ ခုန်ဒီခမ် ဖာရုဝ်၊ ဘော ဂေ အာမူ အာမာတ် အန် ဘော ဂေ ဒူအီ အီ ကွယ် ခဲင် မိူင် အဲဂိုပ်၊ ဂေ ဘောကာဂ့လျီတ် ဝီ ယိတ့်။ ဂေ ဘော ယာမ် တာင် ကူပ် ဟဲ့ မိုဝ်း ဒူအီ ယမ် ခဲင် ကာင် ဒွန် ကာင်။ ခဲင် မိူင် အဲဂိုပ် ဘော မိူင် အာဝ် မိုဝ်း ကာင် အီ တူ မိုဝ်း ဒူအီ ယမ်။
31 ဒေါ အန် တီ ခုန်ဒီခမ် ဖာရုဝ် စ်ု အာမုဝ်ဆဲ ဂါယ် အာရူန် ဝီ တး ဇမ် ဒူင် ကွယ် အန်။ အန် တဝ်း၊ “ဟာဝ် ဟာဝ်၊ ဘော ဘာယ် အာ ဝီ၊ ဘော ဘေ ဒူအီ အီဆာရေလ ဒွန် အီ။ ဟာဝ် လေး ဒူင် ကွယ် ယေ။ ဟာဝ် လှူ ဒီ ဇဝ်ဖြာ ပီ ကြိုပ် ဘေ။ ဟာဝ် ဘူင် ပီ ဒွိုမ် မှာန့် ဘေ။ 32 တဲး ဘေ ဒိုဝ်း ဘော မာမက် ဂေ မာဘူ ဘေ။ တဲး ဘာယ် ယီ မွင့်ကာရာ တဲး ဒီ အုဝ်။”
33 ဂေ ဒူအီ အဲဂိုပ် ဘော စ်ု ဒူအီ အီဆာရေလ၊ တဲး ဂေ ပီခြန် ဂေ ဒီ လေး ဟာဝ်။ ဂေ တဝ်း၊ “ဆေ ဘေ တူ ဟာဝ် ဟဲ ဟဲ၊ ယေ ယုဝ် ယေ ဘောကာဂ့လျီတ် ဒီ ဘော ယမ်။” 34 ပန် တီ ဂေ ဒူအီ အီဆာရေလ ဒိုဝ်း မ့ပါန် ပီ အုန် ဂေ ကာပဲ့ ဆိန်၊ တဲး န့ ဘဲန် ခါမုန်။ ဂေ လုဝ် ဒိုဝ်း ကာပဲ့ ဂေ အာတ့် ဟပ် ဂေ ဆီနမ် ဘြး။ ဂေ ဘော ဒိုဝ်း ဘိက်၊ ကာဘိတ် မ့ပါန် ဂေ၊ ဂွတ် ဟာဝ်။ 35 ဟဲ့ ဟွတ့်၊ ဂေ ဘော မှာန့် ခြိုင် တာ ဘော ရွိုန် ဂေ ခြိဝ်၊ တဲး ဂေ ဒူအီ အဲဂိုပ် ဒွါ ဒီ ဂေ၊ တဲး န့ ဘဲန် ပီ ဒွိုမ် ကာလာင် အာမုဝ်ဆဲ ဒီ ဂေ။ 36 ဇဝ်ဖြာ ဟဲ့ ဟွတ့် ဘူင် တဲး ဂေ ဒူအီ အဲဂိုပ် ကာပ့လု နဝ်း ဂေ၊ တဲး ဂေ ကော အိုင် ဒူအီ အီဆာရေလ။ ဂေ ဒူအီ အီဆာရေလ ဘော ပွိုန် တူတ့် ဒွန် မျုဝ် ပီ မှာန့် ဂေ။ ပါယ် တီ ဂေ ပွိုန် ကိူန် ကြုဝ်ကြာမ် ဂေ ဒူအီ အဲဂိုပ်။
37 ဂေ ဒူအီ အီဆာရေလ မိူဝ် ဟာဝ် ဒီ ပ့လဝ်၊ လေး ခဲင် မိူင် ရာမေဆေတ်၊ ဟာဝ် ဒူပ် န့တေန့် အီ ဇမ် မိူင် ဆူခူတ်။ န့ ဘော မိုဝ်း ဂေ အီမာယ် ကာဘက် ဒဝ် ဆဲန် ဝီ ဘော အီဘိုန့် ဂေ ဂွန်။ ဂေ ဘောကာဂ့လျီတ် ဟာဝ် ဒီ ပ့လဝ် လေး ခဲင် မိူင် အဲဂိုပ် တွိုန်။ 38 န့ ဘော မိုဝ်း ဒူအီ ဟဝ် ကိူန်၊ အီ ဟာဝ် ဒူပ် ဂေ။ ဂေ ဘော ဝဲတ် ဟာဝ် ဘော ဒုဝ် ဆတ်ဒါဝါ ဂေ ကိူန် ကာဆဝ်၊ ဘော မာမက် ဂေ မာဘူ လေး ဟာဝ် တူတ့်။ 39 ဂေ ဘော ဒိုဝ်း ကာပဲ့ ပီ ကာဝ်ု ဂေ ခဲင် မိူင် အဲဂိုပ်၊ ဘူင် ခါမုန် အီ တူ မိုဝ်း ဆီနမ် ဘြး။ ဂေ တူ မိုဝ်း ဆီနမ် ဘြး ကူပ် တူ ဒန် မ့ပြာယ် ဂေ ပီ ဒီ ဟူမ် ဒေါ စ်ု ဒူအီ အဲဂိုပ် ဂေ လေး ခဲင် မိူင် အဲဂိုပ် တွိုန်။
40 ဂေ ဒူအီ အီဆာရေလ ဟဲ့ ဟွတ့် ကွယ် ခဲင် မိူင် အဲဂိုပ် အာဒါ ဖွုန် မာယဝ်း ဒီ အူယ် ဂိုဝ် ဆီနမ်။ 41 ဒေါ လေး ဂေ ခဲင် မိူင် အဲဂိုပ်၊ ဆီငဲ အန် တီ ဘော နုဝ့် ဖွုန် မာယဝ်း ဒီ အူယ် ဂိုဝ် ဆီနမ် ကာဘြီ။ အူ ဆီငဲ မိူဝ် အာဝ် ယူမ်။ ဆီငဲ အန် တီ ဂေ ဒူအီ ပီ အိုပ် ဇဝ်ဖြာ၊ ဂေ ဒွန် ဇိုဝ် ဒွန် ခြိုဝ် ဘော လေး ခဲင် မိူင် အဲဂိုပ်။ 42 ခဲင် မှိုဝ် တွိုန် ဇဝ်ဖြာ ဟဲ့ ဘ်ု ဒီ ယွတ် ဆီချာ ဂေ ဒူအီ အီဆာရေလ၊ တိုယ် ဂေ လေး ခဲင် မိူင် အဲဂိုပ် တွိုန်။ ခုဝ် အန် တီ ဒွန် ဆီနမ် ခဲင် မှိုဝ် တီ၊ ဂေ ဒူအီ အီဆာရေလ အီ ဒီ ဂွိုတ် နာ အာတ့် ဟာဝ် ဒွန် ဇာတ် ဒွန် ဘာန်၊ ဂေ ဘော လုဝ် ဘ်ု ခဲင် မှိုဝ် တီ၊ ကွဲ့ တဲး ဂေ အိတ်၊ တဲး ဂေ နမ်လှုဝ်း ဇဝ်ဖြာ ဘော လှုဝ်း ဆီငဲ ဒေါ မွိုန်။ 43 ဇဝ်ဖြာ ဝီ တဝ်း ဒီ အာမုဝ်ဆဲ ဂါယ် အာရူန်၊ “ပါယ် တီ အုဝ် စ်ု ဘေ ဘူင် ဘ့လွယ် လှုဝ်း ဒေါ ကာလုဝ်း အုဝ် ကာင် ဘေ။ အုဝ် တူ တဲး ဒူအီ အာမျုဝ် ဟဝ် ဘူင် ဘ့လွယ် တီ။ 44 ဆေ န့ ယီ မုး ဒူအီ ပီ စိုဝ်း ဘေ၊ အီ ဟဲ့ ဘဲန် မှာယ် ဘေ၊ အီမာယ် ဒွန် အီ အီ ဟဲ့ ဟွတ့် ဆွာ့ ဝဲန် ဟုန် လခါနာ အန်၊ အန် ဟဲ့ ပွိုန် ဟူမ် ရိုမ် ဒူပ် ဘေ။ 45 ဒူအီ အီ တး ကွယ် ရိုမ် ဒူပ် ဘေ အာဒါ အူ ကာစန် ဘော ဒူအီ ပီ ဇာင် ဘေ၊ ဂေ တူ ပွိုန် ဟူမ် ဘ့လွယ် တီ။ 46 ဘေ မိူဝ် လုဝ် ဟူမ် ဘ့လွယ် တီ ခဲင် ကာင် ဘေ။ ကွဲ့ ဟူမ် နာ ရေတ့် ကာင်။ ကာအာင် မာဘူ ပီ ငဝ်း ဘေ တွိုန်၊ အုဝ် တူ တဲး ဘေ ကာဘက်။ 47 ဂေ ဒူအီ အီဆာရေလ၊ ဂေ ဘောကာဂ့လျီတ် ဘော လုဝ် ဘူင် ဘ့လွယ် တီ။ 48 ဆေ န့ ယီ မိုဝ်း ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ ဆေ ဘော အန် ဆီ ဟူမ် ဘ့လွယ် တီ၊ အီမာယ် ဒွန် အီ အီ ကွယ် ခဲင် န့ဟူမ် အန် လုဝ် ခမ် ဒီ ဆွာ့ ဝဲန် ဟုန် လခါနာ အန် ဒီ အာတ့်။ ဟဲ့ ဟွတ့်၊ အန် ဝီ ပွိုန် ဒီ ဟူမ်၊ တဲး အန် ပီ ဂေ ဒူအီ အီဆာရေလ ဒွန် အီ အီ မုး ဒူအီ အီဆာရေလ အူ ဆိန့် ဒေါ ဂွိုတ် အန်။ ဆေ န့ ယီ မိုဝ်း အီမာယ် အီ တူ ဆွာ့ ဝဲန် ဟုန် လခါနာ အန်၊ ဘေ ကွဲ့ တဲး အန် ဟူမ် ဘ့လွယ် တီ ဒေါ မှဝ်။ 49 ဂေ ဒူအီ အီ မုး ဒူအီ အီဆာရေလ အူ ဆိန့် ဒေါ ဂွိုတ် ဂေ ဘော ဂေ ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ ဘေ လုဝ် ဒူပ် ဒါရာ ပါယ် တီ။”