1 ဇဝ်ဖြာ ဝီ တဝ်း ဒီ အာမုဝ်ဆဲ၊ 2 “ဆေ ဂေ ဒူအီ မိုဝ်း ဂွန် ဂိန့် အီ မုး ဂွန် အီမာယ်၊ ဂွန် တီ ဒွန် ဝီ ဘေ လုဝ် လှူ ဒီ အုဝ်။ ဂွန် ဂိန့် အီ မုး ဂွန် အီမာယ် ဘော ဂွန် ဂိန့် အီ မုး ဒုဝ် ဆတ်ဒါဝါ အာလူင့်၊ အုဝ် ဇဝ်ဖြာ မှာန့်၊ တဲး ဒွန် အီ ဘော ဒွန် ဒုဝ် ဘဲန် ကြုဝ် အုဝ်။”

3 ဝါယ် အန် တီ အာမုဝ်ဆဲ ဝီ ကာလာင် ဒီ ဒူအီ ကိူန် တဝ်း၊ “ဒွန် ဆီနမ်၊ ဘေ လုဝ် လှုဝ်း ဆေဆေ ဆီငဲ ဒေါ လေး ဘေ ခဲင် မိူင် အဲဂိုပ်။ ဘေ ဟဲ့ ဟွတ့် လေး ခဲင် မိူင် အဲဂိုပ်၊ အာဝ် ဟူ ဘဲန် မှာယ် ဒူအီ ဟဝ်။ န့ မုး ပွုန် ဇဝ်ဖြာ အီ တာင်။ န့ ဟဲ့ တဲး ဘေ လေး ခဲင် မိူင် တွိုန်။ ဒွန် ဆီနမ်၊ ဟီ ဇမ် ဆီငဲ လုဝ် လှုဝ်း ဘေ အာခြာဝ် ဒေါ လေး ဘေ ခဲင် မိူင် အဲဂိုပ်၊ ကွဲ့ တဲး ဘေ ဟူမ် ခါမုန် အီ ဟပ် ဘေ ဆီနမ် ဘြး။ 4 အာတိုဝ် နီ န့ မုး မာဂျီန် အီ စိူဝ် မာဂျီန် အာဘိပ်။ မာဂျီန် အာဘိပ် နီ ဘေ ဟဲ့ လေး ဟာဝ် ခဲင် မိူင် အဲဂိုပ်။ 5 ခါ အာတ့် ဇဝ်ဖြာ ယီ ဟဲ့ ဟွတ့် ဒွါ ကာဒိက် ဆတ်ဇာ ဒီ ဂုန့် ဒင် ဘေ။ အန် ဟဲ့ ဟွတ့် တဝ်း၊ အန် ဒီ တဲး ဘေ ဟာဝ် ဇမ် ခဲင် မိူင် ကာနန့် တွိုန်။ မိူင် တီ မုး ဒူင် ကွယ် ဂေ ဒူအီ ဟေထိတ်၊ ဂေ ဒူအီ အာမုဝ်ရိတ်၊ ဂေ ဒူအီ ဟီဝိတ် ဘော ဂေ ဒူအီ ယေဘူဆိတ်။ ခဲင် မိူင် တီ ကာဒါယ် ဟဲ့ ဘွတ်၊ တဲး ဘေ မိုဝ်း ဟေ ဘော ဘ့လေ ဒွန် မျုဝ်၊ တဲး ဘေ မိုဝ်း ပီ ဒီ လုဝ် ဘေ ဒွန် မျုဝ်။ ဘေ ဟီ တး ဇမ် ခဲင် မိူင် ကာနန့် တွိုန်၊ ဒွန် ဆီနမ် ဟီ ဇမ် မာဂျီန် အာဘိပ် နီ၊ ဘေ လုဝ် ဘူင် ပီ ဒမ် အုဝ် ဘေ ဘူင် ဒေါ တီ နီ။ 6 အာဒါ ဘူ ဆီငဲ ဘေ လုဝ် ဟူမ် ခါမုန် အီ တူ မိုဝ်း ဆီနမ် ဘြး။ ဟီ ဇမ် ဆီငဲ မ့ဘူ၊ ဘေ လုဝ် ဘူင် ဘ့လွယ်၊ တဲး ဘေ လှုဝ်း ဇဝ်ဖြာ။ 7 အာဒါ ဘူ ဆီငဲ တီ ဘေ လုဝ် ဟူမ် ခါမုန် အီ တူ မိုဝ်း ဆီနမ် ဘြး။ ဘေ ဒူအီ ဘော မိူင်၊ ကွဲ့ တဲး န့ မိုဝ်း အာဆေ အီ ဘ့လေး အုန် ဆီနမ် ဘြး တွိုန် ခဲင် ကာင် အန်။ 8 ဆီငဲ ဘူင် ဘေ ဘ့လွယ် တီ ဘေ လုဝ် ခဲ၊ တဲး ဂွန် ဘေ နပ် မှဝ် န့ ပါယ် ပီ ဘူင် ဘေ ဘ့လွယ် တီ။ ဘေ လုဝ် တဝ်း၊ ဇဝ်ဖြာ ဟဲ့ တဲး အေ လေး ခဲင် မိူင် အဲဂိုပ်။” 9 ဘ့လွယ် တီ၊ န့ ဒီ တဲး ဘေ လှုဝ်း ဆေဆေ ပီ ဘူင် အုဝ် ဒီ ဘေ။ န့ ပီ ဝန် ပီ ပက် ဒူအီ ဒီ ဒဲ ဂေ၊ ကွဲ့ တဲး ဂေ ပိဝ်။ န့ ဘော ပီ ဇေ ပီ ပက် ဒူအီ ဒီ ကာတဝ်း ဂေ၊ တဲး ဂေ လှုဝ်း ဆေဆေ ဂြုဝ်း ဇဝ်ဖြာ။ ပါယ် တီ ဘေ ဘော လုဝ် ကာလာင် ဆေဆေ လွင် ဒါရာ ဇဝ်ဖြာ ဇိုဝ် တီ၊ ကွဲ့ တဲး ဘေ ပိဝ် ဒေါ မှဝ်။ ပါယ် တီ ဘေ ဘော လုဝ် လှုဝ်း ခဲ့ တာင် ပွုန် ဇဝ်ဖြာ ဒေါ တိုယ် အန် ဒီ ဘေ၊ တဲး ဘေ လေး ခဲင် မိူင် အဲဂိုပ်။ 10 နာ အာတ့် နီ ဟာဝ်၊ ဒွန် ဆီနမ် ဒွန် ဆီနမ် ဟီ ဇမ် အာခြာဝ် အန်၊ ဘေ လုဝ် ဘူင် ဘ့လွယ် တီ၊ ဘူင် ခဲ့ ပီ တဝ်း အုဝ် ဒီ ဘေ။

11 ဝါယ် အန် တီ ဘေ ဘော လုဝ် ဘူင် ပေါ အူ မျုဝ်။ ဇဝ်ဖြာ ဟဲ့ ဒွိုမ် ဒွါ ကာဒိက် ဆတ်ဇာ ဒီ ဘေ ဘော ဒီ ဂုန့် ဒင် ဘေ ခါ အာတ့်။ အန် ဟဲ့ တဝ်း ဒီ တဲး ဘေ ကွယ် ခဲင် မိူင် ကာနန့် တွိုန်၊ တဲး န့ ဘဲန် မိူင် ဘေ။ ဇဝ်ဖြာ ဒီ ဘော ဘူင် ပါယ် တီ။ 12 ဆေ ဘေ ဟဲ့ ဟွတ့် တး ဇမ် မိူင် တွိုန်၊ ဘေ ဝီ လုဝ် လှူ ဒီ ဇဝ်ဖြာ။ ဂွန် ဂိန့် ဘေ၊ ဆေ န့ မုး ဂွန် အီမာယ်၊ ဘေ လုဝ် အာပ် ဒွါ ဒီ ဇဝ်ဖြာ၊ တဲး န့ ဘဲန် ဂွန် ဇဝ်ဖြာ။ ဘော ဂွန် ဂိန့် ဒုဝ် ဆတ်ဒါဝါ ဘေ၊ ဆေ န့ မုး အာလူင့်၊ ဘေ လုဝ် လှူ ဒီ ဇဝ်ဖြာ။ 13 ဆေ န့ မုး မာလုဝ် အာလူင့်၊ ဘေ လုဝ် ဒိုဝ်း ဂွန် မာဘူ၊ တဲး အန် ကာဒါင် ဂွန် မာလုဝ် တွိုန်။ ဆေ ဘေ ယီ တူ မိုဝ်း ဂွန် မာဘူ တဲး အန် ကာဒါင် ဂွန် မာလုဝ်၊ ဘေ လုဝ် ဂ့လွက် ကူမ် အန်၊ တဲး န့ ကာလာတ့်။ ဘော ဂွန် အီမာယ် ဘေ၊ အီ မုး ဂွန် ဂိန့်၊ ဘေ လုဝ် ဒိုဝ်း မာဘူ ကာဒါင် ဒွန် အီ။

14 နာ အာတ့် ဟာဝ်၊ ဆေ ဂွန် ဘေ ဒီမွှတ် ဘေ လွင် ပီ ဘူင် ဘေ ဇိုဝ် တီ၊ ဆေ ဂေ တဝ်း၊ ‘မာဆေ န့ မုး ဆီဖဝ် အန်။း’ ဘေ လုဝ် ဝီ တဝ်း ဒီ ဂေ၊ ‘ခါ အာတ့် ဟဲ့ လှေန့်၊ ဂုန့် ဒင် အေ ဟဲ့ ကွယ် ခဲင် မိူင် အဲဂိုပ်၊ ဘဲန် မှာယ် အီ ဟဝ်။ ဇဝ်ဖြာ ယီ တိုယ် အေ လေး ခဲင် မိူင် အဲဂိုပ် တွိုန်။ အန် ဘော ဘျ ပွုန် အန် ဒီ ဂေ။ 15 အာခြာဝ် ဒေါ အန် တီ ခုန်ဒီခမ် ဖာရုဝ် တွိုန် တူ ဆီ တဲး ဂေ လေး ခဲင် မိူင် အန်။ ပန် တီ ဇဝ်ဖြာ ငဝ်း ယမ် ဂွန် ဂိန့် ခဲင် မိူင် အဲဂိုပ် ဘော မိူင်။ ဘော ဂွန် အီမာယ် ဒူအီ ဘော ဂွန် အာလူင့် ဒုဝ် ဆတ်ဒါဝါ၊ ဇဝ်ဖြာ ဟဲ့ ငဝ်း ဝဲန် တူတ့်။ ခုဝ် အန် တီ၊ အေ ဝီ လုဝ် လှူ ဂွန် ဂိန့် ဒူအီ ဘော ဂွန် ဂိန့် ဒုဝ် ဆတ်ဒါဝါ၊ တဲး န့ ဘဲန် ကြုဝ် ဇဝ်ဖြာ။ ဆေ န့ ယီ မုး ဂွန် အီမာယ် ဒူအီ အီ မုး ဂွန် ဂိန့်၊ အေ ဘော ပွိုန် ဒီ ဒိုဝ်း မာဘူ၊ ကာဒါင် ဂွန် ဒူအီ။’

16 “ဆေ ဘေ ကာလာင် ပါယ် တီ ဒီ ဂွန် ဘေ လွင် အန် တီ၊ န့ ဒီ ဘော တဲး ဂေ လှုဝ်း ဆေဆေ လွင် ပီ ဘူင် အုဝ် ဇဝ်ဖြာ ဒီ ဘေ။ ပါယ် တီ ပီ ဘူင် အုဝ်၊ န့ ဒီ ဘော ဘဲန် ပီ ဝန် ပီ ပက် ဒူအီ ဒီ ဒဲ ဂေ၊ ကွဲ့ တဲး ဂေ ပိဝ်။ န့ ဘော ပီ ဇေ ပီ ပက် ဒူအီ ဒီ ကာတဝ်း ဂေ၊ တဲး ဂေ လှုဝ်း ဆီချာ လွင် ဇဝ်ဖြာ ဒေါ တိုယ် အန် ဒီ ဘေ၊ တဲး ဘေ လေး ခဲင် မိူင် အဲဂိုပ်။” အာတီ ဒွန် မျုဝ်၊ ဇဝ်ဖြာ ဟဲ့ ကာလာင် ဒီ အာမုဝ်ဆဲ။ ဟဲ့ ဟွတ့်၊ အာမုဝ်ဆဲ ဝီ ကာလာင် ဒီ ဒူအီ အီဆာရေလ။

17 ခုန်ဒီခမ် ဖာရုဝ် တွိုန် ဟဲ့ ဟွတ့် တဲး ဂေ ဒူအီ အီဆာရေလ လေး ခဲင် မိူင် အန်၊ ဟာဝ် ဒူပ် န့တေန့်။ ဝါယ် အန် တီ ဇဝ်ဖြာ တူ တိုယ် ဂေ ဟာဝ် ဒူပ် န့တေန့် အီ ဇမ် မိူင် ဖီလီထီ။ န့တေန့် တီ န့ ဆိူဝ်၊ အာဝ် တူင့်။ ဇဝ်ဖြာ ဟဲ့ ထာင်၊ ဆေ ဂေ ဟီ ယိုဝ် ရန်ဆူ၊ ဆေ ဂေ ဘော လုဝ် ကာဂုဝ်း ဒီ ဒူအီ ဟဝ်၊ ဂေ နပ် ဒီ ဝီ ဘျွင် နဝ်း၊ ဝီ ဝေန့် မိူင် အဲဂိုပ် တွိုန်။ 18 ခုဝ်၊ ဇဝ်ဖြာ တိုယ် ဂေ ဟာဝ် ဒူပ် န့တေန့် အီ ကာလုဝ်း ဒူင် ကာဟဝ်း။ ဟဲ့ ဟွတ့်၊ န့ ဘော ဟာဝ် ဇမ် ဒီ အိုမ် ဒီနှူင် ရေန့် တွိုန်။ ဒေါ ဟာဝ် ဂေ ဒူပ် န့တေန့်၊ ဂေ ယီ ဟာဝ် ပီ ဒူအီ အီ ဟာဝ် ကာဂုဝ်း ဒီ အီ။

19 အာမုဝ်ဆဲ မိူဝ် ဟဲ့ ဒိုဝ်း ကာအာင် အာယုဝ် တွိုန်၊ တဲး အန် တိုယ် ဘော ကာအာင် တီ ဟာဝ် လေး ခဲင် မိူင် အဲဂိုပ်။ ဒေါ မွိုန် အာယုဝ် တွိုန် ဟဲ့ တဲး ဂေ ဒူအီ အီဆာရေလ ဒွါ ကာဒိက် ဆတ်ဇာ ဒီ အန်။ အန် ဟဲ့ တဝ်း၊ “ဆေ ဇဝ်ဖြာ စွယ် ဘေ တဲး ဘေ လေး ခဲင် ဒုက် တာင်၊ တဲး ဘေ ဘော ဒိုဝ်း ဒုဝ် ဘူင့် အုဝ်၊ တဲး အန် လေး ခဲင် မိူင် နီ။” ခုဝ် အန် တီ၊ အာမုဝ်ဆဲ ဟဲ့ ဒိုဝ်း ကာအာင် အန်၊ တိုယ် လေး ခဲင် မိူင် အဲဂိုပ်။

20 ဂေ ဒူအီ ဘောကာဂ့လျီတ် ဟဲ့ ဟွတ့် လေး ခဲင် မိူင် ဆူခူတ် တွိုန်၊ ဂေ ဝီ တး ဇမ် နာ ရေတ့် မိူင် အေထာမ်၊ အီ ကွယ် ဒီ ခူပ် ဒူင် ကာဟဝ်း။ ဂေ ဘော ချ ဒူင် တီ။ 21 ဒေါ ဟာဝ် ဂေ ဒူပ် န့တေန့် ကာတဲ ဆီငဲ၊ ဇဝ်ဖြာ တိုယ် ဂေ တဲး ဂေ ယိုဝ် န့အု။ အာရိုပ် န့အု တီ၊ န့ ပီ ရွင့် စာ အီ ယဲတ့် ဒီ အာတ့် ဂေ။ ခဲင် မှိုဝ် ဇဝ်ဖြာ ဝီ တဲး န့ ဘဲန် ပီ ရွင့် ငဝ် အီ ယဲတ့် ဒီ အာတ့် ဂေ၊ တဲး န့ ဘ့လာင် ဒီ ဂေ။ ပါယ် တီ ဆေဆေ ဂေ ပွိုန် ဟာဝ် ဒူပ် န့တေန့် ပီ ဘျ ဇဝ်ဖြာ ဒီ ဂေ။ 22 ရွင့် န့အု တွိုန်၊ န့ ကွယ် ဒီ အာတ့် ဂေ ကာတဲ ဆီငဲ။ ဘော ရွင့် ငဝ် တွိုန် ကွယ် ဆေဆေ ခဲင် မှိုဝ်။ န့ တူ ဝီ ဟြာယ် ဒေါ မှဝ်၊ တဲး ဂေ ပွိုန် ဒီ ယိုဝ် ဆေဆေ။