ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ 2 “မဲ လုဝ် ကာလာင် ဒီ ဂေ ဒူအီ အီဆာရေလ၊ တဲး ဂေ ဝီ ဝး ဟာဝ် ဒူပ် န့တေန့် ဒူင် လုဝ် ဝဝ့် ဂေ၊ တဲး ဂေ ဘ့လေး ထိုပ် ဘိက် ဂေ၊ ကွယ် ကာတတ် မိူင် ပီဟာဟီရူတ် အီ မုး ဒီ ကာတဲ မိူင် မိက်ဒူန် ဂါယ် အိုမ် ဒီနှူင် တွိုန်။ ဂေ လုဝ် ချ ဒီ ခူပ် အိုမ် အီ လာယ် ကာဆိူဝ် ဒီ မိူင် ဘာလဆေဖူန်။ 3 ခုန်ဒီခမ် ဖာရုဝ် တွိုန် ဒီ ထာင်၊ ဂေ ဒူအီ အီဆာရေလ ဒီ ဟာဝ် ဝိန် ဒီ လဲ ခဲင် ဒူင် ကာဟဝ်း၊ ဂေ ယီ တူ နပ် န့တေန့် ဒူင် လုဝ် ဝဝ့် ဂေ၊ န့တေန့် အီ တဲး ဂေ လေး ခဲင် ဒူင် ကာဟဝ်း တွိုန်။ 4 အုဝ် ဒီ ဝီ တဲး ခုန်ဒီခမ် ဖာရုဝ် ဝီ ကာပ့လု နဝ်း၊ တဲး အန် လေး ဟာဝ် ဒူပ် ဘေ။ ဒေါ ပဲ အုဝ် ခုန်ဒီခမ် ဖာရုဝ် ဘော ဂေ ဒါ ဆိုက် အန်၊ အုဝ် ယီ ဒီ ဘျ အာဖုင် ဒင်ခုဝ် အုဝ်။ ပါယ် တီ ဂေ ဒူအီ အဲဂိုပ် ဒီ ဘော နပ်၊ အုဝ် မုး အန် ဇဝ် အီ အိုပ် တူတ့်။” ဇဝ်ဖြာ ဟဲ့ ဟွတ့် ကာလာင် ပါယ် တီ ဂေ ဒူအီ အီဆာရေလ ဝီ ချ ဒူင် ပီ တဝ်း အန် ဇဝ်။

5 ဝါယ် အန် တီ ဂေ ဒူအီ ဟဝ် ဝီ ကာလာင် ဒီ ခုန်ဒီခမ် ဖာရုဝ် လွင် ဂေ ဒူအီ အီဆာရေလ ဟဲ့ ဟွတ့် လေး ခဲင် မိူင် အဲဂိုပ်။ ခုန်ဒီခမ် ဖာရုဝ် ဘော ဂေ အာမူ အာမာတ် အန် ဟဲ့ ဝီ ကာပ့လု နဝ်း။ ဂေ တဝ်း၊ “အေ ဟဲ့ ရိုဝ် ကာဆဝ်။ အေ ဟဲ့ ခ့ဝါင် ဂေ ဒူအီ အီဆာရေလ လေး ဟာဝ်။ ဒေါ တီ နီ အေ အာဝ် ဟူ မိုဝ်း မှာယ် အီ ဘူင် ဂါန် အေ။” 6 ပန် တီ ခုန်ဒီခမ် တွိုန် တဲး ဒူအီ မ့ပြာယ် လက်လဝ် ပီ ပဝ့် အန်၊ တဲး အန် ယဲတ့် ဒါ ဆိုက်၊ တဲး ဂေ ဒူပ် ဒူအီ အီဆာရေလ။ 7 လက်လဝ် ပီ ပဝ့် ဒါ ဆိုက် အန်၊ န့ မိုဝ်း ဒဝ် မာယဝ်း လှာင်။ န့ မုး လက်လဝ် အီ မွှိုမ် လွှိုမ် တူတ့်။ ဒဲင် တီ၊ အန် ဘော ဒိုဝ်း လက်လဝ် အန် ဘဲန် မျုဝ် ဘဲန် မျုဝ်။ ဒါ ဆိုက် အီ ပဝ့် လက်လဝ် ဂေ တီ၊ ဂေ မိူဝ် အိုပ် ဒါ ဆိုက် ဘဲန် ဖိုင် ဘဲန် ဖိုင်။ 8 ဇဝ်ဖြာ ဝီ တဲး ခုန်ဒီခမ် ဖာရုဝ် မိုဝ်း နဝ်း စီစိဝ်၊ တဲး အန် ဆီ ဒူပ် ဂေ ဒူအီ အီဆာရေလ။ ဂေ ဒူအီ အီဆာရေလ ယီ မိုဝ်း နဝ်း ကြွိုမ် နဝ်း တာင်၊ ဟာဝ် ဒူပ် န့တေန့်။ 9 ဂေ ဒူအီ အဲဂိုပ် ဘော ဒါ ဆိုက် ဂေ ဘော မင်ပြွင့် ဘော လက်လဝ် ဘော ဒူအီ အီ ပဝ့် လက်လဝ် တွိုန်၊ ဂေ ဘော ဖိုင် ဝီ ဒူပ် ဒီ ပန် ဂေ ဒူအီ အီဆာရေလ။ ဂေ ဝီ ခြပ် ဒူအီ အီဆာရေလ ဒူင် ချ ဂေ ထိုပ် ဘိက် ဒီ ခူပ် အိုမ် ဒီနှူင် အီ မုး ဒူင် ကာတတ် မိူင် ပီဟာဟီရူတ်။ န့ မုး ဒူင် ကာဆိူဝ် မိူင် ဘာလဆေဖူန်။

10 ခုန်ဒီခမ် ဖာရုဝ် ဟဲ့ ရိန် ဒီ ဇမ် ဒူင် ကွယ် ဂေ ဒူအီ အီဆာရေလ။ ဂေ ဘော ယိုဝ် ဒူအီ အဲဂိုပ် ဟဲ့ တး ဒူပ် ဒီ ပန် ဂေ၊ ဂေ ဘော ယုဝ် ကာဆဝ်။ ဂေ ဝီ ဒတ် တာင်၊ မှာန့် တဲး ဇဝ်ဖြာ စွယ် ဂေ။ 11 ဂေ ဝီ တဝ်း ဒီ အာမုဝ်ဆဲ၊ “ဆေ မဲ ဆီ တဲး ယေ ယမ် ခဲင် ဒူင် ကာဟဝ်း နီ၊ မဲ တူ လုဝ် ဒဲ့ ယေ လေး ခဲင် မိူင် အဲဂိုပ် တွိုန်။ ဘော ခဲင် မိူင် အဲဂိုပ် ပွိုန် ဒိပ် ဒူအီ ယမ်။ မှဝ် န့ ပါယ် ပီ စ်ု မဲ တဲး ယေ လေး ခဲင် မိူင် အဲဂိုပ်။း ဒေါ တီ နီ ယေ ဘောကာဂ့လျီတ် ဘော လုဝ် ယမ်။ 12 ခါ အာတ့် ယေ ဟဲ့ ဟွတ့် တဝ်း ဒီ မဲ၊ ကွဲ့ တဲး မဲ ဒဲ့ ယေ ဟာဝ်။ ယေ ဆီ ဘဲန် မှာယ် ဂေ ဒူအီ အဲဂိုပ်။ ဆေ ယေ ကွယ် ခဲင် မိူင် အဲဂိုပ်၊ ဘဲန် မှာယ် ဂေ၊ န့ မွှိုမ် လွှိုမ် ကွယ် ယေ ခဲင် ဒူင် ကာဟဝ်း နီ အီ ဒီ တဲး ယေ ယမ် ဒေါ တီ နီ။” 13 အာမုဝ်ဆဲ ဝီ တဝ်း၊ “ကွဲ့ ယုဝ်။ တဲး ဘေ ကွယ် ဆီချာ ဒူင် ကွယ် ဘေ နီ။ ဘေ ဒီ ဘော ယိုဝ် မှဝ် ဇဝ်ဖြာ ဒီ ပါယ် ဒီ စွယ် ဘေ။ အာတိုဝ် နီ အန် ဒီ ချွတ် ဘေ အူ ဇေန့်၊ တဲး ဘေ လေး ခဲင် ဒုက် တာင် နီ။ ဂေ ဒူအီ အဲဂိုပ် ပီ ယိုဝ် ဘေ ဒေါ တီ နီ၊ ဘေ တူ ဝီ ယိုဝ် ဒေါ မှဝ်။ 14 ဇဝ်ဖြာ ဒီ ကာဂုဝ်း ကာဒါင် ဘေ။ ဘေ ယီ တူ လုဝ် ဘူင် မာဆေ။ တဲး ဘေ မိုဝ်း နဝ်း ယေန်။”

15 ဇဝ်ဖြာ ဝီ တဝ်း ဒီ အာမုဝ်ဆဲ၊ “မှဝ် န့ ပါယ် ပီ ဒတ် မဲ ခဲ့ တီ၊ မှာန့် ဒွန် မျုဝ် ဒီ အုဝ်။း တဲး မဲ ကာလာင် ဒီ ဂေ ဒူအီ အီဆာရေလ၊ တဲး ဂေ ဝီ ယိတ့် ဟာဝ် ပေါ အူ ပ့လုဝ့်။ 16 တဲး မဲ စုဝ့် န့ကြွုန် မဲ။ ဆူင့် ဒဲင် အိုမ် ဒီနှူင် နီ၊ တဲး အိုမ် ဝီ ကာယဝ်း၊ အာဝ် ဟူ ဟာဝ်။ ဟဲ့ ဟွတ့်၊ ဂေ ဒူအီ အီဆာရေလ ဒီ ဘော ပွိုန် ဒီ ဟာဝ် ကာလုဝ်း အိုမ် ဒီနှူင် နီ၊ တူ တဲး ပ့လဝ် ဂေ အမ် ည။ 17 ဒေါ ကာလုဝ်း ဘေ ဒီ နီ၊ အုဝ် ဒီ တဲး ဂေ ဒူအီ အဲဂိုပ် မိုဝ်း နဝ်း ဆီ ခုင်ခြး ဒူပ် ဘေ။ ပန် တီ အုဝ် ဒီ ဘျ အာဖုင် ဒင်ခုဝ် အုဝ်၊ တဲး ဘေ ယိုဝ် ပီ ဒီ ဘူင် အုဝ် ဒီ ခုန်ဒီခမ် ဖာရုဝ် ဂေ ဒါ ဆိုက် အန်။ တဲး ဘေ ဝီ ယိုဝ် ပီ ဒီ ဘူင် အုဝ် ဒီ လက်လဝ် ဘော ဒါ ဆိုက် အီ ပဝ့် လက်လဝ်။ 18 အုဝ် ဒီ ဘော ဘျ ပွုန် အုဝ်၊ တဲး ဂေ ဒူအီ အဲဂိုပ် ကော နပ်၊ အုဝ် မုး ဇဝ်ဖြာ အီ မိုဝ်း ပွုန် တာင် လွှိုမ် တူတ့်။”

19 ဝါယ် အန် တီ အာမူ အာမာတ် ဇဝ်ဖြာ အီ ဟဲ့ ဒွိုမ် ဟာဝ် ဒီ အာတ့် ဂေ ဒူအီ အီဆာရေလ တဲး အန် ပွိုန် ဒီ ယဲတ့် ဂေ ဟာဝ် ဒူပ် န့တေန့် ပီ လုဝ် ဟာဝ် ဂေ၊ အန် ဝီ ကာထုဝ့် ဒူင် ကွယ် အန်၊ ဟာဝ် ကွယ် ဒီ ပန် ဂေ ဒူအီ အီဆာရေလ။ ဘော ရွင့် န့အု တွိုန်၊ အာဝ် ဟူ ကွယ် နာ အာတ့်၊ ဝီ ဟာဝ် ကွယ် ဒီ ပန် ဂေ။ 20 ပါယ် တီ ဘော အာမူ အာမာတ် ဇဝ်ဖြာ ဘော ရွင့် န့အု တွိုန်၊ ဂါယ် ကွယ် ကာတဲ ဒူအီ အဲဂိုပ် ဘော ဒူအီ အီဆာရေလ။ န့အု တွိုန် တဲး န့ ဘဲန် အပ် ဝွင့် ဒီ ဒူင် ကွယ် ဂေ ဒူအီ အဲဂိုပ်။ န့ ယီ တဲး န့ ဘ့လာင် ဒီ ဒူင် ကွယ် ဂေ ဒူအီ အီဆာရေလ။ ပါယ် တီ ဂေ ကွယ် လာယ် ယာန်။ ခဲင် မှိုဝ် တီ ဂေ ဒူအီ ခဲင် ဖိုင် အူ ဖိုင် အာဝ် ပွိုန် ဟာဝ် လိုပ် ဒူင် ကွယ် ပေါ အူ ဖိုင်။

21 ဒေါ အန် တီ အာမုဝ်ဆဲ ဆူင့် ဒဲ အန် ဒဲင် အိုမ် ဒီနှူင် တွိုန်။ ဇဝ်ဖြာ တဲး ခုန် တာင် တး နာ လေး ဆီငဲ၊ တဲး န့ ဘုတ် ခဲင် မှိုဝ်။ ဟဲ့ ဟွတ့်၊ ခုန် ဘူင် တဲး အိုမ် ကာယဝ်း။ အိုမ် ဟဲ့ ဟိတ်၊ တဲး န့ ဘဲန် န့တေန့်။ 22 ဂေ ဒူအီ အီဆာရေလ ဘော ပွိုန် ဟာဝ် ဆီချာ ကာလုဝ်း အိုမ် တွိုန်။ ခုဝ်၊ န့ ဟဲ့ ဘဲန် ကာဒါယ် ကာဟဝ်း ဒီ ကာတဲ အိုမ်။ အိုမ် ယီ ကွယ် ဒီ ခူပ် န့တေန့် ဒူင် ဒီ ဝဝ့် ဂေ၊ တဲး ဘော အာ ဘ့လာက် ပီ ရဲင် အိုမ် တာင်။

23 ဂေ ဒူအီ အဲဂိုပ် ဘော ခုင်ခြး နာ ပန်။ ဂေ ဘော လိုပ် ခဲင် ကာဒမ် အိုမ် တွိုန်။ ဘော မင်ပြွင့် ဘော လက်လဝ် ဘော ဒူအီ ပဝ့် လက်လဝ် တွိုန်၊ ဂေ ဘောကာဂ့လျီတ် ဟဲ့ ဟာဝ် ဒူပ်။ 24 ဒေါ ဇမ် ဆိန့်ဝး ဝွင့်၊ ပြဲ ညှမ် ဝး၊ ဇဝ်ဖြာ အီ ကွယ် ခဲင် န့အု ဂါယ် ရွင့် ငဝ် တွိုန်၊ အန် ဘော ယွတ် ဒူအီ အဲဂိုပ်။ အန် ဝီ ဘူင် တဲး ဂေ ဆီနန် ဆီနိူင်၊ ကာဝှ်ု ကာဝျှီန်။ 25 အန် ဘူင် တဲး ကာလေန့် လက်လဝ် ဂေ ဝီ လေး၊ တဲး န့ ညှာပ် ဟာဝ်။ ဒေါ အန် တီ ဂေ ဒူအီ အဲဂိုပ် ဝီ တဝ်း၊ “ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ တး ကာဂုဝ်း ဒီ အေ ကာဒါင် ဂေ။ တဲး အေ ဟာဝ် တဝ် လေး ဒူင် ကွယ် အေ နီ။”

26 ပန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ ဆူင့် ဒဲ မဲ ဒဲင် အိုမ် ဒီနှူင်။ တဲး အိုမ် ဝီ မ့ပုန် ဂေ ဒူအီ အဲဂိုပ် ဘောကာဂ့လျီတ်။ ဘော ဂေ၊ ဘော လက်လဝ် ဘော ဒူအီ အီ ပဝ့်၊ တဲး ဂေ စှိုမ်။” 27 ဇဝ်ဖြာ ဟဲ့ ဟွတ့် ကာလာင်၊ အာမုဝ်ဆဲ ဝီ ဆူင့် ဒဲ အန် နာ ဒဲင် အိုမ် ဒီနှူင်။ ပါယ် တီ ဒေါ ဟဲ့ ဝး ပြဲ၊ အိုမ် ဝီ ဟာဝ် ဒူင် ဘြိမ် အန်။ ဂေ ဒူအီ အဲဂိုပ် ဝီ တဝ်း ဒီ လေး တဝ်။ ဇဝ်ဖြာ ယီ တဲး အိုမ် တာင် တွိုန် ဝီ မ့ပုန် ဂေ အူ ဇေန့်။ 28 ဒေါ ဝီ လှဲ ဟာဝ် အိုမ် တွိုန် ဒူင် ဘြိမ်၊ န့ ဘော မ့ပုန် လက်လဝ် ဘော ဂေ ဒူအီ အီ ပဝ့် လက်လဝ် ဘော ဂေ ဒါ ဆိုက် အာမျုဝ် အဲဂိုပ်၊ ဂေ ဟဲ့ ဒူပ် ဒူအီ အီဆာရေလ ဟာဝ် ခဲင် ကာဒမ် အိုမ်။ ဟဲ့ ဟွတ့်၊ ဂေ ဘောကာဂ့လျီတ် ဘော ယမ်။ အူ ဝီ မိူဝ် အာဝ် ဟူ ဂိတ်။

29 ဂေ ဒူအီ အီဆာရေလ ယီ ဟဲ့ ပွိုန် ကာလုဝ်း အိုမ် ဒီနှူင် တွိုန်၊ ဟာဝ် ဒဲင် ကာဒါယ် ကာဟဝ်း။ အိုမ် ဟဲ့ ဘဲန် ရဲင်၊ ကွယ် ဒီ ခူပ် ဂေ ဘော အာ ဘ့လာက်။ 30 ဆီငဲ အန် တီ ဇဝ်ဖြာ ဟဲ့ ချွတ် ဂေ ဒူအီ အီဆာရေလ၊ ကွဲ့ တဲး ဂေ ဒူအီ အဲဂိုပ် ဝီ အိုပ် ဂေ။ ဂေ ဒူအီ အီဆာရေလ ဝီ ယိုဝ် ဒုဝ် ဘူင့် ဒူအီ ယမ် အီ ကွယ် ဘာင် အိုမ် ဒီနှူင် တွိုန်။ 31 ဂေ ဒူအီ အီဆာရေလ ဟဲ့ ယိုဝ် ခဲ့ တာင် ပွုန် ဇဝ်ဖြာ။ ဟဲ့ ဟွတ့်၊ ဂေ ဝီ ယုဝ် ဇဝ်ဖြာ၊ ဝီ ညှိုမ် ဘိုင် ဇဝ်ဖြာ။ ဂေ ဘော ဝီ ညှိုမ် အာမုဝ်ဆဲ အီ တဝ်း၊ အန် မုး ဒူအီ ပီ စ်ု ဇဝ်ဖြာ ဘူင် ဂါန် ဇဝ်ဖြာ။