1 ဝါယ် အန် တီ အာမုဝ်ဆဲ ဘော ဂေ ဒူအီ အီဆာရေလ တဝ်း မှုဝ် ဒါခိုယ် ဒီ ဇဝ်ဖြာ။ အန် တဝ်း၊

“အုဝ် ဒီ တဝ်း မှုဝ် ဒါခိုယ် အီ အိူပ် ဇဝ်ဖြာ။ ဇဝ်ဖြာ ဟဲ့ တာင် လွှိုမ် တူတ့်။

ဘော မင်ပြွင့် ဘော ဂေ ဒူအီ အီ ပဝ့် မင်ပြွင့် တွိုန်၊ ဇဝ်ဖြာ ဟဲ့ ဝဲန် ခဲင် အိုမ် ဒီနှူင်။

2 ဇဝ်ဖြာ ဟဲ့ တဲး အုဝ် မိုဝ်း ပ့လူမ်။ အန် မိူဝ် ဟဲ့ တဲး အုဝ် တဝ်း မှုဝ် ဒါခိုယ်။

အန် ဟဲ့ ချွတ် အုဝ်။ အန် ဇဝ် မုး ဇဝ်ဖြာ ပီ ကြိုပ် အုဝ်။ အုဝ် ဒီ ဘော အိူပ် အန်။

အန် မုး ဇဝ်ဖြာ ပီ ကြိုပ် ဂုန့် ဒင် အုဝ် ခါ အာတ့်။ အုဝ် ဒီ ဝီ ကာလာင် လွင် နာ မွှိုမ် ပီ ဘူင် အန်၊ တဲး ဒွန် အီ နပ်။

3 ဇဝ်ဖြာ မုး ဒါ ဆိုက်။ အန် စိူဝ် အန် ဇဝ်။

4 အန် ဟဲ့ ဟွတ့် ဝဲန် ဂေ ဒါ ဆိုက် ခုန်ဒီခမ် ဖာရုဝ်၊ တဲး ဂေ ဘောကာဂ့လျီတ် ကော ယမ် ခဲင် အိုမ် ဒီနှူင် တွိုန်။ ဘော လက်လဝ် အန် ဟဲ့ စှိုမ်။ ဂေ ဒါ ကာညာ ဒါ ဆိုက်၊ ဂေ အီ မိုဝ်း ပ့လူမ် လွှိုမ် အီ၊ ဇဝ်ဖြာ ဟဲ့ တဲး ဂေ လူင် ယမ် ခဲင် အိုမ် ဒီနှူင် ရေန့်။

5 အိုမ် တာင် တွိုန် ဟဲ့ မ့ပုန် တူတ့်။ ဂေ ဟဲ့ စေတ့် ခဲင် ကာဒမ် အိုမ်၊ တဲး န့ ပီ မာဝ် အီ နပ် ဒီ စေတ့် လူင်။

6 အိုယ် မဲ ဇဝ်ဖြာ၊ မဲ မိုဝ်း ပွုန် တာင် ကာဆဝ်၊ တဲး မဲ ပဲ ဒီ အိုပ် တူတ့်။ မဲ ဟဲ့ ပဲ ဒီ ပျာတ့် ဝဲန် ရန်ဆူ ယေ။

7 ပွုန် တာင် မဲ အီ ပဲ ဒီ အိုပ် တူတ့် ဒွန် မျုဝ်၊ န့ တဲး မဲ ဘော ပျာတ့် ဝဲန် တူတ့် ဂေ အီ တဝ်း ဒီ ကာဂုဝ်း ဒီ မဲ။ မဲ ဟဲ့ တဲး ဂေ ယိုဝ် ခဲ့ ရူ နဝ်း မဲ၊ တဲး ဂေ စှိုမ်၊ တဲး န့ ပီ ငဝ် ကာဆိုမ် ဟျြီင် ကာဟဝ်း။

8 မဲ ဟဲ့ ဟိုဝ်း လေး ဖွိုမ် မဲ ခဲင် ဂုင်မုး မဲ။ ဟဲ့ ဟွတ့်၊ အိုမ် အာဝ် ဟူ လှဲ။ န့ စွင့်၊ ကွယ် ဆိူဝ်၊ ဘဲန် ပီ ရဲင် စာ အီ ပ့လူမ်။ အိုမ် လိုက် တွိုန် ဘော ဘဲန် ပါယ် တီ အူ ဇေန့်။

9 ယီ မုး ဂေ ရန်ဆူ၊ ဂေ ဝီ ကာခဲန့် တဝ်း၊ ‘အုဝ် ဒီ ခုင်ခြး ဂေ၊ တဲး အုဝ် ကော ခြပ် ဂေ။ အုဝ် ဒီ ကာဆာင် ကြုဝ်ကြာမ် ဂေ။ န့ ဒီ တဲး အုဝ် မိုဝ်း နဝ်း ဒါခိုယ် ကူပ် ဟဲ့ ပွိုန် ကြုဝ်ကြာမ် ဂေ ဒွန် မျုဝ်။ အုဝ် ဒီ ထွတ် မာပွါ့ လာင် အုဝ်၊ တဲး အုဝ် ငဝ်း ဝဲန် ဂေ။’

10 န့ ယီ မုး မဲ ဇဝ်ဖြာ၊ ဒေါ ဟိုဝ်း မဲ ဖွိုမ် မဲ၊ မဲ တဲး အိုမ် ဒီနှူင် ဝီ မ့ပုန် ဂေ၊ တဲး ဂေ ဝီ ယမ်။ ဂေ ဘော စေတ့် လူင် ခဲင် အိုမ် ပီ ဟိန် စန်။

11 အိုယ် မဲ ဇဝ်ဖြာ၊ ဂေ ဒူအီ တဝ်း၊ န့ မိုဝ်း ဇဝ်ဖြာ ဘဲန် ကာဒင် ဘဲန် ကာဒင်။ န့ ယီ တူ မိုဝ်း ဇဝ်ဖြာ အီ ပီ မဲ ဇဝ်။ အူ ကာဒင် မိူဝ် အာဝ် မိုဝ်း။ မဲ ဇဝ်ဖြာ ဟဲ့ မိုဝ်း ပွုန် တာင် ကာဆဝ်၊ တဲး မဲ ပဲ ဒီ အိုပ် တူတ့်။ မဲ ယီ ဘွတ် ကာဆဝ်၊ တူ ဘူင် နာ တူ မွှိုမ်။ မဲ ဇဝ်ဖြာ အူ ကာဒင် မိုဝ်း အာဖုင် ဒင်ခုဝ် တာင်၊ တဲး ဒူအီ ဘဲန် နဝ်း ယုဝ်။ မဲ မိူဝ် နပ် ဒီ ဘူင် နာ မွှိုမ် အာမ် ကာဆဝ်။ အာဝ် ပီ အာဆေ။

12 မဲ ဟဲ့ စုဝ့် ဒဲ အာအး မဲ၊ ဟဲ့ ဟွတ့်၊ ဂေ ရန်ဆူ မဲ ဟဲ့ ဟြာယ် အူ ဇေန့်။ န့ ပီ ကာဒါယ် ဟဲ့ ညွှတ် ဂေ။

13 မဲ ဟဲ့ ချွတ် ဂေ ဒူအီ ပီ ရွက့် မဲ၊ တဲး ဂေ လေး ခဲင် ဒုက်။ ကူပ် ရွက့် ကာဆဝ် မဲ ဒီ ဂေ ဒူအီ တီ၊ မဲ ဒီ ဘော တိုယ် ဂေ ဟာဝ် ဒါခိုယ်။ ပွုန် တာင် မဲ ဒီ ဘော တိုယ် ဂေ၊ တဲး ဂေ ကော ဇမ် ဒူင် ကွယ် မဲ ဇဝ်ဖြာ၊ အီ မုး ဒူင် မွှိုမ်၊ ဒူင် ဘွတ် ကာဆဝ်။

14 ဂေ ဒူအီ အာမျုဝ် ဟဝ်၊ ဂေ ဒီ ထူမ် လွင် ပဲ့ ဟဲ့ ဘူင် မဲ။ ဂေ ဒီ ယုဝ် ဘော ဘဲန် နဝ်း ဒီယုး ဒီယေန့် ကူပ် ယိုဝ် ဂေ လွင် အန် တီ။ ဂေ ဒူအီ ဖီလီထီ၊ ဂေ ဒီ ယုဝ် ကော ဘဲန် နဝ်း တျီ့ ဒီ ဂေ။

15 ဂေ ဒူအီ အီ အိုပ် မိူင် အေဒူမ်၊ ဂေ ဒီ ယုဝ် ကာဆဝ် တိူက်။ ဂေ ဒါ တာင် ခဲင် မိူင် မုဝ်အာပ်၊ ဂေ ဒီ ယုဝ် ဘဲန် နဝ်း ဒီယုး ဒီယေန့်။ ဂေ ဒူအီ ခဲင် မိူင် ကာနန့်၊ ဂေ ဒီ ဒီလှး၊ အာဝ် ဟူ မိုဝ်း ပ့လူမ် ကူပ် ယုဝ် ကာဆဝ် ဂေ။

16 ဂေ ဒူအီ ဇိုဝ် တီ ဒွန် မျုဝ်၊ ဂေ ဒီ ဘဲန် ကေး ဘော ယုဝ်၊ ဆေ ဂေ ယိုဝ် လွင် အန် တီ။ ပွုန် မဲ ဇဝ်ဖြာ ဒီ ဘူင် တဲး ဂေ ဘောကာဂ့လျီတ် ကွယ် ဆီတွင့် ပီ မာဝ်၊ တူ ယ ဘူင် မာဆေ၊ တဲး ဂေ ဒူအီ အာမျုဝ် မဲ ဇဝ် တး ဟာဝ် ကာလုဝ်း ပွုန် မိူင် ဂေ။ န့ မုး ဂေ ဒူအီ ပီ စိုဝ်း မဲ ဇဝ်၊ မဲ ဒီ တဲး ဂေ ကာလုဝ်း မိူင် အီ ဟဝ်၊ ကွဲ့ တဲး ဂေ ဇမ် ဒုက် မာဆေ။

17 မဲ ဒီ တိုယ် ဂေ ဇမ် ဒဲင် နွန် ပီ ရဝ်း မဲ၊ ပီ ဒီ ဒွါ မဲ ဒီ ဂေ တဲး န့ ဘဲန် ခါဂုန် ဒီ ဂေ၊ တဲး န့ ဘဲန် ဒူင် ကွယ် ဂေ ဆေဆေ။ ဒူင် တီ၊ န့ ဘော မုး ဒူင် ဘွတ် ဒူင် ကွယ် မဲ ဇဝ်။ မဲ ဇဝ် ဟဲ့ မ့ပြာယ် ဒူင် တွိုန်၊ တဲး ဂေ ဒူအီ ကွယ် ပီ ဟေ အီ ဟဲ့ ဟွတ့် ဆမ်၊ အီ ကွယ် အူ ပ့လုဝ့် တီ ဆေဆေ။

18 အိုယ် မဲ ဇဝ်ဖြာ၊ မဲ ဒီ အိုပ် ဆေဆေ ဂေ ဒူအီ အာမျုဝ် မဲ၊ ဒွန် စုဝ် ဒွန် ဘာန်။” ခဲ့ နီ ဂေ ဟဲ့ တဝ်း မှုဝ် ဒါခိုယ်။

19 ပါယ် တီ ဂေ မင်ပြွင့် ခုန်ဒီခမ် ဖာရုဝ် ဘော လက်လဝ် အန် ဘော ဂေ ဒူအီ အီ ပဝ့် လက်လဝ် တွိုန်၊ ဂေ ဘောကာဂ့လျီတ် ဟဲ့ ဟွတ့် လိုပ် ခဲင် အိုမ် ဒီနှူင် တွိုန်၊ ဇဝ်ဖြာ ဝီ တဲး အိုမ် ဝီ တး၊ ဝီ မ့ပုန် ဂေ၊ တဲး ဂေ ကော ယမ် တူတ့်။ ဂေ ဒူအီ အီဆာရေလ၊ ဂေ ယီ ပွိုန် ဟာဝ် ဆီချာ ကာလုဝ်း အိုမ် ဒီနှူင် ဒေါ ဟေန့် အန်။

20 ပန် တီ န့ မုး နာင် မီရီယမ်။ အန် မုး အီကတ် အာရူန် တွိုန်။ အန် ဘော မုး ဒူအီ ဘျာန် ဂြုဝ်း ဇဝ်ဖြာ။ အန် မိူဝ် ဒိုဝ်း ဂြိုင် ဒီတဲတ်၊ က်ု။ ဘော ဂေ အီဘိုန့် ဘောကာဂ့လျီတ်၊ ဂေ ဝီ ဒိုဝ်း ဂြိုင် ဒီတဲတ် ဂေ၊ ဟာဝ် ဒူပ် နာင် မီရီယမ် တွိုန်။ ဂေ ဘော က်ု ဘော ဂါ ဟာဝ် လာယ် ကာဒူပ်။ 21 နာင် မီရီယမ် ဘော တဝ်း မှုဝ် ဒါခိုယ်။ အန် တဝ်း၊

“တဲး ဘေ ပါက် မှုဝ် ဒါခိုယ်၊ ဘော အိူပ် ဇဝ်ဖြာ။ အန် ဟဲ့ တာင် လွှိုမ် တူတ့်။ ဘော မင်ပြွင့် ဘော ဂေ ဒူအီ အီ ပဝ့် မင်ပြွင့်၊ အန် ဇဝ် ဟဲ့ ဝဲန်၊ ဘူင် တဲး ဂေ ယမ် ခဲင် အိုမ် ဒီနှူင် တွိုန်။” ပါယ် တီ နာင် မီရီယမ် ဟဲ့ တဝ်း မှုဝ် ဒါခိုယ် လွင် ပဲ့ ဟဲ့ ဘူင် ဇဝ်ဖြာ။

22 ဟဲ့ ဟွတ့် ပန် တီ အာမုဝ်ဆဲ ဝီ ယဲတ့် ဂေ ဒူအီ အီဆာရေလ လေး ဒူင် ကွယ် ဂေ ဒီ အိုမ် ဒီနှူင် ရေန့် တွိုန်၊ တဲး ဂေ ဟာဝ် ဇမ် ဒူင် ကာဟဝ်း အီ စိူဝ် ဆူရာ။ ဂေ မိူဝ် ဟာဝ် ဒူပ် န့တေန့် တွိုန် အာဒါ အူယ် ဆီငဲ။ ဒေါ အန် တီ ဂေ တူ ယိုဝ် အိုမ်။ 23 ဟဲ့ ဟွတ့်၊ ဂေ ဝီ တး ဇမ် အူ ပ့လုဝ့် အီ စိူဝ် မာရာ။ ဒူင် တီ၊ န့ မိုဝ်း အိုမ်။ န့ ယီ ဆွင့်။ အာဝ် ပွိုန် ဒျီင် အိုမ် တီ။ ခုဝ် အန် တီ ဂေ တဝ်း၊ ဒူင် တီ စိူဝ် မာရာ။^a 24 ပန် တီ ဂေ ဒူအီ ဝီ ပိုန့် ဒီ အာမုဝ်ဆဲ လွင် အန် တီ။ ဂေ တဝ်း၊ “မှဝ် အိုမ် ပီ ဒီ ဒျီင် ယေ။း” 25 ပန် တီ အာမုဝ်ဆဲ ဝီ မှာန့် ကာဆဝ် ဒီ ဇဝ်ဖြာ။ ဟဲ့ ဟွတ့်၊ ဇဝ်ဖြာ ဝီ ဘျ ဟေ အူ ကာဒင် ဒီ အန်။ အန် ဝီ ဒိုဝ်း ဟေ တီ၊ ဘျွာ ခဲင် အိုမ် တွိုန်။ ဟဲ့ ဟွတ့် အိုမ် ဝီ ဘဲန် အိုမ် ဆီငဲး အူ ဇေန့်၊ တဲး ဒူအီ ပွိုန် ဒီ ဒျီင် အိုမ် တီ။

ဒေါ ကွယ် ဂေ ဒူအီ အီဆာရေလ ဒီ ဒူင် ကွယ် ဂေ တွိုန်၊ ဇဝ်ဖြာ မိူဝ် စ်ု ဂေ ဘူင် ပီ အိုင် အန်၊ တဲး အန် ထေဝ် နဝ်း ဂေ၊ တဲး အန် နပ်၊ ယုဝ် ဂေ ဒီ ဒူပ် ဆီချာ အန်။ 26 အန် တဝ်း ဒီ ဂေ၊ “အုဝ် မုး အန် ဇဝ် ပီ ကြိုပ် ဘေ။ ဆေ ဘေ ဘော ထူမ် ဆီချာ ဂြုဝ်း ပီ ကာလာင် အုဝ်၊ ဆေ ဘေ မိူဝ် ထူမ် ဘူင် ပီ စ်ု အုဝ်၊ ဆေ ဘေ ထူမ် ဒူပ် ပီ စ်ု အုဝ် ဒီ ဘေ ဒွန် မျုဝ်၊ အုဝ် တူ တဲး ဘေ ကာဒုး ဒုက် ဒီ ဆဝ် ရောဂါ ပီ ဒွိုမ် တဲး အုဝ် ဒီ ဂေ ဒူအီ အဲဂိုပ်။ အုဝ် မုး ဇဝ်ဖြာ အီ တဲး ဆဝ် ဘေ ဒွန် မျုဝ် ဟြာယ် တူတ့်။”

27 ဝါယ် အန် တီ ဂေ ဒူအီ ဝီ ဟာဝ် ဇမ် မိူင် အေလိမ်။ မိူင် တီ မိုဝ်း အိုမ် တုဝ်း ဂိုဝ် ဒီ အာ ပ့လုဝ့်။ န့ ဘော မိုဝ်း ဟေ စိုက် ဘူ ဂိုဝ် ကာဒင်။ ဂေ ဒူအီ အီဆာရေလ ဝီ ချ ထိုပ် ဘိက် ဂေ၊ ကွယ် ကာတတ် အိုမ် တီ။