1 ဝါယ် အန် တီ ဂေ ဒူအီ အီဆာရေလ ဘောကာဂ့လျီတ် ဟာဝ် လေး ခဲင် မိူင် အေလိမ် တွိုန်။ ဘော အာ မာဂျီန် ဒီ ဂိုဝ် ဒီ ဖန် ဆီငဲ ဝါယ် ဟဲ့ လေး ဂေ ခဲင် မိူင် အဲဂိုပ်၊ ဂေ ဟဲ့ တး ဇမ် ဒူင် ကာဟဝ်း အူ ပ့လုဝ့်။ ဂေ တဲး ဒူင် ကွယ် ဂေ တီ စိူဝ် ဒူင် ကာဟဝ်း ဆေအိန်။ ဒူင် ကွယ် ဂေ တီ၊ န့ ကွယ် ကာတဲ မိူင် အေလိမ် ဂါယ် နွန် ဆီနာယ်။ 2 ဒေါ ကွယ် ဂေ ဒူင် ကာဟဝ်း ဆေအိန် တီ၊ ဂေ ဒူအီ ဘဲန် နဝ်း တူ အိုင် အာမုဝ်ဆဲ ဂါယ် အာရူန် ဘော ပိုန့် ဒီ ဂါယ်။ 3 ဂေ ဝီ တဝ်း ဒီ ဂါယ်၊ “ဆေ ဇဝ်ဖြာ တဲး ယေ ဘောကာဂ့လျီတ် ယမ် ခဲင် မိူင် အဲဂိုပ် တွိုန်၊ န့ မွှိုမ် လွှိုမ် ဒုက် ပီ လုဝ် ကာဒုး ယေ ဒေါ တီ နီ။ ဒေါ ကွယ် ယေ ခဲင် မိူင် အဲဂိုပ် ယေ ပွိုန် ဟူမ် ဖဲ ယင် ဘဲန် မျုဝ် ဘဲန် မျုဝ်။ ယေ ဘော မိုဝ်း ပီ ဒီ ဟူမ် ဆီငဲး၊ တဲး ဝတ့် ယေ ဂိုဝ်း။ ဘာယ် ယီ ဟဲ့ ယဲတ့် ယေ တး ဇမ် ဒူင် ကာဟဝ်း နီ၊ တဲး ယေ ဘောကာဂ့လျီတ် ဒီ ဘော ယမ် ကူပ် တူ မိုဝ်း ယေ ပီ ဒီ ဟူမ်။”

4 ဂေ ဟဲ့ ဟွတ့် တဝ်း ပါယ် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “အုဝ် ဒီ တဲး ပီ ဒီ ဟူမ် လူင် ခဲင် ဂါင်ဟြာဝ်၊ တဲး န့ ပီ ဂ့လာယ် စုဝ်း။ ဒွန် ဆီငဲ ဒွန် ဆီငဲ ဂေ ဒူအီ ကိူန် လုဝ် လေး ဒိုဝ်း အုန် ပီ ဒီ ဟူမ် တီ။ တဲး ဂေ ဒိုဝ်း အုန် ခဲ့ ပီ ပွိုန် ဂေ ဟူမ် အာဒါ အူ ဆီငဲ။ ပါယ် တီ အုဝ် ဒီ ထေဝ် နဝ်း ဂေ၊ ယုဝ် ဂေ ဒီ ထူမ် ဒူပ် ပီ စ်ု အုဝ် ဂေ ဘူင်။ 5 ဟီ ဇမ် ဆီငဲ န့ဒဝ်၊ ဒွန် အီ လုဝ် ဒိုဝ်း အုန် အာ ဘုန် လွှိုမ် ဒွန် ဆီငဲ တဲး အန် အုန် ပီ ဒီ ဟူမ် အန် တီ။”

6 ပန် တီ အာမုဝ်ဆဲ ဂါယ် အာရူန် ဝီ ကာလာင် ဒီ ဂေ ဒူအီ အီဆာရေလ၊ “အာတိုဝ် ခဲင် မှိုဝ် ဘေ ဒီ နပ် ဆီချာ၊ န့ မုး ဇဝ်ဖြာ အီ တိုယ် ဘေ လေး ခဲင် မိူင် အဲဂိုပ်။ 7 ဟီ ဇမ် ခဲညှာ ဆိန့်ဝး၊ ဘေ ဒီ ဘော ယိုဝ် အာရူင် ဘ့လာင် ဇဝ်ဖြာ၊ တဲး ဘေ နပ်၊ ဇဝ်ဖြာ ဟဲ့ ထူမ် ဂြုဝ်း တူ မွှိုမ် ပီ တဝ်း ဘေ ဒီ အန်။ ယာယ် အာ ဝီ တူ ပွိုန် ဘူင် မာဆေ။ ယာယ် ဘူင် ခဲ့ ပီ စ်ု ဇဝ်ဖြာ ယာယ် ဘူင်။ ခုဝ်၊ အာဝ် မုး ဘေ ကာလာင် နာ တူ မွှိုမ် ဒီ ယာယ်။ ဂြုဝ်း ဘေ တွိုန်၊ ဘေ ဟဲ့ ကာလာင် ဒီ ဇဝ်ဖြာ။ 8 ခဲင် မှိုဝ် ဇဝ်ဖြာ ဒီ တဲး ဘေ ပွိုန် ဒီ ဟာပ် ယင်။ ဆိန့်ဝး အန် ဒီ ဝီ ဒွါ ဘေ ဟူမ် ဘော ခါမုန်၊ တဲး ဘေ ပွိုန် ဒီ ဟူမ် ဖဲ၊ ဟူမ် ခဲ့ ပီ မွက့် ဘေ။ ဝါယ် အန် တီ ဘေ ဒီ ဘော နပ်၊ ဒေါ တဝ်း ဘေ ဂြုဝ်း အီ တူ မွှိုမ် တွိုန်၊ ဘေ ဟဲ့ တဝ်း ဂြုဝ်း တီ ဒီ ဇဝ်ဖြာ။”

9 အာမုဝ်ဆဲ ဂါယ် အာရူန် ဟဲ့ ဟွတ့် ကာလာင် ပါယ် တီ ဒီ ဒူအီ ကိူန်၊ အာမုဝ်ဆဲ ဝီ စ်ု အာရူန် ဘာင် ဂေ ဒူအီ ကိူန်၊ တဲး ဂေ တး ကွယ် ဒီ အာတ့် ဇဝ်ဖြာ၊ တဲး ဂေ နပ် ဇဝ်ဖြာ ဟဲ့ ထူမ် ပီ ကာလာင် ဂေ ဒီ အန်။

10 ဒေါ ကာလာင် အာရူန် ဒီ ဒူအီ ကိူန်၊ ဂေ ဘောကာဂ့လျီတ် ယွတ် နာ ဒူင် ကာဟဝ်း တွိုန်။ ဂေ ဘော ယိုဝ် အာရူင် ဘ့လာင် ဇဝ်ဖြာ အီ ဟဲ့ မွှိုမ် ယုဝ် ကာဆဝ် ဟဲ့ ကာပ့လုး ခဲင် န့အု။ 11 ပန် တီ ဇဝ်ဖြာ ဝီ ကာလာင် ဒီ အာမုဝ်ဆဲ တဝ်း၊ 12 “အုဝ် ဟဲ့ ထူမ် နာ တူ မွှိုမ် ပီ တဝ်း ဂေ ဒူအီ အီဆာရေလ။ တဲး မဲ ကာလာင် ဒီ ဂေ၊ ‘အာတိုဝ် ပြဲ ညှမ် အပ်၊ ဘေ ဒီ ပွိုန် ဒီ ဟာပ် ယင်။ ခဲညှာ ဆိန့်ဝး၊ ဘေ ဒီ ပွိုန် ဟူမ် ဖဲ ခါမုန်။ ဒေါ ယိုဝ် ဘေ ဇိုဝ် တီ ဒွန် မျုဝ်၊ ဘေ ဒီ နပ်၊ အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။’”

13 ဆီငဲ အန် တီ ဘာ ဒီ အပ်၊ မာ အာဘြူင့် ကိူန် ဟဲ့ တး ဘဲန် ဖိုင် ဘဲန် ဖိုင်၊ တး ကော နုဝ့် ခဲင် ဒူင် ချ ဒူအီ တွိုန်။ ပါ ခဲညှာ ဆိန့်ဝး၊ အိုမ် ဒီငါန် ဘော စုဝ်း ကွယ် ဒွန် ပ့လုဝ့်၊ ဝီ ရူပ် ဒူင် ချ ဂေ တွိုန်။ 14 ဝါယ် ဟဲ့ ဟိတ် ဟဲ့ ဟေန့် အိုမ် ဒီငါန်၊ ဂေ ဒူအီ ဝီ ယွတ်၊ န့ မိုဝ်း ကာဟိုင် ဒီတဲတ် ဒီဟြေဝ် အူ မျုဝ် ကွယ် နုဝ့် ဒဲင် ကာဟာတ့်။ န့ ဘော ပီ ဂဲတ် မာဂါ။ န့ မိူဝ် ပီ ကာဟိုင် ဘျြီ။ 15 ဒေါ ယိုဝ် ဂေ ဒူအီ အီဆာရေလ အန် တီ၊ ဂေ ဝီ လာယ် ဒီမွှတ် တဝ်း၊ “မာဆေ န့ မုး။း” ဂေ တဝ်း ပါယ် တီ ခုဝ်၊ ဂေ တူ နပ် ပီ မုး။

အာမုဝ်ဆဲ ဝီ တဝ်း ဒီ ဂေ၊ “အာတီ ဟဲ့ မုး ပီ ဒီ ဟူမ် ပီ ဒွါ ဇဝ်ဖြာ ဒီ ဘေ။ 16 ဇဝ်ဖြာ ဟဲ့ စ်ု ဘေ ဒွန် အီ၊ တဲး ဘေ ဟာဝ် ဒိုဝ်း အုန် ခဲ့ ပီ ပွိုန် ဟူမ် ဘေ၊ တဲး ဘေ ကော ဖဲ။ တဲး ဘေ ဒိုဝ်း၊ အူ ဝီ ကာဘက် အူ ဘ့လဲ ဒီ အူ ခ့ဝါက် အာဒါ ဒွန် အီ အီ ကွယ် ခဲင် န့ဟူမ် ဘေ။”

17 ဂေ ဒူအီ အီဆာရေလ ဘူင် ပီ စ်ု ဇဝ်ဖြာ ဂေ ဘူင်။ မင် အီ ဂေ ဒိုဝ်း အုန် ကိူန်၊ မင် အီ ဘော ဒိုဝ်း အုန် အီ စဲက်။ 18 ဟဲ့ ဟွတ့် ဂေ ဝီ ဂဝ် ပီ ဒိုဝ်း အုန် ဂေ ဒွန် ဝီ။ အာဆေ ဟဲ့ ဒိုဝ်း ကိူန်၊ အန် တူ ဝီ မိုဝ်း ဒီ ကာလူယ်။ အာဆေ ဟဲ့ ဒိုဝ်း အုန် အီ စဲက်၊ အန် တူ လုဝ် ပေါ န့ ပွါ။ ဒွန် အီ မိုဝ်း ခဲ့ ပီ လုဝ် အန်။

19 အာမုဝ်ဆဲ ဝီ တဝ်း ဒီ ဂေ၊ “ကွဲ့ အုန် ပီ ဒီ ဟူမ် တီ၊ တဲး န့ ကော ဇမ် ခဲညှာ။” 20 ဒူအီ မင် အီ ယီ တူ ထူမ် ပီ တဝ်း အန်။ ဂေ ဘော ဂဲပ် အုန် မင် ကာလဝ့်၊ တဲး န့ ကော ဇမ် ပါ ခဲညှာ ဆိန့်ဝး။ ပီ ဂဲပ် အုန် ဂေ တွိုန်၊ န့ ဝီ ဘဲန် မ့ပြတ့် ကော နုဝ့် ခဲင် ဆီလယ့်။ န့ ဘော ကာစုး ဒီ အုး အမ်။ ပန် တီ အာမုဝ်ဆဲ ဝီ ရူ ဒီ ဂေ လွင် အန် တီ။

21 အာဒါ ဒဝ် ဆီငဲ ဂေ ဒူအီ လေး ဒိုဝ်း အုန် ပီ ဒီ ဟူမ် ဇိုဝ် တီ ဒွန် ဆီငဲ၊ တဲး ဂေ ပွိုန် ခဲ့ ပီ လုဝ် ဂေ။ ဝါယ် ဟဲ့ ဝီ ထွင် ဆီငဲ၊ ဝီ ကြဲ ဒီ ကာဟွာ့၊ ပီ ဒီ ဟူမ် တွိုန် ဝီ လာတ့်၊ အာဝ် ဟူ ပွိုန် ဒိုဝ်း အုန်။ 22 ဒွန် ဇေန့်၊ ဒေါ ဇမ် ဆီငဲ န့ဒဝ်၊ ဂေ ဒူအီ လေး ဒိုဝ်း အုန် အာ ဘုန်၊ တဲး န့ ဘဲန် အာဒါ အူ ဝီ အူယ် ဘ့လဲ။ ဂေ ဒူအီ အီ မုး ဒါ တာင်၊ ဂေ ဝီ တး ကာလာင် လွင် အန် တီ ဒီ အာမုဝ်ဆဲ။ 23 အာမုဝ်ဆဲ ဝီ တဝ်း ဒီ ဂေ ဒါ တာင်၊ “ဇဝ်ဖြာ ဟဲ့ စ်ု ဘေ ဒိုဝ်း အာ ဘုန် ပါယ် တီ။ ခဲညှာ န့ ဒီ မုး ဆီငဲ ဒီလှဝ်၊ ဆီငဲ ပီ လုဝ် လှုဝ်း ဘေ ဇဝ်ဖြာ။ ခုဝ်၊ တဲး ဘေ ခုဝ် ခဲ့ ဆီ ခုဝ် ဘေ။ တဲး ဘေ ဒင် ခဲ့ ဆီ ဒင် ဘေ။ တဲး ဘေ မိုင် အုန် အီ ဆီ ဂိတ် အာတိုဝ်၊ တဲး ဘေ ဝီ ပွိုန် ဒီ ဟူမ် ခဲညှာ။”

24 ဂေ ဒူအီ ဝီ ဘူင် ပီ စ်ု အာမုဝ်ဆဲ၊ ဂဲပ် အုန် အာဒါ ခဲညှာ။ ဆီငဲ အန် တီ န့ ယီ တူ မိုဝ်း မ့ပြတ့်။ န့ မိူဝ် တူ ဘဲန် အုး အမ်။ 25 ကော ဇမ် ဆီငဲ ဒီလှဝ်၊ အာမုဝ်ဆဲ ဝီ တဝ်း၊ “အာတိုဝ် နီ တဲး ဘေ ဝီ ဟူမ် ပီ ဂဲပ် အုန် ဘေ အာမှိုဝ်။ ခုဝ်၊ အာတိုဝ် ဝီ မုး ဆီငဲ ဒီလှဝ်၊ ဆီငဲ ပီ လုဝ် လှုဝ်း အေ ဇဝ်ဖြာ။ အာတိုဝ် နီ၊ ဘေ တူ ဝီ ပွိုန် ယိုဝ် ပီ ဒီ ဟူမ် ဇိုဝ် တီ ဒဲင် ကာဟာတ့် တွိုန်။ 26 ဘေ လုဝ် ဒိုဝ်း ပီ ဒီ ဟူမ် ဇိုဝ် တီ အာဒါ ဒဝ် ဆီငဲ။ ယီ ဇမ် ဆီငဲ မ့ဘူ၊ န့ မုး ဆီငဲ ဒီလှဝ်။ ပီ ဒီ ဟူမ် တွိုန်၊ ဘေ တူ ဝီ ပွိုန် ယိုဝ်၊ တူ ဝီ ပွိုန် ဒီ ဒိုဝ်း မာဆေ။”

27 ဒေါ ဟဲ့ ဇမ် ဆီငဲ မ့ဘူ၊ န့ ဝီ မိုဝ်း မင် အီ၊ ဂေ တဝ်း ဒီ ဟာဝ် ဟြေတ့် ပီ ဒီ ဟူမ်။ ဂေ ယီ တူ ယိုဝ် မာဆေ။ 28 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “ဘေ တူ ဆီ ထူမ် ဒူပ် ပီ စ်ု အုဝ် ဘေ ဘူင်။ ပန် မှဝ် ဘေ ဒီ ဝီ ကာပ့လု နဝ်း၊ ဝီ ထူမ် ဒူပ် ပီ ကာလာင် အုဝ်။း 29 ဘေ လုဝ် လှုဝ်း ဆေဆေ။ အုဝ် ဟဲ့ ဒွါ ဘေ မိုဝ်း ဆီငဲ ဒီလှဝ် တီ။ ခုဝ် အန် တီ၊ ဒေါ ဇမ် ဆီငဲ န့ဒဝ်၊ အုဝ် ဟဲ့ ဒွါ ပီ ဒီ ဟူမ် ဒီ ဘေ၊ တဲး န့ ဂ့လိုမ် ဘော အာ ဆီငဲ။ ဒေါ ဇမ် ဆီငဲ မ့ဘူ၊ ဒွန် အီ လုဝ် ကွယ် ဒူင် ကွယ် အန်။ အာဝ် လုဝ် လေး ဟာဝ် ပေါ အူ ပ့လုဝ့်။” 30 ပါယ် တီ ဒေါ ဟဲ့ ဇမ် ဆီငဲ န့ ဘူ၊ ဒွန် ဇေန့် ဒွန် ဇေန့်၊ ဂေ ဒူအီ ကွယ် ဒီလှဝ်၊ တူ ဘူင် မာဆေ။

31 ဂေ ဒူအီ အီဆာရေလ ယီ တဝ်း၊ ပီ ဒီ ဟူမ် တီ၊ န့ စိူဝ် ခါမုန် မာနာ။ ဒေါ ဒွိုမ် ယိုဝ် ဂေ ခါမုန် တီ ခါ အာတ့်၊ ဂေ ဟဲ့ ဒွိုမ် တဝ်း၊ “န့ မုး မာဆေ။း” ခဲင် ဂြုဝ်း ဂေ၊ “န့ မုး မာဆေ။း” ဝီ လေး “မာနာ။” ခုဝ်၊ ဂေ ဟဲ့ တဲး န့ စိူဝ် ခါမုန် မာနာ။ ခါမုန် တီ ဟဲ့ လုယ် ပီ ကာအာင် ဖူဂီ။ န့ ဘော ဆီငဲး ပီ ခါမုန် ပီ ဘူင် ဒူအီ ဟပ် ငါမ် မာဖျီန်။ 32 ဝါယ် အန် တီ အာမုဝ်ဆဲ ဝီ တဝ်း၊ “ဇဝ်ဖြာ ဟဲ့ စ်ု ဘေ၊ တဲး ဘေ ဘ့လေး အုန် ခါမုန် မာနာ တွိုန်၊ အာဒါ အူ ကာလုဝ့်၊ တဲး ဘော လှုက်လှာန် ဘေ နပ် လွင် အန် တီ၊ တဲး ဘော ဂေ ပွိုန် ဒီ ယိုဝ် ပီ ဒီ ဟူမ် ဘေ၊ ပီ ဒွါ ဇဝ်ဖြာ ဒီ ဘေ။ န့ မုး ပီ ဒွါ အန်၊ တဲး ဘေ ဟူမ် ဒေါ ကွယ် ဘေ ခဲင် ဒူင် ကာဟဝ်း၊ ဒေါ တိုယ် ဇဝ်ဖြာ ဘေ လေး ခဲင် မိူင် အဲဂိုပ် တွိုန်။”

33 ပန် တီ အာမုဝ်ဆဲ ဝီ စ်ု အာရူန် ဒိုဝ်း ကာလုဝ့် အူ ဘူင့်၊ တဲး အန် အုန် ခါမုန် မာနာ နာ ခဲင်၊ တဲး န့ ဘဲန် အူ ဘ့လဲ ဒီ အူ ခ့ဝါက်။ တဲး အန် ဘ့လေး အုန် ဒီ အာတ့် ဇဝ်ဖြာ၊ တဲး ဂေ ဒူအီ အီဆာရေလ ဒွန် စုဝ် ဒွန် ဘာန် ကော နပ် လွင် အန် တီ။

34 အာရူန် ဝီ ဒိုဝ်း ကာလုဝ့် အူ ဘူင့်၊ ဟပ် ခါမုန် မာနာ တွိုန် နာ ခဲင်၊ အုန် ဒီ အာတ့် ဇီဒိူက် အီ တဲး ဒူအီ နပ် လွင် ဇဝ်ဖြာ။ န့ မုး ဇီဒိူက် ပီ စ်ု ဇဝ်ဖြာ ဂေ ဘူင်။ ပါယ် တီ အန် ဘူင်၊ တဲး န့ ပီ ပီ စ်ု ဇဝ်ဖြာ ဒီ အာမုဝ်ဆဲ။ 35 အာဒါ ဖွုန် ဂိုဝ် ဆီနမ်၊ ဂေ ဒူအီ အီဆာရေလ ဘော ဟူမ် ခါမုန် မာနာ တွိုန်။ ဂေ ဘော တး ဇမ် ခဲင် မိူင် ကာနန့်၊ ဇမ် ဒူင် ကွယ် အီ ဟဝ်၊ ဂေ အာဝ် ဟူ မိုဝ်း ခါမုန် မာနာ တွိုန်။

36 ဒေါ မွိုန်၊ ဂေ ဒူအီ အီဆာရေလ တူ ဂဝ် ဘဲန် ဘ့လဲ။ ဂေ မိုဝ်း ဆီလယ့် အူ မျုဝ်၊ တဝ်း န့ မုး အေဖာ။ အူ အေဖာ ဝီ မိုဝ်း ဂိုဝ် အုဝ်မာ။ အူ အုဝ်မာ တီ ယီ မိုဝ်း ကာဘက် အူ ဘ့လဲ ဒီ အူ ခ့ဝါက်။