ခါန် 17
လွင် အိုမ် လေး ခဲင် မာဝ်
1 ဝါယ် အန် တီ ဂေ ဒူအီ အီဆာရေလ ဘော ဖိုင် လေး ခဲင် ဒူင် ကာဟဝ်း အီ စိူဝ် ဆေအိန် တွိုန်။ ဂေ ဝီ ဟာဝ် ဒွန် နာ ဒွန် ပ့လုဝ့် ပီ တိုယ် ဇဝ်ဖြာ ဂေ ဟာဝ်။ ဟဲ့ ဟွတ့်၊ ဂေ ဝီ တး ဇမ် အူ ပ့လုဝ့် အီ စိူဝ် ရေဖီဒိမ်။ ဒူင် ချ ဂေ တီ အာဝ် မိုဝ်း အိုမ် ဒျီင်။ 2 ပန် တီ ဂေ ဝီ တး ပိုန့် ဒီ အာမုဝ်ဆဲ လွင် အန် တီ။ ဂေ တဝ်း၊ “တဲး မဲ ဒွါ ယေ ဒျီင် အိုမ်။” အာမုဝ်ဆဲ ဝီ တဝ်း ဒီ ဂေ၊ “မှဝ် န့ ပါယ် ပီ ပိုန့် ဘေ ဒီ အုဝ် လွင် အန် တီ။း မှဝ် န့ ပါယ် ပီ ထေဝ် ဘေ ဇဝ်ဖြာ ယုဝ် အန် နပ် တူ နပ် ဒီ စွယ် အေ။း”
3 ဂေ ဒူအီ ကိူန် ယီ ဘဲန် ဆီ ဒျီင် ကာဆဝ် အိုမ်။ ခုဝ်၊ ဂေ ဝီ ပိုန့် အာမုဝ်ဆဲ တဝ်း၊ “မှဝ် န့ ပါယ် ပီ တိုယ် မဲ ယေ လေး ခဲင် မိူင် အဲဂိုပ်။း မှဝ် န့ ပါယ် ပီ ဘူင် မဲ၊ တဲး ဘော ယေ ဘော ဂွန် ယေ ဘော ဒုဝ် ဆတ်ဒါဝါ ယေ လုဝ် ယမ်။း ယေ ဘောကာဂ့လျီတ် ဒီ ဘော ယမ် ကူပ် တူ မိုဝ်း ယေ ဒီ ဒျီင် အိုမ်။”
4 အာမုဝ်ဆဲ ဝီ ဆာခိုဝ် ဒီ ဇဝ်ဖြာ တဝ်း၊ “မာဆေ ပီ ဒီ လုဝ် ဘူင် အုဝ် ဒီ ဒူအီ ဂေ နီ။း ဂေ ဟဲ့ ငှာ ဒီ ဒိုဝ်း မာဝ် ဝိုန့် အုဝ်၊ ငှာ ဒီ ငဝ်း ယမ် အုဝ်။”
5 ဇဝ်ဖြာ ဝီ တဝ်း ဒီ အန်၊ “တဲး မဲ ဟာဝ် ယဲတ့် ဒီ အာတ့် ဂေ ဒူအီ ကိူန်။ တဲး မဲ ဘော ဒဲ့ ဒါ တာင် မင် အီ၊ တဲး ဂေ ဒူပ် မဲ။ ဘော န့ကြွုန် မဲ၊ ပီ ဒွိုမ် ဒိုဝ်း မဲ ဒေါ မး မဲ အိုမ် ခဲင် ဘ့လဲင် နီလာ တွိုန်၊ မဲ လုဝ် ဒိုဝ်း။ 6 အုဝ် ဒီ ကွယ် ဒီ အာတ့် မဲ ဒီ ခူပ် မာဝ် တာင် အီ ကွယ် ဒဲင် နွန် ဆီနာယ်။ ဒေါ အန် တီ တဲး မဲ မး မာဝ် တွိုန်၊ တာ န့ကြွုန် မဲ။ ပန် တီ အိုမ် ဒီ လေး ခဲင် မာဝ်၊ တဲး ဒူအီ ပွိုန် ဒီ ဒျီင်။” ပန် တီ အာမုဝ်ဆဲ ဝီ ဘူင် ပါယ် တီ တဲး ဂေ ဒါ တာင် ခဲင် မိူင် အီဆာရေလ ဘော ပွိုန် ဒီ ယိုဝ်။ 7 ဝါယ် အန် တီ ဂေ ဒူအီ တဲး ဒူင် တီ စိူဝ် မာဆာ။ မင် အီ ဂေ ဘော တဝ်း၊ ဒူင် တီ၊ အန် စိူဝ် မေရီဘာ။ ခဲင် ဂြုဝ်း ဟဲဘြဲ “မာဆာ” ဂေ တဝ်း၊ “ထေဝ်၊ ယုဝ် အန် နပ် ဒီ စွယ်။” ဂြုဝ်း “မေရီဘာ” တွိုန်၊ ဂေ တဝ်း၊ “ပိုန့်။” ဂေ ဒူအီ အီဆာရေလ တဲး ဒူင် တီ စိူဝ် ပါယ် တီ။ ခုဝ်၊ ဒူင် ကွယ် ဂေ တီ၊ ဂေ ဟဲ့ ထေဝ် ဇဝ်ဖြာ၊ ယုဝ် အန် နပ် တူ နပ် ဒီ စွယ် ဂေ။ ဂေ မိူဝ် ဟဲ့ တဝ်း “ယေ တူ နပ် ယုဝ် ဇဝ်ဖြာ ကွယ် တူ ကွယ် ရိုမ် ဒူပ် ယေ။”
လွင် ဂေ ဒူအီ အီဆာရေလ ပဲ ဂေ ဒူအီ အာမာလေက်
8 ဒေါ ကွယ် ဂေ ဒူအီ အီဆာရေလ ဒီ မိူင် ရေဖီဒိမ် တွိုန်၊ ဂေ ဒါ ဆိုက် မိူင် အာမာလေက် ဝီ တး ကာဂုဝ်း ဒီ ဂေ။ 9 အာမုဝ်ဆဲ ဝီ တဝ်း ဒီ အာယုဝ်ဆူအာ၊ “တဲး မဲ ရဝ်း ဒူအီ မင် အီ၊ တဲး ဂေ ဟာဝ် ကာဂုဝ်း ဒီ ဒူအီ အာမာလေက် တွိုန်။ ခဲညှာ အုဝ် ဒီ ကွယ် နာ ကာဒဲ့ နွန်။ အုဝ် ဒီ ဝီ ဂူင့် န့ကြွုန် ပီ ဒွါ ဇဝ်ဖြာ ဒီ အုဝ်။”
10 အာယုဝ်ဆူအာ ဝီ ဘူင် ပီ စ်ု အာမုဝ်ဆဲ အန် ဘူင်။ အန် ဝီ လေး ကာဂုဝ်း ဒီ ဂေ ဒူအီ အာမာလေက်။ ဘော အာမုဝ်ဆဲ၊ ဘော အာရူန် ဘော အာဟူရာ ဝီ ဟာဝ် ဟုဝ့် နာ ဒဲင် ကာဒဲ့ နွန်။ 11 ဒေါ စုဝ့် ဆူင့် အာမုဝ်ဆဲ ဒဲ အန်၊ ဂေ ဒူအီ အီဆာရေလ ပဲ ဂေ ဒူအီ အာမာလေက်။ ဒေါ ဘ့လေး လူင် အန် ဒဲ အန်၊ ဂေ ဒူအီ အာမာလေက် ဝီ ပဲ ဂေ ဒူအီ အီဆာရေလ။ 12 အာမုဝ်ဆဲ ယီ ကြဲ ဒီ ဒီလှး။ ပန် တီ ဂေ ဝီ ဒိုဝ်း မာဝ် တာင်၊ တဲး အာမုဝ်ဆဲ တုတ့် နာ ဒဲင်။ ဟဲ့ ဟွတ့်၊ အာရူန် ဂါယ် အာဟူရာ ဝီ ကွယ် ဒီ ခူပ် အာမုဝ်ဆဲ၊ အူ ဝီ အူ ဘ့လာက်၊ ဝီ ပါ ဒဲ အန်၊ တဲး ဒဲ အန် ကွယ် နာ ဒဲင်၊ ကွဲ့ တဲး အန် ဘ့လေး လူင် ဒဲ အန်။ ဂေ ဝီ ဘူင် ပါယ် တီ တဲး န့ ကော ဇမ် အာခြာဝ် ဂေတ့် ဆီငဲ။ 13 ပါယ် တီ အာယုဝ်ဆူအာ ဝီ ပဲ ဂေ ဒူအီ အာမာလေက်၊ ဒေါ တး လာယ် ကာဂုဝ်း ဂေ။
14 ဝါယ် အန် တီ ဇဝ်ဖြာ တဝ်း ဒီ အာမုဝ်ဆဲ၊ “တဲး မဲ ဒဲမ် အုန် လွင် အန် တီ ခဲင် ဘပ်၊ တဲး ဒူအီ လှုဝ်း၊ ကွဲ့ တဲး ဂေ ပိဝ်။ ဘေ လုဝ် ကာလာင် ဒီ အာယုဝ်ဆူအာ၊ တဲး အန် နပ် ဆီချာ ပီ ဒီ ဘူင် အုဝ်။ အုဝ် ဒီ ဘူင် တဲး ဂေ ဒူအီ အာမာလေက် စှိုမ် တူတ့်၊ ကွဲ့ တဲး အာဆေ ဝီ လှုဝ်း ဂေ ဒေါ မှဝ်။”