1 န့ ယီ မိုဝ်း အာယေထာရုဝ် တွိုန်၊ အန် မုး ဘိုဝ် အာမုဝ်ဆဲ။ အန် ဘော မုး ဒူအီ လှူ ဒီ ဇဝ်ဖြာ ခဲင် မိူင် မီဒီအာန်။ အန် ဟဲ့ ထူမ် လွင် ဘဲန် မျုဝ် ဘဲန် မျုဝ် ပီ ဘူင် ဇဝ်ဖြာ ဒီ အာမုဝ်ဆဲ ဘော ဒီ ဂေ ဒူအီ အီဆာရေလ။ အန် မိူဝ် ဟဲ့ ယိုဝ် ဆာဒါင် လွင် ဇဝ်ဖြာ တဲး ဂေ ဒူအီ အီဆာရေလ လေး ခဲင် မိူင် အဲဂိုပ်။

2 ခါ အာတ့် အာမုဝ်ဆဲ ဟဲ့ ဒွိုမ် တိုယ် နာင် ဆီပုဝ်ရာ အီ မုး အီဘိုန့် အန် ဘော ဂွန် အန် အာ ဝီ၊ တဲး ဂေ ဝီ ဝေန့် ဒူင် ကွယ် ဘြိမ် အီဘိုန့် တွိုန်။ ဘိုဝ် အာမုဝ်ဆဲ ဝီ တဲး ဂွန် အီဘိုန့် အန် ဝီ ကွယ် ခဲင် ကာင် အန်။ 3 လွင် ဂွန် ဂိန့် အန် အာမုဝ်ဆဲ ဟဲ့ ဒွိုမ် တဝ်း၊ “အုဝ် ဟဲ့ ဘဲန် ခဲတ့် ခဲင် မိူင် ဒူအီ အာမျုဝ် ဟဝ်။” ခုဝ် အန် တီ၊ အန် ဟဲ့ ဒွိုမ် တဲး ဂွန် တီ စိူဝ် အာဂေဆူမ်။^a 4 ဝါယ် အန် တီ အန် ဝီ မိုဝ်း ဂွန် ပေါ အူ ဝီ။ အန် တဝ်း၊ “ဇဝ်ဖြာ ပီ ကြိုပ် ဂုန့် အုဝ်၊ အန် ဟဲ့ စွယ် အုဝ်၊ ကွဲ့ တဲး အုဝ် ယမ် ဒီ မာပွါ့ လာင် ခုန်ဒီခမ် ဖာရုဝ်။” ခုဝ်၊ အန် တဲး ဂွန် တီ စိူဝ် အာအေလီအေဇာ။^b

5 ဝါယ် အန် တီ အာမုဝ်ဆဲ ဟဲ့ ဟွတ့် တိုယ် ဂေ ဒူအီ အီဆာရေလ လေး ခဲင် မိူင် အဲဂိုပ်၊ အာယေထာရုဝ် ဝီ တး ဇမ် ဒူင် ကွယ် အန်။ ဘော အီဘိုန့် အာမုဝ်ဆဲ ဘော ဂွန် အန် အာ ဝီ တွိုန် ဟဲ့ ဟာဝ် ဒူပ် အာယေထာရုဝ်။ ဂေ ကာတုန့် အာမုဝ်ဆဲ ဒေါ ချ ဂေ ဒူအီ အီဆာရေလ ခဲင် ဒူင် ကာဟဝ်း အီ ကွယ် ကာတတ် နွန် ဇဝ်ဖြာ တွိုန်။ 6 အာယေထာရုဝ် ဝီ တိုယ် ဒူအီ အူ ဝီ၊ တဲး အန် ဟာဝ် ကာလာင် ဒီ အာမုဝ်ဆဲ တဝ်း၊ “အာယေထာရုဝ် အီ မုး ဘိုဝ် မဲ တွိုန်၊ အန် ဟဲ့ တး တိုယ် အီဘိုန့် မဲ ဘော ဂွန် မဲ၊ တဲး ဂေ တး ဇမ် ဒူင် ကွယ် မဲ။”

7 ပန် တီ အာမုဝ်ဆဲ လေး ဟာဝ် ရွုး ဘိုဝ် အန်၊ ဂူမ် ဒီ အာတ့် အန် ဘော အုး အန်။ ဟဲ့ ဟွတ့် ရွုး၊ ဂေ ဝီ လိုပ် ခဲင် ထိုပ် ဘိက် အာမုဝ်ဆဲ။ 8 အာမုဝ်ဆဲ ကာလာင် ဒီ ဘိုဝ် အန် လွင် ပီ ဘူင် ဇဝ်ဖြာ ဒီ ခုန်ဒီခမ် ဖာရုဝ် ဘော ဒီ ဂေ ဒူအီ အဲဂိုပ်။ အန် ဝီ ခဲ လွင် ပီ ပါယ် ဇဝ်ဖြာ ဒီ စွယ် ဂေ ဒူအီ အီဆာရေလ။ အန် ဘော ကာလာင် လွင် ဒုက် ဘဲန် မျုဝ် ဘဲန် မျုဝ် ပီ ကာဒုး ဂေ ဒေါ ဟာဝ် ဂေ ဒူပ် န့တေန့်။ အန် မိူဝ် ခဲ လွင် ပီ စွယ် ဇဝ်ဖြာ ဒွန် မျုဝ်။

9 အာယေထာရုဝ် ဝီ ထူမ် ဒွန် မျုဝ် ဇိုဝ် တီ၊ န့ ဝီ ဘဲန် နဝ်း ဒါခိုယ် ဒီ အန်။ 10 အန် ဝီ တဝ်း၊ “အုဝ် အိူပ် ဇဝ်ဖြာ။ အန် ဟဲ့ စွယ် ဘော မဲ ဘော ဂေ ဒူအီ မဲ၊ ကွဲ့ ဟူ တဲး ခုန်ဒီခမ် ဖာရုဝ် ဘော ဂေ ဒူအီ အဲဂိုပ် ပွိုန် ဒီ ဝီ အိုပ် ဘေ။ 11 အုဝ် မိူဝ် ဟဲ့ နပ် ဒေါ တီ နီ၊ ဇဝ်ဖြာ ဟဲ့ တာင် လွှိုမ် ဂေ ဇဝ် ပီ ကြိုပ် ဒူအီ ဟဝ်။ ဂေ ဒူအီ အီ ဒွိုမ် ပီခိုက် နဝ်း ဂေ၊ ဘူင် နာ တူ မွှိုမ် ဒီ ဒူအီ အီဆာရေလ၊ ဂေ ဟဲ့ ကာဒုး ဇဝ်ဖြာ ဒမ် မှာပ် ဒီ ဂေ ဒွန် အီ။” 12 ဝါယ် အန် တီ အာယေထာရုဝ် လှူ ဒုဝ် ဆတ်ဒါဝါ ဒီ ဇဝ်ဖြာ။ ဘော ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ ဘဲန် မျုဝ် ဘဲန် မျုဝ်၊ အန် ဝီ လှူ ဒီ ဇဝ်ဖြာ။ ဘော အာရူန် ဘော ဂေ ဒါ တာင် ခဲင် မိူင် အီဆာရေလ၊ ဂေ ဘောကာဂ့လျီတ် တး ဟူမ် ရိုမ် ဒူပ် ဘိုဝ် အာမုဝ်ဆဲ တွိုန်၊ တဲး န့ ဘဲန် ဘ့လွယ် ဘွတ်၊ ဘ့လွယ် ပီ ဟူမ် ဂေ ဒီ အာတ့် ဇဝ်ဖြာ။

13 ပါ ခဲညှာ၊ အာမုဝ်ဆဲ တုတ့် ဒူင် ကွယ် အန်၊ ဆုင်ဖျာတ် အာမူ ဂေ ဒူအီ အီဆာရေလ။ အူ ဆိန့် ဆိန့်ဝး စေဝ် ကော ဇမ် ခဲင် မှိုဝ်၊ ဂေ ဒူအီ ကိူန် ဟဲ့ တး ကာလာင် ဒီ အန် လွင် ပီ လာယ် ကာယွင့် ဂေ၊ တဲး အန် ဆုင်ဖျာတ် အာမူ ဂေ။ 14 ဘိုဝ် အာမုဝ်ဆဲ ယီ ယိုဝ် ပီ ဘူင် အန် ဒွန် မျုဝ်၊ အန် ဝီ ကာလာင် ဒီ အာမုဝ်ဆဲ၊ “မာဆေ ပီ ဘူင် မဲ ဒီ ဒူအီ ဂေ နီ။း မှဝ် မ့ပါယ် ပီ ကွယ် မဲ အူ ဝီ၊ ဆုင်ဖျာတ် အာမူ ဂေ ဒေါ ကွယ် ကိူန် ဂေ နီ။း ဂေ ဘော နှဝ့် ဒူင် ဝန် ကော ဇမ် ခဲင် မှိုဝ်။ မှဝ် န့ ပါယ် ပီ ဘူင် မဲ အူ ဝီ ဂါန် ဇိုဝ် တီ။း”

15 အာမုဝ်ဆဲ ဝီ တဝ်း၊ “ဂေ ဒူအီ နီ၊ ဂေ တး ဇမ် ဒူင် ကွယ် အုဝ် ခုဝ်၊ ဂေ ဆီ တဲး အုဝ် ကာလာင် ဒီ ဂေ မာဆေ ပီ ဒမ် ဇဝ်ဖြာ ဂေ ဘူင်။ 16 ဆေ ဂေ တူ လာယ် ဖြူမ်၊ ဂေ ဝီ တး ကာလာင် လွင် အန် တီ၊ တဲး အုဝ် ထူမ်။ အုဝ် ဝီ ဆုင်ဖျာတ် အာမူ ဂေ။ အုဝ် ဝီ ကာလာင် ဒီ ဂေ၊ မာဆေ ပီ ဘ့လေး အုန် ဒါရာ ဇဝ်ဖြာ လွင် အန် တီ။ အုဝ် မိူဝ် ကာလာင် မာဆေ ပီ ဒမ် ဇဝ်ဖြာ ဂေ ဘူင်။”

17 ဘိုဝ် အာမုဝ်ဆဲ ဝီ တဝ်း၊ “ပီ ဘူင် မဲ နီ၊ န့ တူ မွှိုမ်၊ တူ ကျ။ 18 ဆေ မဲ ဘူင် ဟာဝ် ပါယ် တီ ဘော မဲ ဘော ဂေ ဒူအီ ကိူန်၊ ဘေ တူ ခမ်။ ဘေ ဒီ ကြဲ ဒီ နုန် ကာဆဝ်။ ဂါန် ပီ ဘူင် မဲ၊ မဲ အူ ဝီ တူ ပဲ ဒီ ဘူင်။ 19 တဲး မဲ ထူမ် ဂြုဝ်း အုဝ် ဒေါ တီ နီ။ အုဝ် ဒီ ကာလာင် ဒီ မဲ၊ မှဝ် မဲ ဒီ ပါယ် ဒီ ဘူင် တဲး မဲ အွင်။ တဲး ဘော ဇဝ်ဖြာ စွယ် မဲ။ မဲ လုဝ် ဘဲန် ဒူအီ အီ ကာလာင် အာမူ ဒူအီ ဒီ ဇဝ်ဖြာ။ 20 မဲ ဘော လုဝ် မာနုဝ် ဒူအီ လွင် ပီ ကာလာင် ဇဝ်ဖြာ ဒီ ဂေ၊ ပီ ဒမ် ဒါရာ ဇဝ်ဖြာ ဂေ ဘူင်။ မဲ ဘော လုဝ် တဲး ဂေ ဒူအီ နပ် ပီ လုဝ် ဂေ ဘူင် တဲး န့ လဝ့် နဝ်း ဇဝ်ဖြာ။ 21 မဲ ယီ လုဝ် ရဝ်း ဒူအီ အီ ပွိုန် ဘူင် ဂါန် မဲ။ ဒူအီ ပီ ဒီ ရဝ်း မဲ တီ၊ ဂေ လုဝ် နပ် ဒီ ဆုင်ဖျာတ် ပီ ဘူင် ဒူအီ အီ တူ မှာန် ဒွန် မျုဝ်။ မဲ လုဝ် ရဝ်း ဒူအီ အီ ဒူပ် ဆီချာ ဇဝ်ဖြာ၊ ဒူအီ အီ မိုဝ်း နဝ်း ဆိူဝ်၊ တူ မှာန့် ရွိုန် ဒီ အီ ဟဝ်။ ဒူအီ ဇိုဝ် တီ၊ မဲ လုဝ် စ်ု ဂေ ဘဲန် ဒါ ကာညာ အီ အိုပ် ဒူအီ ဘဲန် ဖိုင် ဘဲန် ဖိုင်။ မင် အီ လုဝ် အိုပ် ဒူအီ အူ ဟြဲန့်၊ မင် အီ လုဝ် အိုပ် ဒူအီ အူ မာယဝ်း၊ ဖန် ဂိုဝ်၊ ဘော ဂိုဝ် ဝီ။ 22 တဲး မဲ တဲး ဂေ ဘဲန် ဒါ တာင် အီ ဆုင်ဖျာတ် အာမူ ဂေ ဒူအီ ပီ အိုပ် ဂေ ဆေဆေ။ ဆေ န့ ယီ မိုဝ်း အာမူ အီ ညှာပ် လွှိုမ် ပီ ပဲ ဂေ၊ တဲး ဂေ ဝီ ကာလာင် လွင် အန် တီ ဒီ မဲ။ အာမူ ဒွန် မျုဝ်၊ အီ တူ ညှာပ် ဒီ ဆုင်ဖျာတ်၊ တဲး ဂေ ဒါ တာင် ဆုင်ဖျာတ် ရာင် ဂေ။ ပါယ် တီ ဂေ ဒူအီ ဟဝ် ပွိုန် ဒီ စွယ် မဲ၊ ကွဲ့ တဲး ဂါန် မဲ ကိူန် ကာဆဝ်။ 23 ဆေ ပီ တဝ်း အုဝ် နီ ဘော လဝ့် နဝ်း ဇဝ်ဖြာ၊ ဆေ မဲ ဘော ဘူင် ပါယ် တီ မဲ ဘော ဒီ ပဲ ဒီ ဘူင် တူတ့် ပီ လုဝ် မဲ ဘူင်။ ဘော ဂေ ဒူအီ အီ တး ဒီ မဲ၊ ဂေ ဒီ ဘော မိုဝ်း နဝ်း ဒါခိုယ်၊ ဝီ ဝေန့် ဒူင် ကွယ် ဂေ။”

24 အန် ဟဲ့ ဟွတ့် ကာလာင် ဇိုဝ် တီ ဒွန် မျုဝ်၊ အာမုဝ်ဆဲ ဝီ ထူမ် ဒူပ် ဂြုဝ်း ဘိုဝ် အန် တီ။ အန် ဝီ ဘူင် တူတ့် ဒွန် မျုဝ် ပီ မာနုဝ် ဘိုဝ် အန်။ 25 အန် ဝီ ယွတ် ဂေ ဒူအီ အီဆာရေလ ဘောကာဂ့လျီတ်၊ ဝီ ရဝ်း ဒူအီ အီ ပွိုန် ဆုင်ဖျာတ် အာမူ အီ၊ တဲး ဂေ ဘဲန် ဒါ တာင်၊ တဲး ဂေ ဘဲန် ဒါ ကာညာ အီ အိုပ် ဒူအီ ဘဲန် ဖိုင် ဘဲန် ဖိုင်။ မင် အီ အိုပ် အူ ဟြဲန့်၊ အူ မာယဝ်း၊ ဖန် ဂိုဝ် ဘော ဂိုဝ် ဝီ။ 26 ဆေဆေ ဂေ ဝီ ဆုင်ဖျာတ် အာမူ ဒွန် မျုဝ် ဒီ ဂေ ဒူအီ ပီ အိုပ် ဂေ။ ဆေ န့ ဝီ မိုဝ်း အာမူ အီ ညှာပ်၊ ဂေ ဝီ ဟာဝ် ကာလာင် ဒီ အာမုဝ်ဆဲ လွင် အန် တီ။ အာမူ အီ တူ ညှာပ်၊ ဂေ ယီ ဆုင်ဖျာတ် ရာင် ဂေ။

27 ဝါယ် အန် တီ အာမုဝ်ဆဲ ဝီ ခ့ဝါင် ဘိုဝ် အန် ဟာဝ်၊ တဲး အန် ဝီ ဝိဝ် ဒူင် ကွယ် ဘြိမ် အန်။ ဘိုဝ် အန် မိူဝ် ဝီ ဝိဝ် မိူင် ဘြိမ် အန်။