1 ဝါယ် ဟဲ့ ဟွတ့် လေး ဂေ ဒူအီ အီဆာရေလ ခဲင် မိူင် အဲဂိုပ် ဒေါ နုဝ့် အူယ် မာဂျီန်၊ ဂေ ဝီ တး ဇမ် ဒူင် ကာဟဝ်း အီ စိူဝ် ဆီနာယ်။ 2 ခါ အာတ့် ဂေ ဟဲ့ ဟွတ့် လေး ခဲင် ဒူင် ချ အီ စိူဝ် ရေဖီဒိမ်၊ ဂေ ဝီ တး ဇမ် ဒူင် ကာဟဝ်း အီ စိူဝ် ဆီနာယ်။ ဂေ ဝီ ချ ဒီ ဒင် နွန် ဆီနာယ် တွိုန်။

3 ဝါယ် အန် တီ အာမုဝ်ဆဲ ဟုဝ့် ဒူင် ကွယ် ဇဝ်ဖြာ။ ဇဝ်ဖြာ ယီ ကွယ် ဒဲင် နွန်။ အန် ဝီ တဝ်း ဒီ အာမုဝ်ဆဲ၊ “တဲး မဲ ကာလာင် ဂြုဝ်း ဒီ လှုက်လှာန် အာကူပ် ဂေ အီ ဟဲ့ ဘဲန် ဒူအီ အီဆာရေလ။ တဲး မဲ တဝ်း၊ 4 ‘ဘေ ဟဲ့ ယိုဝ် ပီ ဘူင် အုဝ် ဒီ ဂေ ဒူအီ အဲဂိုပ် တွိုန်။ အုဝ် မိူဝ် ဟဲ့ တိုယ် ဘေ တဲး ဘေ ဇမ် ဒူင် ကွယ် အုဝ် နီ။ ပဲ့ ဟဲ့ ဘူင် အုဝ် ဒီ ဘေ၊ န့ ဟဲ့ ပီ မာဂ့လာင် တဲး ဂွန် အန် ပဝ့် ဒဲင် ဖျီင် အန်၊ ကွဲ့ တဲး အန် စုဝ်း။ 5 ဒေါ တီ နီ၊ ဆေ ဘေ ဒီ ထူမ် ဒူပ် ပီ တဝ်း အုဝ်၊ ဆေ ဘေ ဘော ဘူင် ပီ ဒွိုမ် လာယ် ကာဆဲန့် အေ၊ အုဝ် ဒီ ဘော တဲး ဘေ ဘဲန် ဒူအီ အာမျုဝ် အုဝ်။ ကာတဲ ဂေ ဒူအီ ဒွန် မျုဝ် ခဲင် မိူင် ဒွန် မိူင် ဒဲင် ကာဒါယ် နီ၊ အုဝ် ဒီ ဝီ တဲး ဘေ ဘဲန် ဒူအီ ပီ ရွက့် အုဝ် လွှိုမ် အီ ဟဝ်။ 6 ဘေ ဒီ ဘဲန် ဒူအီ အာမျုဝ် ဘွတ် ပီ အိုပ် မီ အုဝ်။ အုဝ် ဒီ ဘော တဲး ဘေ ဘဲန် ဒူအီ အာမျုဝ် ဘွတ်၊ အီ လှူ ဒီ အုဝ် ဒါင် အီ ဟဝ်။’ ပါယ် တီ မဲ လုဝ် ကာလာင် တဲး ဂေ ဒူအီ အီဆာရေလ ထူမ်။” 7 ဝါယ် အန် တီ အာမုဝ်ဆဲ ဝီ လေး လူင် ဒဲင် နွန်။ အန် ဝီ ဒဲ့ ဂေ ဒါ တာင် ဒူအီ အီဆာရေလ တး ဇမ် ဒူင် ကွယ် အန်။ အန် ဝီ ခဲ ဂြုဝ်း ပီ ကာလာင် ဇဝ်ဖြာ ဒီ အန်၊ တဲး ဂေ ဝီ ထူမ် တူတ့် ဒွန် မျုဝ် ပီ စ်ု ဇဝ်ဖြာ အန် ကာလာင်။ 8 ဂေ ဒူအီ အီဆာရေလ ဘောကာဂ့လျီတ် ဝျီ့ ဂြုဝ်း အန် အူ ဇေန့်။ ဂေ တဝ်း၊ “ယေ ဒီ ဘူင် တူတ့် ဒွန် မျုဝ် ပီ စ်ု ဇဝ်ဖြာ ယေ ဘူင်။” ပန် တီ အာမုဝ်ဆဲ ဝီ ဟာဝ် ဒူင် ကွယ် ဇဝ်ဖြာ၊ ဝီ ကာလာင် ဂြုဝ်း ဂေ ဒီ အန် ဇဝ်။

9 ဇဝ်ဖြာ ဝီ တဝ်း ဒီ အာမုဝ်ဆဲ၊ “အုဝ် ဒီ တး ဇမ် ဒူင် ကွယ် မဲ ဒေါ ကွယ် အုဝ် ခဲင် န့အု ဝွင့်။ ပါယ် တီ ဂေ ဒူအီ ပွိုန် ဒီ ထူမ် ဂြုဝ်း အုဝ် ဒေါ ကာလာင် အုဝ် ဂြုဝ်း ဒီ မဲ။ အုဝ် ဒီ ဘူင် ပါယ် တီ တဲး ဂေ ဒူအီ ဘောကာဂ့လျီတ် ဝီ ညှိုမ် ဆေဆေ ဂြုဝ်း ပီ ကာလာင် မဲ ဒီ ဂေ။” ဝါယ် အန် တီ အာမုဝ်ဆဲ ဝီ ကာလာင် ဂြုဝ်း ပီ တဝ်း ဂေ ဒူအီ အီဆာရေလ ဒီ အန်၊ တဲး ဇဝ်ဖြာ ဘော နပ် တူတ့် ဒွန် မျုဝ်။

10 ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ ဝေန့် ဒူင် ကွယ် ဂေ ဒူအီ ကိူန်။ ဘော အာတိုဝ် ဘော ခဲညှာ မဲ လုဝ် စ်ု ဂေ၊ တဲး ဂေ ရဲန် ဒုဝ် ဂေ၊ တဲး ဂေ ဆီငါ ဘွတ်၊ တဲး န့ ပီ ပီ လုဝ် အုဝ်။ 11 တဲး မဲ စ်ု ဂေ လး ခြိုင် ဂေ။ ဒေါ ဇမ် အူယ် ဆီငဲ၊ တဲး န့ ဟွတ့် တူတ့်။ ဒေါ ဇမ် ဆီငဲ ဟာအူယ် အုဝ် ဒီ လေး လူင် ဒီ နွန် ဆီနာယ် နီ၊ တဲး ဂေ ဒူအီ ဘောကာဂ့လျီတ် ပွိုန် ဒီ ယိုဝ်။ 12 တဲး မဲ ဘူင် ကာအုန်၊ တဲး န့ ကော ရူပ် နွန်။ ဟဲ့ ဟွတ့် မဲ လုဝ် စ်ု ဒူအီ၊ ကွဲ့ တဲး ဂေ ဟုဝ့် ဒဲင် နွန် နီ၊ ကွဲ့ တဲး ဂေ ပွုန် ကာအုန် ပီ ဘ့လေး မဲ တီ၊ ကွဲ့ တဲး ဂေ ဟာဝ် ဇမ် ဒီ ဒင် နွန် နီ ဒေါ မှဝ်။ အာဆေ ကာလုဝ်း ကာအုန် ပီ ဘ့လေး မဲ တီ၊ အန် လုဝ် ခမ် မှာပ် အန်၊ လုဝ် ယမ် အူ ဇေန့်။ 13 ဘေ လုဝ် ငဝ်း ယမ် အန်၊ ဝိုန့် မာဝ် ဒီ အန်၊ တဲး အန် ကော ယမ်။ ဆေ ဘေ တူ ဝိုန့် မာဝ်၊ ဘေ လုဝ် ဘန့် ဘ့လာ၊ တဲး အန် ယမ်။ အုဝ် ယီ တူ တဲး ဘေ မး အန်၊ တူ တဲး ဘေ ပါ အန်။ ဆေ န့ ဘော မုး ဒုဝ် ဆတ်ဒါဝါ၊ အီ တး ကာလုဝ်း ကာအုန် တွိုန်၊ ဘေ လုဝ် ငဝ်း ဝဲန် ဘော အန်။ ဘေ လုဝ် နှဝ့်၊ တဲး ဘေ ကော ပွိုန် ဒီ ထူမ် ဟမ် တာင် တူင့်၊ အီ မုး ဟမ် ဘုတ် ဝဝ်။ ဆေ ဘေ ထူမ် ဟမ် တီ၊ မဲ လုဝ် တဲး ဂေ ဒူအီ ဟာဝ် ဟုဝ့် ဒဲင် နွန် နီ။”

14 ဇဝ်ဖြာ ဟဲ့ ဟွတ့် ကာလာင် ပါယ် တီ အာမုဝ်ဆဲ ဝီ လူင် ဒီ နွန်၊ ဝီ တး ဇမ် ဒူင် ကွယ် ဂေ ဒူအီ။ အန် ဝီ တဲး ဂေ ရဲန် ဒုဝ် ဂေ၊ တဲး ဂေ ဆီငါ ဘွတ်၊ တဲး န့ ပီ ပီ အိုင် ဇဝ်ဖြာ။ ခုဝ်၊ ဂေ ဘော လး ခြိုင် ဂေ။ 15 ဝါယ် အန် တီ အန် ဝီ တဝ်း ဒီ ဒူအီ ကိူန်၊ “ဘေ လုဝ် ရဲန် တူတ့် ဒွန် မျုဝ်၊ တဲး န့ ဟွတ့် ဒေါ ဇမ် ဆီငဲ ဟာအူယ်။ ကွဲ့ တဲး ဘေ အီမာယ် အီဘိုန့် လာယ် လာယ် ဒေါ အန် တီ။”

16 ဝါယ် အန် တီ ဟဲ့ ဇမ် ဆီငဲ ဟာအူယ်၊ န့ ဘော မိုဝ်း န့အု ဝွင့် ဒဲင် နွန်။ ဘော ပ့လ မ့ပ့လေတ့် ဘော ဟမ် ကာနမ် ဟဲ့ တး။ ဟဲ့ ဟွတ့် န့ ဘော မိုဝ်း ဟမ် ပီ ဘုတ် ဝဝ်၊ န့ ဟမ် တာင် ကာဆဝ်။ န့ တဲး ဂေ ဒူအီ ကွယ် ခဲင် ထိုပ် ဘိက် ဘော ယုဝ် ဒီယုး ဒီယေန့် ကာဆဝ်။ 17 ဝါယ် အန် တီ အာမုဝ်ဆဲ တဲး ဒူအီ လေး ခဲင် ထိုပ် ဘိက် ဂေ၊ ယဲတ့် ဂေ ဟာဝ် ဇမ် ဒီ အာတ့် ဇဝ်ဖြာ။ ဂေ ဘော ဟာဝ် ကွယ် ဒီ ဒင် နွန် တွိုန်။ 18 ဇဝ်ဖြာ ဘော လေး လူင် ဒီ နွန်၊ တဲး ငဝ် ဘော ကွယ် ရူပ် အန်၊ တဲး ဒက် ငဝ် ပ့လိုက် နွန် ဆီနာယ် ဘော နွန်။ ဒက် ငဝ် ဘော ဟုဝ့် နာ ဒဲင်၊ တဲး န့ ပီ ဒက် ငဝ် အီ လေး ခဲင် ကာင် စိုမ်။ နွန် ဘော နွန် မိူဝ် ဒီယုး ဒီယေန့် ကာဆဝ်။ 19 ဟမ် ပီ ဘုတ် ဝဝ် တွိုန် ဝီ လေး၊ ဝီ ကြဲ ဒီ တာင် လွှိုမ် ခါ အာတ့်။ ဒေါ အန် တီ အာမုဝ်ဆဲ ကာလာင် ဂြုဝ်း ဒီ ဇဝ်ဖြာ။ ဟဲ့ ဟွတ့်၊ ဇဝ်ဖြာ ဝီ ဝျီ့ ဂြုဝ်း အန်။

20 ဇဝ်ဖြာ ဝီ လူင် ဇမ် နာ ဒဲင် ကာဒဲ့ နွန် တွိုန်။ အန် ဝီ စ်ု အာမုဝ်ဆဲ၊ တဲး အန် ဟာဝ် ဟုဝ့် ဇမ် ဒူင် ကွယ် အန် နာ ကာဒဲ့ နွန်။ ပန် တီ အာမုဝ်ဆဲ မိူဝ် ဟုဝ့် နာ ဒဲင်။ 21 အန် ဟဲ့ ဟွတ့် ဇမ်၊ ဇဝ်ဖြာ ဝီ တဝ်း ဒီ အန်၊ “မဲ လုဝ် ဝီ လေး လူင်၊ ဇမ် ဒူင် ကွယ် ဂေ ဒူအီ ကိူန်။ မဲ လုဝ် စ်ု ဂေ၊ ကွဲ့ တဲး ဂေ ပြာ ဒီ ဟုဝ့်၊ ကွဲ့ တဲး ဂေ ထေဝ် ဒီ ယွတ် ဇဝ်ဖြာ၊ ကွဲ့ တဲး ဂေ ဒူအီ ကိူန် လုဝ် ယမ်။ 22 ဘော ဂေ ဒါ တာင် အီ လှူ ဒီ အုဝ်၊ ဂေ အီ လုဝ် တး ဇမ် ဒီ အာတ့် အုဝ်၊ ဂေ လုဝ် ရဲန် ဘော ဒုဝ် ဂေ၊ တဲး ဂေ ဆီငါ ဘွတ်၊ တဲး န့ ပီ ပီ လုဝ် အုဝ်။ ဆေ ဂေ တူ ဘူင် ပါယ် တီ အုဝ် ဒီ ဝီ တဲး ဂေ ခမ် မှာပ် ဂေ။”

23 အာမုဝ်ဆဲ ဝီ တဝ်း ဒီ ဇဝ်ဖြာ၊ “မဲ ဟဲ့ ဟွတ့် စ်ု ယေ ဘူင် ကာအုန် ရူပ် နွန် နီ၊ တဲး န့ ဘဲန် ဒူင် ဘွတ်။ ခုဝ်၊ ဂေ ဒူအီ အာဝ် ပွိုန် ဝီ တး ဟုဝ့် ဒဲင် နွန် ဆီနာယ် နီ။”

24 ဇဝ်ဖြာ ဝီ တဝ်း၊ “တဲး မဲ လူင်။ ဟဲ့ ဟွတ့်၊ တဲး မဲ ဝီ ဟုဝ့် ဝီ တိုယ် ဘော အာရူန် တး ဒူပ် မဲ။ ဂေ ဒါ တာင် အီ လှူ ဒီ အုဝ် ဘော ဂေ ဒူအီ ကိူန် ယီ တူ ပွိုန် ပြာ ဒီ လိုပ် ဇမ် ဒူင် ကွယ် အုဝ်။ ဆေ ဂေ ယ တး ကာတတ် အုဝ်၊ ဂေ ဒီ ဝီ ခမ် မှာပ် ဂေ။” 25 ဇဝ်ဖြာ ဟဲ့ ဟွတ့် ကာလာင် ပါယ် တီ အာမုဝ်ဆဲ ဝီ လေး လူင်၊ ဝီ ဇမ် ဒူင် ကွယ် ဂေ ဒူအီ ကိူန်၊ ဝီ ကာလာင် တူတ့် ဒွန် မျုဝ် ပဲ့ ဟဲ့ တဝ်း ဇဝ်ဖြာ၊ တဲး ဒူအီ ဝီ ထူမ်။