1 ဝါယ် အန် တီ ဇဝ်ဖြာ ဘော ကာလာင် ဒီ ဒူအီ။ အန် တဝ်း၊

2 “အုဝ် မုး အန် ဇဝ် အီ မုး ဇဝ်ဖြာ ပီ ကြိုပ် ဘေ။ အုဝ် ဟဲ့ တိုယ် ဘေ လေး ခဲင် မိူင် အဲဂိုပ် အီ မုး ဒူင် ဟဲ့ ဘဲန် ဘေ မှာယ် ဒူအီ ဟဝ်။

3 ကွဲ့ တဲး ဘေ ကြိုပ် ဇဝ် ဘဲန် ကာဒင် ဘဲန် ကာဒင်။ တဲး ဘေ ကြိုပ် မီ အုဝ်။

4 ကွဲ့ ဘူင် အာရိုပ် တဝ်း၊ န့ မုး ဇဝ်ဖြာ။ ဘော မုး အာမျုဝ် အီ ကွယ် ခဲင် ဂါင်ဟြာဝ် ဘော အာမျုဝ် အီ ကွယ် ဒဲင် ကာဒါယ် ဘော အာမျုဝ် အီ ကွယ် ခဲင် အိုမ်၊ ဘေ ကွဲ့ ဒိုဝ်း ကြုဝ် ဂေ တီ၊ ကွဲ့ ဘူင် အာရိုပ် မာဆေ၊ တဝ်း ဒီ ကြိုပ်။ 5 ကွဲ့ ကြိုပ် အာရိုပ် မျုဝ် မှဝ်။ ကွဲ့ ဂူမ် ဒီ အာတ့် အာရိုပ်၊ တဝ်း န့ ဘွတ်။ အုဝ် မုး အန် ဇဝ်၊ အုဝ် ဟဲ့ မုး ဇဝ်ဖြာ ပီ ကြိုပ် ဘေ။ အုဝ် ယီ တူ ခမ် ဘေ ကြိုပ် ဘဲန် မျုဝ် ဘဲန် မျုဝ်၊ တဝ်း န့ မုး ဇဝ်ဖြာ။ အာဆေ ယီ တူ ဒူပ် အုဝ်၊ အာဆေ ဇွင့် အုဝ်၊ အုဝ် ဒီ တဲး န့ ဘဲန် မှာပ် ဒီ အန်၊ တဲး ဘော လှုက်လှာန် အန် လုဝ် ခမ် မှာပ် တီ၊ တဲး န့ ကော နုဝ့် အူယ် စုဝ်၊ ဖွုန် စုဝ်။ 6 အာဆေ ယီ ရွက့် အုဝ်၊ အာဆေ ဒူပ် ဆီချာ ဘော ဘူင် ပီ အိုင် အုဝ်၊ အုဝ် ဒီ ရွက့် အန် ဆေဆေ၊ ဘော အန် ဘော လှုက်လှာန် အန်၊ တဲး ကော ဇမ် အူ ဟြဲန့် စုဝ်။

7 ကွဲ့ ကာလာင် စိူဝ် အုဝ် ဆေ အာဝ် မိုဝ်း ဒီခုဝ်။ အာဆေ ယီ ကာလာင် ပါယ် တီ အုဝ် ဇဝ်ဖြာ ဒီ တဲး န့ ဘဲန် မှာပ် ဒီ အန်။

8 ဘေ လုဝ် လှုဝ်း ဆီငဲ ဒီလှဝ်။ ဘေ လုဝ် တဲး န့ ဘဲန် ဆီငဲ ဘွတ်။ 9 အာဒါ ဒဝ် ဆီငဲ ဘေ ပွိုန် ဘူင် ဂါန် ဘဲန် မျုဝ် ဘဲန် မျုဝ်။ 10 ဒေါ ဇမ် ဆီငဲ မ့ဘူ၊ န့ မုး ဆီငဲ ဒီလှဝ်။ ဘေ လုဝ် ကြိုပ် ဇဝ်ဖြာ အီ အိုပ် ဘေ။ ဆီငဲ တီ၊ ကွဲ့ ဘူင် ဂါန် မာဆေ။ ဘော မုး ဂွန် ဘေ၊ ဘော မုး မှာယ် အီဘိုန့် ဘော မှာယ် အီမာယ် ဘေ ဘော ဒူအီ ဟဝ် အီ ကွယ် ရိုမ် ဒူပ် ဘေ၊ ဘော မုး ဒုဝ် ဆတ်ဒါဝါ ဘေ၊ ဘေ ကွဲ့ တဲး အာဆေ ဘူင် ဂါန် ဆီငဲ တီ။ 11 ခုဝ်၊ ဒဝ် ဆီငဲ ဇဝ်ဖြာ ဘူင် ကာဒါယ် ဘော ဂါင်ဟြာဝ်။ အန် ဘော ဘူင် ဒွန် မျုဝ် အီ ကွယ် ဒဲင် ကာဒါယ် ဘော ခဲင် ဂါင်ဟြာဝ် ဘော ခဲင် အိုမ်။ ဒေါ ဇမ် ဆီငဲ မ့ဘူ၊ ဇဝ်ဖြာ ဟဲ့ ဒီလှဝ်။ ခုဝ်၊ ဇဝ်ဖြာ ဟဲ့ ဝီ မွင့်ကာရာ တဲး ဆီငဲ ဒီလှဝ် တီ၊ တဲး န့ ဝီ ဘဲန် ဆီငဲ ဘွတ်။

12 ဘေ ဘော လုဝ် ရုဝ်ဆေ ဂုန့် မာ ဘေ။ ဆေ ဘေ ဘူင် ပါယ် တီ အာဆာက် ဘေ ဒီ ဘော တူင့်၊ ပွိုန် ကွယ် လှေန့် ခဲင် မိူင် ပီ ဒီ ဒွါ အန် ဇဝ် ဒီ ဘေ။

13 ကွဲ့ ငဝ်း ယမ် ဒူအီ။

14 အီမာယ် ကွဲ့ လုတ့် အီဘိုန့် အီ။ အီဘိုန့် ကွဲ့ မိုဝ်း နဝ်း ကိူန်။

15 ကွဲ့ ပြာ ကြုဝ် အီ။

16 ကွဲ့ ကာလုဝ် ဒေါ ကာလာင် ဘေ ဆက်ဆေ လွင် ဒူအီ ဟဝ်။

17 ကွဲ့ တဲး ဘေ မိုဝ်း နဝ်း ဆီ ပွိုန် ကြုဝ်ကြာမ် အီ ဟဝ်။ ဘော မုး ကာင် အန်၊ အီဘိုန့် အန် ဘော မှာယ် အန် အီ မုး အီမာယ် ဘော အီဘိုန့်၊ ဘော မာလုဝ် ဂေ မာမက် အန်၊ ခဲ့ မုး ကြုဝ်ကြာမ် အီ ဟဝ်၊ ကွဲ့ တဲး မဲ မိုဝ်း နဝ်း ဆီ ပွိုန် ဇိုဝ် တီ။”

ပါယ် တီ ဇဝ်ဖြာ ဟဲ့ ကာလာင် ဒါရာ အန် ဒီ ဂေ ဒူအီ အီဆာရေလ။

18 ဒေါ ထူမ် ဂေ ဒူအီ ဟမ် ကာနမ်၊ ဒေါ ယိုဝ် ဂေ ပ့လ မ့ပ့လေတ့် ဘော ဟမ် ဝဝ်၊ ဒေါ ဝီ ယိုဝ် ဂေ ဒက် ငဝ် ဒီ နွန် တွိုန်၊ ဂေ ဘော ယုဝ် ကာဆဝ်၊ တဲး ဂေ ဒီယေန့် လွင် အန် တီ။ ခုဝ်၊ ဂေ မိူဝ် ကွယ် ကာတူင့်၊ တူ ယ ဟာဝ် ကာတတ်။ 19 ဂေ ဒူအီ ကိူန် ဝီ တဝ်း ဒီ အာမုဝ်ဆဲ၊ “ကွဲ့ တဲး ဇဝ်ဖြာ ကာလာင် ဆိူဝ် ဒီ ယေ။ ယေ ယုဝ် ဒီ ယမ် ကူပ် ပွိုန် ယေ ဒီ ထူမ် ဂြုဝ်း ဇဝ်ဖြာ တွိုန်။ တဲး မဲ ကာလာင် ဂြုဝ်း ဒီ ဇဝ်ဖြာ။ ဟဲ့ ဟွတ့်၊ ယေ ဒီ ဝီ ထူမ် ဂြုဝ်း ပီ ဝီ တဝ်း မဲ ဒီ ယေ။”

20 အာမုဝ်ဆဲ ဝီ တဝ်း ဒီ ဒူအီ ကိူန် တွိုန်၊ “ဘေ ကွဲ့ ယုဝ်။ ဇဝ်ဖြာ ဟဲ့ တး တဲး အန် ထေဝ် နဝ်း ဘေ၊ တဲး ဘေ ဘော ယုဝ် ဇဝ်ဖြာ၊ ကွဲ့ တဲး ဘေ ယ ဘူင် မှာပ်။”

21 ဝါယ် အန် တီ အာမုဝ်ဆဲ ဝီ ဟာဝ် လိုပ် ဒူင် ကွယ် ဇဝ်ဖြာ ခဲင် န့အု ဝွင့် တွိုန်။ ဂေ ဒူအီ ကိူန် ယီ ကွယ် ကာတူင့်။ 22 ဟဲ့ ဟွတ့် ပန် တီ ဇဝ်ဖြာ ဝီ စ်ု အာမုဝ်ဆဲ ကာလာင် ဒီ ဂေ ဒူအီ အီဆာရေလ။ အန် တဝ်း၊ “ဘေ ဟဲ့ ဟွတ့် ယိုဝ် ဂြုဝ်း ပီ ကာလာင် အုဝ်၊ ဂြုဝ်း အီ လေး ဂါင်ဟြာဝ်။ 23 ကွဲ့ တဲး ဘေ ဘူင် အာရိုပ်၊ တဝ်း န့ မုး ဇဝ်ဖြာ ပီ အုဝ်။ န့ ဘော မုး ရွိုန်၊ န့ ဘော မုး ခြိဝ်၊ ကွဲ့ တဲး ဘေ ဘူင် အာရိုပ်၊ ကွဲ့ တဲး ဘေ ကြိုပ်။

24 ဘေ ယီ လုဝ် ဒိုဝ်း ကာဒါယ်၊ ဘူင် ကာစှူင့် လှူ ဒီ အုဝ်။ ဒဲင် ကာစှူင့် တီ၊ ဘေ လုဝ် လှူ မာမက် အာလူင့် ဘော မာပဲ ဂေ မာဘူ၊ ဒုဝ့် ဒီ ငဝ်၊ တဲး ငဝ် ကာဆိုမ် မင် ဒုဝ်။ ဘော မင် ဒုဝ် ဘေ လုဝ် လှူ ဘော ဟူမ် ဒေါ ကွယ် ကာဇု ဘေ။ ဘေ ဘော ဟာဝ် နာ မှဝ်၊ တဝ်း ဒီ ရုဝ်ဆေ အုဝ်၊ တဝ်း ဒီ လှူ ဒီ အုဝ်၊ အုဝ် ဒီ ဘော တး ဇမ် ဒီ တီ။ ဒွန် ဇေန့် ဒေါ လှူ ဘေ ပါယ် တီ အုဝ် ဒီ မွင့်ကာရာ ဒွါ ဒီ ဘေ။

25 ဆေ ဘေ ယီ တဝ်း ဒီ ဒိုဝ်း မာဝ်၊ ဘူင် ကာစှူင့် လှူ ဒီ အုဝ်၊ ကွဲ့ ဒိုဝ်း မာဝ် ပီ ဒွိုမ် ဒွယ် ဘေ။ ဆေ ဘေ တာ အူ မျုဝ် အူ မျုဝ်၊ ဘူင် တဲး မာဝ် ကာလာတ့်၊ မာဝ် အာဝ် ဟူ ဘွတ်။ 26 ဟဲ့ ဟွတ့်၊ ဆေ ဘေ ဘူင် ကာစှူင့် လှူ ဒီ အုဝ်၊ ကွဲ့ ဘူင် န့တဲင် အီ ပွိုန် ဟုဝ့် နာ ဒဲင်။ အာဝ် ကာအာပ် တဲး အီ ယိုဝ် ဒူအီ ဟုဝ့် နာ ဒဲင်၊ ယုဝ် န့ မွှိုမ် ဆာယ်။”