1 ဇဝ်ဖြာ ဝီ တဝ်း ဒီ အာမုဝ်ဆဲ၊ “ခါ နီ အုဝ် ဒီ ဝီ ကာလာင် ဒါရာ ဘဲန် မျုဝ် ဘဲန် မျုဝ် ပီ ဒီ လုဝ် မဲ ကာလာင် ဒီ ဂေ ဒူအီ အီဆာရေလ။

2 ဆေ ဘေ စိုဝ်း ဒူအီ ဟဲဘြဲ အူ ဝီ၊ တဲး အန် ဘဲန် မှာယ် ဘေ၊ ဒူအီ တီ လုဝ် ဘူင် ဂါန် ဘေ အာဒါ ဒဝ် ဆီနမ်။ ဟီ ဇမ် ဆီနမ် မ့ဘူ၊ ဘေ လုဝ် တဲး အန် လေး ဟာဝ်၊ ဘူင် ပီ အိုင် အန်။ ကွဲ့ တဲး ဘေ ဝီ မှာန့် မာဆေ ဒီ အန်။ 3 ဆေ အန် ဟဲ့ တး အူ ဝီ၊ ညှမ် မိုဝ်း အီဘိုန့်၊ ဘေ လုဝ် တဲး အန် လေး ဟာဝ် အူ ဝီ။ ဆေ အန် ယီ မိုဝ်း ဘော အီဘိုန့် အန် ဒေါ တး အန်၊ ဘေ ဘော လုဝ် တဲး ဂါယ် ဘော အာ ဝီ လေး ဟာဝ်။ 4 ဆေ ဒါ ကာညာ အန် ဟဲ့ ဒွါ အီဘိုန့် ဒီ အန်၊ ဆေ အန် ဘော မိုဝ်း ဂွန် အီမာယ် ဂေ ဂွန် အီဘိုန့်၊ အီဘိုန့် ဂေ ဂွန် အန် တီ၊ ဂေ ဟဲ့ ဘဲန် ကြုဝ် ဒါ ကာညာ အန်။ အီမာယ် တွိုန် ယီ ပွိုန် လေး ဟာဝ် အန် အူ ဝီ၊ အာဝ် ဟူ လုဝ် ဘဲန် မှာယ် အီ။

5 ဆေ န့ ယီ မုး မှာယ် တွိုန်၊ ဆေ အန် ဘော တဝ်း၊ အန် ရွက့် ဒါ ကာညာ အန်၊ ဆေ အန် ဘော ရွက့် အီဘိုန့် ဂေ ဂွန် အန်၊ တူ ဆီ လေး ဒူင် ကွယ် ဒါ ကာညာ အန် ဘော တဝ်း ဒီ ဘဲန် မှာယ် ခဲင် ကာင် ဒါ ကာညာ အန် ဆေဆေ၊ 6 ဒါ ကာညာ အန် တွိုန် လုဝ် တိုယ် မှာယ် အန် တီ၊ တဲး အန် ဟာဝ် ကာလာင် ဒီ အာတ့် ဇဝ်ဖြာ။ ပန် တီ ဒါ ကာညာ အန် ဘော ဘ့လေး အန် ကွယ် ဒီ ခူပ် မာလုဝ်း ကာင်။ အန် လုဝ် ဒိုဝ်း မာလတ့်၊ ဘ့လုး ဟျုဝ့် အန် ဒီ မာ မာလုဝ်း။ ဝါယ် အန် တီ ဒူအီ တွိုန် ဒီ ဘဲန် မှာယ် ခဲင် ကာင် ဒါ ကာညာ အန် ဆေဆေ။

7 ဆေ န့ ယီ မိုဝ်း အီမာယ် အူ ဝီ၊ ဆေ အန် ဘော ယွင့် ဂွန် အီဘိုန့် အန် တဲး အန် ဘဲန် မှာယ် အီ ဟဝ်၊ အီဘိုန့် တီ အာဝ် ပွိုန် လေး ဝါယ် ဟဲ့ နုဝ့် ဒဝ် ဆီနမ်။ အာဝ် ပီ အီမာယ် ဂေ တွိုန်။ 8 ဆေ အီဘိုန့် တွိုန် ဟဲ့ ဘဲန် အီဘိုန့် ဒါ ကာညာ အန်၊ ဆေ အန် ယီ တူ ဘူင် တဲး န့ လဝ့် နဝ်း ဒါ ကာညာ တွိုန်၊ ဒါ ကာညာ တွိုန် လုဝ် ဝီ ဒွါ အီဘိုန့် တီ ဒီ ဂုန့် အန်၊ တဲး ဂုန့် အန် ဝီ စိုဝ်း။ အာဝ် ပွိုန် ယွင့် မှာယ် အီဘိုန့် ဒီ ဒူအီ အာမျုဝ် ဟဝ်။ ခုဝ်၊ အန် ဟဲ့ ဟွတ့် ဘဲန် အီဘိုန့် ဒါ ကာညာ အန်။ 9 ဆေ ဒူအီ အူ ဝီ ယီ စိုဝ်း ဂွန် အီဘိုန့်၊ တဲး န့ ဘဲန် အီဘိုန့် ဂွန် အီမာယ် အန်၊ အန် လုဝ် မာတ် ဂွန် အီဘိုန့် တီ ပီ ဂွန် ဒင် အန်။ 10 ဆေ အီမာယ် အူ ဝီ ဝီ ဒိုဝ်း အီဘိုန့် ပေါ အူ ဝီ၊ အန် ဘော လုဝ် လိုမ်လာ အီဘိုန့် ဘြိမ်။ အီဘိုန့် ဘြိမ် ဟဲ့ ဘဲန် အီဘိုန့် အန် ဆေဆေ။ ဘော ပီ ဒီ ဟူမ် ပီ ဒီ တာ၊ အန် လုဝ် ကာဆာင် ဒီ အန်။ 11 ဆေ အီမာယ် ယီ တူ ဆီ ဘူင် ဇိုဝ် တီ ဒွန် မျုဝ် ဒီ အီဘိုန့် ဒင် အန် တွိုန်၊ အန် လုဝ် တဲး အန် ဝေန့် ခဲင် ကာင် ဂုန့် မာ အန်။ အာဝ် ပွိုန် မှာန့် မာဆေ ဒီ ဂုန့် မာ အန်။” ခဲ့ တီ ဇဝ်ဖြာ ဘ့လေး အုန် ဒါရာ လွင် မှာယ် အီ။

ဝါယ် အန် တီ ဇဝ်ဖြာ ဝီ တဝ်း၊

12 “ဆေ န့ ဘော မိုဝ်း ဒူအီ အူ ဝီ၊ အန် ဟဲ့ မး ပေါ အူ ဝီ တဲး အန် ယမ်၊ ဂေ ဒူအီ ဟဝ် လုဝ် ဝီ မှေတ့် ဒူအီ တီ၊ ငဝ်း ဝဲန် ဘော အန်။ 13 ဆေ န့ မိုဝ်း ဒူအီ အီ တာ ဒိုဝ် ယမ် အီ ဟဝ်၊ ဒေါ တူ အုန် အန် နဝ်း ဒီ ဘူင် ပါယ် တီ ဒူအီ ဝီ တီ ဟဲ့ ပွိုန် တဝ်၊ တဲး န့ ကော ဇမ် ဒူင် ပီ ရဝ်း အုဝ် ဒွါ ဒီ ဒူအီ ဇိုဝ် တီ။ ဆေ အန် ကွယ် ဒီ တီ၊ အာဝ် ပွိုန် မှေတ့် အန်၊ အာဝ် ပွိုန် ဘူင် မာဆေ ဒီ အန်။ 14 ဆေ န့ ယီ မိုဝ်း ဒူအီ အီ ဟဲ့ ဟွတ့် ခြာမ် ဒီ ငဝ်း အီ၊ အန် ဟဲ့ ဟွတ့် ပြာ ဒီ ငဝ်း ယမ် အီ၊ ဟဲ့ ဟွတ့်၊ အန် ဝီ ဟာဝ် ချြီင် ဒီ ခူပ် ကာစှူင့် လှူ ဒီ အုဝ်၊ ဘေ လုဝ် ဟာဝ် မှေတ့် အန် ဒူင် ကွယ် အန် တီ၊ တိုယ် အန် လေး၊ ဝီ ငဝ်း ဝဲန် အန် နာ ရေတ့်။ 15 ဆေ ဒူအီ အူ ဝီ မး ဘော ငဝ်း ယမ် ဂုန့် မာ အန်၊ ဘေ လုဝ် ငဝ်း ယမ် ဘော အန်။

16 ဆေ န့ ဘော မိုဝ်း ဒူအီ အီ ပြာ ဒီ မှေတ့် ဒူအီ ဟဝ်၊ တဝ်း ဒီ ယွင့် အန် ဘဲန် မှာယ် အီ၊ အန် ပီ ဘော ဟဲ့ ဟွတ့် ယွင့်၊ ညှမ် ယွင့်၊ ဒေါ မှေတ့် ဂေ ဒူအီ တီ၊ ဂေ လုဝ် ငဝ်း ဝဲန် အာဆာက် အန်။

17 အာဆေ ဝီ ဒိူင် ဂုန့် မာ အန်၊ ဘော အန် လုဝ် ခမ် ဒီ ယမ်။

18-19 ဆေ န့ ယီ မိုဝ်း ဒူအီ လာယ် ကာဂုဝ်း၊ လာယ် ကာမး၊ ဆေ ဒူအီ အူ ဝီ ဒုး ပေါ အူ ဝီ၊ တာ မာဝ် ဘော တာ ကာလိုမ် အန်၊ ဆေ အန် ယီ တူ တဲး အီ ယမ်၊ ဒူအီ အီ ဘူင် ပါယ် တီ အာဝ် မိုဝ်း မှာပ်။ န့ ယီ မုး ဒူအီ ခမ် ဒီ မး ပါယ် တီ ဆေ အန် လုဝ် အိတ် ကူပ် မး အီ ဒီ အန်၊ ဆေ အန် ယီ လုဝ် ဟာဝ် ဝီ ဇာန် န့ကြွုန် အန်၊ ဒူအီ အီ ဘူင် တဲး အန် ဘဲန် ဆဝ် ပါယ် တီ အန် ဝီ လုဝ် ဒွါ ရွိုန် ဒီ ဒူအီ ဆဝ် တွိုန်။ ခဲ့ စှိုမ် အန် ရွိုန်၊ ဒေါ တူ ပွိုန် ဘူင် အန် ဂါန်၊ ခဲ့ တူတ့် အန် ရွိုန် တဲး ဆဝ် အန် ကော ဟြာယ်၊ အန် လုဝ် ဒွါ ခဲ့ တီ ဒီ ဒူအီ အီ ကာဒုး ဒုက် တွိုန်။

20 ဆေ န့ မိုဝ်း ဒူအီ အူ ဝီ မး မှာယ် အန် တာ မ့ဖျီ့၊ န့ ဘော မုး အီမာယ် အီဘိုန့်၊ ဆေ မှာယ် အန် တွိုန် ကော ယမ် အူ ဇေန့်၊ န့ ဘဲန် မှာပ် ဒီ ဒါ ကာညာ အန်။ 21 ဆေ မှာယ် အန် ယီ ယမ် ဝါယ် အူ ဆီငဲ အာ ဆီငဲ၊ န့ တူ ဘဲန် မှာပ် ဒါ ကာညာ အန်။ မှာယ် တွိုန် ဟဲ့ ပီ ကြုဝ် ပီ စှိုမ် ဒါ ကာညာ အန်။

22 ဆေ အီမာယ် လာယ် ကာလုတ့်၊ ဆေ န့ ယီ မိုဝ်း အီဘိုန့် တူ အး၊ ဆေ ဂေ ဘူင် တဲး ဘော အန် ပပ် ဆဝ်၊ တဲး ဂွန် အန် ဝီ လိုဝ်၊ အန် ယီ တူ ဝီ မိုဝ်း ဆဝ် ပေါ မျုဝ်၊ ဒူအီ အီ ဘူင် ပါယ် တီ လုဝ် ဒွါ ခဲ့ ပီ မှာန့် အီမာယ် အန်။ အန် ဘော လုဝ် ဒွါ ခဲ့ ပီ မှာန့် ဂေ ဒါ တာင် အီ ဆုင်ဖျာတ် အာမူ တီ။ 23 ဆေ အီဘိုန့် တွိုန် ယီ ဆဝ် ကူပ် မး အီ ဒီ အန်၊ ဒူအီ ဘူင် ဆဝ် တီ၊ အန် လုဝ် ခမ် ခဲ့ ကိူန် မှာပ် အန်။ ဆေ အီ ဟဲ့ စှိုမ် အာဆာက်၊ ဘော အန် လုဝ် စှိုမ် အာဆာက် အန်။ 24 ဆေ အန် ဘူင် ငါယ် အီ အပ်၊ ဘော ငါယ် အန် ဝီ လုဝ် အပ်။ အာဆေ တဲး ဟြာင် အီ ကာဘက်၊ လုဝ် ဝီ တဲး ဘော ဟြာင် အန် ကာဘက်။ အာဆေ ဘူင် ဒဲ အီ ဆဝ်၊ တဲး ဘော ဒဲ အန် ဝီ ဆဝ် ခဲ့ တီ။ အာဆေ ဘော ဒုး ပ့လဝ် အီ၊ တဲး ဘော ပ့လဝ် အန် ဝီ ဘဲန် ဆဝ် ခဲ့ တီ။ 25 အာဆေ ဘူင် တဲး အီ ဘ့လုး ဒီ ငဝ်၊ အန် ဝီ လုဝ် ခမ် ဘ့လုး ဒီ ငဝ်။ အာဆေ ဘူင် တဲး န့ ဘဲန် ဘိုပ် ဒီ အီ၊ ဘော အန် လုဝ် ဝီ ဘဲန် ဘိုပ်။ ပါယ် တီ အန် လုဝ် ဝီ ခမ် မှာပ် အန်။

26 ဆေ န့ ယီ မိုဝ်း ဒူအီ မး မှာယ် အန်၊ န့ ဘော မုး အီမာယ် အီဘိုန့်၊ ဆေ အန် ဘော ဘူင် တဲး ငါယ် အန် အပ်၊ ဒါ ကာညာ လုဝ် တဲး မှာယ် အန် ဟာဝ် လေး ဒူင် ကွယ် အန်။ ခဲ့ ပီ စှိုမ် အန် ဂါန် ပီ ဘူင် မှာယ် အန် တီ၊ န့ ဝီ ဘဲန် ငဝ်း ငါယ် အန် တွိုန်။ 27 ဆေ အန် ဝီ မး မှာယ် အန်၊ တဲး ဟြာင် အန် ကာဘက်၊ အန် ဘော လုဝ် တဲး မှာယ် တီ လေး ဒူင် ကွယ် အန် ကူပ် ဘူင် အန် နာ တူ မွှိုမ် ဒီ မှာယ် အန်။

28 ဆေ န့ ယီ မိုဝ်း မက် အာလူင့် တုး ဒူအီ အူ ဝီ တဲး အန် ယမ်၊ ဘော မုး အီမာယ်၊ ဘော မုး အီဘိုန့်၊ ဘေ လုဝ် ဒိုဝ်း မာဝ် ဝိုန့် ဒီ မက် အာလူင့် တွိုန်၊ တဲး အန် ကော ယမ်။ ယင် အန် အာဝ် ပွိုန် ဟာပ်။ ဒါ ကာညာ မက် အာလူင့် တွိုန် ယီ တူ မိုဝ်း မှာပ် ကူပ် မက် အာလူင့် အန် ဟဲ့ တုး တဲး ဒူအီ ယမ်။ 29 ဆေ မက် အာလူင့် တွိုန် ယီ ဟဲ့ ဒွိုမ် တုး ဒူအီ၊ ဆေ ဒါ ကာညာ အန် ဟဲ့ ဟွတ့် နပ် လွင် အန် တီ၊ အန် ယီ တူ ပက် ရိတ် မက် အာလူင့် တွိုန်၊ ဆေ မက် အာလူင့် အန် ဝီ တုး ယမ် ဒူအီ ပေါ အူ ဝီ၊ ဘေ လုဝ် ငဝ်း ဝဲန် မက် အာလူင့် တွိုန်၊ ဒိုဝ်း မာဝ် ဝိုန့် ဒီ အန်၊ တဲး အန် ယမ်။ ဘော ဒါ ကာညာ အန်၊ ဘေ လုဝ် တဲး အန် ယမ်။ 30 ဆေ ဂေ ဝေါဝဲ ဒူအီ ယမ် တွိုန် ယီ မှာန့် ရွိုန် ဒီ ဒါ ကာညာ မက်၊ တဲး အန် ဝီ ဒွါ ခဲ့ ပီ မှာန့် ဂေ၊ တဲး အန် ဝီ လွတ် ယမ်။ 31 ဆေ မက် အာလူင့် တွိုန် ဘော တုး ဂွန် အီမာယ် ဂွန် အီဘိုန့် အီ ဟဝ် တဲး ဂေ ယမ်၊ ဘေ ဘော လုဝ် ဒူပ် ဒါရာ ဇိုဝ် တီ ဒွန် မျုဝ်။ 32 ဆေ မက် အာလူင့် ယီ တုး မှာယ် အီ၊ န့ ဘော မုး အီမာယ် ဘော မုး အီဘိုန့်၊ ဆေ မက် အာလူင့် တုး တဲး အန် ယမ်၊ ဒါ ကာညာ မက် အာလူင့် တွိုန်၊ အန် လုဝ် ဒွါ ရွိုန် အူယ် ဂိုဝ် ဘူင့် ဒီ ဒါ ကာညာ မှာယ် တွိုန်။ ဝါယ် အန် တီ ဘေ ယီ လုဝ် ဒိုဝ်း မာဝ် ဝိုန့် တဲး မက် အာလူင့် ယမ်။ 33 ဆေ န့ မိုဝ်း ဒူအီ အူ ဝီ၊ အန် ဘော ဝိုဝ်း ကာဒဝ် ကာဒါယ်၊ အန် ဘော ဂိုဝ်း ကာဒဝ် အိုမ် ခိုမ်၊ အန် ယီ တူ ဝီ ပုန်။ ဟဲ့ ဟွတ့် ပန် တီ ဆေ မက် အာလူင့် ဘော မာလုဝ် စုဝ်း ခဲင် ကာဒဝ် တွိုန်၊ 34 ဒါ ကာညာ အိုမ် ခိုမ် လုဝ် ဒွါ ရွိုန် ဒီ ဒါ ကာညာ ဒုဝ် ဆတ်ဒါဝါ။ ပန် တီ ဒုဝ် အီ ယမ် တွိုန် ယီ ဘဲန် ကြုဝ် ဒါ ကာညာ အိုမ် ခိုမ်။

35 ဆေ မက် အာလူင့် ဝီ တုး မက် အာလူင့် ပေါ အူ ဒုဝ်၊ ဘူင် တဲး အန် ကော ယမ်၊ ဒါ ကာညာ မက် အာလူင့် ပေါ အူ ဒုဝ်၊ အန် လုဝ် ယွင့် မက် အာလူင့် အန်။ ဟဲ့ ဟွတ့်၊ ငဝ်း ပီ ပွိုန် အန် ဘော ဒုဝ် ဆတ်ဒါဝါ အီ ဟဲ့ ယမ်၊ အန် လုဝ် ကာဆာင် တဲး ဒါ ကာညာ မက် ဝီ ပွိုန် အူ ဝီ အူ ကာတဲ။ 36 ဆေ ဒွန် အီ ယီ နပ်၊ မက် အာလူင့် တွိုန် ဟဲ့ ဒွိုမ် ဘူင် ပါယ် တီ မာလဲ ဒါ ကာညာ ယီ တူ ပက် အုန် ဆီချာ အန်၊ အန် လုဝ် ဝီ ဒွါ ဝိဝ် မာမက် အိမ်။ ဒုဝ် မက် အီ ဟဲ့ ယမ် တွိုန် ယီ ဝီ ဘဲန် ကြုဝ် အန်။” ခဲ့ တီ ဇဝ်ဖြာ ဟဲ့ ဘ့လေး အုန် ဒါရာ လွင် လာယ် ကာလုတ့် ကာမး။