ဇဝ်ဖြာ ဝီ ဘ့လေး အုန် ဒါရာ လွင် ကြုဝ်ကြာမ် အီ။ အန် တဝ်း၊

1 “ဆေ န့ မိုဝ်း ဒူအီ အူ ဝီ၊ ဆေ အန် ပြာ မက် အာလူင့် ဘော ပြာ မာဘူ အီ၊ ဟဲ့ ဟွတ့် အန် ဝီ ငဝ်း ဝီ ယွင့်၊ ဒူအီ တီ လုဝ် ဝီ ဒွါ မက် အာလူင့် ဖန် ဒုဝ် ကူပ် ပြာ အန် မက် အူ ဒုဝ်။ ဆေ န့ ယီ မုး မာဘူ ပီ ပြာ အန်၊ အန် လုဝ် ဝီ ဒွါ ဖွုန် ဒုဝ် ကူပ် ပြာ အန် အူ ဒုဝ် တီ။

2 ဆေ ဒူအီ အူ ဝီ ပြာ ခဲင် မှိုဝ်၊ ဒူအီ ဟဝ် ယီ မှေတ့် အန်၊ ဝီ မး အန် တဲး အန် ယမ်၊ ဒါ အီ မး အန် တွိုန်၊ အာဝ် မိုဝ်း မှာပ် ကူပ် ငဝ်း အာဆာက် အီ။ 3 ဆေ အန် ယီ ငဝ်း ယမ် ဒါ ပြာ ကာတဲ ဆီငဲ၊ န့ ဘဲန် မှာပ် ဒီ အန်။

ဆေ န့ မုး ဒါ ပြာ၊ အန် လုဝ် ဝီ ဒွါ ကြုဝ် ပီ ပြာ အန်။ ဆေ အန် ယီ တူ မိုဝ်း ကြုဝ် မာဆေ ပီ ပွိုန် ဝီ ဒွါ၊ ဂေ လုဝ် ယွင့် အန်၊ တဲး အန် ဝီ ဘဲန် မှာယ် အီ၊ တဲး အန် ဝီ မိုဝ်း ဒီ ဒွါ ခဲ့ ပီ လုဝ် အန် ဒွါ ကူပ် ပြာ အန်။

4 ဆေ ဂေ ယီ ယိုဝ် ဒုဝ် ဆတ်ဒါဝါ ပီ ပြာ ဒါ ပြာ၊ ဘော မုး မက် အာလူင့်၊ ဘော မုး မာလုဝ် ဂေ မာဘူ၊ ဒါ ပြာ တွိုန် လုဝ် ဝီ ဒွါ အာ ဘုန်။

5 ဆေ ဒူအီ အူ ဝီ တူ ဘ်ု ဆီချာ ဒုဝ် ဆတ်ဒါဝါ အန်၊ တဲး ဂေ ဝီ လိုပ် ဟူမ် ကြုဝ် အီ ဟဝ် ခဲင် မာန် ခဲင် စ အီ ဟဝ်၊ ဒါ ကာညာ အန် လုဝ် ဝီ ဝျီ့ ကြုဝ် တီ၊ တဲး န့ ဘဲန် ကြုဝ် မွှိုမ် လွှိုမ် တူတ့် အီ လေး ခဲင် မာန် ခဲင် စ အန်။

6 ဆေ န့ ယီ မိုဝ်း ငဝ် ကုး ခဲင် မာအာတ့် ဝီ ဒန့် ကာဆိုမ် ဘော ဆီဘယ့် ငှုဝ် ပီ ဘ့လေး အုန် အီ၊ ဆေ န့ ဘော ကာဆိုမ် ငှုဝ် ခဲင် နာ၊ ဆေ န့ ဒီ ဘော ကာဆိုမ် နာ ဘော ဒဲ၊ ဒူအီ အီ တဲး ငဝ် ကာဆိုမ် တွိုန်၊ အန် ဝီ လုဝ် ဝျီ့ ခဲ့ ပီ စှိုမ် ဒါ ကာညာ ငှုဝ် တွိုန်။

7 ဆေ န့ မိုဝ်း ဒူအီ အီ အာပ် အုန် ရွိုန် အန် ဘော ကြုဝ်ကြာမ် အန် ခဲင် ကာင် ဂိုက် အန်၊ တဲး ဂိုက် ဝီ ဘ်ု ဒါင် အန်၊ ဆေ န့ ဝီ မိုဝ်း ဒူအီ ပြာ ကြုဝ် တီ ခဲင် ကာင် တွိုန်၊ ဆေ ဂေ ဝီ ပွိုန် ဒီ မှေတ့် ဒါ ပြာ တွိုန်၊ အန် လုဝ် ဝီ ဒွါ အာ ဘုန် ခဲ့ ပြာ အန်။ 8 ဆေ ဂေ ယီ တူ ပွိုန် ယိုဝ် ဒါ ပြာ တွိုန်၊ ဒူအီ အီ အုန် ကြုဝ် တွိုန် ခဲင် ကာင် အန်၊ အန် ဝီ လုဝ် ဟာဝ် ကာလာင် တူတ့် ဒီ အာတ့် ဒါ တာင်၊ တဲး ဂေ ဆုင်ဖျာတ် အာမူ တီ၊ ယုဝ် အန် ဟဲ့ ဒိုဝ်း တူ ဒိုဝ်း ကြုဝ်ကြာမ် အီ ဟဝ် တွိုန်။ 9 ဒွန် ဇေန့်၊ ဆေ ဒူအီ ပိ ပေါ အူ ဝီ တဝ်း၊ ‘ကြုဝ်ကြာမ် ပီ မိုဝ်း မဲ မုး ကြုဝ်ကြာမ် အုဝ်၊’ ဂေ ဒူအီ ဘော အာ ဘ့လာက် လုဝ် ဟာဝ် ကာလာင် တူတ့် ဒီ အာတ့် ဇဝ်ဖြာ။ န့ ဘော မုး မာမက်၊ မာလုဝ်၊ မာဘူ ဘော ဒူအီ အူ ဝီ ဟဲ့ ဟြာယ်၊ ဘော မုး ခြိုင် တာ ဘော ကြုဝ် ဘဲန် မျုဝ် ဘဲန် မျုဝ်၊ ဆေ အန် ဝီ ယိုဝ် ကြုဝ် အန် တီ ဒူင် ကွယ် ဒူအီ ဟဝ်၊ တဲး ဒူအီ အာ ဝီ တွိုန် ဝီ တး ကာလာင် တူတ့် ဒီ အာတ့် ဒါ တာင်၊ တဲး ဂေ ဝီ ဆုင်ဖျာတ် အာမူ တီ၊ တဲး ဂေ နပ်၊ အာဆေ ဘူင် နာ တူ မွှိုမ်။ ဒူအီ အီ ဘူင် နာ တူ မွှိုမ်၊ အန် လုဝ် ဝီ ဒွါ အာ ဘုန် ငဝ်း ဒွန် မျုဝ် ဒီ ဒူအီ ပေါ ဝီ။

10 ဆေ န့ မိုဝ်း ဒူအီ အီ အာပ် အုန် ဒုဝ် ဆတ်ဒါဝါ အန် အူ ဒုဝ်၊ တဲး ဂိုက် အန် ဘ်ု လိုမ်လာ၊ ဆေ ဒုဝ် အန် တီ ဘော ယမ်၊ ဆေ အန် ဘော မိုဝ်း ဆဝ်၊ ဆေ န့ ဘော မိုဝ်း ဒါ ပြာ ဒိုဝ်း ဒေါ တူ မိုဝ်း အီ ယိုဝ်၊ 11 တဲး ဘော ဒါ ကာညာ ဘော ဒူအီ ဘ်ု တွိုန် ဟာဝ် ဒီ အာတ့် ဇဝ်ဖြာ။ ဆေ အန် တူ ပြာ ဒုဝ် ပီ ဘ်ု အန်၊ တဲး ဒူအီ ဘ်ု တွိုန် ဝီ ဒွါ ကာဒိက် ဆတ်ဇာ ဒီ အာတ့် ဇဝ်ဖြာ။ ပန် တီ ဒူအီ အီ အာပ် အုန် ဒုဝ် ဆတ်ဒါဝါ အန် တဲး အီ ဘ်ု၊ အန် လုဝ် ညှိုမ် ပီ တဝ်း ဂိုက် အန် တွိုန်။ ဒူအီ ဘ်ု ဒုဝ် တွိုန် တူ လုဝ် ဝီ ဒွါ မာဆေ။ 12 ဆေ အီ ဟဝ် ယီ ဟဲ့ ပြာ ဒုဝ် ပီ လုဝ် ဘ်ု ဒူအီ တွိုန်၊ ဒူအီ တူ ဘ်ု ဆီချာ လုဝ် ဝီ ဒွါ ဒီ ဒါ ကာညာ တွိုန် ခဲ့ ပီ ပြာ အီ။ 13 ဆေ န့ ယီ မုး ဒုဝ် ခဲင် ပြဲ အီ ဟဲ့ တး ကဝ့် ဒုဝ် ဆတ်ဒါဝါ ပီ ဘ်ု ဒူအီ တွိုန်၊ အန် လုဝ် တိုယ် ဘျ ကာလူယ် အန် ဒီ ဒါ ကာညာ အန်၊ တဲး အန် ဝီ ယိုဝ် ဆီချာ လွင် ဟဲ့ ကဝ့် ဒုဝ် ပြဲ။ ပန် တီ ဒူအီ ဘ်ု ဒုဝ် တွိုန်၊ အန် တူ လုဝ် ဝီ ဒွါ မာဆေ ဒီ ဒါ ကာညာ အန်။

14 ဆေ ဒူအီ အူ ဝီ ယီ ဝါယ် မာဂြ ဂေ မက် အာလူင့် အီ ဟဝ်၊ ဆေ ဒုဝ် ပီ ဝါယ် အန် ယီ ဆဝ်၊ ဆေ အန် ဝီ ဆဝ် ဘော ယမ် ဒေါ တူ ကွယ် ဒါ ကာညာ အန်၊ ဒူအီ အီ ဝါယ် ဒုဝ် တွိုန် လုဝ် ဝီ ဒွါ ခဲ့ စှိုမ် ဒါ ကာညာ အန်။ 15 ဆေ ဒါ ကာညာ အန် ယီ ယိုဝ် ဒေါ ဆဝ် ဒေါ ယမ် အန်၊ ဒူအီ အီ ဝါယ် ဒုဝ် တွိုန်၊ အန် တူ လုဝ် ဒွါ မာဆေ ဒီ ဒါ ကာညာ အန်။ ဆေ ဒူအီ ယီ ဟဲ့ ခါတ် ဒီ ဝါယ် ဒုဝ် ဆတ်ဒါဝါ တွိုန်၊ အန် တူ လုဝ် ဒွါ မာဆေ။ ငဝ်း ခါတ် အန် ဒီ ဝါယ် တွိုန် ဟဲ့ လာယ် လွာ့ ဒီ ငဝ်း ဒုဝ် အီ ဟဲ့ စှိုမ် တွိုန်။” ပါယ် တီ ဇဝ်ဖြာ ဟဲ့ ဘ့လေး အုန် လွင် ကြုဝ်ကြာမ် ဒူအီ။

ဇဝ်ဖြာ ဟဲ့ ဟွတ့် ကာလာင် ဇိုဝ် တီ၊ အန် ဝီ တဝ်း၊

16 “ဆေ အီမာယ် လုတ့် ဒီဘျာ၊ အန် လုဝ် ဒွါ တူတ့် ငဝ်း ခတ် ဒီ ဂုန့် ဒီဘျာ။ ဟဲ့ ဟွတ့် အန် လုဝ် ဒိုဝ်း ဂွန် ဒီဘျာ တွိုန် တဲး အန် ဘဲန် အီဘိုန့် အန်။ 17 ဆေ ဂုန့် အီဘိုန့် တွိုန် ယီ တူ ဆီ တဲး ဂွန် အန် ဒီ အီမာယ် တွိုန်၊ အန် ဒိူန် လုဝ် ဒွါ ငဝ်း ခတ်။

18 ဆေ န့ မိုဝ်း အီဘိုန့် အီ တဲး ကာနမ် လူင် ဒီ အန်၊ ဘေ လုဝ် ငဝ်း ဝဲန် အန်။

19 ဆေ န့ မိုဝ်း ဒူအီ အီ လာယ် ဒုဝ် ဆတ်ဒါဝါ၊ ဘေ လုဝ် ငဝ်း ဝဲန် ဘော အန်။

20 ဆေ န့ မိုဝ်း ဒူအီ အီ လှူ ဒီ ဇဝ် ပီ ကြိုပ် ဒူအီ ဟဝ်၊ ဆေ ဂေ တူ ကြိုပ် အုဝ် အီ မုး ဇဝ်ဖြာ၊ ဘေ လုဝ် ငဝ်း ဝဲန် ဘော ဒူအီ တီ။

21 ဆေ န့ မိုဝ်း ဒူအီ အာမျုဝ် ဟဝ် အီ ကွယ် ဒူင် ကွယ် ဘေ၊ ကွဲ့ ဘူင် နာ စီစိဝ် ဒီ အန်။ တဲး ဘေ ဝီ ကာဖာ လှုဝ်း အာခြာဝ် ဒေါ ကွယ် ဘေ ခဲင် မိူင် အဲဂိုပ်။

22 ကွဲ့ ဘူင် နာ စီစိဝ် ဒီ ယာ ဆီပြး ဂေ ဂွန် ဆီပြး အီ ကွယ် ကာတဲ ဘေ။ 23 ဆေ ဘေ ဘူင် နာ စီစိဝ် ဒီ ဂေ၊ ဆေ ဂေ ဒီ ဆာခိုဝ် မှာန့် တဲး အုဝ် စွယ် ဂေ၊ အုဝ် ဒီ ဝီ ထူမ် ဆီချာ ဂြုဝ်း ပီ မှာန့် ဂေ။ 24 အုဝ် ဒီ ဘော ရူ ကာဆဝ် ဒီ ဘေ၊ တဲး ဘေ ယမ် ဒီ မာပွါ့ လာင် အီ ဟဝ်။ ပါယ် တီ ဂေ အီဘိုန့် ဘေ ဒီ ဘဲန် ယာ ဆီပြး။ ဘော ဂွန် ဘေ တူ ဝီ မိုဝ်း ဂုန့် ဂေ။

25 ဆေ ဘေ တဲး ဒူအီ ဂိန် အူ ဝီ ကာရဝ်း ရွိုန် ဘေ၊ ဆေ အန် မုး ဒူအီ အာမျုဝ် ပီ အိုပ် အုဝ်၊ ကွဲ့ ဘူင် ဒီ အန် ပီ ပီ ဘူင် ဘေ ဒီ ဒူအီ ဟဝ်။ ကွဲ့ မှာန့် အျီင် ဒီ အန်။ 26 ဆေ အီ ကမ် ဆီတုဝ် ဒီ ဘေ၊ ဘေ လုဝ် ဝီ ဒွါ ဝိဝ် အာတ့် ဂေတ့် ဆီငဲ။ 27 ခုဝ်၊ အန် မိုဝ်း ဒီ စှိုပ် မီ ဆီတုဝ် အူ ဖိူန် တီ ဒေါ အိတ် အန်၊ တဲး န့ ဘဲန် ဟိုပ် အန်။ အာဝ် မိုဝ်း ခြိုင် ပေါ အူ ဖိူန်။ ဆေ မဲ ယီ ဒိုဝ်း ခြိုင် အူ ဖိူန် တီ၊ အန် တူ မိုဝ်း မာဆေ တဲး အန် စှိုပ် ဒေါ အိတ် အန်။ ဆေ ဒူအီ တီ ဘော ဝီ မှာန့် တဲး အုဝ် စွယ် အန်၊ အုဝ် ဒီ ထူမ်။ အုဝ် ဒီ ဝီ စွယ် အန် ကူပ် မိုဝ်း အုဝ် နဝ်း ကာဝေ ဒူအီ။

28 ကွဲ့ ကာလာင် ဂြုဝ်း အီ ခဲန့် ဇဝ်ဖြာ။ ကွဲ့ ဒိူင် ဒါ ကာညာ အီ အိုပ် ဘေ။

29 ကွဲ့ ဘ့လေး အုန် ပီ လုဝ် လှူ ဘေ။ န့ ဘော မုး ငှုဝ် ပီ အုန် ဘေ ခဲင် ဘု ဘေ၊ န့ ဘော မုး အိုမ် မာငုန် ဂေ နာမန် ပီ အုန် ဘေ ခဲင် ကာပဝ်၊ ဒွန် မျုဝ် တဲး ဘေ လှူ ဂိုဝ် ဘုန် အူ ဘုန်။ ဆေ ဘေ ပွိုန် ဂွန် အီမာယ်၊ ဆေ န့ မုး ဂွန် ဂိန့် ဘေ၊ ဘေ လုဝ် လှူ ဒီ အုဝ်။ 30 ဘော ဂွန် မက် အာလူင့်၊ ဂွန် မာဘူ ဘော ဂွန် မာပဲ ဘေ၊ ဆေ န့ မုး ဂွန် ဂိန့်၊ ဘေ လုဝ် လှူ ဘော အန်။ ဘေ လုဝ် တဲး ဂွန် ဂေ တီ ကွယ် ရိုမ် ဒူပ် မာ အန် အာဒါ ဘူ ဆီငဲ။ ဒေါ ဇမ် ဆီငဲ န့ဒါ ဘေ လုဝ် တး လှူ ဒီ အုဝ်။

31 ဘေ မုး ဒူအီ ပီ ရဝ်း အုဝ်၊ တဲး ဘေ ဘဲန် ဒူအီ ဘွတ် ပီ အိုပ် အုဝ်။ ခုဝ်၊ ဆေ ဒုဝ် ပြဲ ဟဲ့ ကဝ့် ယမ် ဒုဝ် ဆတ်ဒါဝါ အူ ဒုဝ်၊ ဘေ ကွဲ့ ဟူမ် ယင် အန် တီ။ တဲး ဘေ ဒွါ မာဆုဝ် ဟူမ်။”