ဟဲ့ ဟွတ့် ပန် တီ ဇဝ်ဖြာ ဝီ တဝ်း၊

1 “ကွဲ့ ကာလာင် နာ တူ မှာန် လွင် အီ။ ကွဲ့ စွယ် ဒူအီ တူ မွှိုမ် အီ ဆီ တဲး မဲ ဘဲန် ဆက်ဆေ ဘော ဝီ ကာလုဝ် ဒီ ကာလာင် ဂြုဝ်း အီ တူ မွှိုမ် လွင် အီ ဟဝ်။

2 ဆေ န့ မိုဝ်း ဒူအီ ကိူန် အီ ခြာမ် ဒီ ဘူင် နာ တူ မွှိုမ်၊ ကွဲ့ တဲး ဘော ဘေ ဒူပ် ဂေ။ ဆေ န့ မိုဝ်း အာမူ၊ ဘေ ယီ လုဝ် ဘဲန် ဆက်ဆေ၊ ကာလာင် ခဲ့ ပီ ယိုဝ် ဘေ။ ကွဲ့ ဘျွင် နာ မှာန်၊ ကွဲ့ တဝ်း နာ တူ မှာန်၊ ကွဲ့ ဒူပ် ဂြုဝ်း ဂေ ဒူအီ ကိူန်။ 3 ဆေ န့ မိုဝ်း ဒူအီ ဂိန် အီ မိုဝ်း အာမူ ပီ လုဝ် ဆုင်ဖျာတ်၊ ဆေ အန် ဟဲ့ ဘူင် နာ တူ မွှိုမ်၊ ကွဲ့ စွယ် အန်၊ ကွဲ့ ကာလုဝ် ဒီ ကာလာင် နာ မွှိုမ် လွင် အန်။

4 ဆေ န့ မိုဝ်း ရန်ဆူ မဲ၊ ဆေ မက် အာလူင့် ဂေ မာလုဝ် အန် ဟဲ့ ဟြာယ်၊ ဆေ ဘေ ယီ ဝီ ယိုဝ် ဒုဝ် ဆတ် တီ၊ ဘေ လုဝ် ဝီ တိုယ် ဒီ ဒါ ကာညာ အန်။ 5 ဆေ န့ ဘော မိုဝ်း ဒူအီ ရူ ဒီ ဘေ၊ ဘေ ဘော ယိုဝ် မာလုဝ် ဒူအီ တွိုန် ဟဲ့ ကေး ကူပ် တူ ပဲ အန် ကြုဝ် ပီ ဒါင် အန်၊ ဘေ လုဝ် စွယ် ဒူအီ တီ။ ကွဲ့ တဲး ဘေ ဘ့လေး အန်။

6 ဆေ န့ မိုဝ်း ဒူအီ ဂိန်၊ ဆေ အန် ယီ မိုဝ်း အာမူ ပီ လုဝ် ဆုင်ဖျာတ်၊ ကွဲ့ တဝ်း အာဝ် လုဝ် ဆုင်ဖျာတ် အာမူ အန်၊ ဟဲ့ လိုဝ်း ဆီချာ မှာပ် အန်။ 7 ဆေ န့ မိုဝ်း ဒူအီ ဖျာက် ဒူအီ အီ တူ မိုဝ်း မှာပ်၊ ဘေ ကွဲ့ ထူမ် ဂြုဝ်း ပီ ဖျာက် အန် တီ ဒေါ မှဝ်။ ကွဲ့ ဆုင်ဖျာတ် ဒီ ငဝ်း ယမ် ဒူအီ အီ တူ မိုဝ်း မှာပ်၊ အီ တူ ဘူင် နာ တူ မွှိုမ်။ အာဆေ ယီ ဘူင် ဇိုဝ် တီ၊ အုဝ် ဇဝ်ဖြာ တူ ကာဝေ အန် ဒေါ မှဝ်။

8 ဆေ ဘေ လုဝ် ဆုင်ဖျာတ် အာမူ အီ ဒွန် မျုဝ်၊ ကွဲ့ ဒိုဝ်း ပီ မွှန် အီ။ ရွိုန် ပီ မွှန် ဂေ တီ၊ န့ တဲး ဘေ တူ ယိုဝ် နာ မှာန်။ န့ ဘော တဲး ဒူအီ မွှိုမ် ဝီ စှိုမ်။

9 ကွဲ့ ဘူင် နာ တူ မွှိုမ် ဒီ ဒူအီ အာမျုဝ် ဟဝ်၊ အီ ကွယ် ဒူင် ကွယ် ဘေ။ ဘေ ဟဲ့ နပ် ဒုက် ပီ လုဝ် ခမ် ဒူအီ အာမျုဝ် ဟဝ်။ ခုဝ်၊ ဘော ဘေ ဟဲ့ ဒွိုမ် ကွယ် ခဲင် မိူင် အဲဂိုပ် တွိုန်။”

ဝါယ် အန် တီ ဇဝ်ဖြာ ဝီ တဝ်း၊

10 “အာဒါ ဒဝ် ဆီနမ် ဘေ လုဝ် ဆမ် ဘဲန် မျုဝ် ဘဲန် မျုဝ်။ ဟဲ့ ဟွတ့်၊ ဘေ လုဝ် ဝီ ဆုဝ့် ငှုဝ်၊ ဘေတ့် ဘ့လေ ဘဲန် မျုဝ် ဘဲန် မျုဝ် ပီ ဆမ် ဘေ တွိုန်။ 11 ဆေ ယီ ဇမ် ဆီနမ် မ့ဘူ၊ ဘေ တူ လုဝ် ဆမ် မာဆေ၊ တဲး ကာဒါယ် ဒီလှဝ်။ ဆီနမ် တီ၊ ခဲ့ အီ လေး ရာင် အန်၊ တဲး ဂေ ဒူအီ ဂိန် ဒိုဝ်း ဟူမ်။ ခဲ့ ပီ တူ လုဝ် ဂေ၊ တဲး န့ ဘော ဘဲန် ပီ ဒီ ဟူမ် ဂေ ဒုဝ် ဆတ်ဒါဝါ ခဲင် ပြဲ ဘော ဂေ မာဆိမ် ဒွန် မျုဝ်။ ဘော မာန် မာငုန် ဘော မာန် ဟေ နာမန် ဘေ လုဝ် ဘူင် ပါယ် တီ။

12 ဒဝ် ဆီငဲ ဘေ လုဝ် ဘူင် ဂါန်။ ဟီ ဇမ် ဆီငဲ မ့ဘူ၊ ဘေ ကွဲ့ ဘူင် ဂါန် မာဆေ၊ တဲး ဘော မာမက် ဂေ မာလုဝ် ဘေ ပွိုန် ဒီ ဒီလှဝ်။ မှာယ် အီ ဟဲ့ ကွယ် ခဲင် ကာင် ဘေ ဆိန့် ဒေါ ဂွိုတ် ဂေ ဘော ဂေ ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ တဲး ဘော ဂေ ဝီ ဒီလှဝ်၊ တဲး ဂေ ဝီ မိုဝ်း ပ့လူမ် ကာမာယ်၊ တဲး ဂေ ဝီ ဒါခိုယ်။

13 ဘေ လုဝ် ဘူင် ဆီချာ ဒွန် မျုဝ် ပီ တဝ်း အုဝ် ဒီ ဘေ။ ကွဲ့ မှာန့် ဒီ ဇဝ် ပေါ ကာဒင်၊ တဲး ဘေ ဆာခိုဝ် မှာန့် မီ ဒီ အုဝ်။ ကွဲ့ တဲး ဘေ မှာန့် ဒီ ဇဝ် ပေါ ကာဒင် ဒေါ မှဝ်။”

ဇဝ်ဖြာ ဟဲ့ ဟွတ့် ကာလာင် ပါယ် တီ အန် ဝီ တဝ်း၊

14 “အူ ဆီနမ် အူယ် ဇေန့် ဘေ လုဝ် ဘူင် ဘ့လွယ် တဲး ဘေ ဘော ရုဝ်ဆေ အုဝ်။ 15 ဘ့လွယ် ဒေါ ဂုဝ် ဘေ လုဝ် ဘူင် မာဂျီန် အာဘိပ် တွိုန်။ န့ မုး မာဂျီန် လှေး ဒေါ လေး ဘေ ခဲင် မိူင် အဲဂိုပ်။ ဘ့လွယ် တီ၊ န့ မုး ဘ့လွယ် ဟူမ် ဘေ ခါမုန် တူ မိုဝ်း ဆီနမ် ဘြး။ ဘေ လုဝ် ဘူင် ဒူပ် ဆီချာ ပီ စ်ု အုဝ် ဘေ ဘူင်။ အာဒါ ဘူ ဆီငဲ ကွဲ့ ဟူမ် ခါမုန် အီ ဟပ် ဆီနမ် ဘြး။ ဆေ ဘေ တူ မိုဝ်း ပီ ဒီ လှူ ဒီ အုဝ်၊ ကွဲ့ တး ဇမ် ဒူင် ကွယ် အုဝ်။

16 ဘ့လွယ် ဟာအာ ဘေ လုဝ် ဘူင် ဝါယ် ဟဲ့ ဟွတ့် ဆုဝ့် ငှုဝ်။ ဒေါ အန် တီ ငှုဝ် ပီ ဆုဝ့် ဘေ ဒေါ ဂုဝ်၊ ဘေ ဘော လုဝ် လှူ ဒီ အုဝ်၊ တဲး န့ ဘဲန် ဘ့လွယ် ဆုဝ့် ငှုဝ်။

ဘ့လွယ် ဟာအူယ် ဘေ လုဝ် ဘူင် အာတ့် တူတ့် ဆီနမ်။ ဝါယ် ဟဲ့ ဟွတ့် ဘေ ဘေတ့် အုန် ဘ့လေ ဒီ ဟေ ဘဲန် မျုဝ် ဘဲန် မျုဝ်၊ ဘေ လုဝ် ဝီ ဘူင် ဘ့လွယ် အုန် ဘ့လေ။

17 အူ ဆီနမ် အူယ် ဇေန့် ဂေ အီမာယ် ဒွန် အီ လုဝ် တး ဇမ် ဒူင် ကွယ် ဇဝ်ဖြာ အီ မုး ဒါ ကာညာ အီ အိုပ် ဘေ။

18 ဆေ ဘေ ဒီ ငဝ်း လှူ ဒုဝ် ဆတ်ဒါဝါ ဒီ အုဝ်၊ ကွဲ့ လှူ ဘော ခါမုန် ပီ ဟပ် ဘေ ဆီနမ် ဘြး။

ဆေ ဘေ လှူ ဒုဝ် ဆတ်ဒါဝါ ဒီ အုဝ် ဒေါ ဘူင် ဘေ ဘ့လွယ် တွိုန်၊ ကွဲ့ အုန် ဘျြီင် ဒုဝ် တွိုန်၊ တဲး ကော ဇမ် ပါ ခဲညှာ။

19 ဆေ န့ မုး ပီ ဆမ် ဘေ ဘဲန် မျုဝ် ဘဲန် မျုဝ်၊ ဒေါ ကာစုး န့ ဒီ ဘ့လေ၊ ဘေ လုဝ် ဒိုဝ်း ဘ့လေ ဒင် အီ မွှိုမ် လွှိုမ် တူတ့်၊ တဲး ဘေ ဝီ လှူ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။

ဆေ ဘေ ဒင် ယင် ဂွန် မာပဲ၊ ကွဲ့ ဟပ် အိုမ် ပူ မာ အန်။” ပါယ် တီ ဇဝ်ဖြာ ဟဲ့ ကာလာင် ဒါရာ အန် ဘဲန် မျုဝ် ဘဲန် မျုဝ် ဒီ အာမုဝ်ဆဲ၊ တဲး ဂေ ဒူအီ အီဆာရေလ ဝီ ထူမ် ဘူင် တူတ့် ဒွန် မျုဝ်။

ဝါယ် အန် တီ ဇဝ်ဖြာ ဝီ တဝ်း၊

20 “တဲး ဘေ ယွတ်၊ အုဝ် ဒီ တိုယ် အာမူ အာမာတ် ဇဝ်ဖြာ တဲး အန် ယဲတ့် ဒီ အာတ့် ဘေ၊ တဲး အန် ဘ်ု ရိတ် ဘေ ဒေါ ဟာဝ် ဘေ ဒူပ် န့တေန့်၊ တဲး ဘေ ဇမ် ဒူင် ပဲ့ ဟဲ့ ရဲန် အုန် အုဝ် အာဒါ ဘေ။ 21 ဘေ ယီ လုဝ် ထူမ် ဘော ဒူပ် ဂြုဝ်း ပီ ကာလာင် အန် ဒီ ဘေ။ ကွဲ့ တဲး ဘေ ထူမ် ဝဲန် ဂြုဝ်း အန်။ ပွုန် အုဝ် ကွယ် ဒီ အန်။ ခုဝ် အန် တီ၊ ဆေ ဘေ ဝဲန် ဂြုဝ်း အန်၊ အန် တူ ဝီ ဂဝ်း ဝဲန် မှာပ် ဘေ။

22 ဆေ ဘေ ယီ ထူမ် ဆီချာ ပီ တဝ်း အာမူ အာမာတ် ဇဝ်ဖြာ တီ၊ ဆေ ဘေ ဘော ဘူင် တူတ့် ပီ တဝ်း အုဝ် ဒီ ဘေ ဒွန် မျုဝ်၊ အုဝ် ဒီ ဝီ ဘဲန် ရန်ဆူ ဒီ ရန်ဆူ ဘေ။ အုဝ် ဒီ ကာဂုဝ်း ဒီ ဒူအီ အီ ဆီ ကာဂုဝ်း ဒီ ဘေ။ 23 အာမူ အာမာတ် အုဝ်၊ အန် ဒီ ယဲတ့် ဒီ အာတ့် ဘေ၊ တဲး ဘေ ဇမ် ခဲင် မိူင် ဂေ ဒူအီ အာမုဝ်ရိတ် ဘော ဂေ ဒူအီ ဟေထိတ်၊ ဒူအီ ဖေရေဆိတ်၊ ဒူအီ ကာနန့်၊ ဒူအီ ဟီဝိတ် ဘော ဒူအီ ယေဘူဆိတ်။ အုဝ် ဒီ တဲး ဒူအီ ဂေ တီ စှိုမ် တူတ့်။ 24 ဆေ ဘေ ဟဲ့ တး ဇမ် ခဲင် မိူင် ဂေ တီ၊ ကွဲ့ ကြိုပ် အာရိုပ် ပီ ကြိုပ် ဂေ တွိုန်။ ကွဲ့ ဒူပ် ဟိတ် ဂေ။ ဘေ လုဝ် ဝဲန် အာရိုပ် ပီ ဘ့လေး အုန် ဂေ။ ဘေ လုဝ် ဒွယ် ကာလာတ့် အာရိုပ် ပီ ကြိုပ် ဂေ၊ တဲး န့ စှိုမ်။ 25 ဘေ လုဝ် ကြိုပ် မီ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ ဆေ ဘေ ဘူင် ပါယ် တီ အုဝ် ဒီ မွင့်ကာရာ ဒွါ ပီ ဒီ ဟူမ် ဘေ ဘော အိုမ် ပီ ဒီ ဒျီင် ဘေ။ အုဝ် ဒီ ရဲ ဆဝ်၊ ရဲ ရောဂါ၊ ကွဲ့ တဲး ဘေ ဆဝ်၊ တဲး ဘေ ဘောကာဂ့လျီတ် ခ ဂျာမ်ဆာ။ 26 ခဲင် ကာင် ဘေ န့ တူ မိုဝ်း အီဘိုန့် မ့ဘြွတ့်။ န့ မိူဝ် တူ မိုဝ်း အီဘိုန့် အီ မှန်။ အုဝ် ဒီ ဘော တဲး အာဆာက် ဘေ တူင့်။

27 အုဝ် ဒီ တဲး ဂေ ရန်ဆူ ဘေ ယုဝ် ကာဆဝ် ဘေ။ ဂေ ဒူအီ ခဲင် မိူင် ဒွန် မိူင်၊ ဂေ ဒီ ကာဝှ်ု ကာဝျှီန် ဒေါ တး ဘေ။ အုဝ် ဒီ တဲး ဂေ ဘဲန် နဝ်း တျီ့၊ တဲး ဂေ ဝီ ဟာဝ် တဝ် ဒီ အာတ့် ဘေ။ 28 အုဝ် ဒီ တိုယ် မာကာအာန့်၊ တဲး ဂေ ယဲတ့် ဒီ အာတ့် ဘေ၊ တဲး ဂေ ဆုတ့် ဒူအီ ဟဝ် လေး ဒူင် ကွယ် ဂေ။ ဘော ဂေ ဒူအီ ဟီဝိတ်၊ ဒူအီ ကာနန့် ဘော ဂေ ဒူအီ ဟေထိတ်၊ ဂေ ဘောကာဂ့လျီတ် ဒီ တဝ် ဒေါ တး ဘေ။ 29 အုဝ် ယီ တူ တဲး ဂေ လေး တူတ့် ခဲ့ အူ ဆီနမ်၊ ကွဲ့ တဲး မာန် မိူင် ဘေ ဘဲန် ပြဲ၊ ကွဲ့ တဲး မာ ဒုဝ် ဆတ် ဘြဲ ကိူန်။ 30 အုဝ် ဒီ ဆုတ့် လေး ဂေ အီ စဲက်၊ အီ စဲက်။ တဲး ဘေ ဘော ဘြဲ၊ ဘဲန် ဒူအီ ကိူန်၊ တဲး ဘေ ပဲ ဒီ အိုပ် မိူင် တီ ဘော မိူင်။

31 အုဝ် ဒီ တဲး မိူင် ဘေ စုး ဒီ ခူပ် အိုမ် ဒီနှူင် ရေန့်၊ တဲး ကော ဇမ် အိုမ် ဒိုင် ခဲင် မိူင် ဂေ ဒူအီ ဖီလီထီ။ မိူင် ဘေ န့ မိူဝ် စုး ဒီ ဒူင် ကာဟဝ်း နာ တေတ့်၊ တဲး န့ ကော ဇမ် ဒီ ဘ့လဲင် အိုမ် တာင် အီ ကွယ် နာ ကွာ န့ မုး ဘ့လဲင် အိုမ် အူဖာရာတ်။ အုဝ် ဒီ ဒွါ ဒီ ဘေ ဂေ ဒူအီ အီ ကွယ် ခဲင် မိူင် တီ။ အုဝ် ဒီ တဲး ဘေ အိုပ် ဂေ။ ဘေ ယီ ဒီ ဆုတ့် ဂေ လေး ခဲင် မိူင် ဘေ။ 32 ကွဲ့ ဒွါ ကာဒိက် ဆတ်ဇာ ဒီ ဂေ ဒူအီ တွိုန်။ ဘေ မိူဝ် ကွဲ့ ဒွါ ကာဒိက် ဆတ်ဇာ ဒီ အာရိုပ် ပီ ကြိုပ် ဂေ။ 33 ကွဲ့ တဲး ဂေ အာမျုဝ် ဒူအီ တွိုန် ကွယ် ရိုမ် ဒူပ် ဘေ ခဲင် မိူင် ဘေ။ ယုဝ် ဂေ ကာဆုး ဘေ တဲး ဘေ ဘူင် မှာပ်၊ တဲး ဘေ ဘူင် နာ တူ မွှိုမ် ဒီ အုဝ်။ ဆေ ဘေ ကြိုပ် အာရိုပ် ပီ ကြိုပ် ဂေ၊ န့ ဒီ တဲး ဘော ဘေ ထေဝ် ဒီ ဘူင် ပီ ဂေ။ ဟဲ့ ဟွတ့်၊ ဘေ ဒီ ဘော စှိုမ် အာဆာက် ဘေ။” ခဲ့ တီ ဇဝ်ဖြာ ဟဲ့ ကာလာင် ဒီ ဂေ ဒူအီ အီဆာရေလ။