1 ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ ဒဲ့ ဘော အာရူန်၊ အာနာဒါပ်၊ အာဘီဟူ ဘော ဂေ ဒါ တာင် ဒူအီ အီဆာရေလ ဘူ ဂိုဝ် ဝီ၊ တဲး ဘေ ဟုဝ့် ဇမ် ဒူင် ကွယ် အုဝ် ဒီ နွန် နီ။ တဲး ဂေ ကြိုပ် အုဝ် ဘော ကွယ် ကာယာန် အုဝ်။ 2 မဲ အာမုဝ်ဆဲ၊ မဲ အူ ဝီ ယီ လုဝ် တး ဇမ် ချြီ့ အုဝ်။ ဘော ဂေ ဒူအီ ကိူန် အာဝ် ပွိုန် ဟုဝ့် ဒဲင် နွန်၊ ကွယ် ချြီ့ အုဝ်။”

3 ပန် တီ အာမုဝ်ဆဲ ဟာဝ် ကာလာင် ဒွန် မျုဝ် ပီ ဒွိုမ် ကာလာင် ဇဝ်ဖြာ ဒီ အန်၊ တဲး ဒူအီ ကိူန် ထူမ်။ ဟဲ့ ဟွတ့်၊ ဂေ ဒူအီ ဘောကာဂ့လျီတ် ဝီ တဝ်း ဒီ အန်၊ “ယေ ဒီ ဘူင် တူတ့် ဒွန် မျုဝ် ပီ ဒမ် အုန် ဇဝ်ဖြာ ဒီ ယေ။” 4 ပန် တီ အာမုဝ်ဆဲ ဝီ ဒဲမ် အုန် ဂြုဝ်း ဇဝ်ဖြာ ဒွန် မျုဝ်။

ပါ ခဲညှာ ဆိန့်ဝး အန် ဝီ စေဝ် ယိတ့်၊ ဘူင် ကာစှူင့် လှူ ဒီ ဇဝ်ဖြာ၊ ဘ့လေး အုန် ဒီ ဒင် နွန် တွိုန်။ အန် မိူဝ် ဆမ် ရွင့် မာဝ် ဂိုဝ် ဒီ အာ ညွင့်၊ တဲး န့ ပီ ဂေ ဒူအီ အီဆာရေလ ဂိုဝ် ဒီ အာ ခြိုဝ်။ 5 ဝါယ် အန် တီ အန် တိုယ် ဂေ ကာညူမ် ဟာဝ် လှူ ဒုဝ် ဆတ်ဒါဝါ ဒီ ဇဝ်ဖြာ။ အန် တဲး ဂေ လှူ မက် အာလူင့်၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အီ ကွယ် ကာဇု ဟူမ် ရိုမ်။ 6 အာမုဝ်ဆဲ ဘော ဒိုဝ်း နှာမ် မက် အာလူင့် အူ ကာတဲ၊ အုန် ခဲင် ဆီလယ့်။ ပေါ ကာတဲ အန် ဒိုဝ်း၊ ခြဝ်း ဒီ ကာစှူင့် လှူ တွိုန်။ 7 ဒေါ အန် တီ အာမုဝ်ဆဲ ဘော ဒိုဝ်း ဘပ် ပီ ဒဲမ် အုန် ဒါရာ ဇဝ်ဖြာ၊ တဲး န့ ဘဲန် ပီ လာယ် ကာဆဲန့် ဇဝ်ဖြာ ဂါယ် ဒူအီ။ အန် ဝီ တိး တဲး ဒူအီ ဝီ ထူမ် တူတ့်။ ဟဲ့ ဟွတ့်၊ ဂေ ဒူအီ ဝီ တဝ်း၊ “ယေ ဒီ ဘူင် ဒွန် မျုဝ်။ ယေ ဒီ ဒူပ် ဆီချာ ဂြုဝ်း ဇဝ်ဖြာ ပီ ဘ့လေး အုန် အန်။ ယေ ဒီ ထူမ် ဒူပ် ဇဝ်ဖြာ။”

8 ဂေ ဟဲ့ ဟွတ့် တဝ်း ပါယ် တီ အာမုဝ်ဆဲ ဒိုဝ်း နှာမ် ပီ ဘ့လေး အုန် အန် ခဲင် ဆီလယ့် တွိုန်၊ ဝီ ခြဝ်း ဒီ ဒူအီ ကိူန်။ အန် ဘော တဝ်း၊ “နီ၊ အာတီ ဟဲ့ မုး နှာမ် အီ ဘျ လွင် ဂြုဝ်း ပီ ကာဆဲန့် ဘေ ဒီ ဇဝ်ဖြာ။ ဂြုဝ်း ပီ ကာလာင် အုန် ဇဝ်ဖြာ၊ န့ ဟဲ့ မုး ဟဲ့ မှာန် ဒွန် မျုဝ်။”

9 ပန် တီ ဘော အာမုဝ်ဆဲ ဘော အာရူန်၊ အာနာဒါပ် ဘော အာဘီဟူ ဘော ဂေ ဒါ တာင် ဘူ ဂိုဝ် ဝီ တွိုန်၊ ဂေ ဟုဝ့် ဒီ နွန် တွိုန်။ 10 ဂေ ပွိုန် ဒီ ယိုဝ် ဇဝ်ဖြာ ပီ ကြိုပ် ဂေ ဒူအီ အီဆာရေလ။ နာ ခြိုမ် ပ့လဝ် အန် န့ ပီ န့တေန့် ပီ ဘ့လေး ဆဲန့် ငျီန် ဘ့လေန့်။ န့ ဘော ဘ့လာင် ပီ ဂါင်ဟြာဝ်။ 11 ပါယ် တီ ဂေ ပွိုန် ဒီ ယိုဝ် ဇဝ်ဖြာ။ ဇဝ်ဖြာ ယီ တူ တဲး ဂေ ယမ်။ ဂေ ဒါ တာင် ဒူအီ အီဆာရေလ၊ ဂေ ဟဲ့ ဟွတ့် ယွတ် ဇဝ်ဖြာ၊ ဂေ ယီ ကွယ် ဒါခိုယ်၊ ပွိုန် ဟူမ်၊ ပွိုန် ဒျီင် ပီ ခါ အာတ့်။

12 ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ ဟုဝ့် ဇမ် ဒူင် ကွယ် အုဝ် ဒဲင် နွန် နီ၊ တဲး မဲ ကွယ် ဒီ နီ။ အုဝ် ဒီ ဒွါ မာဝ် အာ ဒီဖ့လာင် ဒီ မဲ။ ဒါရာ ပီ ဒွါ အုဝ် ဒီ ဘေ၊ ပီ ကာလာင် အုဝ်၊ တဲး ဘေ ဘူင်၊ အုဝ် ဟဲ့ ဒဲမ် အုန် ဒဲင် မာဝ် အာ ဒီဖ့လာင် တီ၊ တဲး မဲ ဝီ မာနုဝ် ဂေ ဒူအီ။”

13 ပန် တီ အာမုဝ်ဆဲ ဂါယ် အာယုဝ်ဆူအာ အီ မုး ဒူအီ အီ စွယ် အန်၊ ဂါယ် ဝီ ဟုဝ့် ဒဲင် နွန် ဇဝ်ဖြာ။ 14 အာမုဝ်ဆဲ ဝီ တဝ်း ဒီ ဂေ ဒါ တာင်၊ “ဘေ နှဝ့် ယာယ် ဒူင် ကွယ် ဘေ နီ၊ တဲး ယာယ် ကော ဝီ တး ဇမ် ဒူင် ကွယ် ဘေ။ အာရူန် ဂါယ် အာဟူရာ ဂါယ် ကွယ် ရိုမ် ဒူပ် ဘေ။ ဒေါ တူ ကွယ် ယာယ်၊ ဆေ န့ ဘော မိုဝ်း ပီ တူ လာယ် ဆီဖဝ် ဘေ၊ ဘေ ပွိုန် ကာလာင် ဒီ ဂါယ်။”

15 ဝါယ် အန် တီ ဒေါ ဟာဝ် အာမုဝ်ဆဲ ဟုဝ့် ဒဲင် နွန် ဆီနာယ် တွိုန်၊ န့အု ဝီ ပ့လိုက် နွန် ဘော နွန်။ 16-17 အာရူင် ဘ့လာင် ဇဝ်ဖြာ မိူဝ် လေး လူင် ကွယ် ဒီ နွန် တွိုန်။ ဂေ ဒူအီ အီဆာရေလ ယီ ထာင် အာရူင် ဇဝ်ဖြာ န့ ပီ ငဝ် ဘ့လာင်၊ ငဝ် အီ ကာဆိုမ် တူတ့် ဒဲင် နွန်။ အာဒါ ဒဝ် ဆီငဲ န့အု တွိုန် ဝီ ပ့လိုက် နွန်။ ဒေါ ဇမ် ဆီငဲ မ့ဘူ၊ ဇဝ်ဖြာ အီ ကွယ် ခဲင် န့အု၊ အန် ဝီ ဒဲ့ အာမုဝ်ဆဲ။ 18 အာမုဝ်ဆဲ ဝီ ဟုဝ့် လိုပ် ခဲင် န့အု၊ အာဝ် ဟူ ပွိုန် ယိုဝ်။ အန် ကွယ် ဒဲင် နွန် အာဒါ ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ်။