1 ဇဝ်ဖြာ ဝီ တဝ်း ဒီ အာမုဝ်ဆဲ၊ 2 “ဘေ လုဝ် ကာလာင် ဒီ ဂေ ဒူအီ အီဆာရေလ၊ တဲး ဂေ ကာဇု ကြုဝ်ကြာမ် ဒွန် မျုဝ်၊ တဲး န့ ဘဲန် ပီ ဒီ လှူ ဂေ ဒီ အုဝ်။ အာဆေ မိုဝ်း နဝ်း ဆီ လှူ၊ တဲး အန် ဒွါ ခဲ့ ပီ ဆီ လှူ အန်၊ တဲး မဲ ဘော ရပ် ပီ လှူ တီ။ 3 န့ ယီ မုး ဒွန် မျုဝ် ပီ ပွိုန် ဒွါ ဂေ။ ဘော ခြိဝ်၊ ရွိုန် ဂေ ဘွင့်၊ 4 ဘော ဘိက် ပီ ဘူင် ဂေ တာ ကာတမ် လုယ်၊ ဘော ဆေန့် အီ ခွင်၊ အီ ဂုယ် ခွန်၊ အီ ရေန့် ဂဲ၊ ဘိက် ပီ ဘူင် ဂေ တာ ဆေန့် စာမူယ် ဂေ ဟိုက် ပဲ။ 5 ဂေ ဘော လုဝ် ဒွါ ဘော ဟုန် မာဘူ အီ စုတ် ဆီနမ် ရေန့်၊ ဘော ဟုန် မာမက် အိုမ်၊ ဘော ဟေ ကာထိန်။^a 6 တဲး ဂေ ဘော ဒွါ နာမန် ပီ လုဝ် ဟပ် ခဲင် ငဝ် ရာင် နာမန်၊ ဘော န့ကြိုဝ်း အုး ငှုန် ပီ လုဝ် ဂေ ဒေါ ဘူင် ဂေ နာမန် အုး ငှုန် အီ လုဝ် ဖဝ်း ဒီ ဒူအီ၊ ဘော န့ကြိုဝ်း အုး ငှုန် ပီ လုဝ် ဂေ ဒေါ ပီဒဝ့် ငဝ် အုး ငှုန် ဒီ အာတ့် ဇဝ်ဖြာ။ 7 တဲး ဂေ ဘော ဒွါ ဆဲန့် ဝွင့် လုယ် ဘော ဆဲန့် ဘဲန် မျုဝ် ဘဲန် မျုဝ်၊ တဲး ဂေ ပွိုန် ဒီ ဒိုက် ဒီ ဆီတုဝ် ပီ တာ ဒါ တာင် အီ လှူ ဒီ ဇဝ်ဖြာ၊ တဲး ဂေ ဘော ဒိုက် ဒီ ဟူ ပီ လုဝ် ဘ့လေး ဒါ တာင် အီ လှူ ဒီ ဇဝ်ဖြာ ဒီ ဘင်နဝ်း အန်။^b

8 ဘေ ဟီ ဟွတ့် လှူ ကြုဝ်ကြာမ် ဇိုဝ် တီ ဒွန် မျုဝ်၊ ဘေ လုဝ် စ်ု ဒူအီ ဘူင် ထိုပ် ဘိက် ဘွတ် အာဒါ အုဝ်။ ဟဲ့ ဟွတ့်၊ အုဝ် ဒီ ဘော ကွယ် ကာတဲ ဘေ။ 9 ဘော ထိုပ် ဘိက် နီ၊ ဘော ပီ လုဝ် ဘ့လေး ဘေ နာ ခဲင် ဒွန် မျုဝ်၊ ဘေ လုဝ် ဘူင် တူတ့်၊ တဲး န့ ပီ ပီ ဒီ ဘျ အုဝ် ဒီ မဲ။ ကွဲ့ တဲး န့ ကာဝး မာဆေ။” ခဲ့ တီ ဇဝ်ဖြာ ဟဲ့ စ်ု အာမုဝ်ဆဲ ဘူင်။

10 ဟဲ့ ဟွတ့်၊ ဇဝ်ဖြာ ဝီ တဝ်း၊ “မဲ လုဝ် စ်ု ဒူအီ ဘူင် ဇီဒိူက် အူ ဘူင့်။ ဂေ လုဝ် ဘူင် ဇီဒိူက် တီ၊ တာ ဟေ ကာထိန်။ ဇီဒိူက် တီ၊ နာ တူင့် အန် လုဝ် ဘူင် အာ ကာနိး ဒီ အူ ကာဆာန်။ နာ တာင် အန် လုဝ် ဘူင် အူ ကာနိး ဒီ အူ ကာဆာန်၊ ဘော နာ စာ အန် လုဝ် ဘူင် အူ ကာနိး ဒီ အူ ကာဆာန်။ 11 ဘေ ဘော လုဝ် ဒိုဝ်း ခြိဝ် ဘွတ် ဘူင် ဘဲန် ဘ့လ၊ ပိတ် ဒွန် ဘ့လာက်၊ ဘော နာ ခဲင် ဘော နာ ရေတ့်။ ဘေ ဘော လုဝ် ဘူင် ဘော ဘာင် ခြိဝ် တဲး န့ ရူပ် ဇီဒိူက် တွိုန်။ 12 ဘေ ဘော လုဝ် ဘူင် ခ့ဝင် ခြိဝ် ဖွုန် ခ့ဝင်၊ ဒိုက် ဒီ ပ့လဝ် အန် ဒီ ဘြေတ့်၊ အူ ဘြေတ့် အာ ခ့ဝင်။ 13 ဟဲ့ ဟွတ့် ပန် တီ ဘေ ဘော လုဝ် ဒိုဝ်း ဟေ ကာထိန် ဘူင် မင် ဂွတ်၊ ဝီ ပိတ် ခြိဝ်။ 14 ဘေ ဘော လုဝ် ပ့လွ့ မင် ဂွတ်၊ တဲး န့ ကော ဟာဝ် ခဲင် ခ့ဝင် တွိုန်၊ တဲး ဒူအီ ပွိုန် ဒီ ဂွတ် အန်။ 15 မင် ဂွတ် တွိုန် လုဝ် ကွယ် ခဲင် ခ့ဝင် ဆေဆေ၊ ကွဲ့ တဲး ဘေ ထွတ် ဒေါ မှဝ်။ 16 ဘေ ဟီ ဟွတ့် ဘူင် ဇီဒိူက် တီ၊ အုဝ် ဒီ ဝီ ဒွါ မာဝ် အာ ဒီဖ့လာင် ပီ ဒဲမ် အုန် အုဝ် ဒါရာ အုဝ်။ မာဝ် တီ ဘေ လုဝ် ဘ့လေး အုန် ခဲင် ဇီဒိူက် တွိုန်။

17 ဘေ ဘော လုဝ် ဒိုဝ်း ခြိဝ် ဘွတ်၊ ဘူင် ဆီဘ့လိုက်၊ ကာဘိတ် ဇီဒိူက်။^c ဆီဘ့လိုက် တီ လုဝ် ဘူင် နာ တူင့် အာ ကာနိး ဒီ အူ ကာဆာန်၊ နာ တာင် အူ ကာနိး ဒီ အူ ကာဆာန်။ 18 ဘေ ဘော လုဝ် ဒွက် ခြိဝ် ဘူင် ရာင် အာမူ အာမာတ် ဇဝ်ဖြာ အာ ကာဒင် အီ စိူဝ် ခေရုပ်၊ တဲး ဂါယ် ကွယ် ဒီ အာ ဘ့လာက် နာ ဒဲင် ဆီဘ့လိုက် တွိုန်။ 19 ဘေ လုဝ် ဘ့လေး ဂါယ်၊ တဲး ဂါယ် ကွယ် အူ ဘ့လာက် အူ ကာဒင်။ ဘော ရာင် အာမူ အာမာတ် ဇဝ်ဖြာ ဘော ဆီဘ့လိုက် တွိုန် ဘေ လုဝ် ဘူင် တဲး န့ ဘဲန် အူ ဆိ။ 20 အာရိုပ် အာမူ အာမာတ် ဇဝ်ဖြာ ဂါယ် တီ၊ ဘေ လုဝ် ဘူင် တဲး ဂါယ် စုဝ့် ဖျီင် ဂါယ် ဆူင့် နာ အာတ့်၊ တဲး ဖျီင် ဝီ ကွယ် နာ ဒဲင် ဆီဘ့လိုက် တွိုန်၊ တဲး ဂါယ် လာယ် မာငး၊ မုတ် ယွတ် ဇီဒိူက်။ 21 ဘေ ဟဲ့ ဟွတ့် ဘူင် ပါယ် တီ ဘေ လုဝ် ဘ့လေး ဆီဘ့လိုက် တွိုန် နာ ဒဲင် ဇီဒိူက်။ ဟဲ့ ဟွတ့်၊ ဘေ လုဝ် အုန် မာဝ် အာ ဒီဖ့လာင် ပီ ဒီ ဒွါ အုဝ် ဒီ ဘေ၊ တဲး န့ ကွယ် နာ ခဲင် ဇီဒိူက်။ 22 နာ ဒဲင် ဇီဒိူက် တီ၊ အုဝ် ဒီ ကွယ် ကာလာင် ဂြုဝ်း ဒီ ဘေ။ အုဝ် ဒီ ကွယ် ဒီ ကာတဲ အာမူ အာမာတ် အုဝ် အာ ကာဒင် တွိုန်၊ ခ့ဝါင် ဘေ၊ တဲး ဘေ ကာတုန့် အုဝ်၊ တဲး အုဝ် ကာလာင် ဒါရာ ဒွန် မျုဝ် ဒီ ဘေ၊ တဲး ဘေ ဝီ ဘူင် တူတ့် ဒွန် မျုဝ် ပီ ကာလာင် အုဝ် ဒီ ဘေ။” ပါယ် တီ ဇဝ်ဖြာ စ်ု ဂေ ဘူင်။

23 ဇဝ်ဖြာ ဟဲ့ ဟွတ့် ကာလာင် ဒီ အာမုဝ်ဆဲ၊ အန် ဝီ တဝ်း၊ “တဲး ဘေ ဝီ ဒိုဝ်း ဟေ ကာထိန် ဘူင် ကာစှူင့် အူ ဘူင့်။ ဘေ လုဝ် ဘူင် တဲး နာ တူင့် အာ ကာနိး၊ နာ တာင် အူ ကာနိး၊ နာ စာ အူ ကာနိး ဒီ အူ ကာဆာန်။ 24 ကာစှူင့် တီ ဘေ လုဝ် ပိတ် ခြိဝ် ဘွတ်။ ဘေ ဘော လုဝ် ဒိုဝ်း ခြိဝ် ဘွတ် ဘူင် ဘာင် အန်။ 25 နာ ရေတ့် ဘာင် ခြိဝ် တီ၊ လုဝ် ဘူင် ပေါ အူ ဘာင်၊ တာ ဟေ ကာထိန်။ လုဝ် ဘူင် တဲး နာ တာင် အန် အူ ကာဘာ ဒဲ။ ဒီ ခူပ် ဘာင် ဟေ ကာထိန် တီ ဘော လုဝ် ပိတ် ခြိဝ်။ 26 ဟဲ့ ဟွတ့် ပန် တီ ဘေ ဘော လုဝ် ဒိုဝ်း ခြိဝ်၊ ဘူင် ခ့ဝင် အန် ဖွုန် ခ့ဝင်၊ ဘူင် တဲး ဂေ ဒိုက် ဒီ ပ့လဝ် ကာစှူင့် တွိုန် ဘော ဖွုန် ကာတုဝ့်။ 27 ဘေ လုဝ် ဒိုက် ခ့ဝင် ဒီ ခူပ် ကာစှူင့်၊ တဲး ဂေ ကွယ် နာ ခြိုမ် ဘာင် အန်၊ တဲး ဂေ ပွိုန် ဒီ ပ့လွ့ ဟာဝ် မင် ဂွတ် ခဲင် ခ့ဝင်၊ တဲး ဂေ ပွိုန် ဒီ ဂွတ် ဘော ကာစှူင့်။ 28 ဘေ ဘော လုဝ် ဒိုဝ်း ဟေ ကာထိန် ဘူင် မင် ဂွတ် ကာစှူင့်။ ဟဲ့ ဟွတ့်၊ ဘေ ဝီ လုဝ် ပိတ် ခြိဝ်။ 29 ဘေ ဘော လုဝ် ဒိုဝ်း ခြိဝ် ဘွတ်၊ ဘူင် ဆီလယ့် ဂေ ဖာန်၊ ကာပဝ် ဂေ မ့ပါန် ပီ တာ ဒူအီ ဒေါ လှူ ဂေ အိုမ် ဘဲန် မျုဝ် ဘဲန် မျုဝ် အီ လုဝ် လှုဝ် ဒီ အာတ့် ဇဝ်ဖြာ။ 30 ဘေ လုဝ် လှူ ဆေဆေ ခါမုန် ဒီ အုဝ်၊ ဘ့လေး အုန် နာ ဒဲင် ကာစှူင့် တွိုန်၊ တဲး အုဝ် ပွိုန် ဒီ ယိုဝ် ဆေဆေ။”

31 ဇဝ်ဖြာ ဝီ တဝ်း ဒီ အာမုဝ်ဆဲ၊ “ဘေ မိူဝ် လုဝ် ဘူင် ဒင် ငဝ် အွမ် တာင် အူ ဘူင့်။ ဘေ လုဝ် ဒိုဝ်း ခြိဝ် ဘွတ် ဘော ဒွက်၊ တဲး န့ ဘဲန် ဘော ဒင် အန် ဘော ဂဲန် အန်။ ဒီ ဂဲန် အန် လုဝ် ဘူင် တဲး န့ ဘဲန် ရာင် ဘုဝ်း၊ ဘော ဘုဝ်း ဒိုမ် ဘော ဘုဝ်း ဘြး။ ဘော ဒူင် ဒီ ဘ့လေး ငဝ် အွမ် လုဝ် ဘူင် တဲး န့ ပီ ရာင် ဘုဝ်း၊ တဲး ဘေ ဘူင် အူ ဇေန့် ဘောကာဂ့လျီတ်။ 32 ဘေ လုဝ် ဘူင် ဒင် ငဝ် အွမ် တာင် တီ၊ တဲး အာရိုပ် အန် ပီ ရာ ဒဝ် ရာ လေး ခဲင် ဂဲန် အန်၊ တဲး ရာ ဂေ လေး ဘော အာ ဘ့လာက်၊ အူ ဘ့လာက် လေး အူယ် ရာ။ 33 ဒီ ရာ အန် ဒွန် ရာ ဘေ လုဝ် ဘူင် ရာင် ဘုဝ်း ပီ ဘုဝ်း ဆာခေတ်၊ အူ ရာ အူယ် ဘုဝ်း။ ဘုဝ်း တွိုန် ဒွန် ဘုဝ်း လုဝ် ဘူင် တဲး န့ ပီ ဘော ဘုဝ်း ဒိုမ် ဘော ဘုဝ်း ဘြး။ ပါယ် တီ တဲး ဘေ ဘူင် ဘော ဒဝ် ရာ၊ တဲး ဂေ လာယ် ကာနှဲန်။ 34 ဒီ ဂဲန် ဒင် ငဝ် အွမ် တီ၊ ဘေ ယီ လုဝ် ဘူင် ဘုဝ်း အီ ပီ ဘုဝ်း ဆာခေတ်၊ တဲး န့ ဘဲန် ဖွုန် ဘုဝ်း၊ တဲး န့ မိုဝ်း ဘော ဘုဝ်း ဒိုမ် ဘော ဘုဝ်း ဘြး။ 35-36 ဒီ ဂဲန် ဒင် ငဝ် အွမ် တီ လုဝ် ဘူင် ဘုဝ်း တဲး ဘုဝ်း အူ ဘူင့် ကွယ် အီ ခြိုမ် နာ လေး ရာ အန် ဘော အူယ် ဂူ တွိုန်၊ တဲး န့ မိုဝ်း တူတ့် ဒဝ် ရာ။ ဘေ ဘ့လေး ဘုဝ်း တဲး ရာ အန် တွိုန် လေး နာ ဒဲင် ဘုဝ်း အီ ကွယ် ဒီ ဂဲန် အန် တွိုန်။ ဒင် ငဝ် အွမ် တီ၊ ဘေ လုဝ် ဘူင် တာ ခြိဝ် ဘွတ်၊ ဒွက် တဲး န့ ဘဲန် အူ ဆိ ဘောကာဂ့လျီတ်။

37 ဘေ ဟဲ့ ဟွတ့် ဘူင် ပါယ် တီ ဘေ လုဝ် ဘူင် တဲး န့ ဘဲန် ဒူင် ဒီ ဘ့လေး ငဝ် အွမ် ဘူ ဘူင့်၊ အီ ကွယ် ဒဲင် ဂဲန် ဂေ ရာ ဒင် တီ။ ဘေ လုဝ် ပီဒဝ့် ငဝ် အွမ် တီ၊ တဲး န့ ဘ့လာင် ဒီ ဒူင် ပီ ဘ့လေး ဘေ ဒင် ငဝ် အွမ် တီ။ 38 ဘော န့ကျီပ် ဂေ မ့ပါန် ပီ အုန် ဒူအီ အာဇ တွိုန်၊ ဘေ လုဝ် ဘူင် တာ ခြိဝ် ဘွတ်။ 39 ဒေါ ဘူင် ဘေ ဒင် ငဝ် အွမ် ဂေ အာဇ ပီ တာ ဂေ ဒေါ လိုမ်လာ ဂေ ဒင် ငဝ် အွမ် တီ၊ ဘေ လုဝ် တာ ခြိဝ် အူ ထာလေန်၊ တဲး ဘေ ပွိုန် ဒီ ဘူင် တူတ့် ဒွန် မျုဝ်။^d 40 ဘေ လုဝ် ဘူင် ဆီချာ ဒွန် မျုဝ် ပီ စ်ု အုဝ် ဘေ ဘူင်။ ဘော မဲ လုဝ် ဆာဒိက်၊ တဲး ဂေ ဘူင် ကာဇီ ဒွန် မျုဝ် ပီ ကာလာင် နှဲ အုဝ် ဒီ မဲ အာမုဝ်ဆဲ ဒေါ ကွယ် ရိုမ် မဲ ဒူပ် အုဝ် ဒဲင် နွန် နီ။”