1 ဝါယ် အန် တီ ဇဝ်ဖြာ ဝီ ကာလာင် ဒီ အာမုဝ်ဆဲ ပေါ အူ စိုပ်။ အန် တဝ်း၊ “ဘေ လုဝ် ဘူင် ထိုပ် ဘိက် ဘွတ်။ တဲး ဘေ ဘူင် ဘိက် ဂွင့် ဂိုဝ် ဖိူန်။ ဘေ လုဝ် ဒိုဝ်း ကာတမ် လုယ်၊ ဘတ် ဘဲန် ဆေန့် ဘတ်၊ စုတ် ဆီနမ် အီ ခွင်၊ အီ ဂုယ် ခွန် ဘော ဆီနမ် အီ ရေန့် ဂဲ။ ဟဲ့ ဟွတ့်၊ ဘေ လုဝ် ဒဲ့ ဒူအီ အီ လှဲဝ် ဒီ ဒဝ့်၊ တဲး အန် ဝီ ဒိုဝ်း ဆေန့် ဂေ တီ၊ ဒဝ့် ဘိက် အီ မိုဝ်း ပဲ့ ရာင် အာမူ အာမာတ် ဇဝ်ဖြာ၊ အီ စိူဝ် ခေရုပ်။ 2 ဘိက် ဂွင့် အူ ဖိူန်၊ ဘေ လုဝ် ဘူင် တဲး နာ တူင့် အန် အာ ဂိုဝ် ဒီ ဒါ ကာနိး၊ နာ တာင် အန် ဖွုန် ကာနိး။ ဘေ ဘော လုဝ် ဘူင် တဲး ဒွန် ဖိူန် တာင် ခဲ့ တီ၊ တဲး ဂေ ကာရမ်။ 3 ဘိက် ဂေ တီ ဖန် ဖိူန် ဘေ လုဝ် စိန့် တဲး န့ ကာဒိုက် ဘဲန် ဖိူန် တာင် အူ ဖိူန်။ တဲး ဂိုဝ် ဖိူန် တွိုန် ဝီ ဘဲန် ဖိူန် တာင် အာ ဖိူန်။ 4 ပန် တီ ဘေ လုဝ် ဝီ ဒိုဝ်း ဘိက် ခွင်၊ ဘူင် ဟျုဝ့် ဒိုက် ဒီ အာ ဖိူန် တာင် တွိုန်၊ တဲး ဟျုဝ့် တီ ကွယ် ဘ့လာက် ဒီ ခူပ်၊ အူ ဖိူန် အူ ဘ့လာက်။ 5 ဘိက် အူ ဖိူန်၊ ဘေ လုဝ် ဘူင် ဟျုဝ့် အန် ဖန် ဂိုဝ် ဘူင့်၊ တဲး ဘော အာ ဖိူန် ကာရမ်။ ဟျုဝ့် ပီ ဒိုက် ဘေ ဒီ ဘိက် တာင် အာ ဖိူန် တွိုန်၊ ဘေ လုဝ် ဒိုက် လာယ် ကာဆိူဝ်။ 6 ဟဲ့ ဟွတ့် ပန် တီ ဘေ ဘော လုဝ် ဒိုဝ်း ခြိဝ်၊ ဘူင် မင် ကာကျီပ် ဖန် ဂိုဝ် ဘူင့်၊ တဲး ဘေ ပွိုန် ဒီ ကာကျီပ် ကာဒိုက် ဘိက် တာင် အာ ဖိူန် တွိုန်၊ တဲး ဘိက် ဂွင့် ခဲင် ထိုပ် ဘိက် ဘွတ် တွိုန် ဝီ ဘဲန် အူ ဖိူန်။

7 ဟဲ့ ဟွတ့်၊ ဘေ ဝီ လုဝ် ဒိုဝ်း ဟိုက် မာ ပဲ၊ ဝီ ဘူင် ဘိက် တဲး န့ ဆီဘ့လိုက် ထိုပ် ဘိက် ဘ့လာက် နာ ဒဲင် နာ ရေတ့်။ တဲး ဘေ ဘူင် ဂိုဝ် ဒီ အူ ဖိူန်။ 8 ဘိက် ဂိုဝ် ဒီ အူ ဖိူန် တီ၊ ဘေ လုဝ် ဘူင် တဲး န့ ကာရမ်။ တဲး နာ တူင့် အူယ် ဂိုဝ် ကာနိး၊ နာ တျီမ် ဖွုန် ကာနိး။ 9 ဘိက် ဂေ တီ၊ ဘေ လုဝ် ဒိုဝ်း ဖန် ဖိူန်၊ စိန့် တဲး န့ လာယ် ကာဒိုက် ဘဲန် ဖိူန် တာင် အူ ဖိူန်။ ပေါ ဒဝ် ဖိူန် တွိုန် ဘေ လုဝ် စိန့် တဲး န့ လာယ် ကာဒိုက် ပါယ် တီ။ ဖိူန် တာင် အီ မိုဝ်း ဒဝ် ဖိူန် တွိုန်၊ ဘေ လုဝ် ဒီဂပ် ကာတဲ ဖိူန် န့ဒဝ်၊ တဲး ဘ့လာက် ဒီဂပ် တွိုန် ကွယ် ဘ့လာက် နာ အာတ့် ထိုပ် ဘိက် ဘွတ် တွိုန်။ 10 ဘေ ဘော လုဝ် ဘူင် ဟျုဝ့် ဖန် ဂိုဝ် ဘူင့်၊ တဲး ဘေ ဒိုက် ဒီ ဘ့လာက် ဒီ ခူပ် ဖိူန် တာင် တွိုန်။ ဟဲ့ ဟွတ့်၊ ဘေ ဘော လုဝ် ဘူင် ဟျုဝ့် ပေါ ဖန် ဂိုဝ် ဘူင့်၊ တဲး ဘေ ဒိုက် ဒီ ဘ့လာက် ဒီ ခူပ် ဘိက် တာင် တွိုန် ပေါ အူ ဖိူန်။ 11 ဟဲ့ ဟွတ့်၊ ဘေ လုဝ် ဝီ ဒိုဝ်း ဘွင့်၊ တဲး ဘေ ဘူင် ဘော မင် ကာကျီပ်၊ ဖန် ဂိုဝ် ဘူင့် ကာကျီပ် ဟျုဝ့် ပီ ဒိုဝ်း ဘေ ဒီ ဘိက် တွိုန်၊ တဲး အာ ဖိူန် တာင် တွိုန် ဝီ လာယ် ကာဒိုက် ဘဲန် ဘိက် ထိုပ် ဘိက် အူ ဖိူန်။ 12 ဆေ ဘေ ဘ့လေး အုန် ဘိက် တွိုန် ဆီဘ့လိုက် ထိုပ် ဘိက် ဘွတ်၊ န့ ဒီ ကာလူယ် နာ ပန်။ ဘိက် ဒီ ဘတ့် အူ ဖိူန်၊ အာဒါ နာ တျီမ် အန် အူ ကာတဲ ဒီ ကာလူယ် လူင် နာ ပန်။ 13 ဘော နာ ဘြေတ့် န့ ဒီ ကာလူယ် အူ ဘ့လာက် အူ ကာနိး။ အာတီ ဘေ လုဝ် တဲး အန် ဝီ လူင် ဘော အာ ဘ့လာက်။ ပါယ် တီ ဘေ လုဝ် ဘူင် တဲး ဘိက် ဟိုက် မာပဲ တာင် တွိုန် ဝီ ဆီဘ့လိုက် ထိုပ် ဘိက် ဘွတ် တွိုန်။ 14 နာ ဒဲင် ဘိက် ဟိုက် မာပဲ တွိုန်၊ ဘေ လုဝ် ဝီ ဘ့လေး ပေါ အူ ဖိူန် ပီ ဘူင် ဘေ တာ ဟုန် မာဘူ အာလူင့်၊ စုတ် ဆီနမ် ရေန့်။ ဝါယ် အန် တီ ဘေ လုဝ် ဝီ ဒိုဝ်း ဟုန် မာမက် အိုမ်၊ ဝီ ဘ့လေး နာ ဒဲင် ဟုန် မာဘူ တွိုန်၊ တဲး န့ ဝီ ဘဲန် ပေါ အူ ထာပ် အီ ဆီဘ့လိုက် ထိုပ် ဘိက် ဘွတ်။

15 ဝါယ် အန် တီ ဘေ လုဝ် ဝီ ဒိုဝ်း ဟေ ကာထိန်၊ ဘူင် ဘဲန်၊ တဲး ဘေ ဘ့လေး ကာစွင့်၊ တဲး န့ ဘဲန် ရဲင် ထိုပ် ဘိက် ဘွတ် တွိုန်။ 16 ဘဲန် အူ ဘ့လ ဘေ လုဝ် ဘူင် တဲး နာ စာ အန် ဂိုဝ် ကာနိး၊ နာ ကာဝဝ်း အန် အူ ကာနိး ဒီ အူ ကာဆာန်။ 17 ဘဲန် ဒွန် ဘ့လ ဘေ လုဝ် ဘူင် ဒူတ့် အာ ဒူတ့်၊ တဲး ဂါယ် လာယ် ကာဆိူဝ်၊ တဲး န့ ပွိုန် ဒိုဝ်း ဘဲန် အာ ဘ့လ၊ လာယ် ကာစှိုပ်။ 18 တဲး ဘေ ဘူင် ဘဲန် ဇိုဝ် တီ အာ ဂိုဝ် ဘ့လ အာဒါ ဘ့လာက် နာ တေတ့်။ 19 ဟဲ့ ဟွတ့်၊ တဲး ဘေ ဝီ ဒိုဝ်း ရွိုန်၊ ဘူင် စေန့် ဒီ ဒင် ဘဲန် တွိုန်။ တဲး ဘေ ဘူင် ဖွုန် ဂိုဝ် ဘူင့်။ ဘဲန် အူ ဘ့လ၊ တဲး န့ မိုဝ်း စေန့် ရွိုန် တီ အာ ဘူင့်၊ အီ ကွယ် ဒီ ဒင် အန်၊ တဲး ဘဲန် ကာစွင့် နာ ဒဲင်။ 20 ဘော အာဒါ ဘ့လာက် နာ ကွာ ဘေ လုဝ် ဘူင် ဘဲန် အာ ဂိုဝ် ဘ့လ။ 21 ဘော စေန့် ဒီ ဒင် အန် ဘေ ဝီ လုဝ် ဘူင် ပေါ ဖွုန် ဂိုဝ် ဘူင့်။ 22 အာဒါ ဘ့လာက် နာ ဂေတ့် ဆီငဲ ဘေ ဘော လုဝ် ဘူင် ဘဲန် ပေါ ဒဝ် ဘ့လ။ 23 ဘဲန် ပေါ အာ ဘ့လ ဘေ လုဝ် ဘူင် တဲး န့ ဘဲန် အာ ကာတုဝ့် ဒီ ဘ့လာက် နာ ဂေတ့် ဆီငဲ။ 24 ဒွန် ကာတုဝ့် လုဝ် မိုဝ်း နာ တျီမ် အန် အာ ဘ့လ။ ဂါယ် အာ ဘ့လ လုဝ် လာယ် ကာဒိုက် ဒီ ကာဒမ် အန် ကော ဇမ် ဒီ ကာဒဲ့ အန်။ ဒီ ကာဒဲ့ အန် တွိုန် ဘေ လုဝ် ဝီ ဒိုဝ်း ခ့ဝင် အူ ခ့ဝင်၊ တဲး ဘော ဘဲန် အာ ဘ့လ လာယ် ကာဒိုက်။ ဘော အာ ကာတုဝ့် တွိုန် ဘေ လုဝ် ဘူင် ပါယ် တီ။ 25 ဟဲ့ ဟွတ့် ဘူင် ပါယ် တီ န့ ဒီ မိုဝ်း ဘဲန် ဒါ ဘ့လ ဘော စေန့် ဒီ ဒင် အန် ဂိုဝ် ဒီ ဒဝ် ဘူင့်။ ဘဲန် အူ ဘ့လ တွိုန် ဒီ မိုဝ်း စေန့် ဒီ ဒင် အန် အာ ဘူင့်။

26-27 ဝါယ် အန် တီ ဘေ ဝီ လုဝ် ဒိုဝ်း ဟေ ကာထိန် ဘူင် ရဲပ် ကာလင်၊ တဲး န့ ဘဲန် ဖန် ညွင့် အာဒါ ရဲင် အီ ကွယ် ဘ့လာက် ဘြေတ့် အူ ဘ့လာက်။ ပေါ ဖန် ညွင့် ဘေ လုဝ် ဘူင် အာဒါ ဘ့လာက် ဘြေတ့် ပေါ အူ ဘ့လာက်၊ ပေါ ဖန် ညွင့် လုဝ် ဘူင် အာဒါ ဘ့လာက် ဒီ ပန်၊ အီ မုး ဘ့လာက် နာ ဂေတ့် ဆီငဲ။ 28 ရဲပ် အီ ကွယ် ဒီ ကာတဲ ရဲင်၊ ဘေ လုဝ် ဘူင် တဲး န့ တူင့် ခဲ့ ကာဝဝ်း ရဲင် အူ ဘ့လာက်၊ တဲး န့ ကွယ် ဒီ ကာတဲ နာ စွင့် ဘဲန် ရဲင်။ 29 ဘေ လုဝ် ပိတ် ခြိဝ် ဒီ ဘဲန် တွိုန်။ ဘေ ဘော လုဝ် ဒိုဝ်း ခြိဝ် ဘူင် ခ့ဝင်၊ ဒိုက် ဒီ ဘဲန်၊ တဲး န့ ပွိုန် ဒီ ပ့လွ့ ရဲပ် တွိုန် ခဲင် ခ့ဝင်။ တဲး ဘေ ဘော ပိတ် ခြိဝ် ဒီ ရဲပ် ကာလင် တွိုန်။

30 ဟဲ့ ဟွတ့် ဘူင် ဘဲန် မျုဝ် ဘဲန် မျုဝ် ဇိုဝ် တီ၊ ဘေ လုဝ် ဆမ် ထိုပ် ဘိက် ဘွတ် တွိုန်၊ တဲး န့ ပီ ပဲ့ ဟဲ့ ဘျ အုဝ် ဒီ မဲ ဒေါ ကွယ် မဲ ဒဲင် နွန် နီ။

31 ဘေ ဘော လုဝ် ဘူင် ဘိက် ဂွင့် ပေါ အူ ဖိူန်။ ဘေ လုဝ် ဒိုဝ်း ကာတမ် လုယ် အီ ဟဲ့ ဘတ် ဘဲန် ဆေန့် ဘတ်၊ စုတ် ဆီနမ် အီ ခွင်၊ အီ ဂုယ် ခွန် ဘော အီ ရေန့် ဂဲ။ ဒူအီ အီ လှဲဝ် စိန့် ဂဲ့ ဘော စိန့် ရာင် ဘုဝ်း၊ အန် လုဝ် ဘူင် ဘိက် ဂွင့် တီ၊ တဲး အန် စိန့် ရာင် အာမူ အာမာတ် ဇဝ်ဖြာ အီ စိူဝ် ခေရုပ်၊ တဲး န့ ကွယ် ဒီ ဘိက် တွိုန်။ 32 ဝါယ် အန် တီ ဘေ လုဝ် ဒိုဝ်း ခြိဝ် ဘူင် ခ့ဝင်၊ တဲး ဘေ ဂွင့် ဘိက် တီ ဒီ ရွင့် ဖွုန် ညွင့်။ ဘေ လုဝ် ဘူင် ရွင့် တီ တာ ဟေ ကာထိန်၊ ဝီ ပိတ် ခြိဝ်။ ရွင့် ဖွုန် ညွင့် တီ၊ ဘေ ဘော လုဝ် ဘူင် စေန့် အန် ဖွုန် ဘူင့် တာ ရွိုန်။ 33 ဘေ ဘော လုဝ် ဘူင် မင် ကာကျီပ်၊ တဲး ဘေ ကာကျီပ် ဘိက် ဘော ခ့ဝင် ခြိဝ် အီ ဒိုက် ဒီ ရွင့် တွိုန်၊ တဲး ဘိက် ဂွင့် ပါယ် တီ။ ဝါယ် အန် တီ ဘေ လုဝ် ဒိုဝ်း ဇီဒိူက် တွိုန် တဲး အန် ကွယ် နာ ပန် ဘိက် ဂွင့် တီ။ ဘိက် ဂွင့် တီ ဒီ ကာယဝ်း ထိုပ် ဘိက် ဘွတ်၊ တဲး န့ မိုဝ်း အူ ပ့လုဝ့် အီ ဘွတ် ပေါ အူ ပ့လုဝ့် အီ ဘွတ် လွှိုမ် တူတ့်။ 34 ပန် တီ ဘေ လုဝ် ဒိုဝ်း ဆီဘ့လိုက် တွိုန် ဘ့လေး နာ ဒဲင် ဇီဒိူက်၊ တဲး န့ ကွယ် ခဲင် ဒူင် ဘွတ် လွှိုမ် တူတ့်။ 35 ကာစှူင့် တွိုန် ပီ စ်ု အုဝ် ဘေ ဘူင်၊ ဘေ လုဝ် ဘ့လေး နာ အာတ့် ဘိက် ဂွင့် တွိုန်၊ တဲး န့ ကွယ် ခဲင် ထိုပ် ဘိက် နာ ကွာ။ ဒင် ငဝ် အွမ် တွိုန် ဘေ ယီ လုဝ် ဘ့လေး အုန် နာ တေတ့်၊ တဲး ကာစှူင့် ဂါယ် ဒင် ငဝ် အွမ် ကွယ် လာယ် ကာဆိူဝ်။

36 ဟဲ့ ဟွတ့် ပန် တီ ဘေ လုဝ် ကာဘိတ် မာလုဝ်း ထိုပ် ဘိက် တွိုန်၊ ဝီ ဘူင် ဘိက် ဂွင့် ပေါ အူ ဖိူန်။ ဘေ လုဝ် ဝီ ဒိုဝ်း ကာတမ် လုယ် အီ ဟဲ့ ဘတ် ဘဲန် ဆေန့် ဘတ်၊ စုတ် ဆီနမ် အီ ခွင်၊ အီ ဂုယ် ခွန် ဘော အီ ရေန့် ဂဲ။ ဒူအီ လှဲဝ် စိန့် ဂဲ့၊ စိန့် ရာင် ဘဲန် မျုဝ် ဘဲန် မျုဝ်၊ အန် လုဝ် ဘူင် ဘိက် ဂွင့် တီ။ 37 ဘေ ဘော လုဝ် ဘူင် ရွင့် ဖန် ညွင့် တာ ဟေ ကာထိန်၊ ဝီ ပိတ် ခြိဝ်။ ဟဲ့ ဟွတ့်၊ ဘေ လုဝ် ဒိုဝ်း ဘွင့် ဘူင် တဲး န့ ဘဲန် စေန့် ရွင့်။ ဘေ ဘော လုဝ် ဘူင် ခ့ဝင် အီ ဒိုက် ဒီ ရွင့်၊ တဲး ဘေ ဒိုဝ်း ဘိက် ဂွင့် တီ၊ ဟွယ် ဒီ ရွင့် အန်၊ တဲး န့ ကာဘိတ် မာလုဝ်း ထိုပ် ဘိက် ဘွတ် တွိုန်။” ပါယ် တီ ဒေါ ကွယ် အာမုဝ်ဆဲ ဒဲင် နွန် ဇဝ်ဖြာ၊ ဇဝ်ဖြာ ကာလာင် နှဲ ဒီ အာမုဝ်ဆဲ ခဲ့ ပီ လုဝ် ဘူင် ဂေ ဒူအီ အီဆာရေလ။