1 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ဂါယ် အာရူန်။ 2 အန် တဝ်း၊ “ဒေါ ချ ဂေ ဒူအီ အီဆာရေလ ဒူင် ချ ဂေ၊ ဝီ မှဝ် ဝီ အန် မိူဝ် လုဝ် ချ ကွယ် ခူပ် အာလာမ် ဖိုင် အန် ဘော ခူပ် လက်ဆာနာ န့ကြိုဝ်း အန်။ တဲး ဒူင် ချ ဂေ ဒွန် ဘ့လာက် မာငး လိုပ် တူတ့် နာ ကွယ် ထိုပ် ဘိက် ဘွတ်။ ယီ လုဝ် ကွယ် ရာမ် ကာတူင့် အန်။”

3 ဖိုင် အာယူဒါ ဂေ လုဝ် ချ နာ လေး ဆီငဲ ခူပ် အာလာမ် ဂေ။ အာနာဆူန် အီ မုး ဂွန် အာမီနာဒါပ်၊ အန် ဘော ဘဲန် ဒါ အီ ယဲတ့် ဂေ ခြိုဝ် အာယူဒါ ခဲင် ဖိုင် တီ။ 4 ဂေ ကွယ် ဘူ မှိုန့် ဒီ ဖွုန် ဟြဲန့် ဒီ ဒဝ် မာယဝ်း ဝီ။

5 ခြိုဝ် အာအီဆာခါ လုဝ် ချ ခူပ် ခြိုဝ် အာယူဒါ။ အာနေထာနေလာ အီ မုး ဂွန် အာစူအာ ဟဲ့ ဘဲန် ဒါ အီ ယဲတ့် ဂေ။ 6 ဂေ ကွယ် ဖန် မှိုန့် ဒီ ဖွုန် ဟြဲန့် ဒီ ဖွုန် မာယဝ်း ဝီ။

7 ခြိုဝ် အာဇေဘူလူန် လုဝ် ဝီ ချ ခူပ် ဂေ တီ။ အာအေလီအာပ် အီ မုး ဂွန် အာဟေလူန် ဟဲ့ ဘဲန် ဒါ အီ ယဲတ့် ဂေ။ 8 ဂေ ကွယ် ဖန် မှိုန့် ဒီ ဘူ ဟြဲန့် ဒီ ဖွုန် မာယဝ်း ဝီ။

9 ဂေ အူယ် ဖိုင် တီ ဟဲ့ ဘဲန် ခြိုဝ် အာယူဒါ။ ဂေ ဘောကာဂ့လျီတ် ဟဲ့ ကွယ် အူ ဆဲန် ဒီ ဒါ မှိုန့် ဒီ ဒဝ် ဟြဲန့် ဒီ ဖွုန် မာယဝ်း ဝီ။ ဆေ ဂေ ကာထုဝ့် ဟာဝ် ပေါ ပ့လုဝ့်၊ ဂေ လုဝ် ဟာဝ် ယဲတ့် ဒီ အာတ့် အီ ဟဝ်။

10 ဂေ အီ ကွယ် ဘ့လာက် နာ တေတ့်၊ ဂေ ကွယ် ခူပ် အာလာမ် ဖိုင် အာရူဘေန်။ ခဲင် ဖိုင် အာရူဘေန် တီ၊ န့ ဘော မုး ခြိုဝ် အာရူဘေန်။ အာအေလီစူ အီ မုး ဂွန် အာဆေတူရ၊ အန် ဘော ဘဲန် ဒါ အီ ယဲတ့် ဂေ။ 11 ဂေ ကွယ် ဖွုန် မှိုန့် ဒီ ဒဝ် ဟြဲန့် ဒီ ဖန် မာယဝ်း ဝီ။

12 ဂေ ခြိုဝ် အာဆီမေအူန် လုဝ် ကွယ် ခူပ် ခြိုဝ် အာရူဘေန် ဂေ တီ။ အာဆေလူမေန် အီ မုး ဂွန် အာဇူရီဆာဒေ၊ အန် ဘော ဘဲန် ဒါ အီ ယဲတ့် ဂေ ခြိုဝ် အာဆီမေအူန် တီ။ 13 ဂေ ကွယ် ဖန် မှိုန့် ဒီ ဒိမ် ဟြဲန့် ဒီ အူယ် မာယဝ်း ဝီ။

14 ဂေ ခြိုဝ် အာဂတ် ဘော လုဝ် ကွယ် ခူပ် ဂေ။ အာအေလာဆာပ် အီ မုး ဂွန် အာတူလာ၊ အန် ဘော ဘဲန် ဒါ အီ ယဲတ့် ခြိုဝ် အာဂတ် ဂေ တီ။ 15 ဂေ ကွယ် ဖွုန် မှိုန့် ဒီ ဖန် ဟြဲန့် ဒီ ဒဝ် မာယဝ်း ဒီ ဖန် ဂိုဝ် ဝီ။

16 ဂေ အီ ကွယ် ခဲင် ဖိုင် အာရူဘေန် တီ၊ ဂေ ဘောကာဂ့လျီတ် ကွယ် အူ ဆဲန့် ဒီ ဖန် မှိုန့် ဒီ အူ ဟြဲန့် ဒီ ဖွုန် မာယဝ်း ဒီ ဖန် ဂိုဝ် ဝီ။ ဆေ ဂေ ကာထုဝ့် ဟာဝ် ပေါ ပ့လုဝ့်၊ ဖိုင် ဂေ တီ လုဝ် ဟာဝ် ဒူပ် ဒီ ပန် ဖိုင် အာယူဒါ ဂေ တွိုန်။

17 ဝါယ် ဟဲ့ ဟွတ့် ဟာဝ် အာ ဖိုင် တီ၊ ဂေ ဒူအီ အာလေဝီ လုဝ် ကာယူင့် ထိုပ် ဘိက် ဘွတ် ဘော ဟာဝ် ဒီ ကာတဲ ဂေ ဒူအီ ဘောကာဂ့လျီတ်။ ဂေ ဒီ ဟာဝ် လာယ် ဒါမ် တဲး န့ ပီ ဒေါ ချ ဂေ ခူပ် အာလာမ် ဂေ တွိုန်။

18 ဂေ အီ ချ နာ ဂေတ့် ဆီငဲ၊ န့ ဘော မုး ခြိုဝ် အာအေဖာရိမ်။ ဂေ ဘော လုဝ် ကွယ် ခူပ် အာလာမ် ဂေ။ အာအေလီဆာမာ အီ မုး ဂွန် အာမီဟုတ်၊ အန် ဘော ဘဲန် ဒါ အီ ယဲတ့် ဂေ ဒူအီ ခဲင် ခြိုဝ် အာအေဖာရိမ် တီ။ 19 ဒူအီ ဂေ တီ၊ ဂေ ကွယ် ဖွုန် မှိုန့် ဒီ ဖန် မာယဝ်း ဝီ။

20 ဂေ ခြိုဝ် အာမာနာဆေ၊ ဂေ လုဝ် ကွယ် ခူပ် ခြိုဝ် အာအေဖာရိမ် တီ။ အာဂါမာလေန် အီ မုး ဂွန် အာပေတာစူရ၊ အန် ဘော ဘဲန် ဒါ အီ ယဲတ့် ဖိုင် အာမာနာဆေ။ 21 ဒူအီ ဂေ ကွယ် အူယ် မှိုန့် ဒီ အာ ဟြဲန့် ဒီ အာ မာယဝ်း ဝီ။

22 ခြိုဝ် အာဘေန်ယာမ် ပီ ဝီ ကွယ် ခူပ် ဂေ။ အာဖီဒါန် အီ မုး ဂွန် အာကီတောနီ၊ အန် ဘဲန် ဒါ အီ ယဲတ့် ခြိုဝ် အာဘေန်ယာမ် တီ။ 23 ဒူအီ ဂေ တီ၊ ဂေ ကွယ် အူယ် မှိုန့် ဒီ ဖန် ဟြဲန့် ဒီ ဖွုန် မာယဝ်း ဝီ။

24 ဆေ န့ တိး ကာဇု တူတ့် ဖိုင် အာအေဖာရိမ် တီ၊ ဂေ ကွယ် အူ ဆဲန့် ဒီ ဒါ ဟြဲန့် ဒီ အူ မာယဝ်း ဝီ။ ဖိုင် အာအေဖာရိမ် တီ လုဝ် ဒူပ် ဒီ ပန် ဒူအီ အာလေဝီ။

25 ဂေ အီ ချ ဘ့လာက် နာ ကွာ၊ န့ ဘော မုး ခြိုဝ် အာဒါန်။ ဂေ လုဝ် ကွယ် ခူပ် အာလာမ် ဖိုင် အာဒါန် တီ။ န့ ဘော မုး အာဟေစာ အီ မုး ဂွန် အာမီဆာဒေ၊ အန် ဘော ဘဲန် ဒါ အီ ယဲတ့် ခြိုဝ် အာဒါန် တီ။ 26 ဒူအီ ဂေ တီ၊ ဂေ ကွယ် ဒဝ် မှိုန့် ဒီ အာ ဟြဲန့် ဒီ ဘူ မာယဝ်း ဝီ။

27 ခြိုဝ် အာဆေန်၊ ဂေ ဘော ချ ခူပ် ခြိုဝ် အာဒါန် ဂေ တီ။ အာဘာဂ့လဝ် အီ မုး ဂွန် အာအောခါရာ၊ အန် ဘဲန် ဒါ အီ ယဲတ့် ခြိုဝ် အာဆေန် တီ။ 28 ဒူအီ ဂေ တီ၊ ဂေ ကွယ် ဖွုန် မှိုန့် ဒီ အူ ဟြဲန့် ဒီ ဖန် မာယဝ်း ဝီ။

29 ခြိုဝ် အာနာပ်ထာလီ ပီ ဝီ ချ ခူပ် ဂေ တီ။ အာဟီရ အီ မုး ဂွန် အာအေနန်၊ အန် ဘဲန် ဒါ အီ ယဲတ့် ခြိုဝ် အာနာပ်ထာလီ ဂေ တီ။ 30 ဒူအီ ဂေ တီ၊ ဂေ ကွယ် ဖန် မှိုန့် ဒီ အူယ် ဟြဲန့် ဒီ ဖွုန် မာယဝ်း ဝီ။

31 ဆေ န့ တိး ကာဇု တူတ့် ဖိုင် အာဒါန် ဂေ တီ ဘောကာဂ့လျီတ်၊ ဂေ ကွယ် အူ ဆဲန့် ဒီ ဖန် မှိုန့် ဒီ ဘူ ဟြဲန့် ဒီ ဒဝ် မာယဝ်း ဝီ။ ဆေ ဂေ ကာထုဝ့် ဟာဝ် ပေါ ပ့လုဝ့် ဖိုင် အာဒါန် ဂေ တီ လုဝ် ဒူပ် နာ ပန် ဆိူတ် အီ။

32 ဂေ ဒူအီ အီဆာရေလ ဘောကာဂ့လျီတ်၊ ဂေ ကွယ် ဒဝ် ဆဲန့် ဒီ အူယ် ဟြဲန့် ဒီ ဖန် မာယဝ်း ဒီ ဖန် ဂိုဝ် ဝီ။ ဂေ ဟဲ့ တိး ဒွန် အီ အီ ကွယ် ဒီ ဒူင် ချ ဂေ၊ ဒူပ် န့ကြိုဝ်း မှဝ်၊ န့ကြိုဝ်း အန်။ 33 မာလဲ၊ ဂေ ယီ တူ တိး ခြိုဝ် အာလေဝီ၊ တဲး န့ ဘော ဒူပ် ပဲ့ ဟဲ့ ကာလာင် အုန် ဇဝ်ဖြာ ဒီ အာမုဝ်ဆဲ တွိုန်။

34 ပါယ် တီ ဂေ ဒူအီ အီဆာရေလ ဘော ဘူင် ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ တီ။ ဂေ ဘော ချ ကွယ် ခူပ် အာလာမ် ဖိုင် မှဝ် ဖိုင် အန်၊ တဲး န့ ဒူပ် န့ကြိုဝ်း မှဝ်၊ န့ကြိုဝ်း အန် ဘော န့ဟူမ် မှဝ်၊ န့ဟူမ် အန်။