ခါန် 3
လွင် ခြိုဝ် အာလေဝီ
1 အာနီ န့ မုး ဒူအီ ခဲင် န့ဟူမ် အာရူန် ဂါယ် အာမုဝ်ဆဲ။ ဂေ ဒူအီ တီ ဂေ ကွယ် ဒေါ ကာလာင် ဇဝ်ဖြာ ဂြုဝ်း ဒီ အာမုဝ်ဆဲ ဒေါ ကွယ် အန် ဒဲင် နွန် ဆီနာယ်။
2 ဂွန် အီမာယ် အာရူန် ဘော မုး အာနာဒါပ် အီ မုး ဂွန် ဂိန့် ဘော အာဘီဟူ၊ အာလေအာဆာ ဘော အာအီထာမာ။ 3 ဂေ ဒွန် အီ ဟဲ့ ဘဲန် တူတ့် ဒူအီ အီ လှူ ဒီ ဇဝ်ဖြာ။ အာမုဝ်ဆဲ ဟဲ့ ဖဝ်း နာမန် ဒဲင် ဂိန့် ဂေ၊ တဲး ဂေ ဘဲန် ဒူအီ ဘွတ် အီ ပွိုန် ဒီ ဘူင် ဂါန် ဇဝ်ဖြာ။ 4 အာနာဒါပ် ဂါယ် အာဘီဟူ၊ ဂါယ် ယီ ဟဲ့ ယမ် ဒေါ ကွယ် ဂေ ခဲင် ပြဲ ကာဟဝ်း ခူပ် နွန် ဆီနာယ် တွိုန်။ ဂါယ် ဟဲ့ ယမ် ကူပ် ဟဲ့ လှူ ဂါယ် ပီ လှူ အီ ဒုဝ့် ဒီ ငဝ် ပီ တူ စ်ု ဇဝ်ဖြာ ဂေ ဘူင်။ ဂါယ် ညှမ် မိုဝ်း ဂွန်။ ခုဝ်၊ အာလေအာဆာ ဂါယ် အာအီထာမာ ဟဲ့ ဘဲန် ဒါ အီ လှူ ဒီ ဇဝ်ဖြာ ဘော ဘူင် ဂါန် ဇဝ်ဖြာ ဒေါ မုး စုဝ် ဂုန့် ဂါယ် တီ။
5 ဇဝ်ဖြာ ဝီ တဝ်း ဒီ အာမုဝ်ဆဲ၊ 6 “တဲး မဲ စ်ု ဂေ ဒူအီ ခြိုဝ် အာလေဝီ၊ တဲး ဂေ တး စွယ် အာရူန် ဘူင် ဂါန် ဇဝ်ဖြာ။ 7 ဂေ လုဝ် ဘူင် ဂါန် ခဲင် ထိုပ် ဘိက် ဘွတ်။ ဂေ လုဝ် ဘူင် ဂါန် တီ ကာဒါင် ဒါ အီ လှူ ဒီ ဇဝ်ဖြာ၊ ဘော ဒါင် ဂေ ဒူအီ ဘောကာဂ့လျီတ်။ 8 ဂေ လုဝ် ယွတ် လိုမ်လာ ခြိုင် တာ အီ ကွယ် ခဲင် ထိုပ် ဘိက် ဘွတ် ဘော ဘူင် တူတ့် ဒွန် မျုဝ် ပီ လုဝ် ဘူင် ဂေ ဒူအီ အီဆာရေလ။ 9 တဲး မဲ အာပ် ဂေ ဒူအီ အာလေဝီ တီ ဒီ အာရူန် ဘော ဒီ ဂွန် အန်၊ တဲး ဂေ ပွိုန် ဒီ စွယ် ဂေ ဘူင် မီ ဂါန် ဂေ တီ။ 10 မဲ တဲး အာရူန် ဂေ ဂွန် အန် ဘူင် ဂါန် ပီ ဘူင် ဒါ အီ လှူ ဒီ ဇဝ်ဖြာ။ ဆေ အီ ဟဝ် အူ ဝီ တး တဝ်း ဒီ ဘူင် ဂါန် ဂေ တီ ခဲင် ထိုပ် ဘိက် ဘွတ်၊ ဘေ လုဝ် ငဝ်း ယမ် အန်။”
11 ဟဲ့ ဟွတ့် ပန် တီ ဇဝ်ဖြာ ပီ ဝီ ဒမ် အာမုဝ်ဆဲ ပေါ မ့ပွါ တဝ်း၊ 12 “မဲ ယွတ်၊ အုဝ် ဟဲ့ ရဝ်း ဒူအီ အာလေဝီ ဂေ တီ၊ တဲး ဂေ ကာဒါင် ဒွန် အီ အီ မုး ဂွန် ဂိန့် ခဲင် အာမျုဝ် ဒူအီ အီဆာရေလ။ ကူပ် န့ ပါယ် တီ ဂေ ဒူအီ အာလေဝီ ဟဲ့ ဘဲန် ကြုဝ် အုဝ်။ 13 ခုဝ်၊ ခဲ့ ကွယ် ဂွန် အီမာယ် အီ မုး ဂွန် ဂိန့်၊ ဂေ မုး တူတ့် ကြုဝ် အုဝ်။ ဒေါ ဟဲ့ ငဝ်း အုဝ် ဂွန် ဂိန့် ခဲင် မိူင် အဲဂိုပ် တွိုန်၊ အုဝ် ဟဲ့ ဝီ ဒိုဝ်း ခဲ့ ကွယ် ဂွန် ဂိန့် ဂေ ဒူအီ အီဆာရေလ၊ ဘော မုး ဒူအီ၊ ဘော မုး ဒုဝ် ဆတ်ဒါဝါ၊ တဲး ဂေ ဘဲန် ကြုဝ် အုဝ်။ ဂေ ဟဲ့ ဘဲန် ဒူအီ အုဝ်။ အုဝ် မုး ဇဝ်ဖြာ။”
14 ဒေါ ကွယ် ဂေ ခဲင် ပြဲ ကာဟဝ်း ခူပ် နွန် ဆီနာယ် တွိုန်၊ ဇဝ်ဖြာ ဝီ ကာလာင် ဒီ အာမုဝ်ဆဲ ပေါ အူ ဇေန့်။ အန် တဝ်း၊ 15 “တဲး မဲ တိး တူတ့် ခဲ့ ကွယ် ဂေ အီမာယ် ခဲင် ခြိုဝ် အာလေဝီ။ တဲး မဲ တိး ဂေ ဒူပ် န့ကြိုဝ်း မှဝ် န့ကြိုဝ်း အန် ဘော န့ဟူမ် မှဝ် န့ဟူမ် အန်။ စုး ဆိန့် အာဆာက် အူ မာဂျီန် ဟုဝ့် နာ ဒဲင်၊ တဲး မဲ တိး ဂေ ဘောကာဂ့လျီတ်။”
16 ပန် တီ အာမုဝ်ဆဲ ဘော တိး ခဲ့ ကွယ် ဂေ၊ ဘူင် ဒူပ် ပီ ကာလာင် ဇဝ်ဖြာ ဒီ အန်။
17 အာလေဝီ ဘော မိုဝ်း ဂွန် အူယ် ဝီ။ န့ ဘော မုး အာဂေန်ရာဆူန်၊ အာခုဝ်ဟာတ် ဘော အာမေန်ရာရီ။
18 န့ကြိုဝ်း ဂွန် အာဂေန်ရာဆူန်၊ န့ ဘော မုး န့ကြိုဝ်း အာလီဘာနီ ဘော န့ကြိုဝ်း အာဆီမီ။
19 န့ကြိုဝ်း ဂွန် အာခုဝ်ဟာတ် ဘော မုး န့ကြိုဝ်း အာမာရမ်၊ န့ကြိုဝ်း အာအီဇာဟာ၊ န့ကြိုဝ်း အာဟေဘြုဝ် ဘော န့ကြိုဝ်း အာအူဆီအေန်။
20 န့ကြိုဝ်း ဂွန် အာမေန်ရာရီ ဘော မုး န့ကြိုဝ်း အာမာလီ ဂါယ် န့ကြိုဝ်း အာမူဆီ။ ဒူအီ ဂေ တီ ဟဲ့ ဘဲန် ဂုန့် ဒင် ခဲင် န့ကြိုဝ်း ဂေ အီ မုး ခြိုဝ် အာလေဝီ။
21 ဂေ ဒူအီ အာမျုဝ် အာဂေန်ရာဆူန် တွိုန် ဘော မုး ဒူအီ အာလီဘာနီ ဘော ဒူအီ အာဆီမီ။ 22 ဂွန် အီမာယ် ပဲ့ ဟဲ့ တိး ဂေ၊ အာဆာက် အီ ဟဲ့ ပွိုန် အူ မာဂျီန် ဟုဝ့် နာ ဒဲင်၊ ဂေ ဘောကာဂ့လျီတ် ကွယ် ဘူ ဟြဲန့် ဒီ ဖန် မာယဝ်း ဝီ။ 23 ဒူအီ ဂေ တီ၊ ဂေ လုဝ် ချ နာ ပန် ထိုပ် ဘိက် ဘွတ်၊ အီ မုး နာ ဂေတ့် ဆီငဲ။ 24 အာအေလာဆာပ် အီ မုး ဂွန် အာလာအေန် တွိုန်၊ အန် ဘော ဘဲန် ဒါ တာင် အီ ယဲတ့် ဂေ ဒူအီ အာမျုဝ် အာဂေန်ရာဆူန် တွိုန်။ 25 ဂါန် ပီ လုဝ် ဘူင် ဂေ ဒူအီ အာဂေန်ရာဆူန်၊ ဂေ လုဝ် လိုမ်လာ ထိုပ် ဘိက် ဘွတ်၊ ဘော ဘိက် ဂေ ဟုန် ပီ တပ် နာ ဒဲင်၊ ဘော ဘိက် ဂွင့် ဒီ ဘာင် မာလုဝ်း ထိုပ် ဘိက် ဘွတ်။ 26 ဂေ ဘော လုဝ် လိုမ်လာ ဘော ဘိက် ဂွင့် ဒီ လူင့် အီ ကွယ် ရူပ် ဝဲင် ထိုပ် ဘိက် ဘွတ်။ ဂေ ဘော လုဝ် ယွတ် ဘော ကာစှူင့် လှူ၊ ဘော ဘိက် ဂွင့် ဒီ မာလုဝ်း ဝဲင်၊ ဘော ဝန် ဂေ တွိုန်။ ဂေ လုဝ် ယွတ် မဲန် လိုမ်လာ ဒွန် မျုဝ် အီ လာယ် ဘာ ခဲင် ခြိုင် တာ အာဇ တီ။
27 ဂေ ဒူအီ အာမျုဝ် အာခုဝ်ဟာတ် ဘော မုး န့ကြိုဝ်း အာမာရမ်၊ န့ကြိုဝ်း အာအီဇာရာ၊ န့ကြိုဝ်း အာဟေဘြုဝ် ဘော န့ကြိုဝ်း အာအူဆီအေန်။ 28 ဂွန် အီမာယ် ပဲ့ ဟဲ့ တိး ဂေ အာဆာက် အီ ဟဲ့ နုဝ့် အူ မာဂျီန် ဟုဝ့် နာ ဒဲင်၊ ဂေ ကွယ် ဒါ ဟြဲန့် ဒီ ဒဝ် မာယဝ်း ဝီ။ ဂေ ဒူအီ အာမျုဝ် အာခုဝ်ဟာတ်၊ ဂေ မိူဝ် လုဝ် လိုမ်လာ ထိုပ် ဘိက် ဘွတ်။ 29 ဂေ ဒူအီ တီ၊ ဂေ ဘော ချ ကွယ် နာ ကွာ ထိုပ် ဘိက် ဘွတ်။ 30 အာအေလီဇာဖာန် အီ မုး ဂွန် အာအူဆီအေန် တွိုန်၊ အန် ဘော ဘဲန် ဒါ တာင် အီ ယဲတ့် ဂေ ဒူအီ အာခုဝ်ဟာတ် တီ။ 31 ဂါန် ပီ လုဝ် ဘူင် ဂေ၊ ဂေ လုဝ် ယွတ် လိုမ်လာ ဇီဒိူက် ဇဝ်ဖြာ၊ ဘော ကာစှူင့် ဘော ဒင် ငဝ် အွမ်၊ ဘော ကာစှူင့် လှူ။ ဂေ ဘော လုဝ် ယွတ် လိုမ်လာ ဘော ခြိုင် တာ ခဲင် ထိုပ် ဘိက် ဘွတ် ဘော ဘိက် ဂွင့်။ ဂေ လုဝ် ယွတ် လိုမ်လာ တူတ့် ဒွန် မျုဝ် အီ လာယ် ဘာ ခဲင် ခြိုင် တာ တီ။ 32 အာလေအာဆာ အီ မုး ဂွန် ဒါ အီ လှူ ဒီ ဇဝ်ဖြာ အီ စိူဝ် အာရူန် တွိုန်၊ အန် ဘော ဘဲန် ဒါ တာင် အီ အိုပ် ဂေ ဒါ တာင် အီ ယဲတ့် ဂေ ဒူအီ အာလေဝီ ဂေ တီ။ အန် လုဝ် ယွတ် ဂေ ဘောကာဂ့လျီတ် အီ ဘူင် ဂါန်၊ အီ လိုမ်လာ ထိုပ် ဘိက် ဘွတ် တီ။
33 ဂေ ဒူအီ အာမျုဝ် အာမေန်ရာရီ တွိုန် ဘော မုး န့ကြိုဝ်း အာမာလီ ဘော န့ကြိုဝ်း အာမူဆီ။ 34 ဂွန် အီမာယ် ပဲ့ ဟဲ့ တိး ဂေ၊ အာဆာက် အီ နုဝ့် အူ မာဂျီန် ဟုဝ့် နာ ဒဲင်၊ ဂေ ကွယ် ဒဝ် ဟြဲန့် ဒီ အာ မာယဝ်း ဝီ။ 35 ဂေ ဒူအီ တီ၊ ဂေ ဘော ချ ကွယ် နာ ကွာ ထိုပ် ဘိက် ဘွတ်။ အာစူရေလ အီ မုး ဂွန် အာဖီဟေလာ တွိုန်၊ အန် ဘော ဘဲန် ဒါ တာင် အီ ယဲတ့် ဂေ။ 36 ဂေ လုဝ် ယွတ် လိုမ်လာ ဘဲန် ခဲင် ထိုပ် ဘိက် ဘွတ်။ ဂေ ဘော လုဝ် ယွတ် မာနက် အန်၊ ရွင့် အန် ဘော စေန့် ဒီ ဒင် ဘဲန် ဘော ဆဲ အန်။ ဂေ လုဝ် ယွတ် လိုမ်လာ တူတ့် ဒွန် မျုဝ် အီ လာယ် ဘာ ခဲင် ခြိုင် တာ ဇိုဝ် တီ။ 37 ဂေ ဘော လုဝ် ယွတ် ဘော ရွင့် ဝဲင် ဘော စေန့် ရွင့် တီ ဘော လွှက့် ဘော ဝန် အန်။
38 အာမုဝ်ဆဲ ဘော အာရူန် ဂေ ဂွန် အန်၊ ဂေ ဘော ချ နာ အာတ့် ထိုပ် ဘိက် ဘွတ် အီ မုး ဘ့လာက် နာ လေး ဆီငဲ။ ဂေ ဘော ယွတ် လိုမ်လာ ထိုပ် ဘိက် ဘွတ် တီ။ ဂေ ဘော ဘူင် ကာဒါင် ဂေ ဒူအီ အီဆာရေလ။ ဆေ အီ ဟဝ် တး တဝ်း ဒီ လိုပ် ခဲင် ထိုပ် ဘိက် ဘွတ် တီ၊ ဂေ လုဝ် ငဝ်း ယမ် ဒူအီ ဝီ တီ။
39 အာမုဝ်ဆဲ ဘော တိး ဂေ အီမာယ် ဒူအီ အာမျုဝ် အာလေဝီ အာဆာက် အီ ဟဲ့ နုဝ့် အူ မာဂျီန် ဟုဝ့် နာ ဒဲင်၊ တဲး န့ ပီ ပဲ့ ဟဲ့ စ်ု ဇဝ်ဖြာ အန် ဘူင်။ ဂေ ဘောကာဂ့လျီတ် ကွယ် အာ မှိုန့် ဒီ အာ ဟြဲန့် ဝီ။
40 ဇဝ်ဖြာ ပီ ဝီ စ်ု အာမုဝ်ဆဲ တဝ်း၊ “တဲး မဲ တိး ဒဲမ် ခဲ့ ကွယ် ဂွန် ဂိန့် အီ မုး ဂွန် အီမာယ် ခဲင် ဒူအီ အီဆာရေလ၊ စုး ဆိန့် အာဆာက် အူ မာဂျီန် ဟုဝ့် နာ ဒဲင်။ 41 တဲး မဲ တိး ဘော ဂေ ဒူအီ အာလေဝီ တီ၊ တဲး ဂေ ကာဒါင် ဂွန် ဂိန့် ဂေ ဒူအီ အီဆာရေလ ဒွန် ဝီ၊ တဲး ဂေ ဘဲန် ကြုဝ် အုဝ်။ တဲး မဲ ဒိုဝ်း ဘော ဒုဝ် ဆတ်ဒါဝါ ပီ ဟျီင် ဂေ ဒူအီ အာလေဝီ အီ မုး ဂွန် ဂိန့်၊ တဲး ဂေ ကာဒါင် ဒုဝ် ဆတ် အီ မုး ဂွန် ဂိန့် ပီ ဟျီင် ဂေ ဒူအီ အီဆာရေလ ဘောကာဂ့လျီတ်။ အုဝ် မုး ဇဝ်ဖြာ။”
42 အာမုဝ်ဆဲ ဘော တိး ခဲ့ ကွယ် ဂွန် ဂိန့် အီ မုး ဂွန် ဂေ ဒူအီ အီဆာရေလ ဒူပ် ပီ ကာလာင် ဇဝ်ဖြာ ဒီ အန်။ အန် ဘော ဒဲမ် စိူဝ် ဂေ၊ ဟပ် ခဲင် ဇာရာင်။ 43 အာဆာက် အီမာယ် အီ ဟဲ့ နုဝ့် အူ မာဂျီန် ဟုဝ့် နာ ဒဲင်၊ ဂေ ဘောကာဂ့လျီတ် ကွယ် အာ မှိုန့် ဒီ အာ ဟြဲန့် ဒီ အာ မာယဝ်း ဒီ ဘူ ဂိုဝ် ဒီ အူယ် ဝီ။
44 ဇဝ်ဖြာ ပီ ဝီ တဝ်း ဒီ အာမုဝ်ဆဲ၊ 45 “တဲး မဲ တဲး ဂေ ဒူအီ အာလေဝီ ကာဒါင် ဂွန် ဂိန့် ဂေ ဒူအီ အီဆာရေလ ဘောကာဂ့လျီတ်။ ဒိုဝ်း ဘော ဒုဝ် ဆတ် ပီ ဟျီင် ဂေ ဒူအီ အာလေဝီ၊ တဲး ဂေ ကာဒါင် ဒုဝ် ဆတ် အီ မုး ဂွန် ဂိန့် ပီ ဟျီင် ဂေ ဒူအီ အီဆာရေလ ဘောကာဂ့လျီတ်။ ဂေ ဒူအီ အာလေဝီ၊ ဂေ မုး ကြုဝ် အုဝ် အီ မုး ဇဝ်ဖြာ။ 46 ဂွန် ဂိန့် ဂေ ဒူအီ အီဆာရေလ အီ ကိူန် လွှိုမ် ဂေ ဒူအီ အာလေဝီ အာဒါ အာ မာယဝ်း ဒီ ဘူ ဂိုဝ် ဒီ အူယ် ဝီ တွိုန်၊ မဲ လုဝ် ထုတ် ဝိဝ် ဂေ ဒီ အုဝ်။ 47 မဲ လုဝ် ထုတ် ဂွန် ဂေ တီ၊ အူ ဝီ ဒီ မှဝ် ရွိုန် ဖန် ဘူင့်။ လုဝ် ဆ ရွိုန် တီ တာ ဘ့လေ ဆ အီ ကွယ် ခဲင် ထိုပ် ဘိက် ဘွတ်။ 48 ရွိုန် တီ၊ မဲ လုဝ် ဒွါ ဒီ အာရူန် ဂေ ဂွန် အန်၊ တဲး န့ ထုတ် ဝိဝ် ဂေ ဒူအီ အီဆာရေလ ဒီ အုဝ်။”