1 ဇဝ်ဖြာ ဝီ ကာလာင် ဒီ အာမုဝ်ဆဲ ဂါယ် အာရူန် တဝ်း၊ 2 “တဲး ဘာယ် ဒဲမ် ဇာရာင် ဂေ ဒူအီ ခြိုဝ် အာလေဝီ၊ အီ မုး အာမျုဝ် အာခုဝ်ဟာတ်။ တဲး ဘာယ် တိး ဂေ ဒူပ် န့ကြိုဝ်း မှဝ် န့ကြိုဝ်း အန်၊ န့ဟူမ် မှဝ် န့ဟူမ် အန်။ 3 ဒဲမ် ဇာရာင် ဂေ အီမာယ် ဒွန် အီ၊ စုး ဆိန့် အာဆာက် အူယ် ဂိုဝ် ဆီနမ်၊ ဇမ် ဖန် ဂိုဝ် ဆီနမ်။ န့ မုး ဂေ အီ ဟဲ့ ပွိုန် ဘူင် ဂါန် ခဲင် ထိုပ် ဘိက် ဘွတ်။

4 ဂါန် ပီ လုဝ် ဘူင် ဂေ တီ၊ န့ မုး ဂါန် အီ ဆီငါ ဘွတ် ကာဆဝ်။ ပီ လုဝ် ဘူင် ဂေ၊ န့ ပါယ် နီ။ 5 ဆေ ဟီ ဇမ် ပန် ဒီ ကာထုဝ့် ဘေ ဒူင် ချ ဘေ၊ အာရူန် ဂေ ဂွန် အန် လုဝ် လိုပ် ခဲင် ထိုပ် ဘိက် ဘွတ်၊ ဒိုဝ်း လူင် ဘိက် ဂွင့် အီ ကွယ် နာ အာတ့် ဇီဒိူက် ဇဝ်ဖြာ၊ ပီ ဝီ ပ့လိုက် ဒီ ဇီဒိူက် တီ။ 6 ဟဲ့ ဟွတ့် ပါယ် တီ ဂေ လုဝ် ဝီ ဒိုဝ်း ဟုန် မာမက် အိုမ် ဝီ ပ့လိုက်။ ပီ ဝီ ဒိုဝ်း ဘော ဘိက် ခွင် ဝီ ပ့လိုက် နာ ဒဲင်။ ဟဲ့ ဟွတ့်၊ ဂေ လုဝ် ဝီ ပ့လွ့ အုန် ဘော မင် ဂွတ် အန်။

7 ဒဲင် ကာစှူင့် ဒူင် ဒါင် ဂေ ခါမုန် ဒီ အာတ့် ဇဝ်ဖြာ တွိုန် မိူဝ်၊ ဂေ လုဝ် ဒိုဝ်း ဘိက် ခွင်၊ ဒ နာ ဒဲင် ဘော ဝီ ဒိုဝ်း ဆီလယ့် ဘော ဘ့လေး အာဇုဝ်၊ မ့ပါန် ဘော ကွက့် ပီ ဟပ် အိုမ် မာငုန်။ ဘော ခါမုန် တွိုန် လုဝ် ဘ့လေး ဒဲင် ကာစှူင့် တီ ဆေဆေ။ ဂေ လုဝ် ဒိုဝ်း အာဇ ဂေ တီ၊ ဝီ ဒါင် နာ ဒဲင် ကာစှူင့်။ 8 ဟဲ့ ဟွတ့်၊ ဂေ ပီ ဝီ လုဝ် ဒိုဝ်း ဘိက် ရေန့်၊ ဝီ ပ့လိုက် နာ ဒဲင် အာဇ တီ ဒွန် မျုဝ်၊ ပီ ဝီ ဒိုဝ်း ဟုန် မာမက် အိုမ်၊ ဝီ ပ့လိုက် နာ ဒဲင်။ ဝီ ပ့လွ့ ဘော မင် ဂွတ် အန်။

9 ဂေ ဘော လုဝ် ဒိုဝ်း ဘိက် ခွင်၊ ဝီ ပ့လိုက် ဒင် ငဝ် အွမ်။ ပ့လိုက် ဘော အွမ် နာမန်၊ န့ကျီပ်၊ မင် ဘျတ် ငဝ် အွမ်၊ ဘော ကာပဝ် နာမန်။ ဂေ လုဝ် ဝီ ဘ့လေး တူတ့် နာ ခဲင် ဘိက် ခွင် တွိုန်။ 10 ဟဲ့ ဟွတ့်၊ ဂေ လုဝ် ဒိုဝ်း ဒွါ ငဝ် အွမ် တွိုန်၊ ဘော ခြိုင် တာ အန် ဒွန် မျုဝ်၊ ပီ ဝီ ဟပ် အုန် ခဲင် ဟုန် မာမက် အိုမ်။ ဝီ ပက် ဒိုက် ဒီ မင် ဂွတ်။

11 ဘော ဒဲင် ကာစှူင့် လှူ အီ မုး ခြိဝ် တွိုန်၊ ဂေ လုဝ် ဒိုဝ်း ဘိက် ခွင်၊ ဒ နာ ဒဲင်၊ ပီ ဝီ ဒိုဝ်း ဟုန် မာမက် အိုမ်၊ ဝီ ဘ့လေး နာ ဒဲင်၊ ဝီ ပ့လွတ် ဘော မင် ဂွတ် အန်။

12 ခြိုင် ပီ လုဝ် စ်ု၊ လုဝ် တာ ခဲင် ထိုပ် ဘိက် ဘွတ် ဒွန် မျုဝ်၊ ဂေ လုဝ် ဟပ် အုန် ခဲင် ဘိက် ခွင်။ ပီ ဝီ ဒိုဝ်း ဟုန် မာမက် အိုမ်၊ ဝီ ပ့လိုက်၊ ဝီ ဘ့လေး ဒဲင် မင် ဂွတ် အန်။

13 ဒဲင် ကာစှူင့် လှူ အီ မုး ဘွင့်၊ ဂေ လုဝ် ဒိုဝ်း ဝဲန် တူတ့် ကာဝှါင် အန်။ ဂေ လုဝ် ဝီ ဒိုဝ်း ဘိက် ရေန့် ဂဲ၊ ဒ နာ ဒဲင်။ 14 ဂေ ပီ ဝီ လုဝ် ဒိုဝ်း ခြိုင် ပီ လုဝ် စ်ု လုဝ် တာ ဒီ ကာစှူင့် လှူ တီ၊ ဝီ ဘ့လေး နာ ခဲင်။ န့ ဘော မုး ဖာန်၊ မင် ညဲတ့် ယင်၊ မင် ဆူက်၊ ဆီလယ့် ဂေ မ့ပါန် ဘဲန် မျုဝ် ဘဲန် မျုဝ်။ ဂေ လုဝ် ဝီ ဒိုဝ်း ဟုန် မာမက် အိုမ် ဝီ ပ့လိုက် နာ ဒဲင်၊ ဝီ ပ့လွ့ အုန် ဘော မင် ဂွတ် အန်။

15 ဆေ အာရူန် ဂေ ဂွန် အန် ဟဲ့ ဟွတ့် ဆီဘ့လိုက် တူတ့် ကြုဝ် အီ ဆီငါ ဘွတ် တီ ဘော ခြိုင် တာ အန် ဒွန် မျုဝ်၊ ဆေ ဂေ ဟီ ဒီ လေး ဟာဝ်၊ အီ မုး ဒူအီ အာမျုဝ် အာခုဝ်ဟာတ် တွိုန်၊ ဂေ လုဝ် တး ကာဂွတ် ဟာဝ် ကြုဝ် တီ။ ကြုဝ် အီ ဆီငါ ဘွတ် တီ၊ ဂေ ဒူအီ အာမျုဝ် အာခုဝ်ဟာတ် တီ ယီ တူ ပွိုန် ဒိုဝ် တူ ပွိုန် ပါ ဒေါ မှဝ်။ ဆေ ဝီ မှဝ် ဟီ တာ ဒိုဝ် တာ ပါ၊ အန် ဒီ ယမ် အူ ဇေန့်။ အာနီ န့ မုး ဂါန် ပီ လုဝ် ဘူင် ဂေ အာမျုဝ် အာခုဝ်ဟာတ်။ ဒွန် ဇေန့် ဒေါ ကာထုဝ့် ဂေ ဒူင် ချ ဂေ၊ ဂေ လုဝ် ဘူင် ပါယ် တီ။

16 အာလေအာဆာ အီ မုး ဂွန် ဒါ အီ လှူ ဒီ ဇဝ်ဖြာ အီ စိူဝ် အာရူန် တွိုန်။ အန် ဘော လုဝ် ယွတ် လိုမ်လာ နာမန် အီ ကွယ် ခဲင် ထိုပ် ဘိက် ဘွတ် အီ မုး နာမန် ပီ ဟပ် ခဲင် ငဝ် ရာင် တာင် တွိုန်။ အန် လုဝ် လိုမ်လာ ဘော ဆီနမ် အုး ငှုန် ပီ ဒုဝ့် ဒီ ငဝ် ဘော ဒီဂါဝ် ပီ လှူ ဂေ ဒွန် ဆီငဲ၊ ဘော နာမန် ပီ ဖဝ်း ဂေ ဒီ ဂိန့်။ အန် အီ ယွတ် လိုမ်လာ တူတ့် ဒွန် မျုဝ် အီ ကွယ် ခဲင် ထိုပ် ဘိက် ဘွတ်။”

17 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ဂါယ် အာရူန် တဝ်း၊ 18 “ကွဲ့ တဲး ဂေ အာမျုဝ် အာခုဝ်ဟာတ် ဟြာယ် ခဲင် ခြိုဝ် အာလေဝီ။ 19 ဒေါ တး ဇမ် ကာတတ် ဂေ ကြုဝ် အီ ဆီငါ ဘွတ် အီ ဟဲ့ ဟွတ့် ကာဘိတ် တွိုန်၊ ကွဲ့ တဲး ဂေ လုဝ် ယမ်။ တဲး အာရူန် ဂေ ဂွန် အန် လိုပ် ဒီ အာတ့် ခဲင် ထိုပ် ဘိက် ဘွတ်၊ တဲး ဂေ ကာဆာင် ဂါန် ပီ လုဝ် ဘူင် ဂေ ဒူအီ အာခုဝ်ဟာတ် တီ ဝီ မှဝ် ဝီ အန်၊ တဲး ဂေ နပ် ပီ လုဝ် ဂူင့် လုဝ် ဂွတ် ဂေ ဒွန် အီ။ 20 မာလဲ၊ အူ ကာစန် မိူဝ်၊ ဂေ တူ ပွိုန် ငွိုပ် ခြိုင် အီ ဆီငါ ဘွတ် အီ တူ ကာဘိတ် တီ။ ဆေ ဂေ ဟီ ယွတ်၊ ဂေ လုဝ် ယမ်။”

21 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ပေါ န့ ပွါ တဝ်း၊ 22 “တဲး မဲ တိး ဂေ ဒူအီ အာလေဝီ အီ မုး ဒူအီ အာမျုဝ် အာဂေန်ရာဆူန်၊ ဒဲမ် ဇာရာင် ဂေ။ တဲး မဲ တိး ဂေ ဒူပ် န့ကြိုဝ်း မှဝ် န့ကြိုဝ်း အန်၊ န့ဟူမ် မှဝ် န့ဟူမ် အန်။ 23 တဲး မဲ တိး တူတ့် ခဲ့ ကွယ် အီမာယ်၊ စုး ဆိန့် အာဆာက် အူယ် ဂိုဝ် ဆီနမ် ကော ဇမ် ဖန် ဂိုဝ် ဆီနမ်။ န့ မုး ဂေ အီ ဟဲ့ ပွိုန် ဒီ ဘူင် ဂါန် ခဲင် ထိုပ် ဘိက် ဘွတ်။

24 ဂါန် ပီ လုဝ် ဘူင် ဂေ အာမျုဝ် အာဂေန်ရာဆူန် တီ၊ ပီ လုဝ် ဂွတ် လုဝ် ပး ဂေ၊ န့ ပါယ် နီ။ 25 ခဲ့ ဘော မိုဝ်း ဘိက် ခဲင် ထိုပ် ဘိက် ဘွတ်၊ ဂေ လုဝ် ဂွတ် တူတ့် ဒွန် မျုဝ်။ ဘော မုး ဘိက် အီ တပ် နာ ဒဲင်၊ ဘော ဟုန် မာမက် အိုမ် အီ တပ် နာ ရေတ့်၊ ဘော ဘိက် ဂွင့် ဒီ ဘာင် မာလုဝ်း တွိုန်၊ 26 ဘော ဘိက် အီ ဘဲန် လူင့် ဝဲင် အီ ဂွင့် ရူပ် ထိုပ် ဘိက် ဘွတ် ဂါယ် ကာစှူင့် လှူ၊ ဘော ဘိက် အီ ဂွင့် ဒီ မာလုဝ်း ဝဲင်၊ ဘော ဝန် အန် ဂေ တွိုန်၊ ဂေ လုဝ် ဂွတ် တူတ့် ဒွန် မျုဝ် အီ လာယ် ဘာ့ ခဲင် ခြိုင် တာ အာမျုဝ် တီ။ 27 ခဲ့ ပီ လုဝ် ဘူင် ဂေ ဒူအီ အာဂေန်ရာဆူန် တီ၊ ဘော မုး ပီ လုဝ် ဂွတ်၊ ဘော မုး ပီ လုဝ် ရန့်၊ တဲး အာရူန် ဂေ ဂွန် အန် အိုပ် ဂေ၊ တဲး ဂေ နပ် ဆီချာ ခဲ့ ပီ လုဝ် ဘူင် ဂေ။ 28 ဂါန် ပီ လုဝ် ဘူင် ဂေ အာမျုဝ် အာဂေန်ရာဆူန် ခဲင် ထိုပ် ဘိက် ဘွတ်၊ န့ ပါယ် တီ။ ဂေ လုဝ် ဘူင် ဒူပ် ပီ စ်ု အာအီထာမာ အီ မုး ဂွန် ဒါ အီ လှူ ဒီ ဇဝ်ဖြာ အီ စိူဝ် အာရူန် တွိုန်။”

29 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အန် ပီ ဝီ တဝ်း၊ “တဲး မဲ တိး ဂေ ဒူအီ အာမျုဝ် အာမေန်ရာရီ၊ တိး ဒူပ် န့ကြိုဝ်း မှဝ် န့ကြိုဝ်း အန်၊ န့ဟူမ် မှဝ် န့ဟူမ် အန်။ 30 တိး တူတ့် ခဲ့ ကွယ် အီမာယ်၊ စုး ဆိန့် အာဆာက် အူယ် ဂိုဝ် ဆီနမ် ကော ဇမ် ဖန် ဂိုဝ် ဆီနမ်။ န့ ဘော မုး ဂေ အီ ဟဲ့ ပွိုန် ဒီ ဘူင် ဂါန် ခဲင် ထိုပ် ဘိက် ဘွတ်။ 31 ဂါန် ပီ လုဝ် ဂူင့် လုဝ် ဂွတ် ဂေ၊ ဘော ပီ လုဝ် ဘူင် ဂေ ခဲင် ထိုပ် ဘိက် ဘွတ်၊ န့ ပါယ် နီ။ ဂေ လုဝ် ဂွတ် ဘဲန် ဘော န့ရဲပ် အန်၊ ရွင့် အန် ဘော စေန့် ဒီ ဒင် ရွင့်။ 32 ဂေ ဘော လုဝ် ဂွတ် ဘော ရွင့် ဝဲင်၊ ဘော စေန့် ရွင့် တီ၊ ဘော လွှက့် ဘော ဝန် အန်။ ဂေ ဘော လုဝ် ဂွတ် တူတ့် ဒွန် မျုဝ် အီ လာယ် ဘာ့ ခဲင် ခြိုင် တာ အာမျုဝ် တီ။ မဲ လုဝ် စ်ု ဂေ၊ တဲး ဂေ နပ် ဆီချာ ဂါန် ပီ လုဝ် ဘူင် ဂေ ဝီ မှဝ် ဝီ အန်။ 33 အာတီ မုး ဂါန် ပီ လုဝ် ဘူင် ဂေ အာမျုဝ် အာမေန်ရာရီ ခဲင် ထိုပ် ဘိက် ဘွတ်။ ဂေ မိူဝ် လုဝ် ဘူင် ဒူပ် ပီ စ်ု အာအီထာမာ အီ မုး ဂွန် ဒါ အီ လှူ ဒီ ဇဝ်ဖြာ အီ စိူဝ် အာရူန် တွိုန်။”

34-48 ဇဝ်ဖြာ ဟဲ့ ဟွတ့် ကာလာင် ပါယ် တီ အာမုဝ်ဆဲ ဂါယ် အာရူန် ဘော ဂေ ဒါ တာင် အီ ယဲတ့် ဖိုင် ဂေ တွိုန်၊ ဂေ ဘော တိး ဂေ ဒူအီ အာလေဝီ အူယ် မျုဝ်။ န့ ဘော မုး အာမျုဝ် အာခုဝ်ဟာတ်၊ အာမျုဝ် အာဂေန်ရာဆူန် ဘော အာမျုဝ် အာမေန်ရာရီ။ ဂေ ဘော ဒဲမ် ဇာရာင် အီမာယ် ဒွန် အီ အီ မိုဝ်း အာဆာက် အူယ် ဂိုဝ် ဆီနမ် ကော ဇမ် ဖန် ဂိုဝ် ဆီနမ်။ န့ မုး ဂေ အီ ဟဲ့ ပဲ ဒီ ဘူင် ဂါန် ခဲင် ထိုပ် ဘိက် ဘွတ်။ ဂေ ဘော ဒဲမ် ဇာရာင် ဂေ ဒူပ် န့ကြိုဝ်း မှဝ် န့ကြိုဝ်း အန်၊ န့ဟူမ် မှဝ် န့ဟူမ် အန်၊ တဲး န့ ပီ ပီ စ်ု ဇဝ်ဖြာ ဂေ ဘူင်။ ဂေ ဒူအီ အာခုဝ်ဟာတ် ကွယ် အာ ဟြဲန့် ဒီ ဘူ မာယဝ်း ဒီ ဖန် ဂိုဝ် ဝီ။ ဂေ ဒူအီ အာမျုဝ် အာဂေန်ရာဆူန် ကွယ် အာ ဟြဲန့် ဒီ ဒဝ် မာယဝ်း ဒီ အူယ် ဂိုဝ် ဝီ။ ဂေ ဒူအီ အာမေန်ရာရီ ကွယ် အူယ် ဟြဲန့် ဒီ အာ မာယဝ်း ဝီ။ ဂေ ဒူအီ ခဲင် ခြိုဝ် အာလေဝီ ဂေ ဘောကာဂ့လျီတ် ကွယ် ဒါ ဟြဲန့် ဒီ ဖန် မာယဝ်း ဒီ ဒါ ဂိုဝ် ဝီ။ အာမုဝ်ဆဲ ဂါယ် အာရူန် ဟဲ့ စ်ု ဒူအီ ဂေ တီ ဒွန် အီ၊ တဲး ဂေ ဘူင် ဂါန် ဂေ၊ ရာင် အာဆေ ရာင် အန်။

49 ပါယ် တီ အာမုဝ်ဆဲ ဘော ဘူင် ဒူပ် ပီ ကာလာင် ဇဝ်ဖြာ ဒီ အန်၊ တဲး ဂေ ဒွန် အီ နပ် ဂါန် ပီ လုဝ် ဘူင် လုဝ် ဂွတ် ဂေ ဝီ မှဝ် ဝီ အန်။ အာမုဝ်ဆဲ ဘော ဒဲမ် ဇာရာင် ဂေ၊ ဒူပ် ပီ ဒမ် ဇဝ်ဖြာ ဒီ အန်။