1 ဇဝ်ဖြာ ဝီ စ်ု အာမုဝ်ဆဲ တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ 2 “ဆေ န့ မိုဝ်း ဒူအီ အီ မိုဝ်း ဒိမ် ဒီ ဟုန် အီ နပ် ဒီ ဘြဲ၊ ဆေ န့ မိုဝ်း ဘော ဒူအီ အီ မိုဝ်း အီ ရွတ့် အီ ဇွိုမ် လေး ဒီ ဒုဝ် အန်၊ ဘော ဒူအီ အီ ဟဲ့ တာ ပါ ဒုဝ် ဒူအီ ယမ်၊ မဲ လုဝ် တဲး ဒူအီ ဇိုဝ် တီ လေး ကွယ် နာ ရေတ့် ဒူင် ချ ဘေ။ ဒူအီ ဇိုဝ် တီ၊ ဂေ တူ ဆီငါ ဒူပ် ပီ ဒမ် ဒါရာ။ 3 ဘေ လုဝ် စ်ု ဒူအီ အီ တူ ဆီငါ ဂေ တီ ဒွန် အီ၊ ဘော အီဘိုန့် ဘော အီမာယ်၊ တဲး ဂေ ကွယ် နာ ရေတ့်၊ ကွဲ့ တဲး ဒူင် ချ ဘေ ဘော ဒူင် ကွယ် အုဝ် ဘဲန် ဒူင် တူ ဆီငါ။” 4 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ ဂေ ဒူအီ အီဆာရေလ မိူဝ် ဘူင် ပါယ် တီ။ ဂေ ဘော တဲး ဒူအီ ဇိုဝ် တီ လေး ဟာဝ် နာ ရေတ့် ဒူင် ချ ဂေ။ ဂေ ဘော ဘူင် ဒီ ဂေ တဲး န့ ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ တီ။

5 ဇဝ်ဖြာ ပီ ဝီ စ်ု အာမုဝ်ဆဲ၊ 6 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဆေ န့ မိုဝ်း ဒူအီ အီ ဟဲ့ ဘူင် နာ တူ မွှိုမ်၊ ဘော မုး အီဘိုန့် အီမာယ် အာဝ် တဝ်း၊ အီ ဟဲ့ လုတ့် အီ ဟဝ်၊ လုတ့် ဘော ဇဝ်ဖြာ၊ 7 အန် လုဝ် ဝီ ကာလာင် ပီ လုတ့် အန် တီ၊ ဝီ မှာန့် ဒီ ဘ့လွာ့ ဒီ ဇဝ်ဖြာ။ အန် ဘော လုဝ် ဝီ ဝျီ့ ဝိဝ် တူတ့် ခဲ့ ပီ လုတ့် အန်။ ဒဲင် တီ၊ အန် လုဝ် ဝီ ပွါ ဖန် ဘုန် အူ ဘုန်၊ ဝီ ဒွါ တူတ့် ဒီ ဒူအီ ပဲ့ ဟဲ့ လုတ့် အန် တွိုန်။ 8 မာလဲ၊ ဆေ ဒူအီ ပဲ့ ဟဲ့ လုတ့် အန် တီ ဟဲ့ ဟွတ့် ယမ်၊ ဆေ အန် မိူဝ် တူ မိုဝ်း ဘီနွင် ဝေါဝဲ အီ ဒီ ကာအာပ် ဒိုဝ်း အုန် ကြုဝ် ပီ ဝျီ့ အန် တီ၊ အန် လုဝ် လှူ ဒီ ဇဝ်ဖြာ၊ အာပ် ဒွါ ဒီ ဒါ အီ လှူ ဒီ ဇဝ်ဖြာ။ ဒဲင် တီ၊ အန် လုဝ် ဒိုဝ်း ဘော မာဘူ အာလူင့် အူ ဒုဝ်၊ တဲး န့ ဘဲန် ပီ လှူ အီ တဲး အန် ဝီ ကာလဝ့် ဒီ ဇဝ်ဖြာ။ 9 ဒွန် မျုဝ် ပီ လှူ ဂေ ဒူအီ အီဆာရေလ ဒီ ဇဝ်ဖြာ ဟဲ့ ဘဲန် တူတ့် ကြုဝ် ဒါ အီ လှူ ဒီ ဇဝ်ဖြာ ဝီ အီ ရပ် တီ။ 10 ဘော ခဲ့ ပီ ဒွါ ဂေ ဒီ ဒါ အီ လှူ ဒီ ဇဝ်ဖြာ ဟဲ့ ဘဲန် ကြုဝ် အန်။”

11 ဇဝ်ဖြာ ပီ ဝီ စ်ု အာမုဝ်ဆဲ ကာလာင် ဒီ ဂေ ဒူအီ အီဆာရေလ ပေါ မ့ပွါ တဝ်း၊ 12 “ဆေ အီဘိုန့် အီ ဟဲ့ မိုဝ်း အီမာယ် ဘူင် တူ ကာဆိူဝ် ဒီ အီမာယ် အန်၊ ဆေ အန် ဝီ ပြာ ဒီ လာယ် လုတ့် လာယ် လာယ် ဒီ အီမာယ် အီ ဟဝ်၊ 13 အီမာယ် အန် ယီ တူ ယိုဝ်၊ အန် မိူဝ် ပဲ ဒီ ချြီင် လွင် တူ ဆီငါ အန် မျုဝ် အီ ဒူပ် ဒါရာ၊ န့ မိူဝ် တူ မိုဝ်း အီ ယိုဝ် လွင် အန် တီ၊ 14 ဆေ အီမာယ် အန် ယီ ထာင် အီဘိုန့် အန် ဟဲ့ လာယ် ဒီ အီ ဟဝ်၊ ဘော ဘဲန် နဝ်း တူ ဒါခိုယ်၊ အန် လုဝ် တဲး အီဘိုန့် အန် ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ။ 15 ဆေ အာဝ် ပါယ် တီ ဆေ အီဘိုန့် အန် တူ မိုဝ်း ဒီ ဘူင် နာ တူ မွှိုမ်၊ အန် ယီ ထာင် အီဘိုန့် အန် လာယ် ဒီ အီ ဟဝ်၊ ဘော အီမာယ် တီ လုဝ် ဒဲ့ အီဘိုန့် အန် ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ။ အန် လုဝ် ဂူင့် ဘော ကာပဲ့ ဆီဂူင့်ရာ အူ အုဝ်မာ အီ မုး အူ ဘ့လဲ ဒီ အူ ခ့ဝါက်၊ တဲး န့ ဘဲန် ပီ လှူ အာဒါ အီဘိုန့် အန်။ အာဝ် လုဝ် ဟပ် နာမန် နာ ဒဲင် ကာပဲ့ တီ။ ဘော ကာညန် လေဘူန် အာဝ် လုဝ် ဟပ်။ န့ ဘဲန် ပီ လှူ ကူပ် အီမာယ် တူ ညှိုမ် နဝ်း အီဘိုန့် အန်။ န့ ဘဲန် ဘော ပီ လှူ အီ တဲး န့ လိုဝ်း ဆီချာ လွင် မှာပ်။

16 ဒါ အီ လှူ ဒီ ဇဝ်ဖြာ လုဝ် ဒဲ့ အီဘိုန့် တီ၊ တဲး အန် တး ကွယ် နာ အာတ့် ဇဝ်ဖြာ။ 17 ဟဲ့ ဟွတ့်၊ အန် လုဝ် ဒိုဝ်း အိုမ် အီ ဆီငါ၊ ဟုး ခဲင် ကာလုဝ့် ကာဒါယ်၊ ဝီ ဒိုဝ်း ကာပုး အီ ကွယ် ဒီ ဘိူန် ထိုပ် ဘိက် ဘွတ် တွိုန်၊ ဝီ ဟပ် ခဲင် အိုမ် တီ၊ တဲး န့ ဆွင့်။ 18 အန် လုဝ် ကာယဝ်း ဟိုက် ဂိန့် အီဘိုန့် တွိုန် ဘော တဲး အန် ဂူင့် ကာပဲ့ တွိုန် ခဲင် ဒဲ အန်။ န့ ဘဲန် ပီ လှူ ကူပ် တူ ညှိုမ် အီမာယ် နဝ်း အီဘိုန့် အန်။ ဒါ အီ လှူ ဒီ ဇဝ်ဖြာ လုဝ် ဝီ ဂူင့် အိုမ် ဆွင့် တီ ခဲင် ဒဲ အန်။ န့ ဘဲန် အိုမ် ပီ ဒိူင် အီ။ 19 ဟဲ့ ဟွတ့်၊ အန် လုဝ် ဒိူင် အီဘိုန့် တီ တဝ်း၊ ‘ဆေ အီမာယ် အီ ဟဝ် တူ မိုဝ်း ဒီ အိတ် ရိုမ် ဒူပ် မဲ၊ မဲ မိူဝ် တူ မိုဝ်း ဒီ တဲး အီမာယ် အီ ဟဝ် လာယ် မဲ ဒဲင် အီမာယ် ဘြိမ် မဲ၊ ဆေ မဲ မိူဝ် တူ မိုဝ်း ဒီ ဘူင် တဲး ဒုဝ် မဲ တူ ဆီငါ၊ ကွဲ့ တဲး အိုမ် ဒိူင် တီ ဘဲန် အာဖေ အာရေ မာဆေ ဒီ မဲ။ 20 မာလဲ၊ ဆေ မဲ ဟဲ့ မိုဝ်း ဒီ လာယ် လုတ့် လာယ် လာယ် ဒီ အီမာယ် ပေါ အူ ဝီ အီ တူ မုး အီမာယ် ဘြိမ် မဲ၊ ဆေ မဲ ဟဲ့ ဘူင် တဲး မဲ တူ ဆီငါ၊ 21 တဲး ဇဝ်ဖြာ ဒွါ ဒုက် ဒီ မဲ၊ တဲး န့ ဘဲန် ဂိုမ် ဟျီ့ ဘော ဝတ့် ဂိုဝ်း ဒီ မဲ။ ဒေါ အန် တီ တဲး ဇဝ်ဖြာ ဘူင် တဲး မဲ ဘဲန် ပီ အေး ပီ ဖျာက် အီ ဟဝ်။ 22 ဆေ အိုမ် ပီ ဒိူင် မဲ နီ ဟီ လိုပ် ခဲင် ဝတ့် မဲ၊ တဲး န့ ဘဲန် ဝတ့် ဂိုဝ်း ဝတ့် အဝ်း ဒီ မဲ။ တဲး ဘော ဂိုမ် မဲ ဟျီ့ ကာညန့်။’ ဟဲ့ ဟွတ့်၊ အီဘိုန့် တီ မိူဝ် လုဝ် တဝ်း၊ ‘တဲး န့ မုး၊ တဲး န့ မှာန်။’

23 ဆေ ဟဲ့ ဟွတ့် တဝ်း ပါယ် တီ ဒါ အီ လှူ ဒီ ဇဝ်ဖြာ လုဝ် ဒဲမ် အုန် ဂြုဝ်း ကာဆမ် ဒိူင် တီ၊ လုဝ် ဝီ ဘာယ် ကာဆမ် ဒိူင် တီ ဟပ် ခဲင် အိုမ် ဆွင့် တွိုန်။ 24 ဟဲ့ ဟွတ့်၊ အန် လုဝ် ဝီ ဒိုဝ်း အိုမ် ဆွင့် အီ မုး အိုမ် ပီ ဒိူင် တီ၊ ဝီ ဒွါ အီဘိုန့် ဒျီင်။ အိုမ် တီ ဒီ လိုပ် ခဲင် ဒုဝ် ဘူင့် အန် ဘော တဲး အန် ဆဝ် ကာဆဝ်။ 25 ဒါ အီ လှူ ဒီ ဇဝ်ဖြာ တွိုန် လုဝ် ဝီ ဒိုဝ်း ပီ ဒီ လှူ အီ မုး ကာပဲ့ အီ ကွယ် ခဲင် ဒဲ အီဘိုန့် တွိုန်၊ ဝီ မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ။ ဟဲ့ ဟွတ့်၊ ဘော ဝီ ဘ့လေး လှူ ဒဲင် ကာစှူင့် လှူ။ 26 အန် လုဝ် ဝီ ဒိုဝ်း ပီ ဒီ လှူ ကာပဲ့ တွိုန် အာဒါ အူ ကာနျီမ်၊ ဝီ ဒုဝ့် ဒဲင် ကာစှူင့် လှူ၊ တဲး န့ ဘဲန် ပီ ဒီ လှူ အီ တဲး ဇဝ်ဖြာ နမ်လှုဝ်း ဂေ။ ဝါယ် အန် တီ အန် လုဝ် ဝီ တဲး အီဘိုန့် တွိုန် ဒျီင် အိုမ် ဆွင့် တီ။ 27 ဆေ အီဘိုန့် တွိုန် ဟဲ့ ဟွတ့် ဒျီင် အိုမ် တီ၊ ဆေ အန် ဟဲ့ မိုဝ်း ဒီ လာယ် လုတ့် လာယ် လာယ် ဒီ အီမာယ် အီ ဟဝ်၊ အိုမ် ပီ ဒိူင် တီ ဟီ လိုပ် ခဲင် ဒုဝ် ဘူင့် အန်၊ န့ ဒီ ဘဲန် ဝတ့် ဂိုဝ်း ဝတ့် အဝ်း ဒီ အန်။ ဘော ဂိုမ် အန် ဒီ ဟျီ့ ကာညန့်။ ဂေ ဒူအီ ဟဝ် အီ ကွယ် ခူပ် အန်၊ ဂေ ဒီ ဘော ဒိူင် အန်။ 28 မာလဲ၊ ဆေ အီဘိုန့် တီ ယီ တူ မိုဝ်း ဒီ လုတ့် ရဝ်၊ တူ မိုဝ်း ဒီ တဲး အီမာယ် အီ ဟဝ် လာယ် အန်၊ အန် မိူဝ် ဒီ လွတ် အာဖေ အာရေ ဇိုဝ် တီ ဒွန် မျုဝ်၊ အန် ဒီ ဝီ ပွိုန် ဒီ ဟျီင် ဂွန်။

29 အာနီ န့ မုး ဒါရာ လွင် အီမာယ် အီ တူ ညှိုမ် နဝ်း အီဘိုန့် အန်၊ အီ ထာင် အီဘိုန့် အန် ဟဲ့ လာယ် လုတ့် လာယ် လာယ် ဒီ အီမာယ် အီ ဟဝ်။ 30 ဆေ န့ မိုဝ်း အာမူ ဇိုဝ် တီ၊ လုဝ် စ်ု အီဘိုန့် တီ ဟာဝ် ကွယ် နာ အာတ့် ဇဝ်ဖြာ။ ဟဲ့ ဟွတ့် ဒါ အီ လှူ ဒီ ဇဝ်ဖြာ လုဝ် ဘူင် ဒူပ် ဒါရာ နီ ဒွန် မျုဝ်။ 31 အီ မုး အီမာယ် အန်၊ အန် တူ မိုဝ်း မှာပ် မာဆေ။ န့ ယီ မုး အီဘိုန့် တွိုန်၊ ဆေ အန် ဟဲ့ မိုဝ်း ဒီ ဘူင် နာ တူ မွှိုမ်၊ အန် လုဝ် ခမ် မှာပ် အန်။”