1 ဇဝ်ဖြာ ပီ ဝီ စ်ု အာမုဝ်ဆဲ ကာလာင် ဒီ ဂေ ဒူအီ အီဆာရေလ ပေါ မ့ပွါ။ 2 အန် တဝ်း၊ “ဘော မုး အီဘိုန့် အီမာယ် အာဝ် တဝ်း၊ ဆေ န့ မိုဝ်း ဒူအီ အီ ဟဲ့ ဒွါ ကာဒိက် ဆတ်ဇာ ဒီ ဇဝ်ဖြာ၊ တဲး အန် ကဲမ် ဆိန့်၊ 3 အန် လုဝ် ဝဲန် အိုမ် ပဝ်း ဂေ အိုမ် မာငုန်။ ဘော အိုမ် မာငုန် ဂေ ပဝ်း အီ ပြာင်၊ အန် တူ ပွိုန် ဒျီင်။ ဘော ဘ့လေ မာငုန် ပဲ့ ဟဲ့ နျီ့ အီ တဲး န့ ဘဲန် အိုမ်၊ ဘော အာတီ အန် တူ ပွိုန် ဒျီင် ဒေါ မှဝ်။ ဘော ဘ့လေ မာငုန် အီ ဆီ အိမ် ဂေ အီ ကာဟဝ်း အန် တူ ပွိုန် ဟူမ်။ 4 အာခြာဝ် ဒေါ ဒွါ အန် ကာဒိက် ဆတ်ဇာ တီ၊ ခဲ့ အီ တး ဒီ ဟေ ဘ့လေ မာငုန်၊ အန် တူ ပွိုန် ဟူမ် ခေါ အူ မျုဝ်။ ဘော ကာအာင် အန် ဘော ကုဝ့် အန်၊ အာဝ် ပွိုန် ဟူမ်။

5 အာခြာဝ် ဒေါ ခမ် အန် ကာဒိက် ဆတ်ဇာ တီ၊ အန် မိူဝ် တူ ပွိုန် ကပ်၊ တူ ပွိုန် ဂါ့ ဂိန့် အန်။ အန် လုဝ် ဘဲန် ဒူအီ အီ ဆီငါ ဘွတ်၊ တဲး န့ ကော နုဝ့် ခဲ့ ပီ ကာဆဲန့် အန်။ အန် လုဝ် ဝါင် တဲး ဟိုက် ဂိန့် အန် ကော ဒီတူင့်။ 6 အာခြာဝ် ဒေါ ကဲမ် အန် ဆိန့် တီ၊ အန် တူ ပွိုန် ဟာဝ် ကာတတ် ဒုဝ် ဒူအီ ယမ်။ 7 န့ ပီ ဘော မုး ဂုန့် အန်၊ မာ အန်၊ အီကတ် ဝါ အန် အီ မုး အီဘိုန့် အီမာယ်၊ အန် တူ ပွိုန် ဟာဝ် ကာတတ် ဒေါ ယမ် ဂေ တီ။ ခုဝ်၊ အန် ဟဲ့ ဟွတ့် ဝါင် အုန် ဟိုက် ဂိန့် အန်၊ တဲး န့ ဘျ လွင် ဟဲ့ ဒွါ အန် ကာဒိက် ဆတ်ဇာ ဒီ ဇဝ်ဖြာ။ 8 ဒေါ ဟဲ့ ခမ် အန် ကာဒိက် ဆတ်ဇာ တီ၊ အန် ဟဲ့ ဘဲန် ဒူအီ ဆီငါ ဘွတ် ဒီ အာတ့် ဇဝ်ဖြာ။ ဂေ ဒူအီ ဘော တဝ်း၊ အန် မုး ဒူအီ နာစာရီ။

9 ဆေ န့ ဘော မိုဝ်း ဒူအီ အီ တး ယမ် ခူပ် အန် ဒေါ တူ ဒန် နပ် အန် မာဆေ၊ န့ ပီ ဟိုက် ဂိန့် ပဲ့ ဟဲ့ ဝါင် ဟဲ့ လှူ အန် တွိုန်၊ ဟဲ့ ဟွတ့် ကာဒါတ့်။ အန် လုဝ် ဝီ နှဝ့်၊ တဲး န့ နုဝ့် ဘူ ဆီငဲ။ အန် လုဝ် ဝီ ဂါ့ ဂိန့် အန်၊ ဂါ့ ဒီမုဝ်း အန်။ 10 ဆေ ဟဲ့ နုဝ့် ဒါ ဆီငဲ၊ အန် လုဝ် ဒိုဝ်း မာဘ့လူယ် အာ ဒုဝ်။ ဆေ အာဝ် မုး မာဘ့လူယ်၊ အန် လုဝ် ဒိုဝ်း မာဘ့လူယ် ပြဲ အာ ဒုဝ်၊ ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ ဒီ ဘာင် မာလုဝ်း ထိုပ် ဘိက် ဘွတ်။ 11 ဒါ အီ လှူ ဒီ ဇဝ်ဖြာ လုဝ် ဒိုဝ်း မာဘ့လူယ် အာဒါ အူ ဒုဝ် လှူ၊ တဲး န့ ဘဲန် အီ ဂဝ်း ဝဲန် မှာပ် အန်။ ပေါ အူ ဒုဝ် လုဝ် လှူ တဲး န့ ဘဲန် ပီ လှူ အီ ဒုဝ့် ဒီ ငဝ်၊ တဲး အန် ဝီ ကာလဝ့် ဒီ ဇဝ်ဖြာ ဝါယ် ဟဲ့ တာ ဒိုဝ် အန် ဒူအီ ယမ် တွိုန်။ အန် လုဝ် ဝီ ဒွါ ကာဒိက် ဆတ်ဇာ ကာမာယ်၊ တဲး ဟိုက် ဂိန့် အန် ဝီ ဆီငါ ဘွတ် ဆီငဲ တီ။

12 အန် ပီ ဝီ လုဝ် ခမ် ဆိန့် ပေါ အူ ဇေန့်။ တဲး န့ ပီ ပဲ့ ဟဲ့ ကာဆဲန့် အန် ခါ အာတ့်။ အာခြာဝ် အီ ဟဲ့ ပွုန် တး တီ၊ အာဝ် လိုပ် ဇာရာင်။ အန် ဘော လုဝ် လှူ ဂွန် မာဘူ အီ ဟဲ့ နုဝ့် အူ ဆီနမ်၊ တဲး န့ ဘဲန် ပီ လှူ ကူပ် ဟဲ့ ကာလိုပ် အန်။

13 အာနီ န့ ဘော မုး ဒါရာ လွင် ဒူအီ နာစာရီ အီ ဟဲ့ ဒွါ ကာဒိက် ဆတ်ဇာ ဒီ ဇဝ်ဖြာ။ ဆေ ဟဲ့ နုဝ့် အာခြာဝ် အန်၊ ဂေ အီ ဟဝ် လုဝ် တိုယ် ဟာဝ် အန် ဘာင် မာလုဝ်း ထိုပ် ဘိက် ဘွတ်။ 14 အန် လုဝ် လှူ ဒုဝ် ဆတ်ဒါဝါ အီ တူ မိုဝ်း ဒူင် စှေ ဒူင် နဲ အူယ် ဒုဝ်။ န့ ဘော မုး မာဘူ အာလူင့် အူ ဒုဝ် အီ ဟဲ့ နုဝ့် အူ ဆီနမ်၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ န့ ဘော လုဝ် ဘော မာဘူ အာဟျာင် အူ ဒုဝ် အီ ဟဲ့ နုဝ့် အူ ဆီနမ်၊ တဲး န့ ဘဲန် ပီ လှူ အီ ဟဲ့ ဂဝ်း ဝဲန် မှာပ်။ ဘော ဂွန် မာဘူ အာလူင့် အူ ဒုဝ် လုဝ် ဘဲန် ပီ လှူ ဒီ ဇဝ်ဖြာ အီ ကွယ် ကာဇု ဟူမ် ရိုမ်။ 15 ပီ ဒီ လှူ တီ လုဝ် လှူ ဒူပ် ပီ ဒီ လှူ ဒီဂါဝ် ဘဲန် မျုဝ် ဘဲန် မျုဝ် ဘော ဒူပ် ပီ ဒီ လှူ ပီ ဒျီင်။ ဟဲ့ ဟွတ့်၊ လုဝ် လှူ ဘော ခါမုန် အီ တူ ဟပ် ဆီနမ် ဘြး အူ ခွန်။ ဘော ခါမုန် ဒီခ့လဲပ် ပီ ဘူင် အီ တာ ကာပဲ့ ခဝ်ချုင် အီ ဟဲ့ ကာဝ်ု နာမန် ဘော ခါမုန် အီ ဟဲ့ ဖဝ်း နာမန် အီ ဟဲ့ ခြဲမ်။

16 ဒါ အီ လှူ ဒီ ဇဝ်ဖြာ လုဝ် ဒိုဝ်း တူတ့် ဇိုဝ် တီ၊ ဝီ ဟာဝ် ဒီ အာတ့် ဇဝ်ဖြာ၊ လှူ ပီ ဒီ လှူ အီ ဂဝ်း ဝဲန် မှာပ် ဘော ပီ လှူ အီ ဒုဝ့် ဒီ ငဝ် တီ။ 17 ဒါ အီ လှူ ဒီ ဇဝ်ဖြာ လုဝ် ဒိုဝ်း မာဘူ အာလူင့် တွိုန်၊ လှူ ဒီ ဇဝ်ဖြာ။ အန် လုဝ် ဒိုဝ်း ဘော ခါမုန် အူ ခွန် အီ တူ ဟပ် ဆီနမ် ဘြး တွိုန်၊ တဲး န့ ဘဲန် ပီ လှူ အီ ကွယ် ကာဇု ဟူမ် ရိုမ်။ အန် လုဝ် လှူ ဘော ပီ ဒီ လှူ အီ မုး ဒီဂါဝ် ဘော အိုမ် မာငုန် တွိုန်၊ အီ မုး ပီ ဒီ လှူ ပီ ဒီ ဒျီင်။

18 ဒူအီ နာစာရီ တွိုန်၊ အန် ဘော လုဝ် ဂါ့ ဂိန့် အန် နာ အာတ့် မာလုဝ်း ထိုပ် ဘိက် ဘွတ်။ အန် လုဝ် ဒိုဝ်း ဟိုက် ဂိန့် အန် တီ၊ ဝီ ဒုဝ့် ခဲင် ငဝ် အီ ကွယ် ဒဲင် ကာစှူင့် လှူ ဒေါ လှူ ဂေ ပီ ဒီ လှူ အီ တဲး ဂေ ကွယ် ကာဇု ဟူမ် ရိုမ်။

19 ဆေ ဟဲ့ ဟွတ့် ပါယ် တီ ဒါ အီ လှူ ဒီ ဇဝ်ဖြာ လုဝ် ဒိုဝ်း ယင် မာဘူ အီ မုး ယင် ဂိုမ် အာတ့် အန် ပဲ့ ဟဲ့ ကွင့် ဆိန် ဂေ။ အန် လုဝ် ဒိုဝ်း ဘော ခါမုန် အီ ဒီဖ့လ အူ ဒီခ့လဲပ်၊ ဘော ခါမုန် အီ ဟဲ့ ခြဲမ် အူ ဒီခ့လဲပ် အီ ကွယ် ခဲင် ခွန် တွိုန်၊ ဝီ ဟပ် ခဲင် ဒဲ ဒူအီ နာစာရီ တွိုန်။ ခါမုန် တီ ဒွန် မျုဝ် ဘော မုး ခါမုန် ပီ တူ ပွိုန် ဟပ် ဆီနမ် ဘြး။ 20 ပန် တီ ဒါ အီ လှူ ဒီ ဇဝ်ဖြာ လုဝ် ဒိုဝ်း ပီ လှူ ဂေ တီ၊ မာဝတ် ဝိဝ် မာဝတ် ဝေန့် ဒီ အာတ့် ဇဝ်ဖြာ၊ တဲး န့ ဘဲန် ပီ လှူ အီ မာဝတ် ဝိဝ် မာဝတ် ဝေန့်။ ပီ လှူ ဇိုဝ် တီ၊ ဟဲ့ ဘဲန် ပီ လှူ အီ ဆီငါ ဘွတ်၊ ဟဲ့ ဘဲန် ကြုဝ် ဂေ ဒါ အီ လှူ ဒီ ဇဝ်ဖြာ။ ဘော ဘင်နဝ်း မာဘူ ဘော ယင် ဂိုမ် အာတ့် အန် ဟဲ့ ဘဲန် ကြုဝ် ဒါ အီ လှူ ဒီ ဇဝ်ဖြာ တွိုန်။ ဝါယ် အန် တီ ဒူအီ နာစာရီ တွိုန် ဟဲ့ ဝီ ပွိုန် ဒျီင် အိုမ် မာငုန်။

21 ခဲ့ တီ အီ မုး ဒါရာ လွင် ပီ လုဝ် လှူ ဒူအီ အီ ဟဲ့ ခမ် ဒီ ဘဲန် ဒူအီ နာစာရီ၊ အီ ဟဲ့ ကာဆဲန့် ဒီ ကဲမ် ဆိန့်။ ဒဲင် တီ အန် ပွိုန် ဒီ လှူ ဒီ ဇဝ်ဖြာ ခဲ့ ပီ ပွိုန် ဘဲန် အန်။ မာလဲ၊ ပီ ကာဆဲန့် အန် ဒီ ဒွါ ဒီ ဇဝ်ဖြာ၊ အန် လုဝ် ဒွါ။ အာဝ် ပွိုန် တဲး န့ ဘ့လိူင်။”

22 ဇဝ်ဖြာ ပီ ဝီ စ်ု အာမုဝ်ဆဲ ကာလာင် ဒီ အာရူန် ဂေ ဂွန် အန် ပေါ အူ ဇေန့်။ 23 အန် တဝ်း၊ “ဂြုဝ်း ပီ ဒီ မွင့်ကာရာ ဒွါ ဘေ ဒီ ဂေ ဒူအီ အီဆာရေလ၊ ဘေ လုဝ် တဝ်း၊ 24 ‘တဲး ဇဝ်ဖြာ မွင့်ကာရာ ဒွါ ဒီ ဘေ။ တဲး အန် ယွတ် မဲန် ဘေ။

25 တဲး အာရူင် ဘ့လာင် ဇဝ်ဖြာ ဘ့လာင် ဒီ ဘေ။ တဲး အန် ဇဝ် ကာဝေ ဘေ ဘော ဂေဇူ ဘေ။

26 တဲး ဇဝ်ဖြာ ယွတ် လိုမ်လာ ဘေ၊ တဲး ဘေ ကွယ် ဒါခိုယ် ဂျာမ်ဆာ။’

27 ဆေ ဂေ ဘော ဆာခိုဝ် ဂါဝ် ပွုန် အုဝ်၊ တဲး အုဝ် ကွယ် ရိုမ် ဒူပ် ဂေ ဒူအီ အီဆာရေလ ဆေဆေ၊ အုဝ် ဒီ ဘော မွင့်ကာရာ ဒွါ ဒီ ဂေ ပါယ် တီ။”