1 ဂြုဝ်း နီ ဘော မုး ဂြုဝ်း အာမုဝ်ဆဲ အီ မုး ဒဲစေန့် ဇဝ်ဖြာ။ အန် မွင့်ကာရာ ဒွါ ဒီ ဂေ ဒူအီ အီဆာရေလ အာတ့် ယမ် အန်။ 2 အန် တဝ်း၊ “ဇဝ်ဖြာ ဟဲ့ လေး တး ဒီ နွန် ဆီနာယ်။ ဒေါ တး အန် ဇဝ် တီ၊ န့ ဘော ပီ ဆီငဲ ဟဲ့ လေး ခဲင် မိူင် ဆေအီ။ အန် ဇဝ် ဘော တး ဒီ နွန် ဖာရာန်၊ တဲး ဘ့လာင် အန် ဘော တး ဒီ ဂေ ဒူအီ ပီ အိုပ် အန်။ အာမူ အာမာတ် အီ ဘွတ် ဘော တး ဒူပ် အန်၊ ကော မိုဝ်း ဘဲန် ဟြဲန့် ဘဲန် မှိုန့်။ ဒဲ အန် ဇဝ် ဘ့လာက် အာအး ဘော မိုဝ်း ငဝ် ဘ့လာင်။

3 ဟဲ့ မှာန်၊ မဲ ဇဝ်ဖြာ ရွက့် ဒူအီ ဘောကာဂ့လျီတ် အီ မုး ဒူအီ ပီ ရဝ်း မဲ။ မဲ ဇဝ် ဘော စွယ် ဘော ဂွင့် ရဲ ဂေ အီ မုး ဒူအီ ပီ အိုပ် မဲ။ ပါယ် တီ ဂေ ဘောကာဂ့လျီတ် ဘော ဂူမ် ဂိုပ် ဒီ ပ့လဝ် မဲ ဇဝ်။ တဲး ဂေ ထူမ် ဂြုဝ်း မဲ။

4 န့ မုး ဒါရာ ဇဝ်ဖြာ ပဲ့ ဟဲ့ ကာလာင် အာမုဝ်ဆဲ ဒီ အေ၊ န့ ဒီ ဘဲန် ခါဂုန် ဘွတ် ဒီ အေ ဒူအီ အာမျုဝ် အာကူပ်။

5 ဒေါ တး ကာဇု ကာဒိုမ် ဂေ ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ ဒွန် ဇိုဝ် ဒွန် ခြိုဝ်၊ ဇဝ်ဖြာ ဘော ဘဲန် ခုန်ဒီခမ် အီ အိုပ် ဂေ။

6 ကွဲ့ တဲး ခြိုဝ် အာရူဘေန် ယမ် ဟြာယ် တူတ့်၊ တဲး ဂေ မိုဝ်း အာဆာက်။ ကွဲ့ တဲး ဂေ ပြေတ့် ဒေါ မှဝ်။”

7 ဟဲ့ ဟွတ့်၊ အန် ဘော ကာလာင် ဂြုဝ်း မွင့်ကာရာ ဒီ ခြိုဝ် အာယူဒါ တဝ်း၊ “အိုယ် မဲ ဇဝ်ဖြာ၊ မှာန့် တဲး မဲ ထူမ် ဂြုဝ်း ပီ ဒတ် ဒဲ့ ဂေ ခြိုဝ် အာယူဒါ၊ တဲး ဂေ ဘော ဝီ လာယ် ကာလဝ့် လာယ် ဒါခိုယ် ဒီ ဒူအီ အီဆာရေလ အီ မုး အာမျုဝ် အန်။ မှာန့် မဲ ဇဝ်ဖြာ၊ တဲး ဂေ မိုဝ်း ပ့လူမ် ဂေ ဟဲန့် ဒီ ကာဂုဝ်း ဒီ ရန်ဆူ ဂေ။ တဲး မဲ စွယ်၊ တဲး ဂေ ပဲ ရန်ဆူ ဂေ။”

8 ဂြုဝ်း အီ မွင့်ကာရာ ဒွါ ဒီ ခြိုဝ် အာလေဝီ အန် ဘော တဝ်း၊ “အိုယ် မဲ ဇဝ်ဖြာ၊ မဲ ဟဲ့ ရဝ်း ခြိုဝ် အာလေဝီ၊ တဲး ဂေ ပွိုန် ဒီ စ်ု မာဝ် အူရိမ် ဂါယ် ထူမိမ် တွိုန်။ မဲ ဇဝ် မိူဝ် ဟဲ့ ဇဲတ် ဒီ ယွတ် နဝ်း ဂေ ဒီ ဒူင် စိူဝ် မာဆာ ဘော တူ လာယ် ဆီဖဝ် ဒေါ ကွယ် ဂေ ဒူင် တုဝ်း အိုမ် မေရီဘာ တွိုန်။

9 ဂေ မိူဝ် ဟဲ့ ဘျ ဂေ ဟဲ့ ရုဝ်ဆေ မဲ ဇဝ် လွှိုမ် ရုဝ်ဆေ ဂေ ဂုန့် မာ ဘော ဘီနွင် ဂေ ဘော လှုက်လှာန် ဂေ။ ဂေ ဟဲ့ တဝ်း ဒီ ဂုန့် မာ ဂေ၊ ‘အုဝ် တူ နပ် ဘေ။’ ဂေ ဘော ဂျုဝ်ဂျာ ဒီ ထူမ် ဂြုဝ်း မဲ ဇဝ် ဘော စွယ် တဲး အီ ခမ် ကာဒိက် ဆတ်ဇာ ပဲ့ ဟဲ့ ဒွါ ဂေ ဒီ မဲ ဇဝ်။

10 ဂေ ဒီ ဘော မာနုဝ် ပီ ဒမ် အုန် မဲ ဇဝ် ဒီ ဂေ အာမျုဝ် အာကူပ်။ ဂေ ဒီ ဘော မာနုဝ် ဒါရာ မဲ ဒီ ဒူအီ အီဆာရေလ။ ဂေ ဘော ဒုဝ့် လှူ န့ကြိုဝ်း အုး ငှုန် ဒီ အာတ့် မဲ ဇဝ် ဘော လှူ ပီ ဒီ လှူ အီ ဒုဝ့် ဒီ ငဝ် ဘော လှူ ဒုဝ် ဆတ်ဒါဝါ ဒီ မဲ ဇဝ် ဒဲင် ကာစှူင့် လှူ။

11 အိုယ် မဲ ဇဝ်ဖြာ၊ တဲး မဲ ဘော မွင့်ကာရာ ဒွါ ကြုဝ်ကြာမ် ဂေ။ ပီ ဘူင် ပီ ရန့် ဂေ၊ တဲး န့ ဘော လဝ့် နဝ်း မဲ ဇဝ်။ မှာန့်၊ တဲး မဲ ဇဝ် မး ညွယ် ရန်ဆူ အီ ကာဂုဝ်း ဒီ ဂေ၊ ကွဲ့ တဲး ဂေ ပွိုန် ဒီ ဝီ ယိတ့် ဒေါ မှဝ်။”

12 ဂြုဝ်း မွင့်ကာရာ ဒီ ခြိုဝ် အာဘေန်ယာမ် အန် ဘော တဝ်း၊ “ခြိုဝ် နီ ဘော မုး ခြိုဝ် ပီ ရွက့် ဇဝ်ဖြာ။ တဲး ဂေ ပွိုန် ဒီ ကွယ် ဆီချာ ခူပ် ဇဝ်ဖြာ။ အန် ဇဝ် ဘော စွယ် ဂွင့် ရဲ ဂေ ဒွင် ဝန်။ အန် တဲး ဂေ ကွယ် ဒါခိုယ် ကာတဲ နွန်။”

13 ဂြုဝ်း မွင့်ကာရာ ဒီ ခြိုဝ် အာယုဝ် အန် ဘော တဝ်း၊ “တဲး ဇဝ်ဖြာ မွင့်ကာရာ ဒွါ ဒီ မာန် မိူင် ဂေ၊ တဲး အိုမ် ဒီငါန် ဘော စုဝ်း ခဲင် ဂါင်ဟြာဝ် လူင်၊ တဲး န့ ဘော မိုဝ်း အိုမ် ကိူန် နာ ခြိုမ် ကာဒါယ်။

14 တဲး ဆီငဲ ဘော ဒွါ ဘ့လာင် အန် ဒီ ဘ့လေ ပီ ဆမ် ဂေ၊ တဲး န့ ဘော ဆိန် ဘော ဆီငဲး။ တဲး မာဂျီန် ဘော မွင့်ကာရာ ဒွါ ခဲ့ ပီ ပွိုန် အန် ဒွါ။

15 ဘော ဒဲင် နွန် အီ ဟဲ့ ကွယ် ခဲင် မိူင် ဂေ ဆိန့် အာတ့် နီ၊ တဲး န့ ဘော လေး ဘ့လေ ဘွတ် ဘ့လေ မွှိုမ် ဆေဆေ ဘော နာ အာတ့် ဟာဝ် ဒွန် စုဝ် ဒွန် ဘာန်။

16 တဲး န့ ဘော မိုဝ်း မီ ကြုဝ် ဘွတ် ကြုဝ် မွှိုမ် ဒီလူယ်။ တဲး ဇဝ်ဖြာ အီ ဟဲ့ ဒွိုမ် ကာလာင် ဂြုဝ်း ခဲင် ငဝ် အီ လေး ခဲင် ယွုန် တွိုန် ဘော ကာလဝ့် ဒီ ဂေ ဘော မွင့်ကာရာ ဒွါ နာ မွှိုမ် ဒီ ဂေ။ တဲး အာမျုဝ် အာယုဝ် ပွိုန် မွင့်ကာရာ တီ ကူပ် ဟဲ့ ဘဲန် အာယုဝ် ဂုန့် ဒင် ဂေ ဘော ဒါ အီ ယဲတ့် အူကတ် အူဝါ အန်။

17 ဂေ ဒါ ဆိုက် ခဲင် ခြိုဝ် အာအေဖာရိမ် ဘော ခဲင် ခြိုဝ် အာမာနာဆေ၊ ဂေ မိုဝ်း ဘဲန် ဟြဲန့် ဘဲန် မှိုန့်။ ဂေ မိုဝ်း ပ့လူမ် ဂေ ဟဲန့် ပီ မက် အာလူင့် အီ မုး ဂွန် ဂိန့်။ ဂေ ပီ မက် အာလူင့် ပြဲ၊ ဘော နပ် ဒီ တုး ယမ် ရန်ဆူ ဂေ။ ဂေ ဒူအီ အာအေဖာရိမ် ဘော ဂေ ဒူအီ အာမာနာဆေ ဘော ပီ မက် အာလူင့် တီ။ ဂေ ဒီ ဘော တုး ယမ် ရန်ဆူ ဂေ၊ တဲး န့ ကော ဇမ် ဒူင် ဆိူတ် ကာဒါယ်။”

18 အီ မုး ခြိုဝ် အာဇေဘူလူန် ဂါယ် အာမျုဝ် အာအီဆာခါ အာမုဝ်ဆဲ ဘော တဝ်း၊ “ဘေ ဒူအီ အာဇေဘူလူန်၊ တဲး ဘေ ဘျုဝ် ဒါခိုယ် ကူပ် ပွိုန် ဘေ ဒီ လိုပ် လိုပ် လေး လေး။ ဘော ဘေ ဒူအီ အာမျုဝ် အာအီဆာခါ၊ တဲး ဘေ ဘျုဝ် ဒါခိုယ် ကွယ် ခဲင် ထိုပ် ဘေ။

19 ဂေ ဒီ ဘော ဒဲ့ ဒူအီ ကိူန် တး ဒဲင် နွန် ဇဝ်ဖြာ၊ တဲး ဂေ လှူ ပီ ဒီ လှူ အီ မုး အီ မှာန်။ ဂေ ဒီ ဘော ပွိုန် ကြုဝ်ကြာမ် ဘွတ် ခဲင် အိုမ် နမ်မုက်ဆာရာ၊ ဘော ခဲင် ကာဟာတ့် ခူပ် ဘာင် အိုမ် တီ။”

20 လွင် ခြိုဝ် အာဂတ် အန် ဘော တဝ်း၊ “တဲး အေ အိူပ် ဇဝ်ဖြာ အီ ဟဲ့ တဲး ခြိုဝ် အာဂတ် ကွယ် ဒူင် ကာဝဝ်း။ အာမျုဝ် အာဂတ် တီ၊ ဂေ ဒီ ဘော ပီ မာခြင်ဆီ အီ ဘ်ု ဒီ ကဝ့် ဟူမ် ဒဲ ဂေ ဂိန့် အီ။

21 ဂေ မိူဝ် ဟဲ့ ပွိုန် ရဝ်း ကာဒါယ် အီ ဘွတ် လွှိုမ် ကာဒါယ် အီ ဟဝ်။ န့ ဘော မုး ပဲ့ ဟဲ့ ကာယဝ်း အုန် ဂေ ဒါ တာင် အာဒါ ဂေ။ ဂေ မိူဝ် ဟဲ့ ဘူင် ဒူပ် ပီ အိုင် ဇဝ်ဖြာ ဒေါ တး ကာဇု ကာဒိုမ် ဂေ အီ မုး ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ။”

22 လွင် ခြိုဝ် အာဒါန် အန် တဝ်း၊ “ခြိုဝ် အာဒါန် ဘော ပီ မာခြင်ဆီ နှိုမ် အီ ဒဲန် လေး ခဲင် မိူင် ဘာဆန်။”

23 လွင် ခြိုဝ် အာနာပ်ထာလီ အန် တဝ်း၊ “အာမျုဝ် အာနာပ်ထာလီ ဟဲ့ ပွိုန် ကိူန် မွင့်ကာရာ ပီ ဂေဇူ ဇဝ်ဖြာ ဒီ ဂေ။ ဂေ ဟဲ့ ပွိုန် ဒီ ဘိုင် မိူင် ဘ့လာက် နာ တေတ့် ကော ဝီ ဇမ် ဒီ အိုမ် ဒိုင်။”

24 လွင် ခြိုဝ် အာဆေန် အန် တဝ်း၊ “အာဆေန် ဟဲ့ ပွိုန် မွင့်ကာရာ ဘွတ် အီ လွှိုမ် ဘီနွင် ဝေါဝဲ အန်။ အန် ဘော ဟဲ့ လဝ့် ကာဆဝ် နဝ်း ဇဝ်ဖြာ လွှိုမ် ခြိုဝ် ဟဝ်။ တဲး ဒူအီ အာမျုဝ် အန် ခြမ် ကူပ် ဟဲ့ လိုင် ဘ့လေ နာမန်။

25 ဆဲ မာလုဝ်း ကာင် ဂေ ဒီ ဘော မုး ဟိန် ဂေ ဘွင့် ဒေန့်။ ဂေ ဒီ ဘော ပွိုန် ဒီ ကွယ် ဒါခိုယ် ဂျာမ်ဆာ ဘော စုဝ် ဂေ။

26 အိုယ် ဘေ ဒူအီ အီဆာရေလ၊ အာဝ် မိုဝ်း အီ ပီ ဇဝ်ဖြာ ပီ ကြိုပ် ဘေ။ ဇဝ်ဖြာ ပီ ကြိုပ် ဘေ၊ အန် ကွယ် ခဲင် ဂါင်ဟြာဝ်၊ တး လူင် ဒဲင် န့အု၊ တဲး အန် စွယ် ဘေ။ ပါယ် တီ အန် ဘော ဘျ အာဖုင် ဒင်ခုဝ် အန်။

27 ဇဝ်ဖြာ အီ ကွယ် ဆေဆေ ဘော မုး ဒူင် ဘိုင် ဘေ။ န့ ပီ အန် စုဝ့် ဘေ တာ ဒဲ အန်။ အန် ဒီ ဟုဝ် တဝ် ရန်ဆူ ဘေ။ အန် ဒွါ အာမိင် တဝ်း၊ ‘ပျာတ့် ဝဲန် ဂေ။’

28 ကူပ် န့ ပါယ် တီ ဂေ ဒူအီ အီဆာရေလ ဘော ပွိုန် ဒီ ကွယ် ဂတ် ဂျီတ်။ အာဝ် မိုဝ်း အီ ဒွါ ဒုက် ဒီ ဂေ။ ဂေ လှုက်လှာန် အာကူပ် ကွယ် ဒါခိုယ် ခဲင် မိူင် ဒူင် ဟဲ့ မိုဝ်း ငှုဝ် ဂေ အိုမ် မာငုန် ကိူန်၊ မိူင် ဒူင် စုဝ်း အိုမ် ဒီငါန်၊ ရိုက် ကာဒါယ်။

29 အိုယ် ဘေ ဒူအီ အီဆာရေလ၊ ဘေ ဟဲ့ ပွိုန် မွင့်ကာရာ ဘွတ်။ အိုယ် ဘေ ဒူအီ ပဲ့ ဟဲ့ ချွတ် ဇဝ်ဖြာ၊ အာဝ် မိုဝ်း အာဆေ ပီ ဘေ။ ဇဝ်ဖြာ ဟဲ့ ပီ မင် ဂွင့် ဘေ။ အန် ဟဲ့ စွယ် ဘေ။ န့ ဘော ပီ မာပွါ့ လာင် ဂေ ဘ့လာ လျီး အီ ငဝ်း ယမ် ရန်ဆူ ဘေ၊ တဲး ဘေ ကော အွင်။ ရန်ဆူ ဘေ ကော ကာဒုး ဒီ တး ဂူမ် ဂိုပ် ဒီ အာတ့် ဘေ။ ဘေ ဒီ ဘော ညဲတ့် ဟာဝ် ဒဲင် ကာတု ဂေ။”