အာမုဝ်ဆဲ တဝ်း၊ “တဲး ဂါင်ဟြာဝ် ထူမ် ဂြုဝ်း ပီ ကာလာင် အုဝ်။ တဲး ဘော ကာဒါယ် နုဝ် ဂြုဝ်း အီ လေး ခဲင် မူတ့် အုဝ်။

2 ဂြုဝ်း ပီ မာနုဝ် အုဝ်၊ တဲး န့ ဘော ပီ ဂ့လာယ် အီ စုဝ်း လူင်။ တဲး န့ ဘော ပီ အိုမ် ဒီငါန် အီ စုဝ်း။ တဲး န့ ဘော ပီ ဂ့လာယ် အီ စုဝ်း ဒဲင် ပေတ့် ပီ ဆမ် အီ။ တဲး န့ ဘော ပီ အိုမ် ဂ့လာယ် အီ စုဝ်း ဒဲင် အီ ပု လေး ကာမာယ်။

3 အုဝ် ဒီ ကာလာင် လွင် ပီ ပါယ် ဇဝ်ဖြာ။ တဲး ဘေ ဒူအီ ပီ အိုပ် အန် ဘော အိူပ် ခဲ့ တာင် အာဖုင် ဒင်ခုဝ် အန် ဇဝ်။

4 ဇဝ်ဖြာ ပီ ဒါအာင် မာဝ် အီ မုး ဒူင် ပွိုန် ကွယ် ဆီချာ။ ပီ ဘူင် အန် ဘော ဇေ့ဇုင် တူတ့် ဒွန် မျုဝ်။ န့တေန့် ပီ နှဲ အန် ဟဲ့ ဒူပ် ဒါရာ ဒွန် ညွင့်။ အန် ဘော မုး ဇဝ်ဖြာ အီ မိုဝ်း နဝ်း ဆိူဝ် နဝ်း မှာန် ဘော တူ နပ် ဒီ ဘူင် အီ တူ မှာန်။ အန် ဘူင် မီ နာ ဆိူဝ် နာ မှာန် ဆေဆေ။

5 အီ မုး ဂေ၊ ဂေ ယီ ဘူင် နာ ဟာယ် နာ မိူက် ဒီ ဇဝ်ဖြာ။ ဂေ အာဝ် ဟူ မုး ဂွန် အန် ကူပ် ဟဲ့ ဘူင် ဂေ အီ ကာဒါတ့်။ ဂေ မုး အီ တူ ဒူပ် နာ မှာန်၊ ဘော မိုဝ်း နဝ်း ဂုဝ့် နဝ်း ဂဲ့။

6 အိုယ် ဘေ ဒူအီ ရိုဝ် အီ တူ မိုဝ်း အာငျာန်၊ ဘေ ထာင် ဘေ ပွိုန် ဘူင် ဇိုဝ် တီ၊ ဝီ ဝျီ့ ဂုင် ဂေဇူ ဇဝ်ဖြာ။ အန် ဇဝ် ဟဲ့ မုး ဂုန့် ဘေ၊ ဟဲ့ ဖာန် ဘ့လေး ဘေ။ အန် ဇဝ် ဟဲ့ ဘူင် အာရိုပ် ဘေ၊ တဲး ဘေ ဘဲန် ဒူအီ။

7 တဲး ဘေ ဝီ လှုဝ်း အာခြာဝ် အီ ဟဲ့ ပွုန် တး အာတ့် နီ၊ ကာဒွါ့ ကာဖာ လွင် ဒါ ဒါ ဘေ။ တဲး ဘေ ဝီ ဒီမွှတ် ဂုန့် ဘေ။ ဂေ ဒီ ဘော ကာလာင် ဒီ ဘေ။ တဲး ဘေ ဝီ ဒီမွှတ် ဂေ ဒူအီ ကတ် ဒူအီ ဂဲ၊ ဂေ ဒီ ဘော ခဲ ဒီ ဘေ။

8 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ကာယဝ်း ကာဆာင် ကာဒါယ် ဒီ ဒူအီ ဘဲန် မျုဝ် ဘဲန် မျုဝ်၊ တဲး န့ ဘဲန် ခါဂုန် ဂေ။ တဲး န့ မိုဝ်း ကာအုန် ဒူင် ဒီ ကွယ် ဂေ။ အန် ဇဝ် ဘော ကာဆာင် ဒူပ် ခဲ့ ကိူန် ဒူအီ အီဆာရေလ။

9 ခုဝ်၊ ခြိုဝ် အာကူပ် တွိုန်၊ အန် ဇဝ် ဟဲ့ ရဝ်း၊ တဲး ဂေ ဘဲန် အာမျုဝ် ဒူအီ ပီ အိုပ် အန် ဘော ဘဲန် ပီ ခါဂုန် အန်။

10 အန် ဇဝ် ဟဲ့ ယွတ် မဲန် ဂေ ခဲင် ပြဲ ကာဟဝ်း ဒူင် ငွင့် ဒူအီ။ ဒူင် တီ န့ ဘော မိုဝ်း မီ ဟမ် ဂေ ကာအိူန် မာဒုဝ် ပြဲ ဟာယ်။ အန် ဇဝ် ဘော ဂွင့် ရဲ ဂေ ဘော ယွတ် မဲန် လိုမ်လာ ဂေ။ န့ ကော ပီ အန် လိုမ်လာ ဂွန် ငါယ် အန်။

11 ပီ ဘူင် ဇဝ်ဖြာ ဒီ ဂေ ဘော ပီ မာဂ့လာင် အီ ပျာတ့် ကာဟုန် အန် ဘော ဘိုန့် နာ ဒဲင် ဂွန် အန်။ အန် ဘော ဘ့လး ဖျီင် အန်၊ ဆူက် တဲး ဂွန် အန် ကွယ် ဒဲင် ဖျီင် အန်။

12 န့ မိုဝ်း မီ ဇဝ်ဖြာ အူ ကာဒင် အီ ယဲတ့် ဟာဝ် ဂေ။ ဇဝ် ပီ ကြိုပ် ဒူအီ ဟဝ် တူ ကွယ် ရိုမ် ဒူပ် ဂေ။

13 အန် ဇဝ် တဲး ဂေ ကွယ် ဒူင် မိုဝ်း နွန် စာ ဘော တဲး ဂေ ပွိုန် ဒီ ဟူမ် အီ လတ့် ခဲင် ဒူင် နာ ဂေ။ တဲး ဂေ ဒျီင် ဘော ငါမ် မာဖျီန် ခဲင် ဒး မာဝ် ဘော ပွိုန် ဒီ ဒိုဝ်း နာမန် ဒူင် မိုဝ်း ဒါအာင် မာဝ်။

14 ဂေ ဘော ပွိုန် ဒီ ဟူမ် အိုမ် ပူ ဘော အိုမ် ပူ ဂြုဝ့် ဒီ မာမက် ဂေ မာပဲ။ ဘော ယင် မာဘူ ဂေ မာပဲ အီ ဟဲ့ ဂ့လန့် ကာဆဝ်၊ ဘော မာဘူ အာလူင့် အီ တး ခဲင် မိူင် ဘာဆန် ဘော ခဝ်ချုင် အီ မွှိုမ် ကာဆဝ် ဘော အိုမ် မာငုန် အီ ဇဲတ်၊ ဇဝ်ဖြာ ဟဲ့ ဒွါ ဒီ ဂေ ဇိုဝ် တီ ဒွန် မျုဝ်။

15 ဒူအီ အီဆာရေလ ဂေ တီ၊ ဂေ ဟဲ့ ဂ့လန့် ဘော ဝီ ကာဘး ဒီ ဇဝ်ဖြာ။ ဂေ ဟဲ့ ကွယ် ဒါခိုယ်၊ ဟဲ့ မိုဝ်း ဇေ့ဇုင်၊ ဟဲ့ ဂ့လန့် ဒွန် အီ။ ဂေ ဘော ဝဲန် ဇဝ်ဖြာ အီ ဖာန် ဘ့လေး ဂေ။ ဂေ ဘော ဝး အန် ဇဝ် အီ ပီ ဒါအာင် မာဝ် အီ ဟဲ့ ချွတ် ဂေ။

16 ဂေ ဘော ဝီ ကြိုပ် ဇဝ် ပီ ကြိုပ် အီ ဟဝ်၊ ဘူင် တဲး ဇဝ်ဖြာ ရူ ဒီ ဂေ၊ တဲး ဇဝ်ဖြာ ကာအိး ပီ ကြိုပ် ဂေ အာရိုပ် ရာင်။

17 ဂေ ဘော ဝီ လှူ ဒီ ကာနမ် အီ တူ မုး ဇဝ်ဖြာ၊ အီ မုး ဇဝ် အီ ဘုဝ် တး ကာမာယ် ပီ တူ ဒွိုမ် ရုဝ်ဆေ ဂုန့် ဒင် ဂေ။

18 ဘေ ဝီ ပိဝ် ဇဝ်ဖြာ ပီ ကြိုပ် ဘေ အီ ပီ ဒါအာင် မာဝ်။ ဘေ မိူဝ် ဟဲ့ ပိဝ် ဇဝ်ဖြာ အီ တဲး ဘေ မိုဝ်း အာဆာက် အီ ပီ ဂုန့် ဘေ။

19 ဇဝ်ဖြာ ဟဲ့ ယိုဝ် လွင် အန် တီ၊ အန် ဘော ဝဲန် ဂေ။ ခုဝ်၊ ဂေ ဂွန် အီဘိုန့် ဂွန် အီမာယ် ဟဲ့ ဘူင် တဲး အန် ရူ။

20 အန် ဇဝ် မိူဝ် တဝ်း၊ ‘အုဝ် တူ ယွတ် ဂေ ဒေါ မှဝ်။ အုဝ် ဒီ ဘ်ု ဒီ ယွတ်၊ ယုဝ် ဂေ ဒီ ပါယ် မှဝ်။ ဂေ မုး ဒူအီ နဝ်း ဂုဝ့်။ ဂေ မုး ဂွန် အီ တူ ဘူင် နာ ဆိူဝ် နာ မှာန်။

21 ဂေ ဝီ ဒိုဝ်း မျုဝ် အီ တူ မုး ဇဝ်ဖြာ ဘူင် တဲး အုဝ် လုတ့် နဝ်း။ ဂေ ဘော ဒိုဝ်း အာရိုပ် ရာင် အီ တူ မိုဝ်း ဒီခုဝ်၊ ဘူင် တဲး အုဝ် ရူ။ ပါယ် တီ အုဝ် ဒီ တဲး ဂေ ဝီ လှယ့် ဒူအီ အီ တူ မိုဝ်း ပ့လူမ် ဂေ ဟဲန့်။ အုဝ် ဒီ တဲး ဂေ ဝီ ပီရူ ပီစာဝ် ဂေ ဒီ ဒူအီ အာမျုဝ် ဟဝ် အီ တူ မိုဝ်း အာငျာန်။

22 နဝ်း ရူ အုဝ် တီ၊ န့ ဟဲ့ ကုး ပီ ငဝ် ဒီ ဘော ကာဆိုမ် ဇမ် ဒူင် လိုက် မိူင် မာရာန။ န့ ဒီ ဘော ကာဆိုမ် ဘော ကာဒါယ် ဘော ပီ ပိတ် ပီ ဆမ် ဒူအီ တူတ့် ဒွန် မျုဝ်။ ဘော ဒင် နွန် ဘောကာဂ့လျီတ် ဒီ ကာဟဝ်း ခြဲမ်။

23 အုဝ် ဒီ ဝီ ဒိုဝ်း ကာဇု အီ တူ မွှိုမ် ဒွန် မျုဝ်၊ ဝီ တဲး ဂေ ခမ်။ အုဝ် ဒီ ဘော ဒိုဝ်း ခဲ့ ကွယ် အ အုဝ်၊ ဝီ ဘန့် ဂေ။

24 အုဝ် ဒီ ဘော တဲး အီ ယမ် ကူပ် ဒုက် အီ အေတ့် ပီ ဒီ ဟူမ်။ ဂေ ဒီ ဘော မိုဝ်း ဒုဝ် ကာဟွာ့ ဒုဝ် ဒါတ် ကာဆဝ်။ ဂေ ဒီ ဘော ယမ် ဒီ ဆဝ် ရောဂါ။ အုဝ် ဒီ ဝီ စ်ု မာဒုဝ် ပြဲ ဟာယ် တး ပျာတ့် ဂေ ဘော တဲး မာဟန့် အီ မိုဝ်း အာယ် အီ ဟဲန့် ကာဆဝ် တး ဇုဝ့် ဂေ။

25 နာ ရေတ့် ကာင် ဂွန် ဂေ ဒီ ဘော ယမ် ဒီ မာပွါ့ လာင်။ ခဲင် ကာင် ဂေ၊ ဂေ ဒီ ဘော လုဝ် ယုဝ် ကာဆဝ်။ ဂွန် ကာညူမ် ဂွန် ဒီဘျာ ဂေ ဒီ ဘော ယမ်။ စုး ဒီ ဂွန် ဒီရွယ် ကော ဇမ် ဒူအီ ကတ် အာဝ် မိုဝ်း အီ လွတ်။

26 န့ ဟဲ့ ကာအာပ် အုဝ် ပျာတ့် ဝဲန် တူတ့် ဂေ၊ ကွဲ့ တဲး ဒူအီ ဒဲင် ကာဒါယ် နီ ဆီ လှုဝ်း ဂေ။

27 မာလဲ၊ အုဝ် ယီ တူ ဆီ တဲး ရန်ဆူ ဂေ ဝီ ပီဖုင် ဂေ ဘော ထာင်၊ ဂေ ဟဲ့ ကာဂုဝ်း ဟဲ့ အွင် ဒူအီ ပီ အိုပ် အုဝ်။ န့ ယီ မုး အုဝ် အီ ဟဲ့ တဲး ဂေ လိုဝ် စှိုမ်။’ ဇဝ်ဖြာ ဟဲ့ တဝ်း ခဲ့ တီ။

28 အန် ဇဝ် ဝီ တဝ်း၊ ‘ခုဝ်၊ ဒူအီ အီဆာရေလ တူ မိုဝ်း အာငျာန်။ ဂေ တူ နပ် ဒီ ဇေန့်ဇာ ဆီချာ။

29 အုဝ် ဆီ တဲး ဂေ မိုဝ်း အာငျာန်၊ တဲး ဂြုဝ်း အုဝ် ကာလှုး ဒီ နဝ်း ဂေ၊ တဲး ဂေ လှုဝ်း လွင် အာဂျိုဝ် ပီ ဘူင် ဂေ။

30 ဒူအီ အူ ဝီ ဟဲ့ ကာဂုဝ်း ပဲ ဒူအီ ဂေ ဘဲန် ဟြဲန့်။ ဒူအီ အာ ဝီ ဟဲ့ ကာဂုဝ်း ပဲ ဒူအီ ဂေ ဘဲန် မှိုန့်။ ကူပ် မာဆေ န့ ဟဲ့ ဘဲန် ပါယ် တီ။း န့ မုး ဇဝ်ဖြာ ပီ ကြိုပ် ဂေ၊ အီ ပီ ဒါအာင် မာဝ်၊ အန် ဟဲ့ ဝဲန် ဂေ။ ဇဝ်ဖြာ အီ အိုပ် တူတ့် ဒွန် မျုဝ်၊ အန် မိူဝ် ဟဲ့ အာပ် ဂေ ဒီ အီ ဟဝ်။

31 ရန်ဆူ ဂေ တီ မိူဝ် ဟဲ့ နပ်၊ ဇဝ်ဖြာ ပီ ကြိုပ် ဂေ တူ မိုဝ်း ပ့လူမ် ဂေ ဟဲန့်၊ အာဝ် မိုဝ်း ပွုန် ပီ ဇဝ်ဖြာ ပီ ကြိုပ် ဒူအီ အီဆာရေလ။

32 ရန်ဆူ ဂေ တီ မိူဝ် ဟဲ့ ဟာယ် ကာဆဝ်။ ပီ ဘူင် ဂေ ပီ ဟေ မာငုန် အီ တး မိူင် ဆုဝ်ဒူမ် ဘော အီ ကွယ် ခဲင် ကာဒါယ် မိူင် ဂုဝ်မုဝ်ရာ။ န့ ဘော ပီ ဘ့လေ မာငုန် တီ ဟဲ့ မိုဝ်း ဂူင်။ ကာယူင့် အန် ဟဲ့ ဆွင့်။

33 န့ ဘော ပီ ဘော အိုမ် မာငုန် တီ မိုဝ်း အာယ် မာဟန့်။

34 အုဝ် အီ မုး ဇဝ်ဖြာ ဘော ဝီ လှုဝ်း ပဲ့ ဟဲ့ ဘူင် ရန်ဆူ ဒီ ဂေ တီ။ အုဝ် ဘော ဘ်ု အာခြာဝ် ပန် ဒီ ဆင်ဒုဝ် ဒီ ဝီ ဒမ် မှာပ် ဒီ ဂေ။

35 အုဝ် အီ ဒီ ဝီ ဘူင် ဝျီ့ ဒီ ဂေ။ န့ ဒီ ဘော ဇမ် အာခြာဝ် ဒီ စှိုမ် ဂေ။ အာခြာဝ် ဒီ ဇမ် ဂေ ဒုက် မိူဝ် ဟဲ့ ကာတတ် ဒီ တး။ အာဖေ အာရေ အီ ဒီ ပျာတ့် ဂေ ဒီ ဘော တး ခြန် ခြန်။’

36 ဇဝ်ဖြာ ဒီ ဘော ဝီ ဆုင်ဖျာတ် အာမူ ဂေ ဒူအီ ပီ အိုပ် အန် ဘော ကာဝေ ဂေ ဒဲစေန့် အန် ဒေါ ဟဲ့ ယိုဝ် အန် လွင် တူ မိုဝ်း ဂေ ပ့လူမ် ဂေ ဟဲန့် ဘော အာဝ် ဟူ ဂိတ် အာဆေ၊ ဘော မုး မှာယ် အီ၊ ဘော မုး ဒါ ကာညာ အီ။

37 ဇဝ်ဖြာ ဒီ ဘော ဝီ တဝ်း၊ ‘ဇဝ် ပီ ကြိုပ် ပီ ဘိုင် ဂေ၊ ဂေ ကွယ် ဒီ မှဝ်။း

38 ဂေ ဟဲ့ လှူ ယင် ဘော ဘျြီင် ဒုဝ် ဆတ်၊ တဲး ဇဝ် ဂေ ဟူမ်။ ဇဝ် ဂေ တီ မိူဝ် ဟဲ့ ဒျီင် အိုမ် မာငုန် ပဲ့ ဟဲ့ လှူ ဒူအီ တီ။ ဒေါ တီ နီ၊ တဲး ဇဝ် ဂေ တီ တး စွယ် ဘေ။ တဲး ဂေ တး ဂွင့် ရဲ ဘေ။

39 တဲး ဘေ နပ်၊ အုဝ် အူ ကာဒင် နီ၊ အုဝ် မုး ဇဝ်ဖြာ။ ဇဝ် ပီ ကြိုပ် အီ ဟဝ်၊ ဂေ အာဝ် မုး ဇဝ်ဖြာ အာခါခ်ု။ အုဝ် တဲး အီ မိုဝ်း အာဆာက် ဘော တဲး အီ ယမ်။ အုဝ် တဲး အီ ဆဝ်၊ ပီ ဝီ တဲး န့ ဟြာယ်။ အာဝ် မိုဝ်း ပွုန် အာဆေ အီ ပွိုန် ချွတ် လေး အီ ဒီ အုဝ်။

40 အုဝ် မိူဝ် ဟဲ့ စုဝ့် ဆူင့် ဒဲ အုဝ် ဘော ဒိူင် တဝ်း၊ န့ ဟဲ့ မှာန်၊ အုဝ် ကွယ် ဆေဆေ။ ပါယ် တီ ဘော ပီ ကာလာင် အုဝ် နီ ဟဲ့ မှာန်။

41 အုဝ် ဒီ ဘော လာ့ အုန် မာပွါ့ လာင် အုဝ်၊ တဲး န့ ရာဝ်။ အုဝ် ဘော ဘ်ု ဒီ ဆုင်ဖျာတ် ဒူပ် ဒါရာ။ အုဝ် ဒီ ဘူင် ဝျီ့ ဒီ ရန်ဆူ အုဝ်။ အုဝ် ဒမ် မှာပ် ဒီ ဂေ အီ ဇွင့် အုဝ်။

42 ဘ့လာ အ အုဝ် ဒီ ဘော လဝ့် အီ၊ တဲး နှာမ် လေး ကိူန်။ မာပွါ့ လာင် အုဝ် ဒီ ဘော ဒဲပ် ယင် ဒူအီ ကိူန်။ နှာမ် ကိူန် တီ၊ ဘော မုး နှာမ် ဒူအီ အီ ဟဲ့ ပါ့၊ အီ ဟဲ့ ဒိမ်၊ ဒူအီ ပီ မှေတ့် ဟာဝ် အီ ဟဝ် ဘော နှာမ် ဂေ အီ ယဲတ့် ရန်ဆူ၊ အီ ဟဲ့ ခမ် အီ ဒဲပ် ဂိန့် ဂေ။’

43 အိုယ် ဘေ ဒူအီ အာမျုဝ် ဟဝ်၊ တဲး ဘေ ခူယ် ဒါခိုယ် ဒူပ် ဂေ ဒူအီ ပီ အိုပ် ဇဝ်ဖြာ။ ခုဝ်၊ ဇဝ်ဖြာ ဒီ ဝီ ဒမ် မှာပ် ဒီ ဂေ အီ ငဝ်း ယမ် ဒဲစေန့် အန်။ အန် ဒီ ဝီ ဘူင် ဝျီ့ ဒီ ဂေ ရန်ဆူ အန်၊ ဝီ ဂဝ်း ဝဲန် မှာပ် ဂေ ဒူအီ အာမျုဝ် အန် ဘော မှာပ် ခဲင် မိူင် ဂေ။” ခဲ့ တီ မှုဝ် ပီ မာနုဝ် အာမုဝ်ဆဲ ဒီ ဂေ ဒူအီ အီဆာရေလ။

44 အာမုဝ်ဆဲ ဂါယ် အာယုဝ်ဆူအာ အီ မုး ဂွန် အာနုန် တွိုန် ဘော တဝ်း မှုဝ် တီ၊ တဲး ဂေ ဒူအီ အီဆာရေလ ပွိုန် ဒီ ထူမ် ဒွန် အီ။ 45 အာမုဝ်ဆဲ ဟဲ့ ဟွတ့် ကာလာင် တူတ့် ခဲ့ ကွယ် ဂြုဝ်း ဇဝ်ဖြာ ဒီ ဂေ ဒူအီ အီဆာရေလ၊ 46 အန် ဝီ တဝ်း ဒီ ဂေ၊ “တဲး ဘေ ဆာဒိက်၊ ခဲ့ ကွယ် ဒါရာ ဇဝ်ဖြာ ပီ ကာလာင် အုဝ် ဒီ ဘေ အာတိုဝ် နီ၊ တဲး ဘေ တဲး န့ လိုပ် ခဲင် နဝ်း ဘေ။ တဲး ဘေ ဝီ ကာလာင် ဘော ဒီ ဂေ လှုက်လှာန် ဘေ၊ တဲး ဘော ဂေ ဝီ ဂျုဝ်ဂျာ ဒီ ဘူင် ဒူပ် ဒါရာ ဇဝ်ဖြာ ဒွန် မျုဝ်။ 47 ဂြုဝ်း နီ၊ အာဝ် မုး ဂြုဝ်း ဒီလူယ် ဒီလာယ်၊ န့ ဒီ ဒွါ အာဆာက် ဒီ ဘေ။ ဆေ ဘေ ဘူင် ဒူပ်၊ အာဆာက် ဘေ ဒီ ဘော တူင့်။ ဘေ ဒီ ဘော ပွိုန် ဒီ ကွယ် လှေန့် ခဲင် မိူင် ဒူင် ဒီ ဟာဝ် ကွယ် ဘေ ဝါယ် ကာလုဝ်း ဘေ အိုမ် ဘ့လဲင် ယောဒါန် တီ။”

48 ဆီငဲ တီ ဇဝ်ဖြာ ပီ ဝီ ကာလာင် ဒီ အာမုဝ်ဆဲ တဝ်း၊ 49 “တဲး မဲ ဟာဝ် ဒီ ဒူင် စိူဝ် အာဘာရိမ် အီ မိုဝ်း နွန် ဘဲန် ပ့လုဝ့် ဘဲန် ပ့လုဝ့် အီ ကွယ် ခဲင် ကာဒါယ် မိူင် မုဝ်အာပ် အီ လာယ် ကာဆိူဝ် ဒီ မိူင် ယေရီခုဝ် တွိုန်။ ဟဲ့ ဟွတ့် မဲ ဘော ဝီ ဟုဝ့် ဒီ နွန် နေပေါ၊ တဲး မဲ ဝီ မာငး ယွတ် မိူင် ကာနန့် ပဲ့ ဟဲ့ တဝ်း အုဝ် ဒီ တဲး ဒီ ဂေ ဒူအီ အီဆာရေလ၊ တဲး ဂေ ဟာဝ် ကွယ် ဟာဝ် ဘိုင်။ 50 မဲ ဒီ ဘော ယမ် ဒဲင် နွန် တီ ပီ အီကတ် မဲ အီ စိူဝ် အာရူန်၊ အီ ဟဲ့ ယမ် ဒဲင် နွန် ဟုဝ်ရာ တွိုန်။ 51 ဘာယ် ဟဲ့ ပီရူ ဒီ အုဝ် ကာတဲ ဂေ ဒူအီ အီဆာရေလ ဒေါ ကွယ် ဘေ ခူပ် တုဝ်း အိုမ် မေရီဘာ တွိုန်၊ အီ မုး ဒူင် စိူဝ် ကာဒေတ် အီ ကွယ် ခဲင် ပြဲ ကာဟဝ်း စီနာ တွိုန်။ ဘာယ် မိူဝ် တူ ဘျ ခဲ့ ဘွတ် အုဝ် ဒီ ဂေ ဒူအီ အီဆာရေလ။ 52 ခုဝ် အန် တီ၊ အုဝ် တဲး မီ မဲ ကွယ် တူင့် ယွတ် မိူင် တီ။ မာလဲ၊ မဲ တူ ပွိုန် ဒီ လိုပ် ခဲင် မိူင် ပဲ့ ဟဲ့ တဝ်း အုဝ် ဒီ ဒွါ ဒီ ဂေ ဒူအီ အီဆာရေလ တီ။”