1 အာမုဝ်ဆဲ ပီ ဝီ ကာလာင် ဟာဝ် ဒီ ဂေ ဒူအီ အီဆာရေလ ဘောကာဂ့လျီတ် တဝ်း၊ 2 “ဒေါ တီ နီ အာဆာက် အုဝ် ဟဲ့ နုဝ့် အူ မာယဝ်း ဒီ အာ ဂိုဝ် ဆီနမ်။ ဝါယ် နီ အုဝ် မိူဝ် အာဝ် ဟူ ပွိုန် ယဲတ့် ဘေ ပေါ န့ ပွါ။ ဇဝ်ဖြာ ဟဲ့ ကာလာင် အုန် ဒီ အုဝ် တဝ်း၊ ‘မဲ တူ ပွိုန် ကာလုဝ်း အိုမ် ဘ့လဲင် ယောဒါန် နီ။’ 3 ဇဝ်ဖြာ ပီ ကြိုပ် ဘေ အီ ဒီ ဝီ ယဲတ့် ဟာဝ် ဘေ။ အန် ဒီ ပျာတ့် ဝဲန် ဂေ ဒူအီ အီ ကွယ် ဒီ တီ၊ တဲး ဘေ ကော ပွိုန် ဒီ အိုပ် မိူင် တီ။ ဘော အာယုဝ်ဆူအာ အီ ဒီ ယဲတ့် ဘေ ဒူပ် ပီ ကာလာင် ဇဝ်ဖြာ။ 4 ဇဝ်ဖြာ ဒီ ဘူင် ဒီ ဒူအီ ဂေ တီ၊ တဲး န့ ပီ ပီ ဒွိုမ် ဘူင် အန် ဒီ ခုန်ဒီခမ် အာဆီဟူန် ဂါယ် အာအောခ အီ အိုပ် ဒူအီ အာမျုဝ် အာမုဝ်ရိတ် တွိုန် ဒေါ ဟဲ့ ပျာတ့် အန် ဒီ ဂေ ဘော မာန် မိူင် ဂေ။ 5 ဇဝ်ဖြာ ဒီ အာပ် ဂေ ဒီ ဘေ။ ဘေ မိူဝ် လုဝ် ဘူင် ဒီ ဂေ၊ တဲး န့ ပီ ပီ ကာလာင် အုဝ် ဒီ ဘေ ဘော တူတ့် ဒွန် မျုဝ်။ 6 တဲး ဘေ မိုဝ်း ပ့လူမ် ဘော မိုဝ်း နဝ်း ယ။ အာဝ် လုဝ် ယုဝ်၊ အာဝ် လုဝ် ကျွက့် ဂေ။ ဇဝ်ဖြာ ပီ ကြိုပ် ဘေ ဒီ ဘော ဟာဝ် ရိုမ် ဒူပ် ဘေ။ အန် ဇဝ် မိူဝ် တူ ဘ့လေး တူ ဝဲန် ဘေ။”

7 ဝါယ် အန် တီ အာမုဝ်ဆဲ ဝီ ဒဲ့ အာယုဝ်ဆူအာ၊ ဝီ ကာလာင် ဒီ အန် တဲး ဘော ဂေ ဒူအီ အီဆာရေလ ထူမ်။ အန် တဝ်း၊ “တဲး မဲ မိုဝ်း ပ့လူမ် ဘော မိုဝ်း နဝ်း ယ။ မဲ အီ ဒီ ယဲတ့် ဒူအီ ဂေ နီ ဟာဝ် အိုပ် မိူင် ပဲ့ ဟဲ့ ကာဆဲန့် ဟဲ့ ဒိူင် အုန် ဇဝ်ဖြာ ဒီ ဒွါ ဒီ ဂုန့် ဒင် ဘေ။ မဲ ဘော လုဝ် ကာဆာင် ကာဒါယ် ခဲင် မိူင် တီ ဒီ ဂေ၊ တဲး န့ ဘဲန် ခါဂုန် ဂေ။ 8 ဇဝ်ဖြာ ဒီ ယဲတ့် မဲ ဘော ကွယ် ရိုမ် ဒူပ် မဲ။ အန် တူ ဘ့လေး တူ ဝဲန် မဲ။ အာဝ် လုဝ် ယုဝ်၊ အာဝ် လုဝ် နဝ်း တျီ့။”

9 ပန် တီ အာမုဝ်ဆဲ ဝီ ဒဲမ် အုန် ဒါရာ တီ၊ ဒွါ ဒီ ဂေ ဒါ အီ လှူ ဒီ ဇဝ်ဖြာ အီ မုး ဒူအီ အာလေဝီ အီ ပွိုန် ကာဂွတ် ဇီဒိူက် ဇဝ်ဖြာ ဘော ဒီ ဂေ ဒါ တာင် အီ အိုပ် ဒူအီ အီဆာရေလ ဘောကာဂ့လျီတ်။ 10 ဟဲ့ ဟွတ့် အန် တဝ်း ဒီ ဂေ၊ “ဒေါ ဟဲ့ နုဝ့် ဘူ ဆီနမ် အီ မုး ဆီနမ် ဒီ လုဝ် ခ့ဝါင် နီ ပီ ထုက် အီ ဟဝ်၊ ဟီ ဇမ် ဘ့လွယ် ကွယ် ခဲင် ထိုပ်၊ ဘေ လုဝ် တိး ဒါရာ နီ။ 11 တဲး ဘေ တိး ဒါရာ နီ၊ တဲး ဂေ ဒူအီ အီဆာရေလ ဘောကာဂ့လျီတ် ထူမ် ဒေါ တး ကြိုပ် ဂေ ဇဝ်ဖြာ ဒူင် ပီ ဒီ ရဝ်း အုန် ဇဝ်ဖြာ။ 12 တဲး မဲ ဒဲ့ ဂေ တး ကာဇု တူတ့်၊ ဘော အီမာယ် ဘော အီဘိုန့် ဘော ဂွန် ဒီရွယ် ဘော ဒူအီ အာမျုဝ် ဟဝ် အီ ကွယ် ခဲင် မိူင် တီ ဒူပ် ဘေ၊ တဲး ဘေ ဒွန် အီ ပွိုန် ဒီ ထူမ် ဒါရာ ဇဝ်ဖြာ နီ။ တဲး ဘေ ဖိုက် ဒီ ရုဝ်ဆေ ဇဝ်ဖြာ ပီ ကြိုပ် ဘေ၊ ဂျုဝ်ဂျာ ဒီ ဒူပ် ဆီချာ ဒါရာ ဇဝ်ဖြာ ဒွန် မျုဝ်။ 13 ဆေ ဘေ ဘူင် ပါယ် တီ လှုက်လှာန် ဂေ အီ ညှမ် ဒွိုမ် ထူမ် ဒါရာ ဇဝ်ဖြာ နီ၊ ဂေ ဒီ ဘော ပွိုန် ဒီ ထူမ်။ ပါယ် တီ ဂေ ဒီ ဘော နပ် ဒီ ရုဝ်ဆေ ဇဝ်ဖြာ စုဝ် ကွယ် ဂေ ခဲင် မိူင် ပီ ဒီ အိုပ် ဂေ ဝါယ် ကာလုဝ်း ဂေ အိုမ် ဘ့လဲင် ယောဒါန်။”

14 ဝါယ် အန် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “မဲ အာဝ် ဟူ ကွယ် လှေန့်။ တဲး မဲ ဒဲ့ အာယုဝ်ဆူအာ၊ တဲး ဘာယ် တး ဒီ ထိုပ် ဘိက် ဘွတ်၊ တဲး အုဝ် ပွိုန် ဒီ ဒမ် အုန် ဂါန် ဒီ အန်။” ပါယ် တီ အာမုဝ်ဆဲ ဂါယ် အာယုဝ်ဆူအာ ဘော ဟာဝ် ဒူင် ကွယ် ထိုပ် ဘိက် ဘွတ် တွိုန်။

15 ဇဝ်ဖြာ ဘော ကာပ့လုး ဒီ ရွင့် န့အု အီ ကွယ် ဒီ ထိုပ် ဘိက် ဘွတ် တွိုန်။ 16 ဇဝ်ဖြာ မိူဝ် ကာလာင် ဒီ အာမုဝ်ဆဲ တဝ်း၊ “မဲ ဒီ ဘော ယမ်၊ ကွယ် ရိုမ် ဒူပ် ဂေ ဂုန့် ဒင် မဲ။ ဝါယ် ဟဲ့ ယမ် မဲ တီ၊ ဒူအီ ဂေ နီ ဂေ ဒီ ကာဘး ဒီ အုဝ်၊ ဝီ ဟာဝ် ကြိုပ် ဇဝ် ပီ ကြိုပ် ဒူအီ ဟဝ် အီ ကွယ် ခဲင် မိူင် ဒူင် ဒီ ဟာဝ် ကွယ် ဂေ တီ။ ဂေ ဒီ ဘော ဝဲန် အုဝ် ဘော ပီ လာယ် ကာဆဲန့် ဂေ ဒီ အုဝ်။ 17 ပန် တီ အုဝ် ဒီ ဘော ရူ ကာဆဝ် ဒီ ဂေ ဘော ဝဲန် ဂေ၊ တူ ယွတ် ဂေ။ ဂေ ဒီ ဘော လိုဝ် စှိုမ်၊ လုဝ် ခမ် အာဖေ အာရေ အီ မွှိုမ် ယုဝ် ကာဆဝ်။ ဒေါ အန် တီ ဂေ ဒီ ဘော ဝီ လှုဝ်း အီ ဟဲ့ ဘဲန် ဒီ ဂေ တီ ကူပ် တူ ကွယ် ရိုမ် ဂေ ဒူပ် အုဝ် အီ မုး ဇဝ်ဖြာ ပီ ကြိုပ် ဂေ။ 18 ဒေါ အန် တီ အုဝ် မိူဝ် တူ စွယ် ဂေ ကူပ် ဟဲ့ ဘူင် ဂေ အီ တူ မွှိုမ် အီ ဟာယ် ကာဆဝ် ဘော ဟဲ့ ကြိုပ် ဇဝ် ပီ ကြိုပ် ဒူအီ အာမျုဝ် ဟဝ်။

19 ဒေါ တီ နီ တဲး မဲ ဒဲမ် အုန် မှုဝ် ပီ တဝ်း အုဝ် နီ၊ ဝီ မာနုဝ် ဂေ ဒူအီ အီဆာရေလ၊ တဲး ဂေ ဟေန်၊ တဲး န့ ကော ဒိုက် ဒီ မူတ့် ဂေ၊ တဲး န့ ဘဲန် ဆက်ဆေ အာဒါ အုဝ် လွင် မှာပ် ဂေ ဒူအီ အီဆာရေလ။ 20 အုဝ် ဒီ တိုယ် တဲး ဂေ ကော ဇမ် ခဲင် မိူင် ဘွတ်၊ မိူင် မွှိုမ် အီ မုး ကာဒါယ် ဘွတ်။ တဲး န့ ဘော ဒူပ် ကာဒိက် ဆတ်ဇာ ပဲ့ ဟဲ့ ဒိူင် အုန် အုဝ် ဒီ ဂုန့် ဒင် ဂေ။ ဒူင် တီ ဂေ ဒီ ဘော ပွိုန် ဒီ ဟူမ် လိုင် တာ လိုင်၊ ကွယ် ဒါခိုယ် ဂျာမ်ဆာ။ မာလဲ၊ ဒေါ အန် တီ ဂေ ယီ ဒီ ဝး အုဝ်၊ ဝီ ကြိုပ် ဇဝ် ပေါ ကာဒင်။ ဂေ ဒီ ဘော ဝဲန် အုဝ်၊ ပျာတ့် ဝဲန် ဘော ပီ ကာဆဲန့် ဂေ။ 21 ပါယ် တီ ဂေ ဒီ ခမ် ဒုက် အီ မွှိုမ် ယုဝ် ကာဆဝ်။ ဒေါ အန် တီ ဂေ လုဝ် တဝ်း မှုဝ် နီ၊ တဲး န့ ဘဲန် ဆက်ဆေ လွင် မှာပ် ဂေ။ ခုဝ်၊ လှုက်လှာန် ဂေ တူ ပိဝ် မှာပ် တီ ဒေါ မှဝ်။ အုဝ် မိူဝ် ဟဲ့ ဟွတ့် နပ် ပီ ဒီ ပါယ် ဂေ ဆိန့် အာတ့် ယဲတ့် ဟာဝ် အုဝ် ဂေ ခဲင် မိူင် ပီ ကာဆဲန့် အုဝ် ဒီ ဂေ။” 22 ဆီငဲ တီ အာမုဝ်ဆဲ ဘော ဒဲမ် အုန် မှုဝ် တီ ဘော ဝီ မာနုဝ် ဂေ ဒူအီ အီဆာရေလ။

23 ဝါယ် အန် တီ ဇဝ်ဖြာ ဝီ ကာလာင် ဒီ အာယုဝ်ဆူအာ အီ မုး ဂွန် အာနုန် တွိုန် တဝ်း၊ “တဲး မဲ မိုဝ်း ပ့လူမ် ဘော မိုဝ်း နဝ်း ယ။ မဲ ဒီ ပွိုန် ဒီ ယဲတ့် ဒူအီ အီဆာရေလ ဟာဝ် ခဲင် မိူင် ပဲ့ ဟဲ့ ဒွါ အုဝ် ကာဒိက် ဆတ်ဇာ ဒီ ဂေ။ အုဝ် ဒီ ဘော ကွယ် ရိုမ် ဒူပ် မဲ။”

24 အာမုဝ်ဆဲ ဘော ဒဲမ် အုန် ဒါရာ ဇဝ်ဖြာ တီ၊ တဲး န့ ကော ဟွတ့် တူတ့်။ 25 ဟဲ့ ဟွတ့်၊ အန် ဝီ ဒမ် ဂေ ဒါ အီ လှူ ဒီ ဇဝ်ဖြာ အီ မုး ဒူအီ အာလေဝီ၊ အီ ပွိုန် ကာဂွတ် ဇီဒိူက် ဇဝ်ဖြာ တဝ်း၊ 26 “တဲး ဘေ ဒိုဝ်း ဘပ် ဒါရာ နီ၊ ဘ့လေး ခူပ် ဇီဒိူက် ဇဝ်ဖြာ အီ မိုဝ်း ဒီဖ့လ မာဝ် လွင် ပီ ကာဆဲန့် ဇဝ်ဖြာ၊ တဲး ဘပ် နီ ဘဲန် ဆက်ဆေ လွင် မှာပ် ဂေ ဒူအီ ပီ အိုပ် အန် ဇဝ်။ 27 အုဝ် ဟဲ့ ဟွတ့် နပ် ခဲ့ ဒိူဝ် ကာဆဝ် နဝ်း ဘေ။ ဘေ ဘော မိုဝ်း နဝ်း ဆီ ကာဘး ဆေဆေ။ ဘေ ဟဲ့ ဘူင် ကာဘး ဒီ ဇဝ်ဖြာ ဒေါ မုး စုဝ် အုဝ် နီ။ ဝါယ် ယမ် အုဝ် ဘေ ဘော နပ် ဒီ ဝဲ ဘူင် ကာဘး ဆေဆေ။ 28 တဲး ဂေ ဒါ တာင် အီ ယဲတ့် ဘေ ဒွန် ခြိုဝ် ဘော ဂေ အာမူ အာမာတ် ဘေ ဘောကာဂ့လျီတ် တး ကာဇု ဒူင် ကွယ် အုဝ်၊ တဲး အုဝ် ပွိုန် ဒီ ကာလာင် ဂြုဝ်း နီ၊ တဲး ဂေ ထူမ် ဒွန် အီ။ အုဝ် ဒီ တဲး ဘော ဂါင်ဟြာဝ် ဘော ကာဒါယ် ဘဲန် ဆက်ဆေ လွင် မှာပ် ဂေ။ 29 ခုဝ်၊ အုဝ် ဟဲ့ ဟွတ့် နပ်၊ ဝါယ် ယမ် အုဝ်၊ ဘေ ဒီ ဘော ဟာယ် ကာဆဝ်။ ဘေ ဒီ ဝဲန် ဒါရာ ပီ ကာလာင် အုန် အုဝ် ဒီ ဘေ။ အာခြာဝ် နာ အာတ့် ဟာဝ် ဘေ ဒီ ဘော ကာဒုး ဒုက် ကူပ် မှာပ် ပီ ဘူင် ဘေ။ ဘေ ဒီ ဘော ဘူင် တဲး ဇဝ်ဖြာ ရူ ကာဆဝ်။”

30 ဟဲ့ ဟွတ့်၊ အာမုဝ်ဆဲ ဘော ဒိုဝ်း မှုဝ် တီ၊ တိး တဲး ဂေ ဒူအီ အီဆာရေလ ဘောကာဂ့လျီတ် ပွိုန် ဒီ ထူမ် ဒေါ ကွယ် ကာဇု ဂေ တီ။