1 ဝါယ် အန် တီ အာမုဝ်ဆဲ ဝီ တဝ်း၊ “ဒေါ တီ နီ အုဝ် ဟဲ့ တဲး ဘေ နပ်၊ န့ မိုဝ်း မွင့်ကာရာ ဘွတ် ဘော ဂြုဝ်း ဒိူင် အီ တူ မွှိုမ်။ ဆေ မျုဝ် တီ ဟဲ့ ဘုဝ် ဘဲန် ဒီ ဘေ ဒေါ ဟဲ့ တဲး ဇဝ်ဖြာ ဘေ ကွယ် ကာယဝ်း ကာတဲ ဂေ ဒူအီ အာမျုဝ် ဟဝ်၊ တဲး ဘေ ဘော ဝီ လှုဝ်း ဂြုဝ်း တီ။ 2 ဆေ ဘေ ဘော လှုက်လှာန် ဘေ ဝီ ကာပ့လု နဝ်း၊ ဝီ တး ဘိုင် ဇဝ်ဖြာ၊ ဝီ တဲး ဘော နဝ်း ဘော ဖွိုမ် ဘေ ဝီ ထူမ် ဒူပ် ဂြုဝ်း ဇဝ်ဖြာ ပီ ကာလာင် အုဝ် ဒီ ဘေ အာတိုဝ် နီ၊ 3 ဇဝ်ဖြာ ပီ ကြိုပ် ဘေ ဒီ ဝီ ကာဝေ ဘေ၊ ဝီ ဒွါ အီ မွှိုမ် ဒီ ဘေ။ အန် ဇဝ် ဒီ ဝီ ဒိုဝ်း တး ဘေ ကာတဲ ဒူအီ အာမျုဝ် ဟဝ် ဒူင် ဟဲ့ ကွယ် ကာယဝ်း ကာရေး ဘေ တီ၊ တဲး ဘေ ဝီ ကွယ် ခဲင် မိူင် ဘေ။ 4 ဘေ ပီ ဘော ဟဲ့ ကွယ် ကာယဝ်း ကာရေး၊ ဟဲ့ တူင့် ကာဆဝ် ကော ဇမ် ဒူင် ဆိူတ် ကာဒါယ် မိူဝ်၊ ဇဝ်ဖြာ ပီ ကြိုပ် ဘေ၊ အန် ပီ ဒီ ဝီ ဒိုဝ်း တး ကာဇု ဘေ ပေါ အူ ဇေန့်။ 5 ပါယ် တီ ဘေ ဒီ ဝီ ပွိုန် ဒီ တး ကွယ် ကာဇု ခဲင် မိူင် ဒူင် ဒွိုမ် ကွယ် ဂုန့် ဒင် ဘေ။ န့ ဒီ ဝီ ဘဲန် မိူင် ဘေ။ ဘေ ဒီ ဝီ ကွယ် ဒါခိုယ်၊ ဝီ ဘြဲ ကိူန် လွှိုမ် ဂေ ဂုန့် ဒင် ဘေ။ 6 ဇဝ်ဖြာ ပီ ကြိုပ် ဘေ ဒီ ဝီ တဲး ဘေ ဘော လှုက်လှာန် ဘေ မိုဝ်း နဝ်း အီ နပ် ဒီ ထူမ် ဂြုဝ်း၊ တဲး ဘော နဝ်း ဘော ဖွိုမ် ဘေ ဘော တူတ့် ခဲင် နဝ်း ဘေ ဝီ ရွက့် အန် ဇဝ်၊ တဲး ဘေ ဘော မိုဝ်း အာဆာက် တူင့် ဘော ကွယ် ခဲင် မိူင် တီ။ 7 ဇဝ်ဖြာ ဒီ ဝီ ဘျွင် ဂြုဝ်း ဒိူင် တွိုန်၊ ဝီ တဲး ဂေ ရန်ဆူ ဘေ အီ ဇွင့် ဘေ၊ အီ ခါနှာပ် ဘေ ဝီ ခမ်။ 8 ပါယ် တီ ဘေ ဒီ ဝီ ထူမ် ဂြုဝ်း ဇဝ်ဖြာ ဘော ဝီ ဘူင် ဒူပ် ဒါရာ ပီ ကာလာင် အုဝ် ဒီ ဘေ အာတိုဝ် နီ။ 9 ပန် တီ ဇဝ်ဖြာ ပီ ကြိုပ် ဘေ ဒီ ဝီ တဲး ဂါန် ပီ ဘူင် ဘေ အွင် ဒွန် မျုဝ်။ ဘေ ဒီ ဘော မိုဝ်း လှုက်လှာန် ကိူန် ကာဆဝ်။ ဖိုင် မာဘူ ဂေ မာမက် ဘေ မိူဝ် ဒီ ဝီ ဘြဲ ကိူန် ကာဆဝ်။ မာန် ဘေ ဂေ ဒူင် နာ ဘေ မိူဝ် ဒီ ဘော လေး ကာယူင့် ကိူန် ကာဆဝ်။ ဇဝ်ဖြာ ဒီ ဝီ မိုဝ်း နဝ်း ခူယ် ဒါခိုယ် ကူပ် ဟဲ့ ဝီ မိုဝ်း ဘေ၊ တဲး န့ ပီ ဒေါ ဟဲ့ ခူယ် ဒါခိုယ် အန် ဒေါ မုး စုဝ် ဂေ ဂုန့် ဒင် ဘေ။ 10 မာလဲ၊ ဘေ လုဝ် ထူမ် ဂြုဝ်း ဇဝ်ဖြာ ပီ ကြိုပ် ဘေ ဘော ဘူင် ဒူပ် ဒါရာ ပဲ့ ဟဲ့ ဒဲမ် အုန် ခဲင် ဘပ် ဒါရာ နီ၊ တဲး ဘော နဝ်း ဘော ဖွိုမ် ဘေ ဝီ လှုဝ်း ဇဝ်ဖြာ ဆေဆေ။

11 ဒါရာ ပီ ကာလာင် အုဝ် ဒီ ဘေ အာတိုဝ် နီ အာဝ် မုး ဒါရာ အီ ညှာပ် ဒူပ်။ အာဝ် မုး ပီ တူ ပွိုန် ဒူပ် ဘေ အီ ပီ န့ ကွယ် ကာတူင့် ဒီ ဘေ။ 12 အာဝ် မုး ဒါရာ အီ ကွယ် ခဲင် ဂါင်ဟြာဝ် အီ စာ ကာဆဝ်။ ဘေ တူ လုဝ် ဒီမွှတ် တဝ်း၊ ‘အာဆေ ဒီ ဟုဝ့် ခဲင် ဂါင်ဟြာဝ်၊ ဒိုဝ်း တး ဒါရာ တီ၊ တဲး ယေ ထူမ်၊ တဲး ယေ ဘူင် ဒူပ်။း’ 13 ဒါရာ တီ မိူဝ် တူ ကွယ် နာ ဒွယ် အိုမ် နမ်မုက်ဆာရာ။ ဘေ တူ လုဝ် ဒီမွှတ် တဝ်း၊ ‘အာဆေ ဒီ ကာလုဝ်း အိုမ် နမ်မုက်ဆာရာ ဟာဝ် ဒိုဝ်း တး ဒါရာ တီ၊ တဲး ယေ ထူမ်၊ တဲး ယေ ဒူပ်။း’ 14 အာဝ် မုး ပါယ် တီ။ ဒါရာ တီ ဟဲ့ ကွယ် ချြီ့ ဘေ။ ဟဲ့ ကွယ် ခဲင် မူတ့် ဘေ ဘော ခဲင် နဝ်း ဘေ၊ တဲး ဘေ ဒူပ်။

15 ဒေါ တီ နီ အုဝ် ဟဲ့ တဲး ဘေ ရဝ်း အီ မွှိုမ် ဘော အီ တူ မွှိုမ်၊ အီ တဲး ဘေ မိုဝ်း အာဆာက် ဘော အီ တဲး ဘေ ယမ်။ 16 ခုဝ်၊ အုဝ် စ်ု ဘေ အာတိုဝ် နီ၊ တဲး ဘေ ရွက့် ဇဝ်ဖြာ ပီ ကြိုပ် ဘေ ဘော ထူမ် ဂြုဝ်း အန်။ တဲး ဘေ ဘော ခမ် ဒီ ဘူင် ဒူပ် ဒါရာ အန် တီ။ ဆေ ဘေ ဘော ဘူင် ပါယ် တီ ဘေ ဒီ ဘော ဘဲန် ဒူအီ အာမျုဝ် တာင် ကာတဲ ဒူအီ ဘောကာဂ့လျီတ်။ ဇဝ်ဖြာ ပီ ကြိုပ် ဘေ ဒီ ဘော မွင့်ကာရာ ဒွါ ဒီ ဘေ ခဲင် မိူင် ဒူင် ဒီ ဟာဝ် ကွယ်၊ ဟာဝ် ဘိုင် ဘေ တီ။

17 မာလဲ၊ ဆေ နဝ်း ဘေ ယီ ဝီ ဘ့လိူင်၊ တူ ဝီ ထူမ် ဂြုဝ်း ဇဝ်ဖြာ ပီ ဝီ ဟာဝ် ထူမ် ဂြုဝ်း ပီ ကာဆုး အီ ဟဝ် ဒီ ဘေ၊ ဝီ ကြိုပ် ဇဝ် ပီ ကြိုပ် ဒူအီ ဟဝ်၊ 18 အုဝ် တဝ်း ဒီ ဘေ အာတိုဝ် နီ၊ ဘေ ဒိူန် ဒီ စှိုမ် အာခါခ်ု။ အာဆာက် ဘေ မိူဝ် တူ တူင့်။ ဘေ မိူဝ် တူ ပွိုန် ဒီ ကွယ် လှေန့် ခဲင် မိူင် ဒူင် ဟာဝ် ကွယ် ဘေ ဝါယ် ကာလုဝ်း ဘေ အိုမ် ဘ့လဲင် ယောဒါန်။

19 ဒေါ တီ နီ အုဝ် တဲး ဘေ ရဝ်း လွင် အီ တဲး ဘေ မိုဝ်း အာဆာက် ဘော လွင် အီ တဲး ဘေ ယမ် ဘော လွင် ပီ မွင့်ကာရာ ဒွါ ဇဝ်ဖြာ ဘော လွင် ပီ ဒီ ဒိူင် ဇဝ်ဖြာ။ အုဝ် မိူဝ် တဲး ဘော ကာဒါယ် ဘော ဂါင်ဟြာဝ် ဘဲန် ဆက်ဆေ လွင် ပဲ့ ဟဲ့ ကာလာင် အုဝ် ဒီ ဘေ တီ။ ပါယ် တီ တဲး ဘေ ရဝ်း တဲး ဘော လှုက်လှာန် ဘေ မိုဝ်း အာဆာက်။ 20 တဲး ဘေ ရွက့် ဇဝ်ဖြာ ပီ ကြိုပ် ဘေ၊ တဲး ဘေ ထူမ် ဂြုဝ်း အန် ဘော ကွယ် ကာဒိုက် ကာဒဝ့် ဒီ အန်။ ခုဝ်၊ ဆေ ဘေ ဘူင် ပါယ် တီ ဘေ ဒီ မိုဝ်း အာဆာက် တူင့်၊ ကွယ် ခဲင် မိူင် ပဲ့ ဟဲ့ ဒိူင် အုန် ဇဝ်ဖြာ ဒီ ဒွါ ဒီ ဂေ ဂုန့် ဒင် ဘေ အီ မုး အာဘြာဟမ်၊ အာဆဲက် ဘော အာကူပ် ဂေ တွိုန်။”