1 ဒေါ ကွယ် ဂေ ဒူအီ အီဆာရေလ ခဲင် မိူင် မုဝ်အာပ်၊ ဇဝ်ဖြာ ဆီ တဲး ဒူအီ အီဆာရေလ ဝီ လာယ် ကာဆဲန့် ဒီ အန်။ အန် ဘော စ်ု အာမုဝ်ဆဲ ကာလာင် ဒီ ဂေ ဒူအီ အီဆာရေလ လွင် အန် တီ။ ဂြုဝ်း ကာဆဲန့် နီ၊ ဇဝ်ဖြာ ဝီ ပွါ ဒဲင် ပဲ့ ဟဲ့ လာယ် ကာဆဲန့် အန် ဒီ ဂေ ဒီ နွန် ဆီနာယ် တွိုန်။

2 အာမုဝ်ဆဲ ဘော ဒဲ့ ဂေ ဒူအီ အီဆာရေလ ဘောကာဂ့လျီတ် ဘော ကာလာင် ဒီ ဂေ တဝ်း၊ “ဘေ ဟဲ့ ဟွတ့် ယိုဝ် ပဲ့ ဟဲ့ ဘူင် ဇဝ်ဖြာ ဒီ ခုန်ဒီခမ် ခဲင် မိူင် အဲဂိုပ် ဘော ဒီ ဂေ အာမူ အာမာတ် အန် ဘော ဒီ မိူင် အန် တီ ဘော မိူင်။ 3 ဘေ မိူဝ် ဟဲ့ ဟွတ့် ယိုဝ် ပဲ့ ဟဲ့ ဘူင် ဇဝ်ဖြာ အီ မွှိုမ် အာမ် ကာဆဝ် ဘော အီ မွှိုမ် ယုဝ် ကာဆဝ်။ ဘေ ဟဲ့ ယိုဝ် ဘော ခဲ့ တာင် ပွုန် ဇဝ်ဖြာ။ 4 ပီ ဘော ဟဲ့ ပါယ် တီ မိူဝ်၊ ဇဝ်ဖြာ ယီ ညှမ် တဲး န့ ကာလှုး ဒီ နဝ်း ဘေ။ န့ မိူဝ် တူ လိုဝ်း မာဆေ ဒီ ငါယ် ဘေ ဘော ဒီ ဟျုဝ့် ဘေ ကော ဇမ် အာတိုဝ် နီ။ 5 အာဒါ ဖွုန် ဂိုဝ် ဆီနမ် ဇဝ်ဖြာ ဟဲ့ တိုယ် ဘေ ဟာဝ် ခဲင် ပြဲ ကာဟဝ်း။ ခြိုင် တာ ဘေ ဘော ခ့လဲပ် ပီ တာ ဘေ ယီ တူ ဘြိမ်၊ တူ ရာမ်။ 6 ဘေ တူ မိုဝ်း ဒီ ဟူမ် ခါမုန်၊ တူ မိုဝ်း ဒီ ဒျီင် အိုမ် မာငုန် ဂေ ပဝ်း။ ဇဝ်ဖြာ ဟဲ့ ဘူင် ပါယ် တီ တဲး ဘေ နပ်၊ အန် မုး ဇဝ်ဖြာ ပီ ကြိုပ် ဘေ။

7 ဒေါ တး ဇမ် ဘေ ဒူင် ကွယ် အေ နီ၊ ခုန်ဒီခမ် အာဆီဟူန် အီ အိုပ် မိူင် ဟေဆာဖူန် ဘော ခုန်ဒီခမ် အာအောခ အီ အိုပ် မိူင် ဘာဆန် ဟဲ့ လေး ကာဂုဝ်း ဒီ အေ။ မာလဲ၊ အေ ဟဲ့ ဝီ ကာဂုဝ်း ပဲ ဂေ။ 8 အေ ဘော ဝီ ပွိုန် မိူင် ဂေ။ အေ ဘော ဝီ ကာဆာင် ဒွါ ဒီ ဒူအီ အာမျုဝ် အာရူဘေန်၊ အာမျုဝ် အာဂတ် ဘော အာမျုဝ် ဒူအီ အာမာနာဆေ အာဒါ အူ ကာတဲ၊ တဲး န့ ဘဲန် ခါဂုန် ဂေ။

9 ခုဝ် အန် တီ၊ တဲး ဘေ ဘူင် ဒူပ် ဆီချာ ကာဒိက် ဆတ်ဇာ နီ၊ တဲး န့ ဘွတ်၊ တဲး န့ မွှိုမ် ဒွန် မျုဝ် ပီ ဘူင် ဘေ။ 10 အာတိုဝ် နီ ခဲ့ ကွယ် ဘေ ဘောကာဂ့လျီတ် တး ကွယ် ဒီ အာတ့် ဇဝ်ဖြာ။ ဘော မုး ဒါ ကာညာ ဘေ ဘော ဂေ ဒူအီ ခဲင် ခြိုဝ် ဘေ၊ ဒါ တာင် ဘေ ဘော အာမူ အာမာတ် ဘေ ဘော အီမာယ် ဒူအီ အီဆာရေလ ဒွန် အီ၊ 11 ဘော မုး အီဘိုန့် ဂေ ဂွန် ဘေ ဘော ဂေ ဒူအီ အာမျုဝ် ဟဝ် အီ ကွယ် ရိုမ် ဒူပ် ဘေ၊ အီ ကေတ် ဟေ ဘော အီ တဝ့် အိုမ် ဘေ၊ 12 တဲး ဘေ တး ကွယ် ဒီ နီ၊ တဲး ဘေ ခမ် ကာဒိက် ဆတ်ဇာ။ အာတိုဝ် နီ တဲး ဘေ ဒိူင် ကာဆဲန့် ဒီ ဇဝ်ဖြာ ပီ ကြိုပ် ဘေ။ 13 ဇဝ်ဖြာ ဒီ တဲး ဘေ နပ် ဆီချာ လွင် ဘဲန် ဘေ ဒူအီ အာမျုဝ် ပီ အိုပ် အန်၊ အန် ဘော မုး ဇဝ်ဖြာ ပီ ကြိုပ် ဘေ၊ တဲး န့ ဘော ဒူပ် ပဲ့ ဟဲ့ ကာဆဲန့် အန် ဒီ ဘေ ဘော ပဲ့ ဟဲ့ ဒွိုမ် ဒိူင် အုန် အန် ဒီ ဂေ ဂုန့် ဒင် ဘေ အီ မုး အာဘြာဟမ်၊ အာဆဲက် ဘော အာကူပ် ဂေ တွိုန်။ 14 ဒဲင် တီ၊ အာဝ် မုး ဇဝ်ဖြာ ဒွါ ကာဒိက် ဆတ်ဇာ နီ မီ ဒီ ဘေ အီ ကွယ် ဒီ အာတ့် ဇဝ်ဖြာ ဒေါ တီ နီ။ 15 အန် ဇဝ် ဒွါ ကာဒိက် ဆတ်ဇာ တီ ဘော ဒီ ဂေ အီ တူ ကွယ် ဒီ နီ အာတိုဝ် နီ။

16 ဘေ မိူဝ် လုဝ် လှုဝ်း ဒေါ ကွယ် ဘေ ခဲင် မိူင် အဲဂိုပ် ဘော ဒေါ ဟာဝ် ဘေ ဒူပ် န့တေန့် ဘော ဟာဝ် ကာတဲ ဒူအီ အာမျုဝ် ဟဝ် ပဲ့ ဟဲ့ ကာလုဝ်း ဘေ။ 17 ဘေ ဟဲ့ ယိုဝ် အာရိုပ် ရာင် အီ မွှိုမ် ကာအိး ပီ ဘူင် ဂေ တာ ဟေ ဂေ မာဝ်၊ ရွိုန် ဂေ ခြိဝ်။ 18 ပါယ် တီ တဲး ဘေ ဆာဒိက် ခဲ့ ကွယ် ဘေ ဒီ နီ ဒွန် အီ။ ဘော အီဘိုန့် ဘော အီမာယ် ဘော ဒွန် န့ဟူမ် ဒွန် ခြိုဝ်၊ ကွဲ့ တဲး န့ မိုဝ်း ခေါ အူ ဝီ အီ ဝဲန် ဇဝ်ဖြာ ပီ ကြိုပ် ဘေ၊ ဝီ ဟာဝ် ကြိုပ် ဇဝ် ပီ ကြိုပ် ဒူအီ ဟဝ်။ ကွဲ့ တဲး ဘေ မိုဝ်း နဝ်း အီ ပီ ရျီး ဟေ အီ လေး ဘ့လေ ဆွင့် ဘော ဘ့လေ အီ မိုဝ်း ဂူင်။

19 ပါယ် တီ တဲး ဘေ ဆာဒိက်၊ ကွဲ့ တဲး န့ မိုဝ်း အီ ယိုဝ် ဂြုဝ်း ပီ ကာဆဲန့် နီ၊ အီ တဝ်း ခဲင် နဝ်း အန်၊ ‘န့ ဒီ ဘဲန် အီ မွှိုမ် ဒီ အုဝ်။ အုဝ် ပီ ဘော ဘူင် ဒူပ် နဝ်း ဘြိမ် နဝ်း ဒိူဝ် အုဝ် မိူဝ်၊ ဇဝ်ဖြာ ဒီ မွင့်ကာရာ ဒွါ ဒီ အုဝ်။’ အာဆေ ကာဖာ ဇိုဝ် တီ၊ အန် ဘူင် တဲး ဒွန် အီ လိုဝ် စှိုမ်၊ ဘော ဂေ အီ ပီ ကာဒါယ် ဘွတ် ဘော ဂေ အီ ပီ ကာဒါယ် အီ ဟဲ့ ဝီ ဇိူတ် ကာဟဝ်း တွင့်။ 20 ဇဝ်ဖြာ တူ ဂဝ်း ဝဲန် မှာပ် ဒူအီ ဇိုဝ် တီ ဒေါ မှဝ်။ ဇဝ်ဖြာ ဒီ ဝီ ရူ ကာဆဝ် ဒီ အန်၊ တဲး အန် ဝီ ခမ် ခဲ့ ကွယ် ပီ ဒိူင် ဒွန် မျုဝ် ပဲ့ ဟဲ့ ဒဲမ် အုန် ခဲင် ဘပ် ဇဝ်ဖြာ နီ၊ တဲး အန် လိုဝ် စှိုမ်၊ ကွဲ့ ဟူ တဲး အီ ဆီ နမ်လှုဝ်း အန်။ 21 ဇဝ်ဖြာ ဒီ ကာယဝ်း လေး ဒူအီ တီ ခဲင် ဒူအီ အီဆာရေလ၊ တဲး အန် ဝီ ခမ် ပီ ဒိူင် ဇဝ်ဖြာ ဒွန် မျုဝ်၊ တဲး န့ ဘော ဒူပ် ဂြုဝ်း ဒိူင် အီ ဟဲ့ ဒဲမ် အုန် ခဲင် ဘပ် ဒါရာ နီ။

22 လှုက်လှာန် ဘေ အီ ဒီ ဂွိုတ် တး ဝါယ် နီ ဘော ဂေ ဒူအီ အာမျုဝ် ဟဝ် အီ တး မိူင် တူင့် ဂေ တွိုန်၊ ဂေ ဒီ ယိုဝ် ဒုက် ဘော ဆဝ် ရောဂါ ပီ ဒီ ဒွါ ဇဝ်ဖြာ ခဲင် မိူင် ဘေ တီ။ 23 ခုဝ်၊ ဒဲင် ကာဒါယ် ဘေ၊ န့ ဒီ ဘော မိုဝ်း ကန်ဒိူက် ဘော ဒက် ငဝ် ဘော ဆယ့် ဒီလူယ်။ န့ ဒီ ဘော ရာမ်၊ အာဝ် ဟူ ပွိုန် ဆမ် မာဆေ။ ပြဲ ဂေ ပေတ့် မိူဝ် တူ လတ့်။ မိူင် ဘေ တီ ဒီ ဘဲန် မိူင် အီ ကာပျာတ့် လိုဝ် ပီ မိူင် ဆုဝ်ဒူမ် ဂါယ် မိူင် ဂုဝ်မုဝ်ရာ၊ န့ ဒီ ဘော ပီ မိူင် ဒါမာ ဘော မိူင် ဇေဘုဝ်ယိမ် ပဲ့ ဟဲ့ ဆာဂိုပ် ဝဲန် ဇဝ်ဖြာ ဒေါ ဟဲ့ ရူ ကာဆဝ် အန်။ 24 ဒေါ အန် တီ ဒူအီ မိူင် ဟဝ် ဘောကာဂ့လျီတ် ဒီ ဘော တဝ်း၊ ‘မှဝ် န့ ပါယ် ပီ ဘူင် ဇဝ်ဖြာ ပါယ် နီ ခဲင် မိူင် နီ။း ကူပ် မာဆေ ဇဝ်ဖြာ ရူ ကာဆဝ် ပါယ် ဆဲန် နီ။း’

25 အီ ဟဝ် ပီ ဒီ ဝီ တဝ်း၊ ‘န့ မုး ကူပ် ဂေ ဒူအီ ပီ အိုပ် ဇဝ်ဖြာ ဟဲ့ လှိုဝ် ဂြုဝ်း ပီ လာယ် ကာဆဲန့် ဇဝ်ဖြာ ဘော ဒီ ဂုန့် ဒင် ဂေ ဒေါ ဒိုဝ်း လေး ဇဝ်ဖြာ ဒီ ဂေ ခဲင် မိူင် အဲဂိုပ် တွိုန်။ 26 ဂေ ဟဲ့ ဝီ ကြိုပ် ဇဝ် ပီ တူ ဒွိုမ် ကြိုပ် ဂေ အီ မုး ဇဝ် ပီ တူ ခ့ဝါင် ဇဝ်ဖြာ ဂေ ကြိုပ်။ 27 ကူပ် န့ ပါယ် တီ ဇဝ်ဖြာ ရူ ကာဆဝ် ဒီ ဂေ၊ တဲး ဂေ ဝီ ခမ် ဒုက် ပဲ့ ဟဲ့ ဒိူင် ဇဝ်ဖြာ၊ ပဲ့ ဟဲ့ ဒဲမ် အုန် ခဲင် ဘပ် ဒါရာ နီ။

28 ဇဝ်ဖြာ ဟဲ့ ရူ ကာဆဝ် ဘော မိုဝ်း နဝ်း ကာအိး ကာဆဝ် ဘော ဒိုဝ်း ဝဲန် ဂေ၊ တဲး ဂေ လေး ခဲင် မိူင် ဂေ တီ၊ တဲး န့ ပီ အန် ရိုတ့် လေး ဘော ရျီး ဘော ဒင် ဘော တူတ့်၊ ဝီ တဲး ဂေ ကွယ် ခဲင် မိူင် တေတ့် မိူင် တ ဒူင် ကွယ် ဂေ ဒေါ တီ နီ။’

29 န့ ဆီ မိုဝ်း ပီ တူ နပ် အေ ဒေါ တီ နီ၊ အီ ကွယ် ဒီ ဇဝ်ဖြာ။ ပီ ဘျ နှဲ ဇဝ်ဖြာ၊ န့ ယီ မုး အာဒါ အေ၊ ဘော အာဒါ လှုက်လှာန် အေ၊ တဲး အေ ဘူင် ဒူပ် ဒါရာ တီ ဆေဆေ။” ခဲ့ တီ အာမုဝ်ဆဲ ဟဲ့ ကာလာင်။