1 အာမုဝ်ဆဲ ပီ ဝီ တဝ်း၊ “ဆေ ဘေ ထူမ် ဂြုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် ဘေ ဘော ဘူင် ဒူပ် ဆီချာ ဒါရာ အန် ပီ ကာလာင် အုဝ် ဒီ ဘေ အာတိုဝ် နီ ဒွန် မျုဝ်၊ အန် ဇဝ် ဒီ စုဝ့် မျုက် ဘေ၊ တဲး ဘေ မိုဝ်း ဆာရေ ဘော အာဖုင် ဒင်ခုဝ် လွှိုမ် ဒူအီ ဒွန် မျုဝ် ဒဲင် ကာဒါယ် နီ။ 2 ဆေ ဘေ ထူမ် ဂြုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် ဘေ တီ၊ ဘေ ဒီ ဘော ပွိုန် ပီ မွင့်ကာရာ ဒွါ ဇဝ်ဖြာ ဒီ ဘေ၊ တဲး န့ ဘော ကွယ် ရိုမ် ဒူပ် ဘေ ဆေဆေ။

3 ဇဝ်ဖြာ ဒီ မွင့်ကာရာ ဒွါ ဒီ ဘေ ဒေါ ကွယ် ဘေ ခဲင် မာန် မိူင် ဘေ ဘော ဒေါ ရန့် ဘေ ဒူင် နာ ဘေ။

4 ဇဝ်ဖြာ ဒီ မွင့်ကာရာ ဒွါ၊ တဲး ဘေ မိုဝ်း ဂွန်၊ တဲး ဘော ပီ ပိတ် ပီ ဆမ် ဘေ ဘွတ် ဘော မွှိုမ်။ အန် ဒီ တဲး ဘော ဒုဝ် ဆတ်ဒါဝါ ဘေ ဘြဲ ကိူန်၊ တဲး ဘော ဂွန် မာမက်၊ ဂွန် မာဘူ ဂေ မာပဲ ကွယ် ဒါခိုယ် ခဲင် ဖိုင် ဂေ။

5 ဇဝ်ဖြာ ဒီ မွင့်ကာရာ ဒွါ ဘော ဒီ ခွန် ဂေ ကြိုက် ဘေ ဘော ဒီ ကွက့် ဂေ ဆီလယ့် ကာဝ်ု ဘေ ခါမုန်။

6 ဇဝ်ဖြာ ဒီ မွင့်ကာရာ ဒွါ ဒေါ လိုပ် ဒေါ လေး ဘေ ခဲင် ကာင် ဘေ။

7 ဇဝ်ဖြာ ဒီ ဘော ပဲ ရန်ဆူ ဘေ ဒေါ တး ကာဂုဝ်း ဂေ ဒီ ဘေ။ ဂေ ဒီ တး ကာဂုဝ်း ဒီ ဘေ အူ ဘ့လာက်၊ ဂေ ဒီ ဘော တဝ် ဟာဝ် ဒွန် ဘ့လာက်။

8 ဇဝ်ဖြာ ဒီ မွင့်ကာရာ ဒွါ ဂါန် ပီ ဘူင် ဘေ ဒွန် မျုဝ်။ အန် ဇဝ် ဒီ မွင့်ကာရာ ဒွါ ဘော ဂြွာ ငှုဝ် ဘေ၊ ဘော မိူင် ပီ ဒီ ဒွါ အန် ဒီ ဘေ။

9 ဆေ ဘေ ဘူင် ဒူပ် ဒါရာ ဇဝ်ဖြာ ပီ ကြိုပ် ဘေ၊ ဇဝ်ဖြာ ဒီ တဲး ဘေ ဘဲန် ဒူအီ အီ ဆီငါ ဘွတ်၊ တဲး န့ ဘော ဒူပ် ကာဒိက် ဆတ်ဇာ ပဲ့ ဟဲ့ ဒိူင် အန် ဒီ ဒွါ ဒီ ဘေ။ 10 ပန် အန် တီ ခဲ့ ကွယ် ဒူအီ ဒဲင် ကာဒါယ် နီ ဒွန် မျုဝ်၊ ဂေ ဒီ ဘော ယိုဝ် ဇဝ်ဖြာ ဟဲ့ ရဝ်း ဘေ။ ဂေ ဒီ ဘော ယုဝ် ဘေ။ 11 ဇဝ်ဖြာ ဒီ တဲး လှုက်လှာန် ဘေ ဘြဲ ကိူန် ကာဆဝ်၊ တဲး ဘော မာမက် ဂေ မာဘူ ဘေ ဘြဲ ကိူန်၊ တဲး ဘော ပီ ပိတ် ပီ ဆမ် ဘေ လေး ကိူန် ကာဆဝ် ခဲင် မိူင် ပဲ့ ဟဲ့ ကာဆဲန့် ဇဝ်ဖြာ ဒီ ဒွါ ဒီ ဂေ ဂုန့် ဒင် ဘေ တီ။

12 န့ ဒီ ဘော ပီ ဇဝ်ဖြာ ဒီ ဝိုဝ်း မာလုဝ်း ခဲင် ဂါင်ဟြာဝ်၊ တဲး ဂ့လာယ် စုဝ်း ဒေါ ဆင်ဒုဝ်၊ တဲး အန် ဘော မွင့်ကာရာ ဒွါ ခဲ့ ပီ ဘူင် ဘေ။ ပါယ် တီ ဘေ ဒီ ဝီ ပွိုန် ဒွါ ဂေ ဒူအီ အာမျုဝ် ဟဝ် ကာရဝ်း ကာဝါယ် ဒီ ဘေ။ အီ မုး ဘေ၊ ဘေ ယီ တူ လုဝ် ကာရဝ်း ကာဝါယ် ဒီ အီ ဟဝ်။ 13 ဆေ ဘေ ထူမ် ဘော ဘူင် ဒူပ် ဆီချာ ဒါရာ ပီ ကာလာင် အုဝ် ဒီ ဘေ အာတိုဝ် နီ၊ ဇဝ်ဖြာ တူ တဲး ဘေ ဘဲန် ဒူအီ အီ လုဝ် ဒူပ် ဒီ ပန် အီ ဟဝ်။ အန် ဒီ တဲး ဘေ ဘဲန် ဒူအီ အီ ယဲတ့် ဒီ အာတ့် အီ ဟဝ်။ အန် ဇဝ် မိူဝ် တူ တဲး ဘေ စှိုမ် ပီ ဒူအီ အီ စုဝ်း တျီမ်။ အန် တဲး ဘေ ပွိုန် နာ ဘွတ် နာ မွှိုမ် ဆေဆေ၊ ပီ ဒူအီ အီ ကွယ် ဒူင် စာ။ 14 ဆေ ဘေ တူ ဝး တူ ဝဲန် ခေါ အူ ဒဲ၊ တူ ဝီ ကြိုပ် ဇဝ် ပီ ကြိုပ် အီ ဟဝ်၊ ဘေ ဒီ ဘော ပွိုန် ဒီ ဘိုင် နာ ဘွတ် နာ မွှိုမ် ပါယ် တီ။

15 မာလဲ၊ ဆေ ဘေ ယီ တူ ထူမ် ဂြုဝ်း ဇဝ်ဖြာ ပီ ကြိုပ် ဘေ၊ တူ ဘူင် ဒူပ် ဆီချာ ဒါရာ အန် ဘော ပီ စ်ု အန် ဒီ အုဝ် တဲး အုဝ် ကာလာင် ဒီ ဘေ အာတိုဝ် နီ၊ ဘေ လုဝ် ဝီ ခမ် ပီ ဒိူင် ဇဝ်ဖြာ ပီ တဝ်း အုဝ် ဒေါ တီ နီ ဒွန် မျုဝ်။

16 ဇဝ်ဖြာ ဒီ ဒိူင် ဘေ ဒေါ ကွယ် ဘေ ခဲင် မာန် မိူင် ဘေ၊ ဘော ဒေါ ရန့် ဘေ ဒူင် နာ ဘေ။

17 ဇဝ်ဖြာ ဒီ ဒိူင် ဘော ခွန် ဘေ ဂေ ကြိုက် ဘေ ဘော ကွက့် ဘေ ဂေ ဆီလယ့် ကာဝ်ု ဘေ ခါမုန်။

18 ဇဝ်ဖြာ ဒီ ဒိူင် ဂွန် ဘေ၊ တဲး ဂေ ပြေတ့် ကာဆဝ်။ တဲး ဘော ပီ ပိတ် ပီ ဆမ် ဘေ အာဝ် ဟူ ဘွတ်။ အန် ဒီ ဘော တဲး ဒုဝ် ဆတ်ဒါဝါ ဘေ ပြေတ့်၊ တဲး ဘော ဂွန် မာမက်၊ ဂွန် မာဘူ ဂေ မာပဲ အာဝ် ဟူ ဒါခိုယ် ခဲင် ဖိုင် ဂေ။

19 ဇဝ်ဖြာ ဒီ ဒိူင် ဘေ ဒေါ လိုပ် ဒေါ လေး ဘေ ခဲင် ကာင် ဘေ။

20 ဇဝ်ဖြာ ဒီ ဒိူင် ဘေ ဘော ပျာတ့် ဘေ၊ နဲန ဘေ ဘော ပီ ဘူင် ပီ ရန့် ဘေ ဒွန် မျုဝ်။ အန် ဒီ ဘူင် တဲး ဘေ လိုဝ် ဘော စှိုမ် ခြန် ခြန်။ ခုဝ်၊ ဘေ ဟဲ့ ဝး ဇဝ်ဖြာ ဘော ဘူင် အီ တူ မွှိုမ် ဒွန် မျုဝ်။ 21 အန် ဇဝ် ဒီ တဲး ဘေ ခမ် ဒုက် တာင် ကာဆဝ်၊ တဲး ဘေ မိုဝ်း ဆဝ် ရောဂါ ဘဲန် မျုဝ် ဘဲန် မျုဝ်။ တဲး န့ ကော ပျာတ့် တူတ့် ဘေ၊ ကွဲ့ တဲး ဘေ ဆီ ဂိတ် ခေါ အူ ဝီ ခဲင် မိူင် ဒူင် ဒီ ဟာဝ် ကွယ် ဘေ။ 22 ဇဝ်ဖြာ ဒီ ဘူင် တဲး ဘေ မိုဝ်း ဆဝ် အီ တဲး ပ့လူမ် ကြဲ ဒီ ယူမ်၊ တဲး ဘေ မိုဝ်း ဒုဝ် ကာဟွာ့၊ ဒုဝ် ဒါတ် ဘော အဝ်း။ ဘော ဒီ ကာဒါယ် ဒူင် ကွယ် ဘေ၊ န့ ဒီ ဘော ကာဟဝ်း တွင့်၊ လဲင် ဒီ ဘော စုဝ်း ဒီ ကာယူင့် ငှုဝ် ဘေ။ န့ ဒီ ဘော မိုဝ်း ခုန် ဒါတ်၊ ဘော ကာဒိး ငျီန် ဒီ ဘော ဒိုက် ဒွန် ပ့လုဝ့်။ န့ တဲး ဘေ ခမ် ဒုက်၊ တဲး န့ ကော ဇမ် ပန် ဒီ လိုဝ် စှိုမ် တူတ့် ဘေ။ 23 အန် ဇဝ် မိူဝ် တဲး ဘ့လေန့် ပီ ဘွင့် ဒေန့်။ န့ ဒီ ဘော တဲး ကာဒါယ် ကော ပ့လူမ် နှဲန် ဟိန်။ 24 ဇဝ်ဖြာ မိူဝ် တူ တဲး ဂ့လာယ် စုဝ်း၊ တဲး မီ ခုန် ဘုတ် တး ကာပုး ဂေ ကာဒါယ် ကာမွတ့် ဒူင် ကွယ် ဘေ၊ တဲး ဘေ ကော လိုဝ် စှိုမ် တူတ့်။

25 ဇဝ်ဖြာ ဒီ တဲး ရန်ဆူ ဘေ ပဲ ဘေ။ ဘေ ဒီ ဘော တး ဒီ ဂေ အူ ဘ့လာက်၊ ဘေ ယီ ကာဒုး ဒီ တဝ် ဂေ ဟာဝ် ဘူ ဘ့လာက်။ ဒေါ ယိုဝ် ဂေ ဒူအီ ဟဝ် လွင် ဟဲ့ ဘဲန် ပါယ် တီ ဒီ ဘေ၊ ဂေ ဒီ ဘော ဝီ ကာစွာ ကာပိုန့် အူ ဇေန့်။ 26 ဒုဝ် ယမ် ဘေ ဒီ ဘော ဘဲန် ပီ ဒီ ဟူမ် မာဆိမ် ဂေ မာဒုဝ် ပြဲ။ အာဝ် မိုဝ်း အာဆေ အီ ဒီ ညွန် တဝ် ဂေ။ 27 ဇဝ်ဖြာ ဒီ တဲး ဘေ မိုဝ်း ဆဝ် ဘိုပ် အီ ဟဲ့ ဒွိုမ် လေး ဒီ ဂေ ဒူအီ ခဲင် မိူင် အဲဂိုပ် တွိုန်။ ဇဝ်ဖြာ ဒီ တဲး ဘေ လာန် ဘော ဒိမ် ဘော ဒုဝ်၊ တဲး ဘေ မိုဝ်း ဟြဝ် အီ တူ နပ် ဒီ ဟြာယ် ဒေါ မှဝ်။ 28 ဇဝ်ဖြာ တဲး ဘေ ဘဲန် ယွင် ဘဲန် ဝှိုန့်၊ ဘော ဘဲန် ဆဝ် ငါယ် အပ်၊ ဘော တဲး နဝ်း ဘေ ကာဝှ်ု ကာဝျှီန်။ 29 ဒေါ ကာတဲ ဆီငဲ ဇဝ်ဖြာ ဒီ တဲး ဘေ ဟာဝ် ကာကျီင် ကာကေး ပီ ဒူအီ ငါယ် အပ်။ ခဲ့ ပီ ဘူင် ပီ ရန့် ဘေ၊ အာဝ် မိုဝ်း အီ အွင် မာဆေ။ ဘေ ဒီ ဘော ခမ် အီ ဟဝ် ခါနှာပ် ဘေ ဘော ဖာတ် ဒိုဝ်း ကြုဝ်ကြာမ် ဘေ ဆေဆေ၊ အာဝ် မိုဝ်း အီ ဒီ စွယ် ဘေ ခေါ အူ ဝီ။

30 ဘေ ပီ ဘော ဟဲ့ မှာယ် အုန် အီဘိုန့် အူ ဝီ၊ တဲး အန် ဘဲန် ပါဝ် ဘေ၊ န့ ယီ မိုဝ်း အီ ဟဝ် ဒီ ဝီ မှေတ့် လာယ် အန်။ ဘေ ပီ ဘော ဟဲ့ ဆမ် အုန် ကာင်၊ ဘေ ယီ တူ ပွိုန် ဒီ ကွယ်။ ဘေ ပီ ဘော ဟဲ့ ဘူင် အုန် မာန် မာငုန်၊ ဘေ ယီ တူ ပွိုန် ဒီ ဟူမ် ဘ့လေ အန်။ 31 အီ ဟဝ် ဒီ ငဝ်း ယမ် မာမက် ဘေ ဒီ အာတ့် ဘေ၊ ဘေ ယီ တူ ပွိုန် ဒီ ဟာပ် ယင် အန်။ အီ ဟဝ် ဒီ ဝီ တိုန့် ဟာဝ် မာလာ ဘေ၊ ကွဲ့ တဲး ဘေ ဆီ ဝီ ပွိုန် ဝိဝ် ဒေါ မှဝ်။ မာဘူ ဘေ၊ ဘေ ဒီ ကာဒုး ဒီ အာပ် ဒီ ရန်ဆူ ဘေ၊ အာဝ် မိုဝ်း အီ ဒီ စွယ် ဘေ ခေါ အူ ဝီ။ 32 ဂွန် အီဘိုန့် ဂေ ဂွန် အီမာယ် ဘေ၊ ဒူအီ အာမျုဝ် ဟဝ် ဒီ ဘော ဒိုဝ်း ဟာဝ် ဘဲန် မှာယ် ဂေ ဒေါ ယိုဝ် ဘေ။ ဘေ ဒီ ဘော ဘ်ု ဒီ ယွတ်၊ မွင် ပန် ဒီ ဝီ တး ဂေ၊ တဲး ငါယ် ဘေ ကော မုဝ် ကော ကာပျွယ် မိူဝ်၊ န့ ယီ တူ မိုဝ်း ဒီခုဝ် မာဆေ၊ ဘေ ဘော ဘ်ု ပီယေန့်။ 33 ဒူအီ ပီ တူ ဒွိုမ် ယိုဝ် ဒွိုမ် နပ် ဘေ၊ ဂေ ဒီ ဝီ ဒိုဝ်း ဒီ ဟူမ် ငှုဝ် ပဲ့ ဟဲ့ ရန့် ညှာပ် ကာဆဝ် ဘေ။ ဒဲင် တီ၊ ဘေ ပီ ဝီ လုဝ် ခမ် ပီ ခါနှာပ် အီ ဟဝ် ဆေဆေ၊ တဲး န့ ကော ပီ ဂေ ညဲတ့် ဘေ ဆေဆေ။ 34 ကူပ် ခမ် ဘေ ဒုက် တီ၊ န့ ဒီ တဲး နဝ်း ဘေ ရိုဝ် ဝှိုန့်။ 35 ဇဝ်ဖြာ ဒီ တဲး ဘေ မိုဝ်း ဘိုပ် အီ တူ နပ် ဒီ ဟြာယ် ဒေါ မှဝ်။ အာဝ် ဝန် မီ ဒီ ကိန့်ကြူင့် ဘေ ဂေ ဒီ ပ့လဝ် ဘေ၊ န့ ဒီ ဘော ဘြဲ စုး ဒီ ကာဘာ ပ့လဝ် ဘေ ကော ဇမ် ဒီ ဂိန့် ဘေ။

36 ဇဝ်ဖြာ ဒီ ဒိုဝ်း ဘေ ဘော ခုန်ဒီခမ် ပဲ့ ဟဲ့ မှာန့် ဘေ ဒီ အန်၊ တဲး ဘေ ဟာဝ် ဒီ မိူင် ပီ တူ ဒွိုမ် နပ် ဘေ ဘော ဂုန့် ဒင် ဘေ။ ဒူင် တီ၊ ဘေ ဒီ ကာဒုး ဒီ ကြိုပ် ဇဝ် ပီ ကြိုပ် အီ ဟဝ် အီ မုး ဟေ ဂေ မာဝ် ပဲ့ ဟဲ့ ဘူင် အုန် ဒူအီ။ 37 ခဲင် မိူင် ဒူင် ဒီ ဒိုဝ်း ဟာဝ် ဇဝ်ဖြာ ဘေ တီ၊ ဘေ ဒီ ဘော ဘဲန် ပီ အာမ် ဘော ပီ ကာအိး အီ ဟဝ် ဘော ပီ ကာညး ဒူအီ ဒွန် ဇိုဝ် ဒွန် ခြိုဝ်။

38 ဘေ ပီ ဘော ဟပ် ဆီမာ ကိူန် မိူဝ်၊ ဘေ ယီ ဒီ ဝီ ပွိုန် ဒီ ဆုဝ့် အီ စဲက် ကူပ် ဟဲ့ ဟူမ် မာ အာဇူင့်။ 39 ဘေ ပီ ဘော ဆမ် ဟေ မာငုန် ကိူန် ဘော ယွတ် လိုမ်လာ ဆီချာ မိူဝ်၊ ဘေ ယီ တူ ပွိုန် ဒီ ဟူမ် ဘ့လေ အန် ဂေ အိုမ် အန်။ ခုဝ်၊ ဝလွာ ဒီ ဟူမ် တူတ့်။ 40 ဟေ နာမန် ဘေ ပီ ဘော ဟဲ့ ကိူန် တဲး န့ ကော နုဝ့် ခဲင် မိူင် ဘေ တီ ဒွန် ပ့လုဝ့် မိူဝ်၊ ဘေ ယီ တူ ပွိုန် ဒီ ဖဝ်း နာမန်။ ခုဝ်၊ ဘ့လေ အန် ဒီ ရး၊ အာဝ် ဒန် ဆိန်။ 41 ဘေ ပီ ဘော ဟဲ့ မိုဝ်း ဂွန် အီဘိုန့်၊ ဂွန် အီမာယ် ကိူန် မိူဝ်၊ ဂေ ယီ တူ ပွိုန် ကွယ် ရိုမ် ဒူပ် ဘေ။ ခုဝ်၊ ရန်ဆူ ဘေ ဒီ မှေတ့် ဟာဝ် ဂေ။ 42 မာ အာဇူင့် ကိူန် ဒီ ဘော တး ဟူမ် တူတ့် လှာ ဟေ ဘေ ဘော ပီ ပိတ် ပီ ဆမ် ဘေ ဒွန် မျုဝ်။

43 ဒူအီ အာမျုဝ် ဟဝ် အီ ကွယ် ကာတဲ ဘေ၊ ဂေ ဒီ ဘော ကြဲ ဒီ မိုဝ်း ဆာရေ ဂေ ပွုန် လွှိုမ် ဘေ။ အီ မုး ဘေ၊ ဘေ ယီ ဒီ ကြဲ ဒီ ချဝ့်၊ ကြဲ ဒီ စုဝ်း တျီမ်။ 44 ဂေ ဒီ ဘော ဝီ မိုဝ်း ရွိုန် ဒွါ ဘေ ကာရဝ်း ကာဝါယ် ဒီ ဂေ။ အီ မုး ဘေ၊ ဘေ ယီ တူ မိုဝ်း ဒီ ဒွါ ဂေ ကာရဝ်း ကာဝါယ် ဒီ ဘေ။ ဂေ ဒီ ဘော ဘဲန် အီ ယဲတ့် ဘေ။ ဘေ ယီ ဒီ ဒူပ် ဒီ ပန် ဂေ။

45 ပီ ဒိူင် ဇိုဝ် တီ ဒွန် မျုဝ် ဒီ စုဝ်း တူတ့် ဒီ ဘေ၊ တဲး န့ ကော ဇမ် ပန် ဒီ လိုဝ် စှိုမ် တူတ့် ဘေ ကူပ် တူ ဒိုဝ်း ဒီ ထူမ် ဘေ ဂြုဝ်း ဇဝ်ဖြာ ဘော တူ ဘူင် ဒူပ် ဘေ ဒါရာ ဇဝ်ဖြာ ပီ ကြိုပ် ဘေ ဘော ပီ ဒမ် ပီ ကာလာင် အုန် အန် ဒီ ဘေ။ 46 ပီ ဒိူင် တီ ဟဲ့ တဲး န့ လိုဝ်း ဆီချာ ဒီ ဘေ ဘော ဒီ လှုက်လှာန် ဘေ လွင် ဇဝ်ဖြာ ဟဲ့ ဒမ် မှာပ် ဒီ ဘေ၊ တဲး ဘေ ယုဝ် ဘော ရုဝ်ဆေ ဇဝ်ဖြာ ဆေဆေ။ 47 ဇဝ်ဖြာ ဟဲ့ ဟွတ့် မွင့်ကာရာ ဒွါ နာ ဘွတ် နာ မွှိုမ် ဒီ ဘေ ဒွန် မျုဝ်။ မာလဲ၊ ဘေ တူ မိုဝ်း နဝ်း ဒါခိုယ် နဝ်း ဇွန်ဇူမ် ဒီ ဘူင် ပီ အိုင် အန် ဇဝ်။ 48 ခုဝ် အန် တီ၊ ဘေ ကာဒုး ဒီ ဝီ ဂူမ် ရန်ဆူ ဘေ ပီ ဒီ စ်ု ဇဝ်ဖြာ တး ကာဂုဝ်း ဒီ ဘေ။ ပန် အန် တီ ဘေ ဒီ ကာပြာန့် ပီ ဒီ ဟူမ် ဘော ဆီ ဒျီင် အိုမ်။ ဘေ ဒီ ဘော ဘဲန် အာဂ့လ ဘော ဂိန် ကာဆဝ်၊ ဘဲန် မှာယ် ရန်ဆူ ဘေ။ န့ ဒီ ပီ အန် ဇဝ် ဒီ ဒိုဝ်း မင် ဂွတ် ဟိန်၊ ဘ့လေး ဒဲင် မဝ် ဘေ၊ တဲး န့ ကော ဇမ် ပန် ဒီ ပျာတ့် ဝဲန် တူတ့် အန် ဒီ ဘေ။

49 ဇဝ်ဖြာ ဒီ ဝီ ဒိုဝ်း တး ဒူအီ အူ မျုဝ် အီ တး ဒူင် ဆိူတ် ကာဒါယ်၊ ပီ တူ နပ် ဘေ ဂြုဝ်း ဂေ။ ဂေ ဒီ ဘော တး ခြန် ခြန် ဒူင် ကွယ် ဘေ ပီ မာဂ့လာင် ဒီ လဝ် တး။ 50 အာရိုပ် ဂေ မိူဝ် ဟဲ့ မွှိုမ် ယုဝ်။ ဂေ တူ နပ် ဒီ ရုဝ်ဆေ ဒူအီ ကတ်၊ ဒူအီ ဂဲ။ ဂေ မိူဝ် တူ နပ် ဒီ ကာဝေ ဒူအီ နှိုမ် ဂေ ဂွန်။ 51 ဂေ ဒီ ဘော ငဝ်း ဟူမ် ဂွန် ဒုဝ် ဆတ်ဒါဝါ ဘေ ဘော ငှုဝ် ဒီဂါဝ် အီ လေး ခဲင် မာန် ဘေ၊ တဲး န့ ကော ဇမ် ပန် ဒီ လိုဝ် စှိုမ် တူတ့် ဘေ။ ဂေ မိူဝ် တူ အုန် တဲး န့ ကာလူယ် မာဆေ ဒီ ဘေ။ ဘော မုး ငှုဝ် ဒီဂါဝ်၊ ဘ့လေ မာငုန်၊ ဘ့လေ နာမန် ဘော ခဲင် ဖိုင် ဂွန် မာဘူ၊ မာမက် ဂေ မာပဲ၊ တဲး န့ ကော ဇမ် ပန် ဒီ လိုဝ် စှိုမ် တူတ့် ဘေ။ 52 ဂေ ဒီ ဘော ဝဲင် ရူပ် ဒွန် မိူင် ခဲင် ကာဒါယ် ပီ ဒီ အာပ် ဇဝ်ဖြာ ဒီ ဘေ၊ တဲး န့ ကော ဇမ် ပန် ဒီ လိုဝ် စှိုမ် တူတ့် ဘေ။ ရဲင် မိူင် ပီ ဘော ဟဲ့ စာ ဟဲ့ ခိုက်ခမ်၊ ပီ ဘော ဟဲ့ မုး ဒူင် ဘိုင် ဘေ၊ န့ ဒီ ဘော ကေး ကာပျာတ့် လိုဝ် တူတ့်။

53 ဒေါ တး ရူပ် ရန်ဆူ ဒူင် ကွယ် ဘေ တီ၊ န့ ဒီ ဘော ဒုက် ကာဆဝ် ဒီ နဝ်း ဘေ လွင် ပီ ဒီ ဟူမ်။ ဘေ ဒီ ကာဒုး ဒီ ဝီ ဟူမ် ဂွန် ဘေ အီ မုး ဂွန် အီဘိုန့်၊ ဂွန် အီမာယ် ပဲ့ ဟဲ့ ဒွါ ဇဝ်ဖြာ ဒီ ဘေ။ 54 န့ ပီ ဘော မုး အီမာယ် အီ မိုဝ်း နဝ်း ဒီဟာင် ဘော ဆီ ဘူင် နာ ဘွတ် နာ မွှိုမ် မိူဝ်၊ အန် အာဝ် ဟူ မိုဝ်း နဝ်း ကာဝေ ဘီနွင် ဝေါဝဲ အန် ဘော အီဘိုန့် ပီ ရွက့် အန် ဘော ဂွန် အန် အီ ဆီ ဂိတ် ဂေ တွိုန်။ 55 ဒေါ ဟူမ် အန် ယင် ဂွန် အန် တီ၊ အန် မိူဝ် တူ ကာဆာင် ဒွါ ဒီ အီ ဟဝ် ကူပ် အာဝ် ဟူ မိုဝ်း ပီ ဒီ ဟူမ် မာဆေ။ 56 န့ ပီ ဘော မုး အီဘိုန့် အီ မိုဝ်း နဝ်း န့စု န့စမ် ဘော ဆီ ဘူင် နာ ဘွတ် နာ မွှိုမ်၊ ကော ဟူ ယ ဇာပ် ဒဲင် ကာဒါယ် ကူပ် ဟဲ့ န့စမ် ပ့လဝ် အန်၊ အန် ဒီ ဘော မိုဝ်း နဝ်း ပါယ် တီ။ ဒေါ တး ရူပ် ရန်ဆူ ဒီ မိူင် ဒူင် ကွယ် အန် တီ၊ အန် မိူဝ် အာဝ် ဟူ မိုဝ်း နဝ်း ကာဝေ အီမာယ် ပီ ရွက့် အန် ဘော ဂွန် အန်။ 57 ကြုဝ် ဂွန် အန် ဘော ဂွန် အန် အီ ဂွိုတ် တး ကာမာယ်၊ အန် ဘော ခြာမ် ဒီ ပြာ ဒီ ဟူမ် မီ အန် အူ ဝီ။ အန် တူ ဆီ ကာဆာင် ဒီ အာဆေ ကူပ် အီ ဒုက် အီ ညှာပ် ပီ ဒွါ ရန်ဆူ ဒီ ဘေ။

58 ဆေ ဘေ တူ မိုဝ်း နဝ်း ဒီ ဘူင် ဒူပ် ဆီချာ ဒါရာ ပဲ့ ဟဲ့ ဒဲမ် အုန် ခဲင် ဘပ် နီ ဒွန် မျုဝ်၊ ဆေ ဘေ တူ ရုဝ်ဆေ ပွုန် တာင် ဇဝ်ဖြာ ပီ ကြိုပ် ဘေ အီ ဟဲ့ ဘူင် အီ မွှိုမ် အာမ် ကာဆဝ်၊ 59 အန် ဇဝ် ဒီ တဲး ဘော ဘေ ဘော လှုက်လှာန် ဘေ ဘော ခြိုဝ် ဘေ ခမ် ဒုက် ဒီ ဆဝ် ရောဂါ အီ တူ နပ် ဒီ ဟြာယ်၊ အီ မွှိုမ် ယုဝ် ဘော ဟဲန့် ကာဆဝ်။ 60 ဒဲင် တီ၊ အန် ဇဝ် ဒီ တဲး ဘေ ခမ် ဆဝ် ရောဂါ ပီ ယုဝ် ဘေ၊ အီ ပီ ပီ ဒွိုမ် ယိုဝ် ဘေ ခဲင် မိူင် အဲဂိုပ် ဒွန် မျုဝ်၊ အီ တူ နပ် ဒီ ဟြာယ် ဒေါ မှဝ်။ 61 ဒဲင် တီ၊ အန် ဇဝ် ဒီ တဲး ဘေ ခမ် ဒုက် ဒီ ဆဝ် ရောဂါ ဒွန် မျုဝ်၊ ဘော ဒုက် အီ တာင် ကာဆဝ် အီ တူ မိုဝ်း ဒီ ဒဲမ် ခဲင် ဘပ် ဒါရာ နီ။ အန် ဇဝ် ဒီ တဲး ဘေ ခမ်၊ တဲး ဘေ ကော လိုဝ် စှိုမ် တူတ့်။ 62 ဘေ ပီ ဘော ဟဲ့ ကိူန် ကော ပီ ဆီမန့် ခဲင် ဘ့လေန့် မိူဝ်၊ ဘေ ယီ ဒီ ဝီ ပြေတ့် ကာဆဝ် ကူပ် တူ ထူမ် ဘေ ဂြုဝ်း ဇဝ်ဖြာ ပီ ကြိုပ် ဘေ။ 63 ဇဝ်ဖြာ ဟဲ့ ခူယ် ဒါခိုယ် ဒီ ဂေဇူ ဘေ တဲး ဘေ ဘြဲ ကိူန်။ ပါယ် တီ အန် ဇဝ် ပီ ဒီ ဝီ ခူယ် ဒါခိုယ် ဒီ ဝီ ပျာတ့် ဝဲန် ဘေ၊ ဘူင် တဲး ဘေ လိုဝ် စှိုမ်၊ ပီ ဝီ ဒိုဝ်း လေး ဘေ ခဲင် မိူင် ဒူင် ဒီ ဟာဝ် ကွယ် ဘေ တီ။

64 ဇဝ်ဖြာ ဒီ ဘော တဲး ဘေ ကွယ် ကာယဝ်း ကာတဲ ဒူအီ ဒွန် မျုဝ်၊ စုး ဒူင် ဆိူတ် ကာဒါယ် အူ ဘ့လာက်၊ ပီ ဝီ ဇမ် ဒူင် ဆိူတ် ကာဒါယ် ပေါ အူ ဘ့လာက်။ ဘေ ဒီ ဘော ဝီ ကြိုပ် ဇဝ် အီ မုး ဟေ ဂေ မာဝ်၊ အီ မုး ဇဝ် ပီ တူ ဒွိုမ် ကြိုပ် ဘေ ဘော ဂုန့် ဒင် ဘေ ဒေါ မှဝ်။ 65 ဘေ အာဝ် ဟူ မိုဝ်း ဒေါ ဘျုဝ် ဒေါ ဒါခိုယ် ဒေါ မှဝ်။ ဒူင် ဒီ ဘိုင် မိူဝ်၊ ဘေ အာဝ် ဟူ မိုဝ်း။ ဇဝ်ဖြာ ဒီ ဘူင် တဲး နဝ်း ဘေ ကာဟွာ့၊ ကွဲ့ တဲး ဘေ မိုဝ်း ပီ နှဝ့် န့ဒဝ့် မာဆေ၊ တဲး ဘေ ယိုဝ် မီ အီ ဒုက် အီ ဆွင့် ဒီ နဝ်း ဘေ။ 66 အာဆာက် ဘေ ဒီ မိုဝ်း အာဖေ အာရေ ဆေဆေ။ ဘေ ဒီ ဘော ကာပိုန့် ဒွန် မှိုဝ် ဒွန် ညှာ၊ ယုဝ် မီ ဒီ ယမ်။ 67 နဝ်း ဘေ ဒီ ဘော ယုဝ် ကာဆဝ် လွင် ပဲ့ ဟဲ့ ယိုဝ် ဘေ။ ဒေါ မုး စေဝ် ညှာ၊ ဘေ ဒီ ဘော ကာပြာ တဲး ပြဲ အပ်။ ဘာ ဒီ အပ်၊ ဘေ ဒီ ဝီ ကာပြာ တဲး ပြဲ ဝး။ န့ ဒီ ဘော ပါယ် တီ ဒွန် မှိုဝ် ဒွန် ညှာ။ 68 ဇဝ်ဖြာ ဒီ ဝီ ဒိုဝ်း တး ရိုဝ် ဆင်ဖုဝ်၊ ဝီ တိုယ် ဝိဝ် ဘေ ခဲင် မိူင် အဲဂိုပ် ဒူင် ဟဲ့ တဝ်း ဇဝ်ဖြာ၊ အန် တူ တဲး ဘေ ဝီ ဝိဝ် ဒေါ မှဝ်။ ဒူင် တီ၊ ဘေ ဒီ ဘော ဝီ ဟြေတ့် ဒီ ယွင့် ဒုဝ် ဘေ ဒီ ရန်ဆူ ဘေ၊ တဲး ဘေ ဘဲန် မှာယ် ဂေ။ န့ ယီ တူ မိုဝ်း အီ စိုဝ်း ဘေ ခေါ အူ ဝီ။” အာမုဝ်ဆဲ ဟဲ့ ကာလာင် ခဲ့ တီ လွင် ကာဆမ် ဒိူင် ဇဝ်ဖြာ ဒီ ဂေ။