1 ဒေါ အန် တီ အာမုဝ်ဆဲ ဘော ဂေ ဒါ တာင် ဒူအီ အီဆာရေလ ဝီ ကာလာင် ဒီ ဂေ ဒူအီ ကိူန် တဝ်း၊ “တဲး ဘေ ဘူင် ဒူပ် ဒါရာ ပီ ဒမ် အုန် အုဝ် ဒီ ဘေ အာတိုဝ် နီ။ 2 ဝါယ် ဟဲ့ ကာလုဝ်း ဘေ အိုမ် ဘ့လဲင် ယောဒါန်၊ ဝီ လိုပ် ဟာဝ် ခဲင် မိူင် ပဲ့ ဟဲ့ အာပ် ဇဝ်ဖြာ ဒီ ဘေ၊ တဲး ဘေ ဒိုဝ်း မာဝ် တာင် ဘဲန် ဘူင့် ဘဲန် ဘူင့်၊ ဝီ မ့ပြာယ် ဖဝ်း ထုန်။ 3 တဲး ဘေ ဝီ ဒဲမ် ဂြုဝ်း ဒါရာ အန် ဇဝ် တီ ဒွန် ဒဲ၊ ဒိုက် ဒီ မာဝ် ဂေ တီ။ အာဝ် လှေန့် ဘေ ဒီ ကာလုဝ်း ဘ့လဲင် အိုမ် ယောဒါန် တွိုန် ဘော တး ကွယ် ခဲင် မိူင် ဘွတ်၊ မိူင် မွှိုမ် ပဲ့ ဟဲ့ ဒွိုမ် ကာဆဲန့် ဇဝ်ဖြာ ဒီ ဒွါ ဒီ ဂေ ဂုန့် ဒင် ဘေ ဘော တဝ်း ဒီ ဒွါ ဒီ ဘေ။ ပန် အန် တီ ဘေ လုဝ် ဘူင် ပါယ် တီ။ 4 ဆေ ဘေ ဟဲ့ ဟွတ့် ကာလုဝ်း ဇမ် ဘ့လာက် နာ ဒွယ် အိုမ် ဘ့လဲင် ယောဒါန်၊ ဘေ လုဝ် ဒိုဝ်း မာဝ် တီ၊ ဝီ ဟာဝ် ဘ့လေး ကာစွင့် ဒဲင် နွန် အေဘာန်။ တဲး ဘေ ဘူင် ဒူပ် ပီ ကာလာင် အုဝ် ဒီ ဘေ အာတိုဝ် နီ၊ ဝီ မ့ပြာယ် ဖဝ်း ထုန်။ 5 ဒူင် တီ၊ ဘေ ဘော လုဝ် ဒိုဝ်း မာဝ်၊ ဘူင် ကာစှူင့် လှူ ဒီ ဇဝ်ဖြာ ပီ ကြိုပ် ဘေ။ ဘေ ယီ တူ ပွိုန် ဒိုဝ်း ဟိန်၊ ဒဝ်း မာဝ် တီ ဒေါ မှဝ်။ 6 ဆေ ဘေ ဘူင် ကာစှူင့် လှူ အာဒါ ဇဝ်ဖြာ ပီ ကြိုပ် ဘေ တီ၊ ဘေ လုဝ် ဒိုဝ်း မာဝ် အီ ကွယ် ခဲင် နာ ခဲင် မာန်။ ဘေ တူ ပွိုန် ဒိုဝ်း မာဝ် ပဲ့ ဟဲ့ ဒဝ်း ဟဲ့ မ့ပြာယ်။ ဒဲင် ကာစှူင့် လှူ ဇိုဝ် တီ လုဝ် လှူ ပီ ဒီ လှူ အီ ဒုဝ့် ဒီ ငဝ် ဒီ ဇဝ်ဖြာ ပီ ကြိုပ် ဘေ။ 7 ဘေ လုဝ် လှူ ဘော ပီ ဒီ လှူ အီ ကွယ် ကာဇု ဟူမ် ရိုမ်၊ တဲး ဘေ ဟူမ် ဘျုဝ် ဘျုဝ် ကျဝ် ကျဝ် ဒီ အာတ့် ဇဝ်ဖြာ ပီ ကြိုပ် ဘေ။ 8 ဂြုဝ်း ဇဝ်ဖြာ ဒွန် ဒဲ၊ ဘေ လုဝ် ဒဲမ် ဒဲင် မာဝ် ပဲ့ ဟဲ့ ကာစွင့် ဟဲ့ ဖဝ်း ဘေ ထုန်။”

9 ဟဲ့ ဟွတ့် ကာလာင် ပါယ် တီ အာမုဝ်ဆဲ ဂေ ဒါ အီ လှူ ဒီ ဇဝ်ဖြာ အီ မုး ဒူအီ အာလေဝီ၊ ဂေ ပီ ဝီ ကာလာင် ဒီ ဒူအီ အီဆာရေလ ပေါ န့ ပွါ တဝ်း၊ “အိုယ် ဘေ ဒူအီ အီဆာရေလ၊ တဲး ဘေ ကွယ် ယေန် ယေန်၊ ဘ်ု ဘေ ထူမ်။ အာတိုဝ် နီ၊ ဘေ ဟဲ့ ဘဲန် ဒူအီ ပီ အိုပ် ဇဝ်ဖြာ ပီ ကြိုပ် ဘေ။ 10 ခုဝ်၊ တဲး ဘေ ထူမ် ဂြုဝ်း ဇဝ်ဖြာ အီ အိုပ် ဘေ၊ တဲး ဘေ ဘော ဘူင် ဒူပ် ဒါရာ အန် ဇဝ် ပဲ့ ဟဲ့ ကာလာင် အုဝ် ဒီ ဘေ အာတိုဝ် နီ။”

11 ဆီငဲ တီ၊ အာမုဝ်ဆဲ ပီ ဝီ ဒမ် အုန် ဒီ ဂေ ဒူအီ အီဆာရေလ တဝ်း၊

12 “ဆေ ဘေ ဟဲ့ ဟွတ့် ကာလုဝ်း အိုမ် ဘ့လဲင် ယောဒါန် တွိုန်၊ ဂေ ခြိုဝ် ဘေ မင် ခြိုဝ် လုဝ် ဟုဝ့် ဒဲင် နွန် ဂီရာစေမ်၊ မွင့်ကာရာ ဒွါ ဒီ ဂေ ဒူအီ ကိူန်။ န့ ဘော မုး ခြိုဝ် အာဆီမေအူန်၊ ခြိုဝ် အာလေဝီ၊ ခြိုဝ် အာယူဒါ၊ ခြိုဝ် အာအီဆာခါ၊ ခြိုဝ် အာယုဝ် ဘော ခြိုဝ် အာဘေန်ယာမ်။ 13 ဂေ ခြိုဝ် တီ လုဝ် ကွယ် ဒဲင် နွန် အေဘာန် ဘော ကာလာင် ဂြုဝ်း ဒိူင် ဒီ ဂေ ဒူအီ ကိူန်။ န့ ဘော မုး ခြိုဝ် အာရူဘေန်၊ ခြိုဝ် အာဂတ်၊ ခြိုဝ် အာဆေန်၊ ခြိုဝ် အာဇေဘူလူန်၊ ခြိုဝ် အာဒါန် ဘော ခြိုဝ် အာနာပ်ထာလီ။

14 ဂေ ဒူအီ အာလေဝီ၊ ဂေ လုဝ် ဒတ် ကာလာင် ဂြုဝ်း တာင် ဒီ ဂေ ဒူအီ အီဆာရေလ တဝ်း၊

15 ‘ဒူအီ အီ ဘူင် ဒီ ကြိုပ် အာရိုပ် ရာင်၊ ဘော မုး ပီ ဘ့လုဝ်း ပီ ဒွက်၊ ဘော မုး ပီ လှုဝ် ပီ စိုမ်၊ အန် လုဝ် ခမ် ဂြုဝ်း ဒိူင် ဇဝ်ဖြာ။ ခုဝ်၊ ဇဝ်ဖြာ ကာအိး ကာဆဝ် အာရိုပ် ရာင် တီ ပဲ့ ဟဲ့ ဘူင် ဒူအီ အီ ဟဲ့ လှဲဝ် ဒီ ဘူင် ဘော ချြီင် အုန် ဒူင် တူ လိုဝ်း ဒီ အီ။’ ဝါယ် အန် တီ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

16 ‘ဒူအီ အီ တူ ရုဝ်ဆေ ဂုန့် မာ အန်၊ အန် လုဝ် ခမ် ပီ ဒိူင် ဇဝ်ဖြာ။’ ဝါယ် အန် တီ၊ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

17 ‘ဒူအီ အီ ရိုတ့် ကာထုဝ့် လွှက့် ကာအုန် ကာဒါယ် ဂေ အီ ကွယ် ကာချြီ့ ဒီ အန်၊ အန် လုဝ် ခမ် ပီ ဒိူင် ဇဝ်ဖြာ။’ ပါယ် တီ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

18 ဒူအီ အီ ယဲတ့် ဒူအီ ငါယ် အပ် ဝး န့တေန့် ဘော ကာလိုပ် န့တေန့်၊ အန် လုဝ် ခမ် ပီ ဒိူင် ဇဝ်ဖြာ။ ဝါယ် အန် တီ၊ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

19 ဒူအီ အီ ဆုင်ဖျာတ် တူ မှာန် ဒီ ဂေ ဒူအီ အာမျုဝ် ဟဝ် ဘော ဒီ ဂွန် ဆီပြး ဂေ ယာ ဆီပြး၊ အန် လုဝ် ခမ် ပီ ဒိူင် ဇဝ်ဖြာ။ ဝါယ် အန် တီ၊ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

20 ဒူအီ အီ ဝီ လုတ့် အီဘိုန့် ဂုန့် အန်၊ ဘူင် တဲး ဂုန့် အန် စှိုမ် ဆာရေ၊ အန် လုဝ် ခမ် ပီ ဒိူင် ဇဝ်ဖြာ။’ ဝါယ် အန် တီ၊ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

21 ဒူအီ အီ လာယ် ဒုဝ် ဆတ်ဒါဝါ ဘော မုး ဒုဝ် ဆတ် မျုဝ် မှဝ် အာဝ် တဝ်း၊ အန် လုဝ် ခမ် ပီ ဒိူင် ဇဝ်ဖြာ။ ဝါယ် အန် တီ၊ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

22 ဒူအီ အီ လုတ့် အီကတ် အန်၊ လုတ့် ဝါ အန်၊ ဘော ဂွန် နာ ဂုန့် ဘော ဂွန် နာ မာ၊ အန် လုဝ် ခမ် ပီ ဒိူင် ဇဝ်ဖြာ။ ဝါယ် အန် တီ၊ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

23 ဒူအီ အီ ဝီ လုတ့် ဂိုန့် အန် အီ မုး မာ အီဘိုန့် အန်၊ အန် လုဝ် ခမ် ပီ ဒိူင် ဇဝ်ဖြာ။ ဝါယ် အန် တီ၊ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

24 ဒူအီ အီ ဘူင် တဲး အီ ဟဝ် မိုဝ်း ဆဝ်၊ အန် လုဝ် ခမ် ပီ ဒိူင် ဇဝ်ဖြာ။ ဝါယ် အန် တီ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

25 ဒူအီ အီ ဇာင် ဒီ ငဝ်း ယမ် ဒူအီ အီ တူ မိုဝ်း မှာပ်၊ အန် လုဝ် ခမ် ပီ ဒိူင် ဇဝ်ဖြာ။ ဝါယ် အန် တီ၊ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’

26 ဒူအီ အီ တူ ထူမ် တူ ဘူင် ဒူပ် ဒါရာ နီ၊ အန် လုဝ် ခမ် ပီ ဒိူင် ဇဝ်ဖြာ။ ဝါယ် အန် တီ၊ ခဲ့ ကွယ် ဂေ ဒူအီ ဘောကာဂ့လျီတ် လုဝ် တဝ်း၊ ‘တဲး န့ ဘဲန် ပါယ် တီ။’”