1 အာမုဝ်ဆဲ ဝီ တဝ်း၊ “ဝါယ် ဟဲ့ ဟွတ့် ဟာဝ် ကွယ် ဘေ ခဲင် မိူင် ပီ ဒီ အာပ် ဇဝ်ဖြာ ဒီ ဘေ၊ ဘေ မိူဝ် ဟဲ့ ဟွတ့် အိုပ် မိူင် တီ၊ 2 ဆေ ပီ ပိတ် ပီ ဆမ် ဘေ ဟဲ့ ဟွတ့် လေး၊ ဘေ လုဝ် ဒိုဝ်း ဘ့လေ ဒင် ဘော ကာယူင့် ငှုဝ် ပီ ဆုဝ့် ဘေ ဒီ အာတ့်၊ ဟပ် ခဲင် ခွန်၊ ဝီ ဒိုဝ်း ဟာဝ် ဒူင် ဒီ ရဝ်း အုန် ဇဝ်ဖြာ တဲး န့ မုး ဒူင် ဒီ ကွယ် အန်၊ 3 ဝီ ဟာဝ် တိုယ် ဒီ ဂေ ဒါ အီ လှူ ဒီ ဇဝ်ဖြာ။ ဘေ ဘော လုဝ် ကာလာင် ဒီ အန် တဝ်း၊ ‘အာတိုဝ် နီ အုဝ် ဟဲ့ တး တိုယ် ကြုဝ် နီ ဘော ကာလာင် ဘျ၊ ဇဝ်ဖြာ ပီ ကြိုပ် မဲ၊ အန် ဟဲ့ ဟွတ့် တဲး အုဝ် တး ဇမ် ခဲင် မိူင် ပဲ့ ဟဲ့ ဒွါ ဇဝ်ဖြာ ဒီ အေ၊ တဲး န့ ဒူပ် ပီ ဒွိုမ် ကာဆဲန့် အန် ဇဝ် ဒီ ဂေ ဂုန့် ဒင် အေ။’ 4 ပန် တီ ဒါ အီ လှူ ဒီ ဇဝ်ဖြာ လုဝ် ဒိုဝ်း ခွန် တီ၊ ဝီ ဟာဝ် အုန် ခူပ် ကာစှူင့် လှူ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ 5 ဟဲ့ ဟွတ့် ပါယ် တီ ဘေ လုဝ် ကာလာင် ဒီ အာတ့် ဇဝ်ဖြာ ပီ ကြိုပ် ဘေ တီ တဝ်း၊ ‘ဂုန့် ဒင် အုဝ် အီ စိူဝ် အာကူပ် အီ မုး ဒူအီ အာမျုဝ် အာရာမ် ဟဲ့ ဟာဝ် ဝိဝ် ဟာဝ် ဝေန့် ဘဲန် ပ့လုဝ့် ဘဲန် ပ့လုဝ့်။ အန် ဟဲ့ ယဲတ့် ဒူအီ န့ဟူမ် အန် ဟာဝ် ဒီ မိူင် အဲဂိုပ်။ ဒေါ အန် တီ ဂေ ပီ ဘော ဟဲ့ ပြေတ့် မိူဝ်၊ ခဲင် မိူင် အဲဂိုပ် ဂေ ယီ ဝီ ဘဲန် ဒူအီ အာမျုဝ် ကိူန်၊ အာမျုဝ် တာင်။ 6 မာလဲ၊ ဂေ ဒူအီ အဲဂိုပ် ဟဲ့ ခါနှာပ် ယေ၊ တဲး ယေ ဘူင် ဂါန် အီ ညှာပ် ကာဆဝ်။ ယေ ဟဲ့ ခမ် ဒီ ဘဲန် မှာယ် ဂေ၊ ဟဲ့ ဒုက် ကာဆဝ် ဒီ ယေ။ 7 ဟဲ့ ဟွတ့်၊ ယေ ဘော ဝီ ဆာခိုဝ် မှာန့် ဒီ ဇဝ်ဖြာ ပီ ကြိုပ် ဂုန့် ဒင် ယေ၊ တဲး အန် ဇဝ် စွယ် ယေ။ အန် ဇဝ် ဘော ထူမ် ဂြုဝ်း ယေ ဘော ယွတ် အီ ဒုက် အီ ညှာပ် ကာဆဝ် ဒီ ယေ တီ။ အန် ဇဝ် မိူဝ် ဟဲ့ နပ် ခဲ့ ခါနှာပ် အီ ဒီ ယေ ဘော ခဲ့ ခမ် ယေ။ 8 ဒေါ အန် တီ အန် ဇဝ် မိူဝ် ဘျ အာဖုင် ဒင်ခုဝ် တာင် အန် ဘော ချွတ် လေး ယေ ခဲင် မိူင် အဲဂိုပ်။ အန် ဇဝ် မိူဝ် ဟဲ့ ဘျ အီ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်၊ ဘူင် ဘော အီ မွှိုမ် ယုဝ် ကာဆဝ်။ 9 အန် ဇဝ် ဝီ ယဲတ့် ယေ တး ကွယ် ဒီ နီ၊ ဝီ ကာဝေ ယေ၊ ဒွါ မိူင် အီ ဘွတ် အီ မွှိုမ် နီ ဒီ ယေ။ 10 ကူပ် န့ ပါယ် တီ ဒေါ တီ နီ ယေ ဝီ ဒိုဝ်း တး ဘ့လေ ဒင် ဘော ငှုဝ် ပီ ဆုဝ့် ယေ ဒီ အာတ့် အီ ဟဲ့ လေး ခဲင် ကာဒါယ် ပဲ့ ဟဲ့ အာပ် မဲ ဇဝ်ဖြာ ဒီ ယေ တီ။’ ဘေ ဟဲ့ ဟွတ့် ကာလာင် ပါယ် တီ ဘေ လုဝ် ဝီ ဒိုဝ်း ခွန် ဘေ တွိုန်၊ ဘ့လေး ဒီ အာတ့် ဇဝ်ဖြာ ဘော ဝီ ကြိုပ် အန် ဇဝ် ဒီ တီ။ 11 တဲး ဘေ ဝီ အိူပ် မျုက် အန် ဇဝ် ဘော ဒါင် ဂုင် ဂေဇူ ဒီ အန် ဇဝ် ကူပ် ဟဲ့ မွင့်ကာရာ ဒွါ အန် နာ ဘွတ် နာ မွှိုမ် ဒီ ဘေ ဘော ဒီ န့ဟူမ် ဘေ ဘောကာဂ့လျီတ်။ တဲး ဘော ဒူအီ အာလေဝီ ဘော ဒူအီ အာမျုဝ် ဟဝ် အီ ကွယ် ကာတဲ ဘေ ဘော ဘျုဝ် ဒါခိုယ် ဒူပ် ဘေ။

12 ဟီ ဇမ် ဆီနမ် ဟာအူယ်၊ န့ ဟဲ့ မုး ဆီနမ် ပီ လုဝ် လှူ ဘေ ဂိုဝ် ဘုန် အူ ဘုန်။ ဆေ ဘေ ဟဲ့ ဟွတ့် ဘေတ့် ပီ ဆမ် ပီ ပိတ် ဘေ အီ ဟဲ့ ဘြဲ ဟဲ့ ကိူန်၊ အာဒါ ဂိုဝ် ဘုန် အူ ဘုန် ဘေ လုဝ် ဝီ ဒိုဝ်း ဟျီင် ဂေ ဒူအီ အာလေဝီ ဘော ဂေ ဒူအီ အာမျုဝ် ဟဝ် ဘော ဂေ ဂွန် ဆီပြး ဂေ ယာ ဆီပြး၊ တဲး ဂေ ကော ပွိုန် ဒီ ဟူမ် ဖဲ၊ ဟူမ် ဆီချာ ခဲင် မိူင် ဘေ။ 13 ဆေ ဘေ ဟဲ့ ဟွတ့် ဘူင် ပါယ် တီ ဘေ လုဝ် ဝီ ကာလာင် ဒီ ဇဝ်ဖြာ တဝ်း၊ ‘ပီ ဒီ လှူ ဂိုဝ် ဘုန် အူ ဘုန် အီ ဟဲ့ ဆီငါ ဘွတ် နီ၊ အာဝ် ဟူ မိုဝ်း ဒီ ဂိတ် ဒီ ကာလူယ် ခေါ အီ စဲက် ခဲင် ကာင် ယေ။ ယေ ဟဲ့ ဒွါ တူတ့် ဒီ ဒူအီ အာလေဝီ၊ ဘော ဒီ ဒူအီ အာမျုဝ် ဟဝ် ဘော ဂေ ဂွန် ဆီပြး ဂေ ယာ ဆီပြး၊ တဲး န့ ဘော ဒူပ် ပဲ့ ဟဲ့ စ်ု မဲ ဇဝ်ဖြာ ယေ ဘူင်။ ယေ မိူဝ် တူ ဘ့လိူင် တူ ပိဝ် ဒါရာ ပီ ဒမ် အုန် မဲ ဇဝ် ခေါ အူ မျုဝ်။ 14 ဒေါ ဒုက် ဒေါ က့လိုဝ် အုဝ်၊ အုဝ် မိူဝ် ဒိူန် တူ ဒိုဝ်း ဒီ ဟူမ် ကြုဝ် တီ။ ဒေါ တူ ဆီငါ အုဝ်၊ အုဝ် မိူဝ် တူ ဒိုဝ်း လေး ခဲင် အာတီ ခေါ အီ စဲက်။ အုဝ် မိူဝ် တူ ဒိုဝ်း ဒွါ ဒီ ဒူအီ ယမ်။ အိုယ် မဲ ဇဝ်ဖြာ၊ အုဝ် မိူဝ် ဟဲ့ ထူမ် ဂြုဝ်း မဲ။ အုဝ် မိူဝ် ဟဲ့ ဘူင် ဒူပ် ပီ ဒမ် အုန် မဲ ဒီ ယေ။ 15 မဲ ဇဝ် ဘော ကွယ် ခဲင် ဂါင်ဟြာဝ် အီ မုး ဒူင် ဆီငါ ဘွတ်။ တဲး မဲ ဝီ ယွတ် လူင် ဒူအီ အီဆာရေလ အီ မုး ဒူအီ ပီ ရဝ်း မဲ။ တဲး မဲ ဇဝ် ဘော မွင့်ကာရာ ဒွါ ဒီ ယေ ဘော ဒီ မိူင် ဘွတ်၊ မိူင် မွှိုမ် ပဲ့ ဟဲ့ အာပ် ဒွါ မဲ ဇဝ် ဒီ ယေ။ တဲး န့ ဒူပ် ပဲ့ ဟဲ့ ဒိူင်၊ ဟဲ့ ကာဆဲန့် မဲ ဇဝ် ဒီ ဒွါ ဒီ ဂေ ဂုန့် ဒင် ယေ။’

16 အာတိုဝ် နီ ဇဝ်ဖြာ ပီ ကြိုပ် ဘေ ဟဲ့ ဒမ် အုန်၊ တဲး ဘေ ထူမ် ဒါရာ အန် ဘော ပီ ဒမ် အုန် အန် ဇဝ် တူတ့် ဒွန် မျုဝ်။ ပါယ် တီ တဲး ဘေ ခတ် နဝ်း ခတ် ဖွိုမ် ဘေ၊ ဘူင် ဒူပ် ဒါရာ အန်။ 17 အာတိုဝ် နီ၊ ဘေ ဟဲ့ ဟွတ့် ဖြူမ် ဒီ တဝ်း၊ ဇဝ်ဖြာ ဟဲ့ မုး ဇဝ်ဖြာ ပီ ကြိုပ် ဘေ။ ဘေ မိူဝ် ဟဲ့ ဒွါ ကာဒိက် ဆတ်ဇာ ဒီ ထူမ် ဂြုဝ်း အန် ဇဝ် ဘော ဘူင် ဒူပ် ဒါရာ အန် ဘော ဘူင် ခဲ့ ပီ ဒမ် ပီ စ်ု အန် ဒွန် မျုဝ်။ 18 အာတိုဝ် နီ၊ ဇဝ်ဖြာ မိူဝ် ဟဲ့ ဟွတ့် ရပ် ဘေ၊ ကာလာင် တဲး ဘေ နပ်၊ တဲး ဘေ ဘဲန် ဒူအီ ပီ အိုပ် အန် အာခါခ်ု။ ဘေ ပီ ကြုဝ် အန် အီ ဟဲ့ ငဝ်း တာင်၊ တဲး န့ ဘော ဒူပ် ပဲ့ ဟဲ့ ဒွိုမ် ကာဆဲန့် အန် ဇဝ် ဒီ ဘေ။ အန် ဇဝ် မိူဝ် ဒမ် အုန် ဒီ ဘေ၊ တဲး ဘေ ဘူင် ဒူပ် ဒါရာ အန် ဘော တူတ့် ဒွန် မျုဝ်။ 19 အန် ဇဝ် ဒီ တဲး ဘေ မိုဝ်း ဆာရေ၊ မိုဝ်း အာဖုင် ဒင်ခုဝ် လွှိုမ် ဂေ ဒူအီ ဟဝ် ပဲ့ ဟဲ့ ဖာန် ဘ့လေး အန် ဇဝ် ဘောကာဂ့လျီတ်၊ တဲး အီ ဟဝ် ဘော အိူပ် ဘေ ဘော ရုဝ်ဆေ ဘေ၊ တဲး ဘေ ဘဲန် ဒူအီ အီ ဆီငါ ဘွတ် အီ ဒူပ် မီ ပီ ဒမ် အုန် ဇဝ်ဖြာ ပီ ကြိုပ် ဘေ၊ တဲး န့ ပီ ပဲ့ ဟဲ့ ဒွိုမ် ကာလာင် အန် ဇဝ်။”