အာမုဝ်ဆဲ ပီ ဝီ တဝ်း၊ “ဆေ အီမာယ် နင်ဂန် တူ လာယ် ဆီဖဝ်၊ တဲး ဂေ ဟာဝ် ဒီ ဒါ တာင် အီ ဆုင်ဖျာတ် ဒါရာ။ ဒါ တာင် တီ လုဝ် ဆုင်ဖျာတ် အာမူ တီ။ ဝီ အီ တူ လုတ့်၊ ဂေ လုဝ် ဘ့လေး။ ဝီ အီ ဟဲ့ လုတ့်၊ ဂေ လုဝ် ဒမ် မှာပ်။ 2 ဆေ ဝီ အီ ဟဲ့ လုတ့် တွိုန် ဟဲ့ လုဝ် ခမ် အီ မး အန်၊ ဒါ တာင် တွိုန် လုဝ် တဲး အန် အိတ် ကာတပ် ဒီ ကာဒါယ် ဘော တဲး အီ မး အန် ဒီ အာတ့် ဒါ တာင် တီ။ အန် လုဝ် ခမ် ခဲ့ ကာဒါန် မှာပ် အန်။ 3 ဂေ ယီ တူ ပွိုန် မး တဲး န့ လွှိုမ် ဖွုန် ဂိုဝ် မ့ဖျီ့။ ဆေ ဟီ ကိူန် လွှိုမ် တီ၊ ယုဝ် ဘီနွင် ဘေ တီ ဒီ ဘဲန် ပီ လုက်တာယ် ဂေ ဒူအီ။

4 ဘေ တူ ပွိုန် ပက် မူတ့် မာမက် ဒေါ ညဲတ့် အန် ဒီ ငှုဝ်။

5 ဆေ န့ မိုဝ်း ဂေ အူကတ် အူဝါ အီ ကွယ် ရိုမ်၊ ဆေ အူ ဝီ ဘော ယမ် အာတ့် မိုဝ်း အန် ဂွန်၊ ယာ ဆီပြး တီ တူ ပွိုန် ဝီ ခတ် ဒိုဝ်း အီ ဟဝ် အီ တူ မုး အူကတ် အူဝါ အီမာယ် အန် တွိုန်။ အူကတ် အူဝါ အီမာယ် အန် တွိုန် လုဝ် ဝီ ဒိုဝ်း အန်၊ တဲး ဂေ ဘူင် ပီ လုဝ် ဘူင် ဂုန့် အာန် ဘော ဂုန့် တဲ့ ဒီ အန်။ 6 ဆေ ဂွန် ဂိန့် ဂါယ် ဝီ မုး ဂွန် အီမာယ်၊ အန် လုဝ် မာတ် တဲး န့ ပီ ဂွန် အူကတ် အူဝါ အန် အီ ဟဲ့ ယမ် တွိုန်။ ဘေ လုဝ် ဘူင် ပါယ် တီ ကွဲ့ တဲး စိူဝ် အီမာယ် တီ ဟြာယ် ကာတဲ ဂေ ဒူအီ အီဆာရေလ။

7 ဆေ အီမာယ် တွိုန် ယီ တူ အိုင် ယာ ဆီပြး တီ၊ ယာ ဆီပြး တွိုန် လုဝ် ဟာဝ် ကာလာင် ဒီ ဂေ ဒါ တာင် အီ အိုပ် မိူင် တီ တဝ်း၊ ‘အူကတ် အူဝါ အီမာယ် အုဝ် နီ တူ မိုဝ်း နဝ်း ဆီ တဲး စိူဝ် အီမာယ် အုဝ် မိုဝ်း ကာတဲ ဒူအီ အီဆာရေလ။ အန် တူ ဆီ ဘူင် ပီ လုဝ် ဘူင် အန် ဒီ အုဝ်။’ 8 ဟဲ့ ဟွတ့် ပါယ် တီ ဒါ တာင် အီ အိုပ် မိူင် တွိုန်၊ ဂေ လုဝ် ဒဲ့ ဒီ ဒီမွှတ် အီမာယ် တီ။ ဆေ အန် တူ ဆီ ဘူင် အာခါခ်ု ပီ လုဝ် ဘူင် အန် ဒီ ယာ ဆီပြး တွိုန်၊ 9 ယာ ဆီပြး တွိုန် လုဝ် တး ကွယ် ချြီ့ အီမာယ် တီ ဒီ အာတ့် ဂေ ဒါ တာင် အိုပ် မိူင်။ အန် လုဝ် ဘုတ့် လေး ခူဒိန့် ဒီ ပ့လဝ် အီမာယ် တီ အာဒါ အူ ဘ့လာက်၊ ဝီ ပတ့် နာ အီမာယ် တီ ဘော ကာလာင် တဝ်း၊ ‘ပါယ် နီ န့ ကာအာပ် ဘူင် ဒီ ဒူအီ အီ တူ ခမ် ဒီ ဘူင် တဲး န့ဟူမ် အီကတ် အန် ဘြဲ ကိူန်။’ 10 ဝါယ် တီ ကာတဲ ဂေ ဒူအီ အီဆာရေလ တဲး ဂေ ကာလာင် လွင် န့ဟူမ် အီမာယ် တီ တဝ်း၊ ‘န့ဟူမ် အီ ဟဲ့ ခမ် ဒီ ဘုတ့် လေး ခူဒိန့်။’

11 ဆေ န့ မိုဝ်း အီမာယ် အာ ဝီ ဟဲ့ လာယ် ကာလုတ့်၊ ဆေ အီဘိုန့် အူ ဝီ ဝီ ဟာဝ် ခြဲ အီမာယ် အန်၊ အန် ဘော ဝီ တာ ပါ လခါနာ အီမာယ် အီ တူ မုး အီမာယ် အန်၊ 12 ဘေ တူ ပွိုန် ကာဝေ အီဘိုန့် ဝီ တီ။ ဘေ လုဝ် ဒဲပ် ဝဲန် ဒဲ အန်။

13 ခဲင် ဟူ ဘေ၊ ဘေ တူ ပွိုန် မိုဝ်း ဘ့လေ ဆ အာ မျုဝ်၊ အူ ဘူင့် စန်၊ အူ ဘူင့် န့စိုဝ်။ 14 ခဲင် ကာင် ဘေ၊ ဘေ တူ ပွိုန် မိုဝ်း ဘ့လဲ ဂေ ခွန် အာ မျုဝ်၊ အူ ဘူင့် တျီ့ အူ ဘူင့် တာင်။ 15 ဆေ ဘေ စ်ု ဘ့လေ ဆ ဂေ ခွန် အီ မုး အီ မှာန်၊ န့ တဲး အာဆာက် ဘေ တူင့် ဘော တဲး ဘေ ပွိုန် ဒီ ကွယ် လှေန့် ခဲင် မိူင် ပီ ဒီ အာပ် ဇဝ်ဖြာ ဒီ ဘေ။ 16 ခုဝ်၊ ဇဝ်ဖြာ မိူဝ် ကာအိး ကာဆဝ် ဂေ အီ ဘူင် နာ တူ မှာန် ဘော ဂေ အီ ကာလုဝ် ပါယ် တီ။

17 တဲး ဘေ လှုဝ်း လွင် ပဲ့ ဟဲ့ ဘူင် ဂေ ဒူအီ အာမာလေက် ဒီ ဘေ ဒေါ ကွယ် ဘေ ဒူပ် န့တေန့် ဝါယ် ဟဲ့ လေး ဘေ ခဲင် မိူင် အဲဂိုပ် တွိုန်။ 18 ဂေ မိူဝ် တူ ယုဝ် တူ ရုဝ်ဆေ ဇဝ်ဖြာ။ ဂေ ဘော ရဲ န့တေန့် ဘေ ဘော ကာဂုဝ်း ဒီ ဒူအီ အီ ဒူပ် ဒီ ပန် အီ ဟဲ့ နုန် ဟဲ့ ဒီလှး ကာဆဝ်။ 19 ပါယ် တီ ဆေ ဇဝ်ဖြာ ဟဲ့ ဟွတ့် အာပ် မိူင် တီ ဒီ ဘေ၊ ဟဲ့ တဲး ဘေ လွတ် အာဖေ အာရေ ဒီ ရန်ဆူ ဘေ ဒွန် ဘ့လာက်၊ တဲး ဘေ ငဝ်း ဝဲန် တူတ့် ခဲ့ ကွယ် ဒူအီ အာမာလေက်။ ကွဲ့ တဲး အီ ဟဝ် ဝီ နမ်လှုဝ်း ဂေ ဒေါ မှဝ်။ လွင် အန် တီ ကွဲ့ တဲး ဘေ ပိဝ်။”