အာမုဝ်ဆဲ ပီ ဝီ တဝ်း၊ “ဆေ န့ မိုဝ်း အီမာယ် အူ ဝီ၊ အန် ဟဲ့ ဟွတ့် ခတ် ဒိုဝ်း အီဘိုန့်၊ အန် ပီ ဝီ ဆီ ဝဲန် အီဘိုန့် တီ ကူပ် ဟဲ့ ယိုဝ် အန် အီဘိုန့် တီ ဘူင် အီ တူ ကာအာပ် ဘူင်၊ အန် ဒဲမ် ပဲ့၊ ဒွါ ဒီ အီဘိုန့် အန် တီ၊ တဲး အီဘိုန့် တီ လေး ဟာဝ် တ ကာင် အန်။ 2 ဆေ အီဘိုန့် တီ ဟဲ့ ဟွတ့် လေး ဟာဝ် တ ကာင် အီမာယ် အန်၊ ပီ ဝီ ဟာဝ် ဒိုဝ်း အီမာယ် ပေါ အူ ဝီ၊ 3 ဆေ အီမာယ် အန် ဝီ တီ မိူဝ် တူ အိုင် အန်၊ ပီ ဝီ ဆီ ဝဲန် အန်၊ ပီ ဝီ ဒဲမ် ပဲ့ ဒွါ ဒီ အန်၊ တဲး အီ နပ် ဂါယ် ဟဲ့ လာယ် ဝဲန် ကာဒတ်။ ဆေ အာဝ် ပါယ် တီ အီမာယ် အန် တီ ဒီ ဘော ယမ်၊ 4 အီမာယ် ဘြိမ် အန် တွိုန် အာဝ် ပွိုန် ဝီ ဒိုဝ်း ဝိဝ် အန် ဝါယ် အီမာယ် ပေါ ဝီ ဟဲ့ ဟွတ့် လာယ် အီဘိုန့် တီ။ ဇဝ်ဖြာ ပီ ကြိုပ် ဘေ ဘော ကာအိး ကာဆဝ် အာမူ ဇိုဝ် တီ။ ကွဲ့ တဲး ဘေ ဘူင် တဲး န့ ဘဲန် မှာပ် ခဲင် မိူင် ပီ ဒီ အာပ် ဒွါ ဇဝ်ဖြာ ဒီ ဘေ၊ အီ ဒီ ဘဲန် ခါဂုန် ဘေ တွိုန်။

5 ဆေ န့ မိုဝ်း အီမာယ် အီ ဆီလွ့ ခတ် ကာမာယ်၊ ဘေ ကွဲ့ တဲး အန် ဟာဝ် ကာဂုဝ်း ဘော ဘူင် ဂါန် မိူင်။ တဲး ဘေ တဲး အန် ကွယ် ဒီ ကာင် အန် အာဒါ အူ ဆီနမ်၊ တဲး န့ ဘျုဝ် ဒါခိုယ် ဒီ နဝ်း အန် ဘော ဒီ အီဘိုန့် အန် တီ။

6 ဆေ ဘေ ဘော ဒွါ အီ ဟဝ် ကာရဝ်း ကာဝါယ် ဒီ ဘေ၊ ဘေ ကွဲ့ တဲး အန် ကမ် မာဝ် ကြိတ် ငှုဝ် အန် ဒီ ဘေ ဘော မုး အာ ဘူင့် ဘော မုး မီ ဘူင့် နာ ဒဲင်၊ အာဝ် ပွိုန် ဒိုဝ်း။ ဆေ ဘေ ဒိုဝ်း မာဝ် ကြိတ် ငှုဝ် တီ၊ န့ ပီ ဘေ တဲး အန် ကမ် အာဆာက် အန် ဒီ ဘေ။

7 ဆေ ဘေ ယိုဝ် ဒူအီ အူ ဝီ အီ ဟဲ့ ပြာ ဒီ မှေတ့် ဒူအီ အီဆာရေလ၊ တဲး ဒူအီ တီ ဘဲန် မှာယ် အန်၊ ဆေ အန် ဘော ယွင့် ဝီ တီ ဒီ အီ ဟဝ်၊ ဒူအီ အီ ပြာ တီ၊ ဘေ လုဝ် ငဝ်း ဝဲန်။ ဆေ ဘေ ဘူင် ပါယ် တီ န့ ပီ ဘေ ဒိုဝ်း ဝဲန် မှာပ် ကာတဲ ဘေ။

8 ဆေ ဘေ မိုဝ်း ဆဝ် ဒု အီ နပ် ဒီ ဒိုက် ဒီ အီ ဟဝ်၊ တဲး ဘေ ဆာဒိက်။ ဘေ လုဝ် ဘူင် တူတ့် ဒွန် မျုဝ် ခဲ့ ပီ ကာလာင် ဂေ ဒါ အီ လှူ ဒီ ဇဝ်ဖြာ ဒီ ဘေ အီ မုး ဒူအီ အာလေဝီ။ တဲး ဘေ ဘော ဘူင် ဒူပ် ဆီချာ ခဲ့ ပီ ကာလာင် အုဝ် ဒီ ဂေ ဒွန် မျုဝ်။ 9 တဲး ဘေ လှုဝ်း ပဲ့ ဟဲ့ ဘူင် ဇဝ်ဖြာ ပီ ကြိုပ် ဘေ ဒီ နာင် မီရီယမ် ဒေါ လေး ဘေ ခဲင် မိူင် အဲဂိုပ် ဒေါ ဟာဝ် ဘေ ဒူပ် န့တေန့် တွိုန်။

10 ဆေ ဘေ ဒွါ အီ ဟဝ် ကာရဝ်း ကာဝါယ် ဒီ ဘေ မင် မျုဝ်၊ ကွဲ့ လိုပ် ဟာဝ် ခဲင် ကာင် အန်၊ ဒိုဝ်း ကြုဝ်ကြာမ် အန် အီ ဘဲန် ကြုဝ် ကမ် ကြုဝ် ငါမ် အန် ဒီ ဘေ။ 11 ဘေ လုဝ် ကွယ် ဘ်ု နာ ရေတ့် ကာင်၊ တဲး အန် ဒိုဝ်း လေး ကြုဝ် ပီ ဒီ ကမ် ပီ ဒီ ငါမ် အန် ဒွါ ဒီ ဘေ။ 12 ဆေ ဒူအီ တီ မုး ဒူအီ ဂိန် ဒူအီ ဖ့လာန်၊ ကွဲ့ တဲး ဘေ ဒိုဝ်း အုန် ဟိုပ် ဂေ ခြိုင် တာ ပီ ကမ် အန် တီ၊ တဲး န့ ကာလုဝ်း မှိုဝ်။ 13 ဆေ ဆီငဲ ဟီ ဂေတ့်၊ တဲး ဘေ ဒွါ ဝိဝ် ဒီ အန် ဒွန် ဆီငဲ၊ တဲး အန် မိုဝ်း ဒီ စှိုပ်၊ မိုဝ်း ဒီ ပ့လိုက် ဒေါ အိတ် အန်။ ဆေ ဘေ ဘူင် ပါယ် တီ အန် ဒီ ဝီ မိုဝ်း နဝ်း ဆီ ဒါင် ဂုင် ဂေဇူ ဒီ ဘေ၊ တဲး န့ လဝ့် ဘော နဝ်း ဇဝ်ဖြာ ပီ ကြိုပ် ဘေ။

14 ဆေ န့ မိုဝ်း ဒူအီ ဂိန်၊ ဒူအီ ဖ့လာန် အီ တူ မိုဝ်း မာဆေ၊ တး ဇာင် ဒီ ဘေ၊ ဘော မုး ဒူအီ အီဆာရေလ၊ ဘော မုး ဒူအီ အာမျုဝ် ဟဝ် အီ ကွယ် ကာတဲ ဘေ၊ ဘေ တူ ပွိုန် ကာလုဝ် အန်။ 15 တဲး ဘေ ဒွါ ရုး ရန့် အန် ဆိန့် အာတ့် ဂေတ့် ဆီငဲ။ ကူပ် ဟဲ့ ဂိန် ကာဆဝ် အန်၊ အန် ဟဲ့ ဟွတ့် လုဝ် ဇာယ် ရွိုန် တီ။ ဆေ အာဝ် ပါယ် တီ ယုဝ် အန် ဝီ ဆာခိုဝ် ဇဝ်ဖြာ၊ တဲး န့ ဘဲန် မှာပ် ဒီ ဘေ။

16 ဘေ တူ ပွိုန် ငဝ်း ယမ် ဂုန့် ကာဒါင် ဂွန် အန်။ ဂွန် တူ ပွိုန် ယမ် ကာဒါင် ဂုန့်။ ဒူအီ ဒွန် အီ လုဝ် ယမ် ကာဒါင် မှာပ် အာဆေ မှာပ် အန်။ 17 ဒေါ မိုဝ်း ဘေ အာမူ၊ ဘေ လုဝ် ဆုင်ဖျာတ် တဲး န့ ဒူပ် ဒါရာ ဘော ဒီ ဒူအီ အာမျုဝ် ဟဝ် ဘော ဂေ ဂွန် ဆီပြး။ ဘေ တူ ပွိုန် ဒိုဝ်း ခြိုင် တာ ပီ တး ကမ် တး ငါမ် ယာ ဆီပြး။ 18 တဲး ဘေ လှုဝ်း ဒေါ ဟဲ့ ဘဲန် ဘေ မှာယ် အီ ဟဝ် ခဲင် မိူင် အဲဂိုပ် တွိုန်။ ဇဝ်ဖြာ ပီ ကြိုပ် ဘေ ယီ ဟဲ့ ထုတ် လေး ဘေ။ ကူပ် န့ ပါယ် တီ အုဝ် ဒမ် အုန် ဘေ ပါယ် နီ။

19 ဒေါ ဟဲ့ ဟွတ့် ဆုဝ့် ဘေ ငှုဝ်၊ ဆေ ဘေ ပိဝ် ဒီ ဒိုဝ်း ဆီဘယ့် ငှုဝ် မင် ဆီဘယ့်၊ အာဝ် ဟူ လုဝ် ဝီ ဟာဝ် ဒိုဝ်း။ တဲး ဘေ အုန် ပါယ် တီ တဲး ဂေ ဒူအီ အာမျုဝ် ဟဝ် ဘော ဂေ ဂွန် ဆီပြး၊ ဂေ ယာ ဆီပြး တး ဂဲပ် ဒီ ဂေ။ ပါယ် တီ တဲး ဇဝ်ဖြာ ဝီ ပွိုန် ဒီ မွင့်ကာရာ ဒွါ ဂါန် ပီ ဘူင် ဘေ ဒွန် မျုဝ်။ 20 ဆေ ဘေ ဟဲ့ ဟွတ့် မး စုဝ်း ဘ့လေ နာမန် ဘေ အာဒါ အူ ဇေန့်၊ အာဝ် ဟူ လုဝ် ဝီ ဟာဝ် မး ပေါ အူ ဇေန့်။ တဲး ဘေ အုန် အာဒါ ဂေ ဒူအီ အာမျုဝ် ဟဝ် ဘော အာဒါ ဂေ ဂွန် ဆီပြး ဂေ ယာ ဆီပြး။ 21 ဆေ ဘေ ဟဲ့ ဟွတ့် ဘေတ့် ဘ့လေ မာငုန် ဘေ အာဒါ အူ ဇေန့်၊ အာဝ် ဟူ လုဝ် ဝီ ဟာဝ် ဘေတ့် ပေါ အူ ဇေန့်။ တဲး ဘေ တဲး ဂေ ဒူအီ အာမျုဝ် ဟဝ် ဘော ဂေ ဂွန် ဆီပြး ဂေ ယာ ဆီပြး ဂဲပ်။ 22 ကွဲ့ တဲး ဘေ ပိဝ် ဒေါ ဟဲ့ ဒွိုမ် ဘဲန် ဘေ မှာယ် ခဲင် မိူင် အဲဂိုပ် တွိုန်။ ကူပ် န့ ပါယ် တီ အုဝ် ဒမ် အုန် ဒါရာ နီ ဒီ ဘေ။”