ခါန် 23
လွင် ဒူအီ အီ တူ ပွိုန် လိုပ် ခဲင် ဖိုင် အီ ကြိုပ် ဇဝ်ဖြာ
1 အာမုဝ်ဆဲ ဝီ တဝ်း၊ “ဆေ န့ မိုဝ်း ဒူအီ ဂဝ် ကာလာတ့် ဘော ဒူအီ အီ ဒဲပ် ဝဲန် လခါနာ အန်၊ အန် တူ ပွိုန် လိုပ် ခဲင် ဖိုင် ဒူအီ အီ ကြိုပ် ဇဝ်ဖြာ။
2 ဒွန် အီ အီ မုး ဂွန် ကာပုး ဘော ဂွန် ကာတဲ ဂ့လ ဘော လှုက်လှာန် ဂေ တီ အာဝ် ပွိုန် လိုပ် ခဲင် ဖိုင် ဒူအီ အီ ကြိုပ် ဇဝ်ဖြာ။ ဘော စုဝ် လှုက် စုဝ် လှာန် အန်၊ ကော နုဝ့် ဂိုဝ် စုဝ်၊ ဘေ လုဝ် ဒူပ် ဒါရာ တီ။
3 ဒူအီ အမ်မူန် ဘော ဒူအီ မုဝ်အာပ် အာဝ် ပွိုန် လိုပ် ခဲင် ဖိုင် ဒူအီ အီ ကြိုပ် ဇဝ်ဖြာ၊ တဲး န့ ကော ဇမ် ဘော စုဝ် လှုက် စုဝ် လှာန် ဂေ ဂိုဝ် စုဝ်။ 4 ခုဝ်၊ ဒေါ လေး ဘေ ခဲင် မိူင် အဲဂိုပ် တွိုန်၊ ဂေ တူ ဒိုဝ်း အိုမ် ဂေ ခါမုန်၊ ဟာဝ် ဘ်ု ဒီ ရွုး ဘေ ဒူပ် န့တေန့်။ ဂေ ဟဲ့ ဝီ ဇာင် အာဘာလာအမ်၊ တဲး အန် ဒိူင် ဘေ။ အာဘာလာအမ် တီ၊ အန် ဘော မုး ဂွန် အာပေါဆော အီ ကွယ် ခဲင် မိူင် ဘေဆော ခဲင် ကာဒါယ် မိူင် အာရာမ်နာရာဟမ်။ 5 မာလဲ၊ ဇဝ်ဖြာ ပီ ကြိုပ် ဘေ ယီ တူ ထူမ် ဂြုဝ်း အာဘာလာအမ် တီ။ အန် ဇဝ် ဟဲ့ ဒိုဝ်း ဂြုဝ်း ပီ ဒိူင် အန် တီ၊ ဝီ ကာဘ့လျီ့ တဲး န့ ဝီ ဘဲန် ဂြုဝ်း မွင့်ကာရာ ဒွါ ဒီ ဘေ ကူပ် ရွက့် အန် ဇဝ် ဒီ ဘေ။ 6 ဘော စုဝ် အာဆာက် ဘေ၊ ကွဲ့ တဲး ဘေ ကာဂိုက် ဒီ ဂေ၊ ကွဲ့ တဲး ဘေ ကာဆဲန့် ဒီ ဂေ ခေါ အူ မျုဝ်။
7 ယီ မုး ဒူအီ အာမျုဝ် အေဒူမ်၊ ဘေ တူ ပွိုန် ဇွင့် ဂေ။ ဂေ မုး ဘီနွင် ဘေ။ ဒူအီ အာမျုဝ် အဲဂိုပ် မိူဝ်၊ ဘေ တူ ပွိုန် ဇွင့်။ ဘေ ဟဲ့ ဒွိုမ် ကွယ် ဘဲန် ခဲတ့် ခဲင် မိူင် ဂေ။ 8 လှုက်လှာန် ဂေ အီ ဟဲ့ ကာဒုတ် တး ဇမ် စုဝ် ဟာအူယ်၊ ဂေ ဟဲ့ ပွိုန် လိုပ် ဖိုင် ဒူအီ အီ ကြိုပ် ဇဝ်ဖြာ။
လွင် အီ ဘူင် တဲး ဒပ် ဒါ ဆိုက် ကာဒါတ့်
9 ဒေါ ကွယ် ဘေ ခဲင် ဒပ် ဒါ ဆိုက်၊ အာတ့် ကာဂုဝ်း ဘေ ဒီ ရန်ဆူ ဘေ၊ တဲး ဘေ ဝး အီ တူ မွှိုမ် ဒွန် မျုဝ်။ 10 ဆေ န့ မိုဝ်း အီမာယ် အူ ဝီ၊ ဆေ အိုမ် ကြုဝ် အန် ဟဲ့ လေး ခဲင် မှိုဝ်၊ တဲး အန် လေး ဟာဝ် ကွယ် နာ ရေတ့် ဒပ် ဒါ ဆိုက်။ 11 အာတ့် ဂေတ့် ဆီငဲ၊ အန် လုဝ် ဝီ တာ အိုမ်။ ဆေ ဆီငဲ ဟီ ဟွတ့် ဂေတ့်၊ အန် လုဝ် ဝီ တး လိုပ် ခဲင် ဒူင် ချ ဂေ။
12 ဘေ လုဝ် ရဲန် အုန် အာဒါ အူ ပ့လုဝ့် နာ ရေတ့် ဒပ် ဘေ၊ တဲး န့ ဘဲန် ဒူင် ဒီ စှီ၊ ဒူင် ဒီ ဝိန် ဘေ ပြဲ။ 13 ဘေ လုဝ် ဂူင့် ခြိုင် တာ အီ ဘဲန် မင် ဂိုဝ်း ကာဒါယ်။ ဆေ ဘေ ဟဲ့ ဟွတ့် ဝိန် ပြဲ၊ တဲး ဘေ ဝီ ပုန်။ 14 ခုဝ်၊ ဇဝ်ဖြာ ပီ ကြိုပ် ဘေ ဘော ကွယ် ရိုမ် ဒူပ် ဘေ ဘော ဝိန် ဒီလဲ ခဲင် ဒပ် ဘေ။ အန် ဘော ဘ်ု ဒီ စွယ် ဘေ၊ တဲး ဘေ အွင် ရန်ဆူ ဘေ။ ဘေ ယီ လုဝ် ဘူင် တဲး န့ ဆီငါ ဒွန် ပ့လုဝ့်၊ ကွဲ့ တဲး အန် ဇဝ် ယိုဝ် အီ တူ ဆီငါ ခေါ အူ မျုဝ် ကာတဲ ဘေ။ ကွဲ့ တဲး အန် လုဝ် တဝ် ဘေ။
လွင် ဒါရာ ဘဲန် မျုဝ် ဘဲန် မျုဝ်
15 ဆေ ဘေ ယိုဝ် မှာယ် အီ ဟဝ် ဟဲ့ တဝ် လေး ဒီ ဒါ ကာညာ အန်၊ တး မှာန့် ဒီ ချြီင် ဒူင် ကွယ် ဘေ၊ ဘေ ကွဲ့ ဝီ ဟာဝ် တိုယ် ဝိဝ် အန် ဒီ ဒါ ကာညာ အန်။ 16 တဲး အန် ရဝ်း မိူင် ဒူင် ဆီ ကွယ် အန်။ ဟဲ့ ပွိုန် ဒိုဝ်း နဝ်း အန်။ ဘေ တူ ပွိုန် ခါနှာပ် အန်။
17 ကာတဲ ဒူအီ အာမျုဝ် အီဆာရေလ၊ အီဘိုန့် တူ ပွိုန် ဘဲန် ယာ မာလမ် ခဲင် ဟုဝ် ပီ ကြိုပ် ဂေ ဇဝ် ဘဲန် မျုဝ် ဘဲန် မျုဝ်။ ဘော အီမာယ် မိူဝ် ပါယ် တီ အာဝ် ပွိုန် ဘူင်။ 18 ရွိုန် ပီ ပွိုန် ယာ မာလမ် ဘော အီမာယ် အီ ဘူင် ပါယ် တီ ဘေ တူ ပွိုန် ဒိုဝ်း တး ခဲင် ဟုဝ် ဇဝ်ဖြာ ပီ ကြိုပ် ဘေ၊ တဲး န့ ဘဲန် ရုး ပဲ့ ဟဲ့ ကာဆဲန့် ဘေ။ ဇဝ်ဖြာ ပီ ကြိုပ် ဘေ ဘော ကာအိး ကာဆဝ် မျုဝ် တီ။
19 ဆေ ဘေ ဘော ဒွါ ဘီနွင် ဘေ ကာရဝ်း ကာဝါယ် ဒီ ဘေ၊ ဘော မုး ရွိုန်၊ ဘော မုး ပီ ဒီ ဟူမ်၊ ဘော မုး ခြိုင် တာ မျုဝ် မှဝ် အာဝ် တဝ်း၊ ဘေ တူ ပွိုန် ဒိုဝ်း အျီင် အန် ဒေါ မှဝ်။ 20 ဆေ န့ မုး ဒူအီ အာမျုဝ် ဟဝ်၊ ဘေ ဟဲ့ ပွိုန် ဒိုဝ်း အျီင် အန် ခဲ့ ပီ ဒွါ ဘေ တဲး ဂေ ကာရဝ်း။ မာလဲ၊ ကူပ် တူ ဒိုဝ်း ဘေ အျီင် အန် ဒီ ဂေ ဒူအီ အီဆာရေလ အီ မုး ဘီနွင် ဘေ၊ ဇဝ်ဖြာ ဒီ မွင့်ကာရာ ဒွါ ဂါန် ပီ ဘူင် ဘေ ဒွန် မျုဝ် ခဲင် မိူင် ဒူင် ဒီ ဟာဝ် ကွယ် ဘေ တွိုန်။
21 ဆေ ဘေ ဟဲ့ ကာဆဲန့်၊ ဟဲ့ ဒွါ ကာဒိက် ဆတ်ဇာ ဒီ ဇဝ်ဖြာ ပီ ကြိုပ် ဘေ၊ ဘေ ကွဲ့ ကြဲ ဒီ ဘူင် ဒူပ်။ ခုဝ်၊ ဆေ ဘေ တူ ဘူင် ဒူပ် ပဲ့ ဟဲ့ ကာဆဲန့် ဘေ တီ၊ ဇဝ်ဖြာ ဒီ ဝီ မှာန့် ဒီ ဘေ။ န့ မိူဝ် ဒီ ဘဲန် မှာပ် ဒီ ဘေ။ 22 ဆေ ဘေ ယီ တူ ကာဆဲန့် ဒီ ဇဝ်ဖြာ၊ အာဝ် ဘဲန် မှာပ် ဒီ ဘေ။ 23 မာလဲ၊ ဆေ ဘေ ဟဲ့ ကာလာင် လေး ခဲင် မူတ့် ဘေ၊ ဘေ လုဝ် ဘူင် ဒူပ် အာခါခ်ု။ ခုဝ်၊ ဘေ ဟဲ့ ဒိူင် ဟဲ့ ကာဆဲန့် ဒီ ဇဝ်ဖြာ ရာင် ဘေ။