ပန် တီ အာမုဝ်ဆဲ ဝီ တဝ်း၊ “ဆေ ဘေ ယိုဝ် မာဘူ မာမက် ဘီနွင် ဘေ အီ ဟဲ့ ကာလိုပ် န့တေန့်၊ ဘေ တူ ပွိုန် တူ ညိုင်ရာင် ယိုဝ်။ ဘေ လုဝ် ဝီ ဒိုဝ်း တိုယ် ဇမ် ဒီ ဒါ ကာညာ အန်။ 2 ဆေ ဒါ ကာညာ အန် ဘော ကွယ် တူင့်၊ ဘေ မိူဝ် တူ နပ် အီ မုး ဒါ ကာညာ အန်၊ တဲး ဘေ ပက် အုန် ဒီ ကာင် ဘေ။ ဆေ ကာညာ အန် ဟီ တး ဟြေတ့် တး ဒူပ်၊ တဲး ဘေ ဝီ အာပ် ဝိဝ် ဒီ ဒါ ကာညာ အန်။ 3 န့ ဘော ပါယ် တီ ဆေ န့ ဘော မုး မာလာ၊ ဘော မုး ခြိုင် တာ၊ ဘော မုး ကြုဝ်ကြာမ်၊ ဆေ ဟီ မုး ကြုဝ် ဘီနွင် ဘေ၊ ဘေ တူ ပွိုန် တူ ညိုင်ရာင် ယိုဝ်။

4 ဆေ ဘေ ယိုဝ် မာလာ မာမက် ဘီနွင် ဘေ၊ ဟဲ့ ကေး ဒူပ် န့တေန့်၊ ဘေ တူ ပွိုန် တူ ညိုင်ရာင် ယိုဝ်။ ဘေ လုဝ် စွယ် ဘျိတ့် တဲး အန် ယိတ့်။

5 အီဘိုန့် တူ ပွိုန် တာ ခြိုင် အီမာယ်။ အီမာယ် မိူဝ် တူ ပွိုန် တာ ခြိုင် အီဘိုန့်။ ဇဝ်ဖြာ ပီ ကြိုပ် ဘေ ကာအိး ကာဆဝ် ဂေ အီ ဘူင် ပါယ် တီ။

6 ဆေ ဘေ ယိုဝ် ကာဟုန် မာဆိမ်၊ မာ အန် မိူဝ် ကာနမ် ပွိုန် အန်၊ ကာနမ် ဂွန် အန်၊ ဘော မုး ဒဲင် ဟေ၊ ဘော မုး ဒဲင် ကာဒါယ်၊ ဘေ တူ ပွိုန် ဒိုဝ်း ဘော မာ အန် ဘော ဂွန် အန်။ 7 မာ အန် တီ ဘေ လုဝ် ဘ့လေး ဟာဝ်။ ဂွန် အန်၊ ဆေ ဘေ ဆီ ဒိုဝ်း ဒီ ဘေ၊ ဟဲ့ ပွိုန်။ ဆေ ဘေ ဘူင် ပါယ် တီ န့ ဒီ ဘော ဘဲန် နာ ဘွတ် နာ မွှိုမ် ဘော ဘဲန် အာဆာက် တူင့် ဒီ ဘေ။

8 ဒေါ ဆမ် ဘေ ကာင် ကာမာယ်၊ ဘေ လုဝ် ဘူင် ရဲင်၊ တဲး န့ ရူပ် ကာတု ကာင် ဘေ။^a ပါယ် တီ ဆေ ဒူအီ အူ ဝီ ဘော စုဝ်း ယမ် ဒီ ကာင် ဘေ၊ အာဝ် ဘဲန် မှာပ် ဒီ ဘေ။

9 ခဲင် မာန် မာငုန် ဘေ၊ ဘေ တူ ပွိုန် ဟာဝ် ဘြတ် ဆီမာ အာ မျုဝ်။ ဆေ ဘေ ဘူင် ပါယ် တီ ဘ့လေ ဘော အာ မျုဝ် ဘဲန် အီ တူ ဆီငါ။ ဘေ တူ ပွိုန် လှူ ဒီ ဇဝ်ဖြာ။

10 ဒေါ ထဲ ဘေ ဒူင် နာ ဘေ၊ ဘေ တူ ပွိုန် ဒိုဝ်း မက် ဘော မာလာ ဘဲန် အူ ဂူ။

11 ဘေ တူ ပွိုန် ဒိုဝ်း ကာတမ် လုယ် ဘော ဟိုက် မာဘူ ဒဝ့် ကာဝ်ု ဘဲန် ခြိုင် တာ ဘေ။

12 ဘေ လုဝ် ဟပ် ဒုယ် ဒီ ဘြုဝ် ဆီတုဝ် တုန် ဘေ ဘော ဖွုန် ဘ့လာက်။

13 ဆေ အီမာယ် အူ ဝီ ဟဲ့ ဟွတ့် ခတ် ဒိုဝ်း အီဘိုန့်၊ ဝါယ် တီ အန် ဝီ ဇွင့် အီဘိုန့် အန် တီ၊ 14 အန် ဘော ဝီ နဲန ကာလာင် နာ တူ မွှိုမ် ဒီ အီဘိုန့် အန် တဝ်း၊ ‘ဒေါ တး ချြီ့ အုဝ် ဒီ အန်၊ အုဝ် တူ ယိုဝ် လက်ဆာနာ အီ ဘျ လွင် မုး အန် ဒီဘျာ ဇဲတ်။’ 15 ဆေ အန် တဝ်း ပါယ် တီ ဂုန့် မာ ဂွန် အီဘိုန့် တွိုန် လုဝ် ဒိုဝ်း ဂွန် တီ၊ ဟာဝ် ဒူင် ကွယ် ဒါ တာင် ဒီ ဘာင် မာလုဝ်း မိူင်၊ လုဝ် ဟာဝ် ဘျ မျုဝ် အီ တဲး အီ နပ် ဆီချာ လွင် မုး အန် ဒီဘျာ ဇဲတ်။ 16 ဂုန့် ဂွန် အီဘိုန့် တွိုန် လုဝ် ကာလာင် တဝ်း၊ ‘အုဝ် ဟဲ့ အာပ် ဂွန် အုဝ် နီ ဘဲန် အီဘိုန့် အီမာယ် ဝီ နီ၊ အန် ယီ ဟဲ့ ဝီ ဇွင့် ဂွန် အုဝ် နီ။ 17 အန် ဘော ဟြေတ့် ဒီ နဲန ဘော ကာလာင် အီ တူ မုး အီ တူ မှာန် တဝ်း၊ “အုဝ် တူ ယိုဝ် လွင် မုး ဂွန် မဲ နီ ဒီဘျာ ဇဲတ်။” အုဝ် ယီ ပွိုန် ဘျ ဒီ ဘေ လွင် အန် တီ။’ ဟဲ့ ဟွတ့်၊ အန် လုဝ် ဘျ ဒီ ဂေ ဘိက် အီ ဘျ ဆက်ဆေ လွင် အန် တီ။ 18 ပါယ် တီ ဂေ အီ မုး ဒါ တာင် ခဲင် မိူင် တီ၊ ဂေ မိူဝ် လုဝ် ဒမ် မှာပ် ဒီ ဒူအီ ဝီ တီ။ 19 ပီ ဝီ မွန် အန် ရွိုန် အူ မာယဝ်း ဘူင့်၊ ဝီ ဒွါ ဒီ ဂုန့် မာ ဂွန် အီဘိုန့် တွိုန်။ ခုဝ်၊ ဒူအီ ဝီ တီ ဟဲ့ ဖျာက် ဆာရေ ဒီဘျာ ဇဲတ် ဒူအီ အီဆာရေလ။ ဒဲင် တီ၊ အီဘိုန့် တွိုန် လုဝ် ဘဲန် အီဘိုန့် အန် ဘော စုဝ် အန်။ အန် တူ ပွိုန် ဝဲန် အီဘိုန့် တီ ဒေါ မှဝ်။

20 မာလဲ၊ ဆေ ဂြုဝ်း ပီ ကာလာင် အီမာယ် တွိုန် ဟဲ့ မှာန် အာခါခ်ု၊ ဂွန် အီဘိုန့် တွိုန် မိူဝ် အာဝ် မိုဝ်း အီ ဘျ လွင် မုး အန် ဒီဘျာ ဇဲတ်၊ 21 ဂေ လုဝ် ဒိုဝ်း ဂွန် အီဘိုန့် တွိုန်၊ ဘ့လေး နာ အာတ့် မာလုဝ်း ကာင် ဂုန့် အန်။ ခဲ့ ကွယ် အီမာယ် ခဲင် မိူင် တွိုန် လုဝ် ဒိုဝ်း မာဝ်၊ ဝိုန့် တဲး အန် ကော ယမ်။ ခုဝ်၊ ဒေါ ကွယ် အန် ခဲင် ကာင် ဂုန့် မာ အန်၊ အန် ဟဲ့ ဘူင် ပီ ပီ ဘူင် ယာ မာလမ်၊ ဟဲ့ ဘူင် အီ ဟာယ် အီ မိူက် ကာတဲ ဒူအီ အီဆာရေလ။ ပါယ် တီ ဘေ လုဝ် ဒိုဝ်း ဝဲန် အီ တူ မွှိုမ် ကာတဲ ဘေ။

22 ဆေ ဘေ ယိုဝ် အီမာယ် အူ ဝီ၊ ဝီ လာယ် လုတ့် လာယ် လာယ် ဒီ အီဘိုန့် အီ ဟဲ့ ဟွတ့် မိုဝ်း အီမာယ်၊ လုဝ် ငဝ်း ယမ် ဂါယ် ဘော အာ ဝီ။ ဘေ လုဝ် ဘူင် ပါယ် တီ တဲး ဘေ ဒိုဝ်း ဝဲန် အီ တူ မွှိုမ် ကာတဲ ဘေ။

23 ဆေ အီမာယ် အူ ဝီ တး ယိုဝ် ဂွန် ဒီဘျာ အီ ဟဲ့ ဟွတ့် မိုဝ်း ပါဝ် အီ ကွယ် ခဲင် မိူင် ဘေ၊ ဆေ အန် ဝီ အိတ် ရိုမ် ဒူပ် ဒီဘျာ တီ၊ 24 ဘေ လုဝ် ဒိုဝ်း ဂါယ် ဘော အာ ဝီ လေး နာ ရေတ့် မိူင်၊ ဝီ ဒိုဝ်း မာဝ်၊ ဝိုန့် တဲး ဂါယ် ကော ယမ်။ န့ ကာအာပ် ဒီဘျာ တီ ယမ် ကူပ် ကွယ် အန် ကာတဲ မိူင်၊ ယီ တူ ဒတ် တူ ဒဲ့ အီ စွယ် အန်။ န့ ကာအာပ် အီမာယ် တွိုန် ယမ် ကူပ် ဟဲ့ ဖျာက် အန် ဒီဘျာ ဇဲတ် ပဲ့ ဟဲ့ မှာယ် အုန် အီ၊ တဲး ဆာရေ အန် စှိုမ်။ ပါယ် တီ ဘေ လုဝ် ဒိုဝ်း ဝဲန် အီ တူ မွှိုမ် ကာတဲ ဘေ။

25 ဆေ အီမာယ် အူ ဝီ ဟာဝ် ခဲင် ပြဲ၊ ဟာဝ် မှေတ့် ရိုဝ် ဒီဘျာ အီ ဟဲ့ ဟွတ့် မိုဝ်း ပါဝ်၊ မီ အီမာယ် ဝီ တီ လုဝ် ယမ်။ 26 ဂွန် ဒီဘျာ တွိုန်၊ ဘေ ယီ တူ ပွိုန် ဘူင် မာဆေ ဒီ အန်။ အန် တူ ဘူင် မာဆေ အီ ကာအာပ် ယမ်။ အာမူ ဇိုဝ် တီ၊ န့ ပီ ဒူအီ အူ ဝီ ဟဲ့ ကာဂုဝ်း ဟဲ့ ငဝ်း ယမ် အီ ဟဝ်။ 27 ခုဝ်၊ အီမာယ် တီ၊ အန် ဝိန် ဒီ မှေတ့် ရိုဝ် အီဘိုန့် ခဲင် ပြဲ။ အီဘိုန့် တွိုန် ပီ ဘော ဟဲ့ ဒတ် ဟဲ့ ဒဲ့ အီ စွယ် အန် မိူဝ်၊ န့ ယီ တူ မိုဝ်း အီ ပွိုန် စွယ် အန်။

28 ဆေ အီမာယ် အီ ယိုဝ် ဒီဘျာ အီ ညှမ် မိုဝ်း ပါဝ် ဘော မှေတ့် လာယ် ဒီဘျာ တီ၊ ဆေ အီ ဟဝ် ဘော ယိုဝ် အန်၊ 29 အန် လုဝ် ဟပ် ရွိုန် ဖန် ဂိုဝ် ဘူင့် ဒီ ဂုန့် ဂွန် အီဘိုန့် တွိုန်။ ဂွန် အီဘိုန့် တီ မိူဝ် လုဝ် ဘဲန် အီဘိုန့် ဒူအီ တီ ဘော စုဝ် အန်။ အီမာယ် မိူဝ် တူ ပွိုန် ဝဲန် အီဘိုန့် တီ ဒေါ မှဝ် ကူပ် ဟဲ့ မှေတ့် ရိုဝ် အန် ဂွန် အီဘိုန့် တီ။

30 ဒူအီ ဒွန် အီ အာဝ် ပွိုန် ဝီ ဒိုဝ်း အီဘိုန့် ဂုန့် အန်။ အာဝ် ပွိုန် ဘူင် တဲး ဂုန့် အန် ဆာယ် အီ။”