1 အာမုဝ်ဆဲ ဟဲ့ ဝီ တဝ်း၊ “ခဲင် မိူင် ပီ ဒီ အာပ် ဇဝ်ဖြာ ဘေ ဟာဝ် ကွယ် တီ၊ ဆေ ဘေ ကာတုန့် ဒူအီ ယမ် နာ ရေတ့် ရဝ် ဘေ၊ ဘေ မိူဝ် တူ နပ် အီ ငဝ်း ယမ်၊ 2 ဂေ ဒါ တာင် ဘေ ဘော ဂေ ဒါ အီ ဆုင်ဖျာတ် ဒါရာ လုဝ် ဂဝ် ဒီ ယွတ် ဒူင် ကွယ် ဒူအီ ယမ် တီ၊ န့ ချြီ့ မိူင် မှဝ် အီ ကွယ် အာရာပ် တီ ဒွန် မိူင်။ 3 ပန် တီ ဒါ တာင် အီ အိုပ် မိူင် အီ ကွယ် ချြီ့ ဒူင် ယမ် ဒူအီ တွိုန်၊ ဂေ လုဝ် ဒိုဝ်း တး ဂွန် မက် ဆိူဝ် အူ ဒုဝ် အီ ညှမ် ဒွိုမ် ဒါင်၊ ညှမ် ဒွိုမ် စ်ု ဘူင် ဂါန် ခေါ အူ ဇေန့်။ 4 တဲး ဂေ ဒိုဝ်း ဟာဝ် ဂွန် မက် ဆိူဝ် တီ ဒီ ဒီလယ့် အီ တူ ဒွိုမ် ထဲ၊ တူ ဒွိုမ် ဆမ် မာဆေ ဘော မိုဝ်း အိုမ် အီ တူ ဒွိုမ် ဟိတ် ဒေါ မှဝ်။ ဟဲ့ ဟွတ့်၊ တဲး ဂေ ဘက် မဲင် ဂွန် မက် တွိုန် ဒီ တီ။ 5 ဒါ အီ လှူ ဒီ ဇဝ်ဖြာ အီ မုး ဒူအီ အာလေဝီ ဂေ တွိုန်၊ ဂေ လုဝ် တး ဒီ တီ။ ခုဝ်၊ ဇဝ်ဖြာ ပီ ကြိုပ် ဘေ၊ အန် ဟဲ့ ရဝ်း ဂေ၊ တဲး ဂေ ဘူင် ဂါန် အန် ဘော ဂါဝ် ပွုန် အန် ဇဝ်၊ မွင့်ကာရာ ဒွါ ဒီ အီ။ ဂေ မိူဝ် လုဝ် ဆုင်ဖျာတ် အာမူ အီ လာယ် ကာလုတ့် လာယ် ကာငဝ်း တီ။ 6 ဝါယ် အန် တီ၊ ဒါ တာင် ခဲင် မိူင် အီ ကွယ် ချြီ့ ဒူင် ယမ် ဒူအီ တွိုန်၊ ဂေ လုဝ် ဘာယ် ဒဲ ဂေ ဒဲင် ဒုဝ် ဂွန် မက် ဆိူဝ် တွိုန် ပဲ့ ဟဲ့ ကာဘက် ဂေ မဲင် အန်၊ တဲး အန် ယမ်။ 7 ဂေ လုဝ် ကာဖြူမ် ဒီ တဝ်း၊ ‘ယေ တူ မိုဝ်း ဒီ ငဝ်း ယမ် အန်။ အာဆေ ငဝ်း ယမ် အန်၊ ယေ မိူဝ် တူ နပ်၊ တူ ယိုဝ်။ 8 အိုယ် မဲ ဇဝ်ဖြာ၊ ယေ မှာန့်၊ တဲး မဲ ဇဝ် ဂဝ်း ဝဲန် မှာပ် ဒူအီ အီ မုး ဒူအီ အီဆာရေလ ပဲ့ ဟဲ့ ထုတ် လေး မဲ။ ယေ မှာန့် မဲ ဇဝ် ဂဝ်း ဝဲန် မှာပ် ယေ တီ၊ ကွဲ့ တဲး ယေ ဒဲစေန့် မဲ လုဝ် ခမ် မှာပ် ကူပ် ဟဲ့ ယမ် ဒူအီ အီ တူ ကာအာပ် ယမ် တီ။’ 9 ပါယ် တီ ကူပ် ဟဲ့ ဘူင် ဘေ အီ လဝ့် နဝ်း ဇဝ်ဖြာ၊ ဘေ အာဝ် ဟူ မိုဝ်း မှာပ် အီ လာယ် ဘာ့ ဒီ အာမူ ဒူအီ ယမ် တွိုန်။

10 ပန် ဒီ တဲး ဇဝ်ဖြာ ဘေ အွင် ရန်ဆူ ဘေ၊ ဘေ မိူဝ် ဟဲ့ ပွိုန် ဒီ မှေတ့် ဂေ ဒူအီ အီ ဟဲ့ စှိုမ် ဒီ ဘေ တီ။ 11 ကာတဲ ဒူအီ ဂေ တီ၊ ဆေ ဘေ ယိုဝ် အီဘိုန့် အီ စှိတ်၊ ဆေ ဘေ ဆီ ပွိုန် အန် ဘဲန် အီဘိုန့် ဘေ၊ 12 ဘေ လုဝ် ဒိုဝ်း တး အန် ဒီ ကာင် ဘေ။ ဟဲ့ ဟွတ့်၊ အန် လုဝ် ဂါ့ ဂိန့် အန်၊ ကပ် ဘော န့ဟိမ် ဒဲ အန်။ 13 တဲး အန် ဘော ကာပ့လု ဝဲန် ဘော ခြိုင် ပီ တာ အန်၊ တဲး အန် ဝီ ကွယ် ခဲင် ကာင် ဘေ။ အန် ဟဲ့ ဟွတ့် ကွယ် ခဲင် ကာင် ဘေ၊ အန် လုဝ် ဝီ က့လိုဝ် ဝီ ငှဝ် အာဒါ ဂုန့် မာ အန်၊ တဲး န့ ကော နုဝ့် အူ မာဂျီန်။ ဟဲ့ ဟွတ့် ပန် တီ၊ ဘေ ဟဲ့ ပွိုန် ခတ် ဒိုဝ်း အန်။ 14 ဝါယ် တီ၊ ဆေ ဘေ အာဝ် ဟူ ဘျုဝ် ဒီ ကွယ် ရိုမ် ဒူပ် အန်၊ ဘေ လုဝ် တဲး အန် ဟာဝ် ဒါခိုယ်၊ တဲး အန် ဟာဝ် ဒူင် ဆီ ဟာဝ် အန်။ ဘေ တူ ပွိုန် မာတ် အန် ပီ မှာယ် ဘေ။ ခုဝ်၊ ဘေ ဟဲ့ ဟွတ့် တဲး ဆာရေ အန် စှိုမ် ဒေါ မုး အန် ဒီဘျာ။

15 ဆေ အီမာယ် မိုဝ်း အီဘိုန့် အာ ဝီ၊ အူ ဝီ အန် ရွက့်၊ ပေါ အူ ဝီ အန် တူ ဘော ရွက့်။ ဆေ အီဘိုန့် အန် ဂါယ် တီ ယီ မိုဝ်း ဂွန် အီမာယ် ဘော အာ ဝီ၊ ဂွန် ဂိန့် အန် ယီ မုး ဂွန် အီဘိုန့် ပီ တူ ရွက့် အန် တွိုန်၊ အန် လုဝ် ဆာဒိက်။ 16 ဟီ ဇမ် ပန် ဒီ ကာဆာင် အန် ခါဂုန် ဒီ ဂွန် အီမာယ် အန် ဂါယ် တီ၊ အန် တူ ပွိုန် ဘူင် တဲး ဂွန် အီဘိုန့် ပီ ရွက့် အန် ဘဲန် ပီ ဂွန် ဂိန့်။ 17 အန် လုဝ် မာတ် ဂွန် အီဘိုန့် ပီ တူ ရွက့် အန် တွိုန် မုး ဂွန် ဂိန့်။ အန် လုဝ် ကာဆာင် ခါဂုန် အန် အာ ဘုန်၊ ဒွါ ဒီ ဂွန် အန် ဝီ တီ။ ခုဝ်၊ ဂုန့် အန် ဟဲ့ ဒွါ ပ့လူမ် ဂေ ဟဲန့် အန် ဒီ ဂွန် တီ ဒီ အာတ့်၊ တဲး ဂွန် တီ ဘဲန် ဂွန် ဂိန့်။

18 ဆေ ဒူအီ အူ ဝီ မိုဝ်း ဂွန် အီမာယ် အီ ဒိူဝ် ကာဆဝ် ဘော ဟာယ် ကာဆဝ်၊ ဂုန့် မာ အန် ပီ ဘော မာနုဝ်၊ ပီ ဘော မး အန် မိူဝ်၊ အန် တူ ထူမ် ဂြုဝ်း ဂုန့် မာ အန်၊ 19 ဂုန့် မာ အန် လုဝ် ဒိုဝ်း ဟာဝ် ဂွန် တီ ဒီ အာတ့် ဒါ တာင် အီ ကွယ် ဒီ ဘာင် မာလုဝ်း မိူင်။ 20 ဂုန့် မာ အန် လုဝ် ကာလာင် ဒီ ဒါ တာင် တွိုန် တဝ်း၊ ‘ဂွန် ယာယ် နီ၊ အန် ဒိူဝ် ကာဆဝ်။ အန် မိူဝ် တူ ထူမ် ဂြုဝ်း ယာယ် မာဆေ။ အန် ဘော ဇာယ် ရွိုန် ကိူန်၊ ဘော ဒျီင် ပဝ်း ကော ယိုတ့် ဆေဆေ။’ 21 ဝါယ် အန် တီ ခဲ့ ကွယ် အီမာယ် ခဲင် မိူင် တီ၊ ဂေ လုဝ် ဒိုဝ်း မာဝ်၊ ဝိုန့်၊ တဲး ဂွန် တီ ကော ယမ်။ ဆေ ဘေ ဘူင် ပါယ် တီ န့ ပီ ဘေ ဟဲ့ ဒိုဝ်း ဝဲန် မှာပ် ဘော အီ တူ မွှိုမ် ကာတဲ ဘေ။ ဂေ ဒူအီ အီဆာရေလ ဟီ ယိုဝ် လွင် အန် တီ၊ ဂေ ဒီ ဘော ဝီ ယုဝ် အူ ဇေန့်။

22 ဆေ န့ မိုဝ်း ဒူအီ အီ ဟဲ့ ဘူင် မှာပ် အီ ကာအာပ် ငဝ်း ယမ်၊ ဆေ ဘေ ဟဲ့ ဟွတ့် ငဝ်း ယမ် အန် 23 ဘော ပက် ဟွယ် ဒုဝ် အန် ဒီ ရွင့်၊ ဒုဝ် ယမ် အန် တီ အာဝ် ပွိုန် ဘ့လေး အုန် ဒီ ရွင့် တီ ဘော ဒွင် ခိူန်။ ဘေ လုဝ် ဒိုဝ်း လေး၊ ဒိပ် ဆီငဲ တီ အူ ဇေန့်။ ခုဝ်၊ ဒူအီ အီ ကာဒုး ဒီ ဟွယ် ဒီ ရွင့် ပါယ် တီ န့ မုး ဒူအီ ပီ ဒိူင် ဇဝ်ဖြာ။ တဲး ဘေ ဘူင် ပါယ် တီ ကွဲ့ တဲး မိူင် ပီ ဒီ အာပ် ဇဝ်ဖြာ ဒီ ဘေ တီ ကာဒါတ့်။ တဲး ဘေ ဒိပ် ဝဲန် အူ ဇေန့်။”