1 အာမုဝ်ဆဲ ဟဲ့ ဝီ တဝ်း၊ “ပန် ဒီ ကာဂုဝ်း ဘေ ဒီ ရန်ဆူ ဘေ၊ ဆေ ဘေ ဘော ယိုဝ် မင်ပြွင့် ဂေ လက်လဝ် ဘော ဒါ ဆိုက် အီ ဟဲ့ ကိူန် လွှိုမ် ဘေ၊ ကွဲ့ တဲး ဘေ ယုဝ်။ ခုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ အီ ဟဲ့ ယဲတ့် လေး ဘေ ခဲင် မိူင် အဲဂိုပ် တွိုန်၊ အန် ဒီ ကွယ် ရိုမ် ဒူပ် ဘေ။ 2 အာတ့် ကာဂုဝ်း ဘေ တီ၊ ဒါ အီ လှူ ဒီ ဇဝ်ဖြာ လုဝ် ဟာဝ် ကွယ် ဒီ အာတ့် ဘေ ကာလာင် ဒီ ဂေ ဒါ ဆိုက် တဝ်း၊ 3 ‘အိုယ် ဘေ ဒူအီ အီဆာရေလ၊ အာတိုဝ် နီ တဲး ဘေ ထူမ်။ ကွဲ့ တဲး ဘေ ယုဝ် ရန်ဆူ ဘေ။ အာဝ် လုဝ် တဲး ဘေ မိုဝ်း နဝ်း လိုဝ် နဝ်း တျီ့။ အာဝ် လုဝ် ပီဒိူန် ပီကာစွာ ဘေ ကူပ် ဂေ။ 4 ခုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဒီ ကွယ် ရိုမ် ဒူပ် ဘေ။ အန် ဒီ တဲး ဘေ အွင်၊ တဲး ဘေ ပဲ ဂေ။’

5 ဟဲ့ ဟွတ့်၊ ဂေ အီ မုး ဒါ တာင် အီ ယဲတ့် အီ အိုပ် တွိုန်၊ ဂေ ဒီ ဝီ ဒီမွှတ် ဂေ ဒါ ဆိုက် တဝ်း၊ ‘ဘေ အီ ကွယ် ဒီ နီ၊ န့ မိုဝ်း အီ ဘူင် ကာင် ကာမာယ် ယီ ညှမ် ပွိုန် ဒီ ဟုဝ့် ကာင် ကာမာယ် တီ။း ဆေ န့ မိုဝ်း၊ တဲး အန် ဝီ ဝေန့် ဒီ ကာင် အန်။ ယုဝ် အန် ယမ် ဒေါ ကာဂုဝ်း အေ နီ။ ယုဝ် အီ ဟဝ် ဝီ တး ဟုဝ့် ကာင် ကာမာယ် အန် တီ။’ 6 န့ မိူဝ် မိုဝ်း အီ ဆမ် မာန် မာငုန် အီ ညှမ် ပွိုန် ဒီ ဟူမ် ဘ့လေ အန်။း ဆေ န့ မိုဝ်း၊ တဲး အန် ဝီ ဝေန့် ဒီ ကာင် အန်၊ ယုဝ် အန် ယမ် ဒေါ ကာဂုဝ်း အေ နီ။ ယုဝ် အီ ဟဝ် ဝီ တး ဟူမ် ဘ့လေ မာငုန် အန်။ 7 န့ မိူဝ် မိုဝ်း အီ ဟဲ့ မိုဝ်း ပါဝ် ယီ ညှမ် ဘူင် ခတ်။း ဆေ န့ မိုဝ်း၊ တဲး အန် ဝီ ဝေန့် ဒီ ကာင် အန်။ ယုဝ် အန် ယမ် ဒေါ ကာဂုဝ်း အေ နီ။ ယုဝ် အီ ဟဝ် ဝီ ခတ် ဒိုဝ်း ပါဝ် အန် တီ။’ 8 ဒါ တာင် ဂေ တီ ပီ ဝီ လုဝ် ကာလာင် ဒီ ဂေ ဒါ ဆိုက် ဘောကာဂ့လျီတ် တဝ်း၊ ‘န့ မိုဝ်း အီ မိုဝ်း နဝ်း ယုဝ် နဝ်း တျီ့။း အာဆေ မိုဝ်း နဝ်း ဇိုဝ် တီ၊ တဲး အန် ဝေန့်။ ယုဝ် ဘော အီ ဟဝ် ဒီ ဝီ မိုဝ်း နဝ်း ယုဝ် နဝ်း လိုဝ် ပီ အန်။’ 9 ဆေ ဂေ ဒါ တာင် ဟဲ့ ဟွတ့် ကာလာင် ဒီ ဂေ ဒါ ဆိုက် ဘောကာဂ့လျီတ်၊ ဂေ လုဝ် ဝီ ဒါင် တဲး န့ မိုဝ်း ဂေ ဂိန့် ဆိုက် အီ ယဲတ့် ဂေ။

10 ဆေ ဘေ ဟဲ့ တး ချြီ့ မိူင် ဒူင် ဒီ ကာဂုဝ်း ဘေ၊ တဲး ဘေ ကာလာင် ဒီ ဒူအီ ခဲင် မိူင် တီ၊ တဲး ဂေ ဂူမ်၊ ကွဲ့ တဲး ဂေ လုဝ် ကာဂုဝ်း။” 11 ဆေ ဂေ ခမ် ဒီ စှိုမ် ဘော ဝိုဝ်း မာလုဝ်း မိူင်၊ တဲး ဘေ လိုပ်။ ဒူအီ ခဲင် မိူင် တီ ဘောကာဂ့လျီတ် လုဝ် ခမ် ဒီ ဘူင် ဂါန် ပီ စ်ု ဘေ ဂေ ဘူင်။ 12 ဆေ ဒူအီ ခဲင် မိူင် တီ ယီ တူ ဂူမ် ဘေ၊ ဆီ ကာဂုဝ်း ဒီ ဘေ၊ တဲး ဘေ ဝဲင် ရူပ် မိူင် ဂေ တီ။ 13 ဆေ ဇဝ်ဖြာ ပီ ကြိုပ် ဘေ ဟဲ့ အာပ် ဒူအီ ဂေ တီ ဒီ ဘေ၊ ဘေ လုဝ် ငဝ်း ယမ် တူတ့် ဂေ အီမာယ် ခဲင် မိူင် တီ။ 14 အီ မုး အီဘိုန့် ဂေ ဂွန် ဘော ကြုဝ်ကြာမ် အီ ကွယ် ခဲင် မိူင် တီ၊ တဲး ဘေ ဒိုဝ်း၊ ဘဲန် ကြုဝ် ဘေ။ ကြုဝ်ကြာမ် ရန်ဆူ ဘေ တီ ပဲ့ ဟဲ့ ဒွါ ဇဝ်ဖြာ ဒီ ဘေ၊ ဘေ ဟဲ့ ပွိုန် စ်ု၊ ပွိုန် တာ တူတ့် ဒွန် မျုဝ်။ 15 မိူင် အီ ကွယ် ကာတူင့် ဒီ မိူင် ဒူင် ဒီ ဟာဝ် ကွယ် ဘေ တီ ဒွန် မိူင်၊ ဘေ လုဝ် ဘူင် ပါယ် တီ။ ဂေ မုး အာမျုဝ် ဒူအီ အီ တူ ပီ ဂေ အာမျုဝ် ဒူအီ အီ ကွယ် ခူပ် ဘေ။

16 မာလဲ၊ ဒေါ ကာဂုဝ်း ဘေ ဒီ မိူင် ပဲ့ ဟဲ့ အာပ် ဇဝ်ဖြာ ဒီ ဘေ၊ တဲး န့ ဘဲန် ခါဂုန် ဘေ၊ ဘေ လုဝ် ငဝ်း ယမ် တူတ့် ဒွန် မျုဝ်၊ ဘော ဒူအီ ဘော ဒုဝ် ဆတ်ဒါဝါ။ ဘေ ကွဲ့ အုန် မျုဝ် အီ မိုဝ်း ဖွိုမ် ခေါ အူ မျုဝ်။ 17 ဘေ လုဝ် ငဝ်း ဒူအီ အာမျုဝ် ဟေထိတ်၊ ဒူအီ အာမုဝ်ရိတ်၊ ဒူအီ ကာနန့်၊ ဒူအီ ဖေရေဆိတ်၊ ဒူအီ ဟီဝိတ် ဘော ဒူအီ ယေဘူဆိတ်။ ဒူအီ ဇိုဝ် တီ ဒွန် မျုဝ် ဘေ လုဝ် ငဝ်း ဝဲန် တူတ့် ဘောကာဂ့လျီတ်၊ တဲး န့ ဘော ဒူပ် ခဲ့ ပီ ကာလာင် အုန် ဇဝ်ဖြာ ဒီ ဘေ။ 18 ဆေ ဘေ တူ ငဝ်း ယမ် တူတ့် ဂေ၊ ယုဝ် ဂေ မာနုဝ် ဘေ ဘူင် ပီ ကာအိး ဇဝ်ဖြာ၊ ဘူင် အီ ကာဘး ဒီ ဇဝ်ဖြာ ဘော ဝီ ကြိုပ် ဇဝ် ပီ ကြိုပ် ဂေ။

19 ဒေါ ဟဲ့ ဝဲင် ရူပ် ဘေ မိူင် မင် မိူင်၊ ဘေ မိူဝ် ဟဲ့ ကွယ် လှေန့်၊ ဘ်ု ဒီ ကာဂုဝ်း တဲး ဘေ အွင် မိူင် တီ၊ ဘေ ကွဲ့ ဂ်ု ဝဲန် ဟေ။ ခုဝ်၊ ဘေ ဟဲ့ ပွိုန် ဟူမ် ဘ့လေ အန်။ အာဝ် ပွိုန် ဂ်ု တဲး န့ ကေး။ အာဝ် မုး ဟေ အီ မုး ရန်ဆူ ဘေ ပီ လုဝ် ငဝ်း ဘေ။ 20 ဆေ ဘေ ဟဲ့ နပ်၊ န့ ဘော မုး ဟေ အီ တူ မိုဝ်း ဘ့လေ အီ ပွိုန် ဟူမ်၊ ဘေ ဟဲ့ ပွိုန် ဂ်ု ကေး၊ ဝီ ဘူင် တဲး န့ စွယ် ဘေ ကာဂုဝ်း၊ တဲး န့ ကော ဇမ် ပန် ဒီ ပွိုန် ဘေ ဒီ လိုပ် ခဲင် မိူင် တီ။”