1 အာမုဝ်ဆဲ ဟဲ့ ဝီ တဝ်း၊ “အဝ် လှေန့် ဇဝ်ဖြာ ဒီ ပျာတ့် ဝဲန် ဂေ ဒူအီ အီ ကွယ် ခဲင် မိူင် ပီ ဒီ အာပ် အန် ဒီ ဘေ၊ တဲး ဘေ ဟာဝ် ကွယ်။ ဘေ မိူဝ် ပွိုန် ဒီ ကွယ် ဒါခိုယ်၊ ကွယ် ဆီချာ ခဲင် မိူင် ခဲင် ကာင် တီ။ 2 ဒေါ အန် တီ ဘေ လုဝ် ရဝ်း အူယ် မိူင်။ မိူင် တီ ဘေ လုဝ် တဲး န့ ကွယ် ဒီ ကာတဲ ကာဒါယ် မိူင် ပီ ဒီ အာပ် ဒွါ ဇဝ်ဖြာ ဒီ ဘေ။ 3 ဘေ လုဝ် ကာယဝ်း ကာဒါယ် မိူင် တာင် ပီ ဒီ အာပ် ဇဝ်ဖြာ ဒီ ဘေ တီ၊ တဲး န့ ဘဲန် အူယ် ပ့လုဝ့်။ ဘေ ဘော လုဝ် မ့ပြာယ် န့တေန့်၊ တဲး န့ ပွိုန် ဒီ ဟာဝ် ဆီချာ၊ တဲး ဂေ ဒူအီ အီ ဟဲ့ ကာလုတ့် ဒီ ငဝ်း ယမ် အီ ဟဝ် ပွိုန် ဒီ တဝ်၊ ဟာဝ် ကွယ်၊ ဟာဝ် ချြီင် ခဲင် မိူင် တီ အီ ကွယ် ကာတတ် ဒီ ဂေ။

4 ပါယ် တီ ဟဲ့ မုး ဒါရာ လွင် ဒူအီ အူ ဝီ အီ ဟဲ့ ကာလုတ့် ဒီ ငဝ်း ယမ် အီ ဟဝ်။ ဆေ အန် တူ ဒွိုမ် အုန် နဝ်း ဒီ ငဝ်း အီ၊ အန် မိူဝ် တူ ဒွိုမ် မိုဝ်း ဒီ ကာအေး ကာထဲန့် ဒီ ဒူအီ ဝီ တီ၊ အန် ဟဲ့ ပွိုန် တဝ် ဟာဝ် ကွယ် ခဲင် မိူင် အူယ် မိူင် တွိုန် ဒွန် မိူင် ပဲ့ ဟဲ့ ရဝ်း ဇဝ်ဖြာ၊ ကွဲ့ တဲး အီ ဟဝ် ငဝ်း အန်။ 5 အူဖာမာ အန်၊ ဆေ န့ မိုဝ်း ဒူအီ အူ ဝီ ဘော ဂိုက် အန် ဟာဝ် ခဲင် ပြဲ၊ တဝ်း ဒီ ဟာဝ် ကေတ် ဟေ။ ဆေ အူ ဝီ ဟဲ့ ဂ်ု ဟေ တာ မိုယ် အန်၊ မိုယ် အန် တီ ဘော လေး ဟာဝ် ဒိုဝ် ဂိုက် အန်၊ တဲး အန် ကော ယမ်။ ဆေ န့ မုး ဒူအီ ဇိုဝ် တီ၊ ဟဲ့ ပွိုန် တဝ်၊ ဟာဝ် ကွယ်၊ ဟာဝ် ချြီင် ခဲင် မိူင် အူ မိူင်၊ တဲး အန် လွတ် ယမ်။ 6 ဆေ န့ မိုဝ်း မီ အူ မိူင်၊ ဆေ ခြာဝ် န့တေန့် တူင့် ကာဆဝ်၊ ယုဝ် ဂေ အီ ဆီ ဘူင် ဝျီ့ ဒီ အန် တွိုန်၊ ဂေ ဝီ ခုင်ခြး ခြပ် အန်၊ ဝီ ငဝ်း ယမ် ဒူအီ အီ တူ ကာအာပ် ယမ်၊ ယူ ဟူ မုး အန် အုန် နဝ်း ဒီ ဘူင်။ 7 ကူပ် န့ ပါယ် တီ အုဝ် တဝ်း ဒီ ဘေ၊ တဲး ဘေ ရဝ်း မိူင် အာဒါ အူယ် မိူင်။

8 ဆေ ဇဝ်ဖြာ ပီ ကြိုပ် ဘေ ဟဲ့ ပီဝဝ်း ပီလေး မိူင် ဘေ၊ တဲး န့ ဒူပ် ပီ ဒွိုမ် ကာဆဲန့် အန် ဒီ ဂေ ဂုန့် ဒင် ဘေ၊ ဆေ အန် ဟဲ့ ဒွါ မိူင် ပဲ့ ဟဲ့ ကာဆဲန့် အန် ဒီ ဒွါ၊ 9 ကူပ် ဘူင် ဒူပ် ဘေ ဒါရာ ပီ ကာလာင် အုဝ် ဒီ ဘေ အာတိုဝ် နီ၊ ဘော ကူပ် ရွက့် ဘေ ဇဝ်ဖြာ ပီ ကြိုပ် ဘေ ဘော ထူမ် ဒူပ် ပီ မာနုဝ် အန် ဒီ ဘေ၊ တဲး ဘေ ရဝ်း မိူင် ပေါ န့ ပွါ အာဒါ ပေါ အူယ် မိူင်။ 10 ဘေ လုဝ် ဘူင် ပါယ် တီ ကွဲ့ တဲး ဂေ ဒူအီ အီ တူ ကာအာပ် ယမ် လုဝ် ယမ် ခဲင် မိူင် ပဲ့ ဟဲ့ အာပ် ဇဝ်ဖြာ ပီ ကြိုပ် ဘေ ဒီ ဘေ၊ ကွဲ့ တဲး န့ ဘဲန် မှာပ် ဒီ ဘေ ကူပ် ငဝ်း ယမ် ဒူအီ။

11 မာလဲ၊ ဆေ န့ ယီ မိုဝ်း ဒူအီ အီ ဟဲ့ အုန် နဝ်း ဒီ ငဝ်း ယမ် ဒူအီ အူ ဝီ၊ ဆေ အန် ဟဲ့ ဟွတ့် ဘူင် ပါယ် တီ အန် ဘော ဝီ ကာဘ့လဲပ် တဝ် ဟာဝ် ချြီင် ခဲင် မိူင် ဂေ တီ၊ 12 ဒါ တာင် အီ ကွယ် ခဲင် မိူင် ဘြိမ် အန် လုဝ် စ်ု အီ ဟာဝ် မှေတ့် တး အန်၊ ဝီ အာပ် အန် ဒီ ဒူအီ အီ ဟဲ့ ကာအာပ် ဝီ ဘူင် ဝျီ့ ဒီ အန်။ ဒူအီ ဝီ တီ ဒိူန် ဒီ လုဝ် ယမ်။ 13 ဘေ မိူဝ် တူ ပွိုန် ကာဝေ အန်။ ဘေ လုဝ် ဒိုဝ်း ဝဲန် ဒူအီ အီ ဟဲ့ ကာအာပ် ယမ် ကူပ် မှာပ် ပဲ့ ဟဲ့ ဘူင် အန် ဒေါ ငဝ်း ယမ် အန် အာဆာက် အီ ကာတဲ ဘေ ဒူအီ အာမျုဝ် အီဆာရေလ။ ပါယ် တီ တဲး ဘေ ဝီ ပွိုန် ဒီ ကွယ် ဆီချာ။

14 ဘေ ကွဲ့ ကာထုဝ့် လွှက့် ကာအုန် ဝဲင် ကာင် ဒီ ဂေ အီ ကွယ် ခူပ် ဘေ။ ဂေ ဒူအီ ဒေါ မွိုန် ဟဲ့ ဆမ် အုန် လွှက့် တီ ဆိန့် အာတ့် နီ၊ တဲး န့ ဘျ ကာအုန် ကာဒါယ် ပဲ့ ဟဲ့ အာပ် ဇဝ်ဖြာ ပီ ကြိုပ် ဘေ ဒီ ဘေ၊ တဲး န့ ဘဲန် ခါဂုန် ဘေ။

15 ဆေ န့ မိုဝ်း မီ ဒူအီ အူ ဝီ အီ ဘဲန် ဆက်ဆေ လွင် အာမူ အီ၊ ကွဲ့ တဲး ဘေ ဆုင်ဖျာတ် အာမူ တီ။ န့ လုဝ် မိုဝ်း ဒူအီ အာ ဝီ၊ အူယ် ဝီ၊ အီ ဘဲန် ဆက်ဆေ၊ တဲး ဘေ ပွိုန် ဒီ ဆုင်ဖျာတ် အာမူ အီ ဟဝ်။

16 ဆေ န့ မိုဝ်း ဒူအီ အီ ကာလာင် ဂြုဝ်း တူ မှာန် ဘော ကာလာင် နာ တူ မွှိုမ် လွင် အီ ဟဝ်၊ 17 ဒူအီ ဂါယ် တီ ဘော အာ ဝီ လုဝ် တး ကွယ် ဒီ အာတ့် ဇဝ်ဖြာ။ ဂေ ဒါ အီ လှူ ဒီ ဇဝ်ဖြာ ဘော ဂေ ဒါ တာင် အီ ဆုင်ဖျာတ် ဒါရာ အီ လုဝ် ဘူင် ဂါန် ဒေါ အန် တီ၊ ဂေ လုဝ် ဆုင်ဖျာတ် အာမူ ဂါယ် တီ။ 18 ဂေ ဒါ တာင် အီ ဆုင်ဖျာတ် ဒါရာ တီ၊ ဂေ လုဝ် ဇဲတ် ဒီ ယွတ်၊ တဲး န့ ကော ဇေ့ တူတ့် ဒွန် မျုဝ်။ ဆေ ဒူအီ ဘဲန် ဆက်ဆေ ကာလာင် ဂြုဝ်း တူ မှာန်၊ ကာလာင် နာ တူ မွှိုမ် လွင် ဘီနွင် အန် အီ မုး ဒူအီ အီဆာရေလ နင်ဂန်၊ 19 ဒူအီ ဝီ တီ လုဝ် ဝီ ခမ် ခဲ့ ပီ ဆီ ဘူင် အန် ဒီ အီ ဟဝ်။ ဘေ လုဝ် ဘူင် ပါယ် တီ တဲး ဘေ ဒိုဝ်း ဝဲန် မျုဝ် အီ ဟာယ် အီ ကွယ် ကာတဲ ဘေ။ 20 ပါယ် တီ ဆေ ဒွန် အီ ဝီ ယိုဝ် လွင် အန် တီ၊ ဂေ ဒီ ဘော ဝီ ယုဝ်၊ ကွဲ့ တဲး န့ မိုဝ်း အီ ဒီ ဝီ ယ ဘူင် အီ တူ မွှိုမ်။ 21 ဆေ န့ မုး အာမူ ဇိုဝ် တီ၊ ကွဲ့ တဲး ဘေ မိုဝ်း နဝ်း ကာဝေ။ ဆေ ဒူအီ ဘူင် တဲး အာဆာက် အီ စှိုမ်၊ ဘော အာဆာက် အန် လုဝ် ဝီ စှိုမ်။ ဆေ အန် ဘူင် တဲး ငါယ် အီ အပ်၊ ဘော ငါယ် အန် လုဝ် ဝီ အပ်။ ဆေ အန် ဘူင် တဲး ဟြာင် အီ ကာဘက်၊ ဘော ဟြာင် အန် ဝီ လုဝ် ကာဘက်။ ဆေ အန် ဘူင် တဲး ဒဲ အီ ဆဝ်၊ ဘော ဒဲ အန် လုဝ် ဝီ ဆဝ်။ ဘော၊ ဆေ အန် တဲး ပ့လဝ် အီ ကာဘက်၊ ဘော ပ့လဝ် အန် လုဝ် ဝီ ကာဘက်။”