1 အာမုဝ်ဆဲ ဟဲ့ ဝီ တဝ်း၊ “ဂေ ဒူအီ အာလေဝီ အီ ဟဲ့ ဘဲန် ဒါ အီ လှူ ဒီ ဇဝ်ဖြာ ဘော ဂေ ဒူအီ အာလေဝီ ဘောကာဂ့လျီတ်၊ ဂေ တူ ပွိုန် ခါဂုန် ပီ လာယ် ကာဆာင် ဘေ ကာတဲ ဘေ ဒူအီ အီဆာရေလ။ ဂေ လုဝ် ဟူမ် ပီ လှူ အီ ဟဝ် ဒီ ဇဝ်ဖြာ အီ မုး ပီ လှူ အီ ဒုဝ့် ဒီ ငဝ်၊ တဲး န့ ဘဲန် ခါဂုန် ဂေ။ 2 ဂေ မိူဝ် တူ မိုဝ်း ကာဒါယ် အီ ဘဲန် ခါဂုန် ဂေ ပီ အီ ဟဝ်။ ခုဝ်၊ ဂေ ဟဲ့ ပွိုန် ဒီ ဘဲန် ဒါ အီ လှူ ဒီ ဇဝ်ဖြာ။ ဂေ ဘော ပွိုန် ဒီ ဘိုင် ဇဝ်ဖြာ အီ ဟဲ့ ကာဆဲန့် ဒီ လိုမ်လာ ဂေ။

3 ဒွန် ဇေန့် ဒေါ လှူ ဘေ မာဘူ ဂေ မာမက်၊ ဘေ လုဝ် ဒိုဝ်း ယ အန် အာဒါ အူ ဘ့လာက် ဘော ယင် ကာလာ အန် ဘော အာ ဘ့လာက် ဘော ဘိုမ် အန်၊ ဒွါ ဒီ ဂေ။ 4 ခဲ့ ကွယ် ငှုဝ် ဂေ အိုမ် မာငုန် ဘော နာမန် အီ မုး ဘ့လေ ဒင်၊ ဘေ လုဝ် ဒွါ ဒီ ဂေ။ ဘော ဟိုက် မာဘူ ပီ ကပ် ဘေ ဒီ အာတ့်၊ န့ ဒီ ဘဲန် ကြုဝ် ဂေ။ 5 ခုဝ်၊ ဇဝ်ဖြာ ဟဲ့ ရဝ်း လေး ဂေ ဒူအီ အာလေဝီ ကာတဲ ခြိုဝ် ဒွန် ခြိုဝ်၊ တဲး ဘော ဂေ ဘော လှုက်လှာန် ဂေ ဝီ ဘူင် ဂါန် ဇဝ်ဖြာ ဘော ဘဲန် ဒါ အီ လှူ ဒီ ဇဝ်ဖြာ ဆေဆေ။

6 ဆေ န့ မိုဝ်း ဒူအီ အာလေဝီ အူ ဝီ အီ ကွယ် ခဲင် မိူင် အူ မိူင် ခဲင် ကာဒါယ် မိူင် အီဆာရေလ၊ ဆေ အန် မိုဝ်း နဝ်း ဆီ ဟာဝ် ဒူင် ဒီ ရဝ်း ဇဝ်ဖြာ တဲး ဘေ ကြိုပ် အန် ဇဝ်၊ အန် ဟဲ့ ပွိုန် ဘူင် ဂါန် ဇဝ်ဖြာ ဒီ တီ ပီ ဘီနွင် အန်။ 7 အန် ဟဲ့ ပွိုန် ဘူင် ဂါန် ဒါ အီ လှူ ဒီ ဇဝ်ဖြာ ပီ ကြိုပ် အန် ပီ ဂေ ဒူအီ အာလေဝီ ဒွန် အီ။ 8 ဝေါဝဲ အန် ပီ ဘော ဟဲ့ ကာဆာင် ဒီ အန် ခဲ့ ယွင့် ဂေ ခါဂုန် ဂေ၊ ဘေ ယီ လုဝ် ဒွါ ဒီ အန်၊ တဲး န့ ကာရမ် ခဲ့ ပွိုန် ဒူအီ ဟဝ် ဒွန် အီ။

9 ဆေ ဘေ ဟဲ့ ဟွတ့် ဟာဝ် ကွယ် ခဲင် မိူင် ပီ ဒီ အာပ် ဇဝ်ဖြာ ပီ ကြိုပ် ဘေ ဒီ ဘေ၊ ကွဲ့ တဲး ဘေ ဘူင် ပီ ပီ ဘူင် ဂေ ဒူအီ အာမျုဝ် ဟဝ် အီ ဟဲ့ ဒွိုမ် ကွယ် ခဲင် မိူင် တီ။ ဂေ ဟဲ့ ဘူင် အီ မွှိုမ် ကာအိး မွှိုမ် ကာဒါတ့်။ 10-11 ကွဲ့ တဲး န့ မိုဝ်း ဒူအီ အီ ဒိုဝ်း ဂွန် အန် ဒုဝ့် ခဲင် ငဝ်။ ကွဲ့ တဲး န့ မိုဝ်း ဒူအီ အီ မဲန် ဘေဒါင် ဘော ကာလာင် အီ ဒီ ပါယ် နာ အာတ့်၊ အီ မဲန် ဂါလာ၊ အီ ဘူင် အာဒါတ်၊ စ်ု ကာထာ၊ အီ တဲး ကာနမ် လိုပ် အန်၊ အီ ဒဲ့ တး ဝီ ဒီမွှတ် ကာပြဝ် ဒူအီ ယမ်။ ကွဲ့ တဲး န့ မိုဝ်း အီ ဘူင် ပါယ် တီ ဒေါ မှဝ်။ 12 ဇဝ်ဖြာ ပီ ကြိုပ် ဘေ ဘော ကာအိး ကာဆဝ် ဒူအီ အီ ဘူင် ပါယ် တီ။ ကူပ် ဘူင် အီ ဟဝ် ဇိုဝ် တီ ဒွန် မျုဝ်၊ အန် ဇဝ် ဒီ ဘော ဟုဝ် တဝ် ဂေ၊ တဲး ဂေ လေး ခဲင် မိူင် ဒူင် ဒီ လိုပ် ဟာဝ် ကွယ် ဘေ တီ။ 13 ဘေ ယီ လုဝ် မိုဝ်း နဝ်း ဆိူဝ် နဝ်း မှာန် ဒီ အာတ့် ဇဝ်ဖြာ ဘော ဘူင် အီ လဝ့် နဝ်း အန်။

14 ဒူအီ အီ ကွယ် ခဲင် မိူင် ပီ ဒီ ဟာဝ် ဒိုဝ်း ဘေ တီ၊ ဂေ ဘော နပ် ဒီ ဒူပ် ဂြုဝ်း ဒူအီ အီ နပ် ဒီ မဲန် ဘေဒါင် ဘော ကာလာင် အီ ဒီ ပါယ် နာ အာတ့်။ ယီ မုး ဘေ၊ ဇဝ်ဖြာ ပီ ကြိုပ် ဘေ တူ တဲး ဘေ ဘူင် ပါယ် တီ ဒေါ မှဝ်။ 15 ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဒီ ဝီ တိုယ် ဒူအီ အီ ဘျာန် ဂြုဝ်း ဇဝ်ဖြာ အူ ဝီ ဒီ ဘေ။ အန် ဒီ ဘဲန် ပီ အုဝ်။ အန် ဒီ တး ကာတဲ ဘေ။ ဘေ လုဝ် ထူမ် ဂြုဝ်း ပီ ကာလာင် အန် ဒီ ဘေ။ 16 ခုဝ်၊ ဆီငဲ တး ကွယ် ကာဇု ဘေ ဒီ နွန် ဆီနာယ် တွိုန်၊ ဘေ မိူဝ် ဟဲ့ ဆာခိုဝ် မှာန့်၊ ကွဲ့ ဟူ တဲး ဘေ ယိုဝ် ဂြုဝ်း ဇဝ်ဖြာ ဘော ငဝ် အီ ဟဲ့ ကုး တာင် ကူပ် ဟဲ့ ယုဝ် ဘေ ဒီ ယမ်။

17 ပါယ် တီ ဇဝ်ဖြာ ဝီ တဝ်း ဒီ အုဝ်၊ ‘ဂြုဝ်း ပီ ကာလာင် ဂေ တီ ဟဲ့ မုး ဟဲ့ မှာန်။ 18 အုဝ် ဒီ ရဝ်း ဒါ အီ ဘျာန် ဂြုဝ်း ဇဝ်ဖြာ အူ ကာဒင် ခဲင် ဘီနွင် ဂေ၊ တဲး အန် ပီ မဲ။ အုဝ် ဒီ ကာလာင် ဒီ အန် ဂြုဝ်း ပီ ဒီ လုဝ် ကာလာင် အန် ဒီ ဂေ။ အန် ဒီ ဘော ဝီ ကာလာင် တူတ့် ဂြုဝ်း ပီ ဒမ် အုဝ် ဒီ အန်။ 19 အာဆေ အာဝ် တဝ်း၊ ဆေ န့ မိုဝ်း ဒူအီ အီ တူ ထူမ် ဂြုဝ်း ဒါ အီ ဘျာန် ဂြုဝ်း ဇဝ်ဖြာ တီ၊ အုဝ် ဒီ ဒမ် မှာပ် ဒီ အန်။ 20 ဆေ န့ ယီ မိုဝ်း ဒါ အီ ဘျာန် ဂြုဝ်း ဇဝ်ဖြာ ပေါ အူ ဝီ အီ တဝ်း၊ အန် ကာလာင် ဂြုဝ်း အုဝ်၊ အုဝ် ယီ တူ ရဝ်း တူ စ်ု အန်၊ ဆေ န့ ဘော မုး ဒူအီ အီ ဂါဝ် ပွုန် ဇဝ် ပီ ကြိုပ် အီ ဟဝ်၊ ဒူအီ တီ လုဝ် ခမ် ဒီ ယမ်။’

21 ဆေ ဘေ ကာဖာ ခဲင် နဝ်း ဘေ တဝ်း၊ “မှဝ် ယေ ဒီ ပါယ် ဒီ နပ်၊ ဂြုဝ်း ပီ ကာလာင် ဒါ အီ ဘျာန် ဂြုဝ်း ဇဝ်ဖြာ တီ၊ ယုဝ် န့ မှာန် တူ မှာန် မုး ဂြုဝ်း ဇဝ်ဖြာ။း” 22 ဆေ ဒါ အီ ဘျာန် ဂြုဝ်း ဇဝ်ဖြာ ဟဲ့ ကာလာင် ဂြုဝ်း အူ မျုဝ် ဘော တဝ်း န့ မုး ဂြုဝ်း ဇဝ်ဖြာ၊ ဆေ လွင် ပီ ကာလာင် အန် ယီ တူ ဘဲန်၊ န့ တူ မုး ဂြုဝ်း ဇဝ်ဖြာ။ ဒါ အီ ဘျာန် ဂြုဝ်း ဇဝ်ဖြာ တီ ဟဲ့ ကာလာင် ရာင် အန်။ ဘေ မိူဝ် တူ လုဝ် ယုဝ် အန်။