အာမုဝ်ဆဲ ဟဲ့ ဝီ တဝ်း၊ “ဘေ တူ ပွိုန် ဒိုဝ်း မာဘူ ဂေ မက် အာလူင့် အီ တူ ဆီချာ၊ အီ မိုဝ်း ဒူင် စှေ၊ လှူ ဒီ ဇဝ်ဖြာ ပီ ကြိုပ် ဘေ။ ခုဝ်၊ ဇဝ်ဖြာ ဘော ကာအိး ကာဆဝ် အာမျုဝ် တီ။

2 ခဲင် မိူင် ပီ ဒီ အာပ် ဇဝ်ဖြာ ဒီ ဘေ၊ ဆေ ဘေ ယိုဝ် ဒူအီ ဘော မုး အီဘိုန့် ဘော မုး အီမာယ်၊ အီ ဘူင် ပီ တူ အိုင် ဇဝ်ဖြာ၊ ဆေ အန် တူ ရုဝ်ဆေ ပီ ကာဆဲန့် ဘေ ဒီ ဇဝ်ဖြာ၊ 3 ဆေ အန် ဝဲန် ဒါရာ ဇဝ်ဖြာ ဘော ဝီ ဟာဝ် ကြိုပ် ဇဝ် ပီ ကြိုပ် ဒူအီ အာမျုဝ် ဟဝ် ဘော ဝီ ကြိုပ် မာဂျီန် ဂေ ဆီငဲ ဘော ဆီမန့် အီ ကွယ် ခဲင် ဘ့လေန့်၊ 4 ဆေ အီ ဟဝ် မိူဝ် ကာလာင် ဒီ ဘေ လွင် အန် တီ၊ ဘေ လုဝ် ဒီမွှတ် တဲး ဘေ နပ် ဆီချာ။ ဆေ ဘေ ယိုဝ် ဟဲ့ မုး ဟဲ့ မှာန် ခဲ့ ပီ တဝ်း အီ၊ ဘေ မိူဝ် နပ် ဆီချာ အီ ဟာယ် ကာဆဝ် ပါယ် တီ ဟဲ့ ဘုဝ် ဘဲန် ကာတဲ ဘေ ဒူအီ အီဆာရေလ၊ 5 ဘေ လုဝ် ဒိုဝ်း လေး ဒူအီ ဝီ တီ နာ ရေတ့် မိူင်၊ ဝီ ဒိုဝ်း မာဝ်၊ ဝိုန့် တဲး အန် ကော ယမ်။ ဘော မုး အီဘိုန့် အီမာယ် အာဆေ အာဝ် တဝ်း၊ ဘေ လုဝ် ဘူင် ပါယ် တီ ဒီ ဒွန် အီ။ 6 ပီ ဘော ဟဲ့ တဝ်း ပါယ် တီ မိူဝ်၊ န့ ယီ လုဝ် မိုဝ်း ဆက်ဆေ အာ အူယ် ဝီ၊ ဘေ ကော ပွိုန် ငဝ်း ယမ် အန်။ ဆေ န့ ယီ မိုဝ်း မီ ဆက်ဆေ အူ ဝီ၊ အာဝ် ပွိုန် ငဝ်း ယမ်။ 7 ဂေ အီ ဟဲ့ ဘဲန် ဆက်ဆေ တီ၊ ဂေ လုဝ် ဒိုဝ်း မာဝ်၊ ဝိုန့် ဒူအီ ဝီ တီ ဒီ အာတ့် အီ ဟဝ်။ ဟဲ့ ဟွတ့်၊ ဂေ ဒူအီ ကိူန် ဘော လုဝ် ဝီ ဝိုန့်။ ပါယ် တီ ဘေ လုဝ် ဒိုဝ်း လေး အီ တူ မွှိုမ် ကာတဲ ဘေ။

8 မင် ဇေန့် ဆေ န့ ဘော မိုဝ်း အာမူ အီ ညှာပ် ဒီ ဆုင်ဖျာတ်၊ ဆေ န့ ဘော မုး အာမူ လွင် ငဝ်း ယမ် အီ ဘော အာမူ ကာဖာတ် ခါဂုန်၊ အာမူ အီ လာယ် ကာမး၊ ဆေ န့ မိုဝ်း အာမူ ပါယ် တီ ပီ တူ ပဲ ဘေ ဒီ ဆုင်ဖျာတ်၊ တဲး ဘေ ဟာဝ် ဒူင် ဒီ ရဝ်း အုန် ဇဝ်ဖြာ။ 9 တဲး ဘေ ဒါင် အာမူ တီ ဒီ ဂေ ဒါ အီ လှူ ဒီ ဇဝ်ဖြာ အီ မုး ဒူအီ အာလေဝီ ဘော ဒီ ဂေ အီ ဘူင် ဂါန် ဒီ ဒူင် ဘွတ် ဒေါ အန် တီ။ တဲး ဘေ ဒီမွှတ် ဂေ၊ တဲး ဂေ ဆုင်ဖျာတ် အာမူ တီ။ 10 ဘေ မိူဝ် လုဝ် ဒူပ် ပီ ဆုင်ဖျာတ် ဂေ တီ ဒီ ဒူင် ဘွတ် ပီ ဒီ ရဝ်း ဇဝ်ဖြာ။ 11 ဘေ လုဝ် ဘူင် ဒူပ် ခဲ့ ပီ မာနုဝ် ဂေ ဒီ ဘေ လွင် ပီ ဆုင်ဖျာတ် ဂေ တီ၊ ကွဲ့ တဲး ဘေ ဝး နာ ဂ နာ အး။ 12 အာဆေ ဝီ ထဲန့် ဂြုဝ်း ဂေ ဒါ အီ လှူ ဒီ ဇဝ်ဖြာ ဘော ဂြုဝ်း ဂေ ဒါ တာင် အီ ဆုင်ဖျာတ် ဒါရာ တီ၊ အီ မုး ဒူအီ အီ ဘူင် ဂါန် ဇဝ်ဖြာ၊ ဒူအီ ဝီ တီ လုဝ် ခမ် ဒီ ယမ်။ ပါယ် တီ ဘေ လုဝ် ဒိုဝ်း ဝဲန် အီ တူ မွှိုမ် ကာတဲ ဘေ ဒူအီ အီဆာရေလ။ 13 ဆေ ဒူအီ ကိူန် ယိုဝ် လွင် အန် တီ၊ ဂေ ဒီ ဘော ယုဝ်။ ဝါယ် အန် တီ ဂေ မိူဝ် အာဝ် ဟူ ယ ဝီ ကာဘး ဒီ ဒါ တာင်။

14 ဝါယ် ဟဲ့ ဟွတ့် ဟာဝ် ကွယ် ဘေ ခဲင် မိူင် ပီ ဒီ အာပ် ဇဝ်ဖြာ ဒီ ဘေ၊ ဘေ မိူဝ် ပွိုန် ဒီ ကွယ် ဆီချာ။ ဒေါ အန် တီ ဘေ ဒီ ဘော တဝ်း၊ ‘ယေ ဆီ ပွိုန် ခုန်ဒီခမ် ပီ ဂေ ဒူအီ အာမျုဝ် ဟဝ် အီ ကွယ် ခူပ် ယေ ဟဲ့ မိုဝ်း ခုန်ဒီခမ်။’

15 တဲး ဘေ ဆာဒိက်၊ တဲး ဘေ ရဝ်း ဝီ ပဲ့ ဟဲ့ ရဝ်း အုန် ဇဝ်ဖြာ ဒီ ဘေ။ ဝီ တီ လုဝ် မုး ဒူအီ အာမျုဝ် အီဆာရေလ ပီ ဘေ။ ဘေ ကွဲ့ ဒိုဝ်း ဒူအီ အာမျုဝ် ဟဝ် အီ တူ မုး အာမျုဝ် အီဆာရေလ ဘဲန် ခုန်ဒီခမ် ဘေ။ 16 ဒဲင် တီ၊ ခုန်ဒီခမ် တီ တူ ပွိုန် မိုဝ်း ကိူန် ကာဆဝ် မင်ပြွင့် အာဒါ ဒါ ဆိုက် အန်။ အန် တူ ပွိုန် စ်ု အီ ဟဝ် ဟာဝ် စိုဝ်း တး မင်ပြွင့် ခဲင် မိူင် အဲဂိုပ် တွိုန်။ ခုဝ်၊ ဇဝ်ဖြာ ဟဲ့ ဒမ် အုန် ဒီ ဘေ တဝ်း၊ ‘ဘေ တူ ပွိုန် ဝီ ဝေန့် ခဲင် မိူင် အဲဂိုပ် ဒေါ မှဝ်။’ 17 ခုန်ဒီခမ် တီ မိူဝ် တူ ပွိုန် ဒိုဝ်း အီဘိုန့် ကိူန်။ ယုဝ် န့ တဲး အန် ဝီ ကာလိုပ်။ ဘော ရွိုန် ဂေ ခြိဝ် မိူဝ် ပါယ် တီ။ အာဝ် ပွိုန် ဟြူမ် အုန် ကိူန် ကာဆဝ်။

18 ဆေ အန် ဟဲ့ ဟွတ့် အိုပ် ခဲင် ဟုဝ် အန်၊ အန် လုဝ် ထုတ် လေး ဒါရာ နီ ဒီ ဘပ် ဂေ ဒါ အီ လှူ ဒီ ဇဝ်ဖြာ အီ မုး ဒူအီ အာလေဝီ တွိုန်၊ တဲး အန် ဒဲမ် ဟပ် ခဲင် ဘပ် အန်။ 19 ဘပ် ဒါရာ တီ၊ န့ လုဝ် ကွယ် ခူပ် အန် ဆေဆေ။ အန် မိူဝ် လုဝ် တိး ဘော စုဝ် အန်။ ဆေ အန် ဘူင် ပါယ် တီ အန် ဒီ ဘော နပ် ဒီ ရုဝ်ဆေ ဇဝ်ဖြာ။ အန် မိူဝ် ဒီ ဘော နပ် ဒီ ဘူင် ဒူပ် ဒါရာ ဘော ပီ စ်ု ဇဝ်ဖြာ ဒွန် မျုဝ်။ 20 ဒါရာ တီ ဒီ ဘော မာနုဝ် အန်၊ ကွဲ့ တဲး အန် မိုဝ်း နဝ်း ပီခိုက် ဒဲင် ဂေ ဘီနွင် အန်။ န့ မိူဝ် တူ တဲး အန် ဝး နာ ဂ နာ အး။ ပါယ် တီ ဘော အန် ဘော လှုက်လှာန် အန် ဒီ ပွိုန် ဒီ ကွယ် လှေန့် ခဲင် မိူင် ပီ အိုပ် အန်။”