ခါန် 16
လွင် ဘ့လွယ် ဂေ ဒူအီ အီဆာရေလ
1 အာမုဝ်ဆဲ ဟဲ့ ဝီ တဝ်း၊ “ဒွန် ဇေန့် ဆေ ဇမ် မာဂျီန် အာဘိပ်၊ ဘေ လုဝ် အိူပ် မျုက် ဇဝ်ဖြာ ဘော ဘူင် ဘ့လွယ် လှုဝ်း ဘေ ဇဝ်ဖြာ ဒေါ ကာလုဝ်း အန် ကာင် ဘေ။ ခုဝ်၊ ဒေါ ကွယ် ဘေ ခဲင် မိူင် အဲဂိုပ် တွိုန်၊ ခဲင် မှိုဝ် အန် ဇဝ် ဟဲ့ ချွတ် လေး ဘေ ခဲင် မိူင် အဲဂိုပ် ဒေါ မုး မာဂျီန် အာဘိပ် တီ။ 2 ဘေ လုဝ် ဟာဝ် ဒီ ဒူင် ပီ ရဝ်း အုန် ဇဝ်ဖြာ၊ တဲး ဘေ ကြိုပ် အန် ဇဝ်။ တဲး ဘေ ငဝ်း မာဘူ။ ဆေ အာဝ် မုး မာဘူ၊ တဲး ဘေ ငဝ်း မာမက် ဂေ မာပဲ၊ တဲး ဘေ လှုဝ်း ဇဝ်ဖြာ ဒေါ ကာလုဝ်း အန် ကာင် ဘေ။ 3 ဒေါ ဟူမ် ဘေ ယင် တီ၊ ဘေ ကွဲ့ ဟူမ် ဘော ခါမုန် အီ ဟဲ့ ဟပ် ဆီနမ် ဘြး။ အာဒါ ဘူ ဆီငဲ၊ ဘေ တူ ပွိုန် ဟူမ် ခါမုန် အီ ဟပ် ဆီနမ် ဘြး။ ခါမုန် တီ တဲး ဘေ လှုဝ်း ဒုက်။ ခုဝ်၊ ဒေါ လေး ဘေ ခဲင် မိူင် အဲဂိုပ် တီ၊ ဘေ လုဝ် လေး ဟာဝ် ကာတဝ် ကာတိူတ်။a ဘော စုဝ် အာဆာက် ဘေ ဘေ လုဝ် လှုဝ်း ဆီငဲ လေး ဘေ ခဲင် မိူင် အဲဂိုပ် အီ မုး ဒူင် ဟဲ့ ခမ် ဘေ ဒုက် တာင်။ 4 အာဒါ ဘူ ဆီငဲ တီ၊ အာဝ် ပွိုန် မိုဝ်း ဆီနမ် ဘြး ခါမုန် ခဲင် မိူင် ဘော မိူင်။ ဘာ ဒီ အပ် ဆီငဲ ဒေါ ဂုဝ်၊ ဆေ ဘေ တူ ဟူမ် တူတ့် ယင် ပီ လှူ ဘေ၊ ဘေ ကွဲ့ အုန် ကာလူယ် အန် တဲး န့ ဝီ ဇမ် ပါ ခဲညှာ။
5 ဘေ တူ ပွိုန် ငဝ်း လှူ ဒုဝ် ဆတ်ဒါဝါ ဒေါ ဘူင် ဘေ ဘ့လွယ် ခဲင် မိူင် ဒွန် မိူင် ပီ ဒီ အာပ် ဇဝ်ဖြာ ဒီ ဘေ။ 6 ဘေ လုဝ် ငဝ်း မီ ဒီ ဒူင် ရဝ်း အုန် ဇဝ်ဖြာ တဲး ဘေ ကြိုပ် အန် ဇဝ်။ တဲး ဘေ ငဝ်း ဘာ ဒီ အပ် ဒေါ ဟဲ့ ဂေတ့် ဆီငဲ၊ အီ မုး အာခြာဝ် ဒေါ ဒွိုမ် လေး ဘေ ခဲင် မိူင် အဲဂိုပ် တွိုန်။ 7 တဲး ဘေ တာတ် ယင် ဘ့လွယ် တီ ဒဲင် ငဝ်၊ ဟူမ် ဒီ ဒူင် ရဝ်း အုန် ဇဝ်ဖြာ တဲး ဘေ ကြိုပ် အန်။ ဆိန့်ဝး ဘေ လုဝ် ဝီ ဝေန့် ဒီ ကာင် ဘေ။ 8 အာဒါ ဒဝ် ဆီငဲ၊ ဘေ လုဝ် ဟူမ် ခါမုန် အီ တူ ဟပ် ဆီနမ် ဘြး။ ဆီငဲ န့ ဘူ၊ တဲး ဘေ တး ကာဇု ကြိုပ် ဇဝ်ဖြာ ပီ ကြိုပ် ဘေ။ ဆီငဲ တီ ဘေ တူ ပွိုန် ဘူင် ဂါန် မာဆေ။
9 ဆီငဲ ဒီ စုး ဘေ ဒီ ဆုဝ့် ငှုဝ်၊ ဘေ လုဝ် စုး ဒီ တိး ဟာဝ်၊ တဲး န့ ကော နုဝ့် ဘူ ခါနှာ တိုင်။ 10 ဟဲ့ ဟွတ့်၊ တဲး ဘေ ဝီ ဘူင် ဘ့လွယ် ဆုဝ့် ငှုဝ်။ တဲး ဘေ ဝီ အိူပ် မျုက် ဇဝ်ဖြာ ပီ ကြိုပ် ဘေ။ တဲး ဘေ လှူ ခဲ့ ဆီ လှူ ဘေ၊ တဲး န့ ကာဒါန် ခဲ့ ပီ မွင့်ကာရာ ဒွါ ဇဝ်ဖြာ ဒီ ဘေ။ 11 တဲး ဘေ ခူယ် ဒါခိုယ် ဒီ အာတ့် ဇဝ်ဖြာ ဒီ ဒူင် ရဝ်း ဇဝ်ဖြာ။ ဘော ဘေ ဘော ဂွန် အီမာယ် ဂေ ဂွန် အီဘိုန့် ဘေ ဘော မှာယ် ဘေ အီ မုး အီမာယ် အီဘိုန့် ဘော ဂေ ဒူအီ အာလေဝီ ဘော ခဲတ့် အီ ကွယ် ဒူပ် ဘေ ဘော ဂွန် ဆီပြး ဂေ ယာ ဆီပြး အီ ကွယ် ဒူပ် ဘေ၊ တဲး ဘေ ဘောကာဂ့လျီတ် ဘူင် ဘ့လွယ် တီ။ 12 တဲး ဘေ လှုဝ်း ဒေါ ဘဲန် ဘေ မှာယ် အီ ဟဝ် ခဲင် မိူင် အဲဂိုပ် တွိုန်။ တဲး ဘေ ဆာဒိက်၊ တဲး ဘေ ဘူင် ဒူပ် ဒါရာ အန် ဇဝ် ဇိုဝ် တီ။
13 ဝါယ် ဟဲ့ ဟွတ့် မး ဘေ ဒီ ငှုဝ် ဘော ဟဲ့ ဟွတ့် နျီ့ ဘေ ဘ့လေ မာငုန်၊ ဘေ လုဝ် ဝီ ဘူင် ဘ့လွယ် ကွယ် ခဲင် ထိုပ် အာဒါ ဘူ ဆီငဲ။ 14 ဘော ဘေ ဘော ဂွန် အီမာယ် ဂေ ဂွန် အီဘိုန့် ဘေ ဘော မှာယ် ဘေ အီ မုး အီဘိုန့် အီမာယ် ဘော ဂေ ဒူအီ အာလေဝီ ဘော ခဲတ့် အီ ကွယ် ဒူပ် ဘေ ဘော ဂွန် ဆီပြး ဂေ ယာ ဆီပြး အီ ကွယ် ခဲင် မိူင် ဒူပ် ဘေ၊ ဘေ လုဝ် ဘူင် တဲး န့ ကော ဘျုဝ် ဘျုဝ် ကျဝ် ကျဝ်။ 15 ဒေါ ဘူင် ဘေ ဘ့လွယ် ကွယ် ခဲင် ထိုပ် အာဒါ ဘူ ဆီငဲ တီ၊ တဲး ဘေ အိူပ် မျုက် ဇဝ်ဖြာ ပီ ကြိုပ် ဘေ။ တဲး ဘေ ဘူင် ဘ့လွယ် တီ ဒီ ဒူင် ရဝ်း ဇဝ်ဖြာ တဲး ဘေ ကြိုပ် အန်။ တဲး ဘေ ခူယ် ဒါခိုယ် ခုဝ်၊ ဇဝ်ဖြာ ဒီ မွင့်ကာရာ တဲး ဂါန် ပီ ဘူင် ဘေ ဘော ပီ ပိတ် ပီ ဆမ် ဘေ။
16 ခဲ့ ကွယ် အီမာယ် ဒူအီ အာမျုဝ် ဘေ ဘောကာဂ့လျီတ်၊ ဂေ လုဝ် တး ကြိုပ် ဇဝ်ဖြာ အူ ဆီနမ် အူယ် ဇေန့်။ တဲး ဂေ ကြိုပ် ဇဝ်ဖြာ ဒီ ဒူင် ရဝ်း ဇဝ်ဖြာ တွိုန်။ ဘ့လွယ် အူယ် မျုဝ် တီ၊ န့ ဘော မုး ဘ့လွယ် လှုဝ်း ဒေါ ကာလုဝ်း ဇဝ်ဖြာ ကာင် ဘေ၊ ဘ့လွယ် ဆုဝ့် ငှုဝ် ဘော ဘ့လွယ် ကွယ် ခဲင် ထိုပ်။ ဘေ တူ ပွိုန် ဟာဝ် ဒူင် ကွယ် ဇဝ်ဖြာ ဒုဝ် ဒီလူယ် ဒီလာယ်။ 17 ဒူအီ ဒွန် အီ လုဝ် ဒိုဝ်း တး ပီ ဒီ လှူ၊ တဲး န့ ကာဒါန် ခဲ့ ပဲ့ ဟဲ့ မွင့်ကာရာ ဒွါ ဇဝ်ဖြာ ဒီ အန်။
လွင် ဒါ တာင် အီ ဆုင်ဖျာတ် ဒါရာ
18 ဘေ လုဝ် ဒါင် တဲး န့ မိုဝ်း ဒါ တာင် အီ ဆုင်ဖျာတ် ဒါရာ ဘော ဒါ တာင် အီ အိုပ် မိူင်။ တဲး ဂေ အိုပ် ခဲင် မိူင် ဒွန် မိူင် ပီ ဒီ အာပ် ဇဝ်ဖြာ ဒီ ဘေ။ ဒါ တာင် ဂေ တီ၊ ဂေ ဘော လုဝ် ဆုင်ဖျာတ် ဆိူဝ် ဆိူဝ် မှာန် မှာန် ဒီ ဂေ ဒူအီ ကိူန်။ 19 ဒါ တာင် တီ အာဝ် ပွိုန် မိုဝ်း နဝ်း ဂုဝ့်။ အာဝ် ပွိုန် မိုဝ်း ဒူင် ရွက့် ဒူင် ဇွင့်။ အာဝ် ပွိုန် ပြာ ဒီ ဟူမ် ရွိုန် ပီ မွှန် အီ ဟဝ်။ ရွိုန် ပီ မွှန် အီ ဟဝ် တီ၊ န့ ဘော နပ် ဒီ ဘူင် တဲး ဒူအီ အီ မိုဝ်း အာငျာန် ပီ ဒူအီ ငါယ် အပ်၊ တဲး ဘော ဒူအီ နဝ်း ဆိူဝ် နဝ်း မှာန် ဝီ ဆုင်ဖျာတ် ကာလိုပ်။ 20 ဆေ ဘေ ဆုင်ဖျာတ် ဆိူဝ် ဆိူဝ် မှာန် မှာန် ဘော ဒူပ် ဒါရာ ဆေဆေ၊ န့ ဒီ တဲး အာဆာက် ဘေ တူင့်၊ တဲး ဘေ ဘော ပွိုန် ဒီ ဘိုင် လှေန့် ခါဂုန် ပဲ့ ဟဲ့ အာပ် ဒွါ ဇဝ်ဖြာ ဒီ ဘေ။
လွင် ဇဝ် ပီ ကြိုပ် အီ ဟဝ်