1 အာမုဝ်ဆဲ ဟဲ့ ဝီ တဝ်း၊ “ဘူ ဆီနမ် အူ ဇေန့် ဘေ လုဝ် ခ့ဝါင် နီ ပီ ထုက် အီ ဟဝ် ဒီ ဘေ။

2 ပီ ဒီ လုဝ် ဘူင် ဘေ န့ ပါယ် နီ။ ဒါ ကာညာ နီ ဒွန် အီ လုဝ် ခ့ဝါင် ပဲ့ ဟဲ့ ဒွါ အန် အီ ဟဝ် ကာရဝ်း ဒီ အန်။ ဆေ အီ ကာရဝ်း တီ မုး ဒူအီ အီဆာရေလ အီ မုး ဘီနွင် အန်၊ အန် တူ ပွိုန် မှာန့် နီ တီ။ ခုဝ်၊ ဇဝ်ဖြာ ဟဲ့ ဟွတ့် ကာလာင် အုန် အာခြာဝ် ဒီ ခ့ဝါင် နီ တီ။ 3 ဘေ ယီ ဟဲ့ ပွိုန် မှာန့် နီ ဘေ ဒီ ဒူအီ အာမျုဝ် ဟဝ်။ ဆေ န့ ယီ မုး ဘီနွင် ဘေ အီ ဟဲ့ ကာရဝ်း ဒီ ဘေ၊ ဘေ လုဝ် ခ့ဝါင် နီ အန် တီ။ 4 ကွဲ့ တဲး န့ မိုဝ်း ဒူအီ ဂိန် ဒူအီ အေတ့် ခေါ အူ ဝီ ကာတဲ ဘေ။ ခုဝ်၊ ဇဝ်ဖြာ ဒီ မွင့်ကာရာ ဒွါ ဒီ ဘေ ခဲင် မိူင် ပီ ဒီ အာပ် အန် ဒီ ဘေ အီ ဒီ ဘဲန် ခါဂုန် ဘေ။ 5-6 ဆေ ဘေ ထူမ် ဂြုဝ်း ပီ ကာလာင် ဇဝ်ဖြာ ဒီ ဘေ ဘော ဘူင် ဒူပ် ဒါရာ ဒွန် မျုဝ် ပီ ကာလာင် အုဝ် ဒီ ဘေ အာတိုဝ် နီ၊ ဇဝ်ဖြာ ပီ ကြိုပ် ဘေ ဒီ မွင့်ကာရာ ဒွါ ဒီ ဘေ၊ တဲး န့ ဒူပ် ပဲ့ ဟဲ့ ဒွိုမ် ကာဆဲန့် အန် ဒီ ဘေ။ ဘေ ဒီ ဘော ပွိုန် ဒွါ ဒီ ဒူအီ ကိူန် ဝီ ကာရဝ်း ကာဝါယ် ဒီ ဘေ။ ဘေ ယီ တူ လုဝ် ဝီ ကာရဝ်း ကာဝါယ် ဒီ အာဆေ။ ဘေ ဒီ ဘော ပွိုန် ဒီ အိုပ် အာမျုဝ် ဒူအီ ကိူန်၊ ယီ တူ မိုဝ်း ဒူအီ မျုဝ် ဟဝ် အီ ဒီ ဝီ အိုပ် ဘေ။

7 ခဲင် မိူင် ပီ ဒီ အာပ် ဇဝ်ဖြာ ဒီ ဘေ တီ၊ န့ ဘော မုး မိူင် မှဝ် အာဝ် တဝ်း၊ ဆေ န့ မိုဝ်း ဒူအီ အီဆာရေလ အီ အေတ့်၊ အီ တူ မိုဝ်း မာဆေ၊ ကွဲ့ တဲး ဘေ ဂျြီ့၊ ဘေ ဝး ဒီ စွယ် အန်။ 8 တဲး ဘေ မိုဝ်း နဝ်း ဆီ ပဝ်း၊ နဝ်း ဟာင်၊ ဒွါ အန် ကာရဝ်း ကာဝါယ် ဒီ ဘေ။ တဲး န့ ကော ဂြုဝ် ခဲ့ လုဝ် အန်။ 9 ဆေ ဆီနမ် န့ ဘူ ပီ လုဝ် ခ့ဝါင် ဘေ နီ ဒီ အီ ဟဝ် တီ ဟဲ့ ကာတတ် ဒီ ဇမ်၊ ကွဲ့ တဲး ဘေ မိုဝ်း နဝ်း တူ ဆီ ဒွါ အီ ဟဝ် ကာရဝ်း ကာဝါယ် ဒီ ဘေ။ ကွဲ့ တဲး အီ ဟာယ် ဇိုဝ် တီ ပွိုန် ဒီ လိုပ် ခဲင် နဝ်း ဘေ။ ဆေ ဘေ ယီ ပီလိုပ် ပီလေး ငါယ် ဘေ လွင် အန်၊ ဘော တူ ဒွါ အန် ကာရဝ်း ကာဝါယ် မာဆေ၊ ဆေ အန် ဟီ ဆာခိုဝ် ကာလာင် ဒီ ဇဝ်ဖြာ၊ န့ ဒီ ဘဲန် မှာပ် ဒီ ဘေ။ 10 ကွဲ့ တဲး ဘေ လှယ့် ကြုဝ် ဘေ၊ တဲး ဘေ ဒွါ ဒီ အန်။ ဆေ ဘေ ဘူင် ပါယ် တီ ဇဝ်ဖြာ ပီ ကြိုပ် ဘေ ဒီ မွင့်ကာရာ ဒွါ ဒီ ဂါန် ပီ ဘူင် ပီ ရန့် ဘေ ဒွန် မျုဝ်။ 11 ဒူအီ ဒုက် ဒူအီ ဂိန် ဘော ဒူအီ အီ ဇုတ် လုတ် ဒီ ဘော မိုဝ်း ဆေဆေ ခဲင် မိူင် ဘေ။ ခုဝ်၊ အုဝ် ဒမ် ဘေ၊ တဲး ဘေ မိုဝ်း နဝ်း ဒီဟာင် ဒီ ဂေ။

12 ဆေ န့ မိုဝ်း ဒူအီ ဟဲဘြဲ ကာတဲ ဘေ အီ ဟဲ့ ယွင့် ဒုဝ် အန် ဘဲန် မှာယ် ဘေ၊ ဘော မုး အီဘိုန့် ဘော မုး အီမာယ်၊ ဆေ ဘေ ဟဲ့ ဆုတ့် ဟဲ့ စ်ု အန် အာဒါ ဒဝ် ဆီနမ်၊ ပန် ဒီ ဇမ် ဆီနမ် န့ ဘူ၊ ဘေ လုဝ် ဘ့လေး မှာယ် ဘေ၊ တဲး ဂေ လေး။ 13 ဆေ ဘေ ဟဲ့ ဟွတ့် ဘ့လေး တဲး ဂေ လေး၊ ဘေ ကွဲ့ တဲး ဂေ လေး ဟာဝ် ဒုဝ် ဒီလူယ် ဒီလာယ်။ 14 ခဲ့ ပီ မွင့်ကာရာ ဒွါ ဇဝ်ဖြာ ဒီ ဘေ၊ ဘော မုး ဖိုင် မာဘူ ဘေ ဘော ငှုဝ် ဘေ ဘော အိုမ် မာငုန် ဘေ တဲး ဘေ မိုဝ်း နဝ်း ဒါခိုယ်၊ နဝ်း ဇွန်ဇူမ် ဒီ ဒွါ ဒီ ဂေ။ 15 တဲး ဘေ လှုဝ်း၊ ဘော ဘေ ဟဲ့ ဒွိုမ် ဘဲန် မှာယ် အီ ဟဝ် ခဲင် မိူင် အဲဂိုပ် တွိုန်။ ဇဝ်ဖြာ ယီ ဟဲ့ ချွတ် လေး ဘေ။ ကူပ် န့ ပါယ် တီ အုဝ် ဒွါ ဒါရာ နီ ဒီ ဘေ အာတိုဝ် နီ။

16 မာလဲ၊ ဆေ မှာယ် အူ ဝီ ယီ တူ ဆီ လေး တူ ဆီ ဟာဝ်၊ ဆေ အန် မိူဝ် ရွက့် ဘေ ဘော ဒူအီ ခဲင် န့ဟူမ် ဘေ၊ ဆေ အန် တဝ်း ဒီ ဘေ၊ အန် ဆီ ကွယ် ရိုမ် ဒူပ် ဘေ၊ 17 တဲး ဘေ ဒိုဝ်း ဟာဝ် အန် ဒီ ဘာင် မာလုဝ်း ကာင် ဘေ၊ ဘော ဒိုဝ်း ကာလွင့်၊ ဘ့လုး ဟျုဝ့် အန်။ ပါယ် တီ အန် ဒီ ဘဲန် မှာယ် ဘေ ဘော စုဝ် အန်။ ဘော ဒီ မှာယ် အီဘိုန့် လုဝ် ဘူင် ပါယ် တီ။

18 ဆေ ဘေ ဟဲ့ ဟွတ့် ဘ့လေး မှာယ် ဘေ တဲး အန် လေး၊ ကွဲ့ တဲး ဘေ ဝီ လှယ့်။ ခုဝ်၊ အန် ဟဲ့ ခမ် ဒီ ဘဲန် ဒဲစေန့် ဘေ ဒဝ် ဆီနမ်၊ ဂါန် ပဲ့ ဟဲ့ ဘူင် အန် ဟဲ့ ဟွတ့် ကာဒါန် အာဒါ အာ ဘုန် လွှိုမ် ဂါန် ပီ ဘူင် ဒူအီ အီ ဇာင် ဒီ ဘေ။ ဆေ ဘေ ဘူင် ပါယ် တီ ဇဝ်ဖြာ ပီ ကြိုပ် ဘေ ဒီ မွင့်ကာရာ ဒွါ ဒီ ဂါန် ပီ ဘူင် ပီ ရန့် ဘေ ဒွန် မျုဝ်။

19 ခဲင် ဖိုင် မာဘူ ဘော ဖိုင် မာမက် ဘေ အီ မိုဝ်း ဂွန် ဂိန့် ဒုဝ် အာလူင့်၊ ဘေ လုဝ် ဒိုဝ်း ဒွန် ဒုဝ်၊ အုန် အာဒါ ဇဝ်ဖြာ ပီ ကြိုပ် ဘေ။ ဂွန် မာမက် တီ ဘေ မိူဝ် တူ ပွိုန် စ်ု ဘူင် ဂါန် ဘေ။ ဂွန် မာဘူ တီ မိူဝ်၊ ဘေ တူ ပွိုန် ကပ် ဟိုက် အန်။ 20 ဒွန် ဆီနမ် ဘော ဘေ ဘော ဒူအီ ခဲင် န့ဟူမ် ဘေ၊ ဘေ လုဝ် ဒိုဝ်း ဂွန် မာဘူ ဘော ဂွန် မာမက် တီ၊ ဟာဝ် ဒီ ဒူင် ရဝ်း အုန် ဇဝ်ဖြာ တဲး ဘေ ကြိုပ် အန်။ ဘေ ဘော လုဝ် ငဝ်း ဟူမ် ဒုဝ် တီ ဒီ အာတ့် ဇဝ်ဖြာ။ 21 မာလဲ၊ ဆေ ဂွန် မာဘူ ဂွန် မာမက် ဘေ တူ ဆီချာ၊ ပ့လဝ် မိူဝ် ဂုဝ့် ဂဲ့၊ ငါယ် အပ် ဘော မိုဝ်း ဒူင် စှေ၊ အာဝ် ပွိုန် လှူ ဒီ ဇဝ်ဖြာ။ 22 ဆေ ဒုဝ် အန် ပါယ် တီ ဘေ ဟဲ့ ပွိုန် ငဝ်း ဟူမ် ဒီ ကာင် ဘေ။ ဘော ဘေ အီ ဆီငါ ဒူပ် ပီ ဒမ် ဒါရာ ဘော အီ တူ ဆီငါ ဒူပ် ပီ ဒမ် ဒါရာ ဟဲ့ ပွိုန် ဟူမ် ဒွန် အီ၊ တဲး န့ ပီ ဘေ ဟူမ် ယင် မင်ဂျီး ဂေ ယင် မာဇ။ 23 မာလဲ၊ ဘေ ကွဲ့ ဟူမ် နှာမ် အန်။ ဘေ လုဝ် ဟုး ဝဲန် နှာမ် အန် တီ ဒဲင် ကာဒါယ်၊ တဲး န့ ပီ ဘေ ဟုး ဝဲန် အိုမ်။”