1 အာမုဝ်ဆဲ ဟဲ့ ဝီ တဝ်း၊ “ဘေ ဟဲ့ မုး ဒူအီ ပီ အိုပ် ဇဝ်ဖြာ ပီ ကြိုပ် ဘေ။ ခုဝ်၊ ဒေါ ယာမ် ဒေါ က့လိုဝ် ဘေ ကူပ် ဒူအီ ယမ်၊ ဘေ ကွဲ့ ဆွာ့ ကွဲ့ ကြိး ယင် ဘေ။ ဘေ ကွဲ့ ဂါ့ ဟိုက် နာ ဒဲင် ကာတဝ်း ဘေ။ 2 ခုဝ်၊ ဘေ ဟဲ့ ဘဲန် ဒူအီ အီ ဆီငါ ဘွတ် ဘော ဒူအီ ပီ အိုပ် ဇဝ်ဖြာ ပီ ကြိုပ် ဘေ။ ဇဝ်ဖြာ ဟဲ့ ရဝ်း လေး ဘေ ခဲင် ဒူအီ ဒွန် မျုဝ် ဒဲင် ကာဒါယ် နီ၊ တဲး ဘေ ဝီ ဘဲန် ပီ ကြုဝ် အန် အီ ဟဲ့ ဘွတ်၊ ဟဲ့ ငဝ်း တာင်။

3 ဘေ ကွဲ့ ဟူမ် ခေါ အူ မျုဝ် ပီ တဝ်း ဇဝ်ဖြာ အာဝ် ဆီငါ။ 4-5 ဒုဝ် ဆတ်ဒါဝါ ပီ ပွိုန် ဘေ ဟူမ်၊ န့ ဘော မုး မာမက်၊ မာဘူ၊ မာပဲ၊ မာဇ၊ မင်ဂျီး၊ မာဘွုး၊ မာပဲ ပြဲ၊ မာပဲ ဒီ နွန်၊ မာဘွုး မ့ဘာတ့် ဘော မာဘူ ပြဲ။ 6 ခဲ့ ကွယ် ဒုဝ် ဆတ်ဒါဝါ အီ မိုဝ်း ဂိပ် ရာ၊ အီ နပ် ဒီ ဝီ ဆုဝ်း ပီ ဟူမ် အန်၊ ဇိုဝ် တီ ဒွန် မျုဝ် ဘေ ဟဲ့ ပွိုန် ဟူမ်။ 7 ပါယ် တီ ဒုဝ် ဆတ်ဒါဝါ အီ မိုဝ်း ဂိပ် အီ တူ ရာ၊ အီ တူ နပ် ဒီ ဝီ ဆုဝ်း ပီ ဟူမ် အန်၊ ဘေ တူ ပွိုန် ဟူမ် ဒေါ မှဝ်။ ဘော မင်ပြွင့် ကာဟာတ့်၊ မာယုန် ဂေ မာယုန် ပြဲ၊ ဘေ ကွဲ့ ဟူမ်။ ဒုဝ် ဆတ် ဇိုဝ် တီ၊ ဂေ ပီ ဘော ဟဲ့ နပ် ဒီ ဝီ ဆုဝ်း ပီ ဟူမ် ဂေ မိူဝ်၊ ဂိပ် ဂေ ယီ တူ ရာ။ ခုဝ်၊ ဘေ လုဝ် မာတ် ဒုဝ် ဆတ် ဇိုဝ် တီ မုး အီ တူ ဆီငါ။ 8 ဘော မာလေတ့် ဘေ ကွဲ့ ဟူမ်။ ဂိပ် ဂေ ပီ ဘော ဟဲ့ ရာ မိူဝ်၊ ဂေ ယီ တူ နပ် ဒီ ဆုဝ်း ပီ ဟူမ် ဂေ။ ခုဝ်၊ ဘေ လုဝ် မာတ် န့ မုး ဒုဝ် ဆတ် အီ တူ ဆီငါ။ ယင် ဒုဝ် ဆတ် ဇိုဝ် တီ၊ ဘေ ကွဲ့ ဟူမ်။ ဘော ဒုဝ် ယမ် ဂေ၊ ဘေ ကွဲ့ ပါ။

9 အီ မုး မာဂါ၊ ဆေ ဟဲ့ မိုဝ်း ကုက် မိုဝ်း ဂဲတ်၊ ဘေ ဟဲ့ ပွိုန် ဟူမ် ဒွန် မျုဝ်။ 10 မာလဲ၊ ဒုဝ် ဆတ် အီ ကွယ် ခဲင် အိုမ်၊ ဆေ အာဝ် မိုဝ်း ကုက် အာဝ် မိုဝ်း ဂဲတ်၊ ဘေ တူ ပွိုန် ဟူမ်။ ဘေ လုဝ် မာတ် န့ မုး ဒုဝ် ဆတ် အီ တူ ဆီငါ။

11 ဘော မာဆိမ် အီ ဆီငါ ဒူပ် ပီ ဒမ် ဒါရာ ဘေ ဟဲ့ ပွိုန် ဟူမ် ဒွန် မျုဝ်။ 12-18 မာဆိမ် ပီ တူ ပွိုန် ဟူမ် ဘေ၊ အီ မွှိုမ် ကာအိး မွှိုမ် ကာဒါတ့် ဒီ ဘေ၊ န့ ဘော မုး မာလင်ဒါ၊ မာဂ့လာင် တာင်၊ မာတီတုတ်၊ မာဂ့လာင် ဒွန် မျုဝ်၊ မာကာအ ဘော ဒွန် မျုဝ်၊ မာဒီဘုဝ့် ဒွန် မျုဝ်၊ မာဆိမ် ကဲဝက်၊ မာဘေပ် ကာကာ၊ မာတီတုတ် ဘော မာလင်ဒါ အီ ဟူမ် ယင် ဒုဝ် အီ ဟဲ့ ဟွတ့် ယမ်၊ မာနူက်ကွန်၊ မာနုဝ်ကျာင်၊ မာပြာန့် ဘော မာကာလ။

19-20 ဘော မာဝ အီ မိုဝ်း ဖျီင် အီ နပ် ဒီ ဘိုန့် ဘဲန် ဖိုင် ဘဲန် ဖိုင် အီ တူ ဆီငါ ဒူပ် ပီ ဒမ် ဒါရာ၊ ဘေ တူ ပွိုန် ဟူမ်။ ဆေ န့ ယီ မုး မျုဝ် အီ မိုဝ်း ဖျီင် အီ ဟဲ့ ဆီငါ ဒူပ် ပီ ဒမ် ဒါရာ၊ ဘေ ဟဲ့ ပွိုန် ဟူမ်။

21 ကွဲ့ ဟူမ် ဒုဝ် ဆတ်ဒါဝါ အီ ယမ် ရာင် အန်။ ဘေ ဟဲ့ ပွိုန် ဒွါ ဒီ ဒူအီ အာမျုဝ် ဟဝ် အီ ကွယ် ကာတဲ ဘေ၊ တဲး ဂေ ဟူမ်။ ဆေ အာဝ် ပါယ် တီ ဘေ ဟဲ့ ပွိုန် ယွင့် ဟာဝ် ဒီ ဒူအီ မိူင် တေတ့် မိူင် တ၊ တဲး ဂေ ဟူမ်။ ဘေ မုး ဒူအီ အီ ဆီငါ ဘွတ် ဒီ အာတ့် ဇဝ်ဖြာ ပီ ကြိုပ် ဘေ။ ဘေ ကွဲ့ ဒိုဝ်း ယင် ဂွန် မာမက် ဂွန် မာဘူ၊ ဝီ ဒင် ကာဆူ အိုမ် ပူ မာ အန်။

22 ခဲ့ ကွယ် မျုဝ် အီ ဟဲ့ လတ့် ဟဲ့ ဘြဲ ခဲင် မာန် ခဲင် ဒူင် နာ ဘေ၊ ဘေ လုဝ် ကာယဝ်း လေး ဂိုဝ် ဘုန် အူ ဘုန်။

23 ဟဲ့ ဟွတ့် ပါယ် တီ ဘေ လုဝ် ဟာဝ် ဒူင် ဟဲ့ ရဝ်း အုန် ဇဝ်ဖြာ ဒီ ကြိုပ် အန်။ ဒီ တီ ဘေ ဟဲ့ ပွိုန် ဟူမ် ရိုမ် ဒီ အာတ့် ဇဝ်ဖြာ။ ပီ လှူ ဘေ ဂိုဝ် ဘုန် အူ ဘုန် တီ၊ န့ ဘော မုး ငှုဝ် ဘော အိုမ် မာငုန် ဘော နာမန်၊ ဂွန် မာဘူ ဘော ဂွန် မာမက် အီ မုး ဂွန် ဂိန့် ဒုဝ် အာလူင့်။ ဘေ လုဝ် ဘူင် ပါယ် တီ တဲး န့ မာနုဝ် ဘေ လွင် မှဝ် ဒီ ပါယ် ဒီ ရုဝ်ဆေ ဇဝ်ဖြာ ပီ ကြိုပ် ဘေ။ 24 ဆေ ဒူင် ပီ ရဝ်း အုန် ဇဝ်ဖြာ တီ ဟဲ့ တူင့် ကာဆဝ်၊ ဆေ ဇဝ်ဖြာ ဟဲ့ မွင့်ကာရာ ဒွါ ဒီ ဘေ၊ ဘေ မိူဝ် တူ ပဲ ဒီ ဒိုဝ်း ဟာဝ် ဂိုဝ် ဘုန် အူ ဘုန် တီ။ 25 တဲး ဘေ ယွင့် တူတ့်၊ တဲး န့ ဘဲန် ရွိုန်။ ဟဲ့ ဟွတ့်၊ တဲး ဘေ ဝီ ဒိုဝ်း ရွိုန် တီ၊ ဟာဝ် ဒူင် ဟဲ့ ရဝ်း အုန် ဇဝ်ဖြာ၊ တဲး ဘေ ကြိုပ် အန် ဒီ တီ။ 26 ပန် တီ ဘေ ဘော ဝီ ဟာဝ် စိုဝ်း ယင် ပီ ဆီ ဟူမ် ဘေ၊ စိုဝ်း ယင် မက်၊ ယင် မာဘူ၊ အိုမ် မာငုန်၊ အိုမ် ပဝ်း ပေါ မျုဝ်၊ စိုဝ်း ဒွန် မျုဝ် ခဲ့ ပီ ဆီ ဟူမ် ဘေ၊ တဲး ဘေ ဟူမ် ဒီ တီ။ ဘော ဘေ ဘော ဒူအီ ခဲင် န့ဟူမ် ဘေ၊ တဲး ဘေ ဘောကာဂ့လျီတ် ဟူမ် ဒါခိုယ်၊ ဟူမ် ဘျုဝ် ဘျုဝ် ဒီ အာတ့် ဇဝ်ဖြာ ပီ ကြိုပ် ဘေ။ 27 ဘေ ကွဲ့ ပိဝ် ဂေ ဒူအီ အာလေဝီ အီ ကွယ် ဒူပ် ဘေ ခဲင် မိူင် ဘေ။ ဂေ တူ ပွိုန် ခါဂုန် ပီ ဘေ။

28 ဒွန် ဇေန့် ဝါယ် ဟဲ့ ဟွတ့် အူယ် ဆီနမ်၊ ဘေ လုဝ် ဒိုဝ်း တူတ့် ပီ လှူ ဘေ ဂိုဝ် ဘုန် အူ ဘုန်၊ တး ကာဇု ခဲင် မိူင် ဒူင် ကွယ် ဘေ။ 29 ဇိုဝ် တီ န့ ဒီ ဘဲန် ပီ ဒီ ဟူမ် ဂေ ဒူအီ အာလေဝီ အီ တူ ပွိုန် ခါဂုန် မာဆေ ဘော ဂေ ဒူအီ အီ မုး ခဲတ့် ခဲင် မိူင် ဘေ၊ ဘော ဂေ ဂွန် ဆီပြး ဂေ ယာ ဆီပြး အီ ကွယ် ခဲင် မိူင် ဘေ တီ။ ပါယ် တီ ဂေ ပွိုန် ဒီ ဟူမ် ဖဲ ဟူမ် ဒါခိုယ်။ ဆေ ဘေ ဘူင် ပါယ် တီ ဇဝ်ဖြာ ပီ ကြိုပ် ဘေ ဒီ မွင့်ကာရာ ဒွါ ခဲ့ ပီ ဘူင် ဘေ ဒွန် မျုဝ်။”