1 အာမုဝ်ဆဲ ဟဲ့ ဝီ တဝ်း၊ “ဆေ န့ မိုဝ်း ဒူအီ မင် အီ ဒူင် ကွယ် ဘေ ဘော မုး ဒူအီ အီ တဝ်း ဒီ ဘျာန် ဂြုဝ်း ဇဝ်ဖြာ ဘော မုး ဒူအီ အီ နပ် ဒီ ကာတာမ် မ့ဘာဝ် ဘော တဝ်း၊ ဂေ နပ် ဒီ ဘူင် အီ မွှိုမ် အာမ် မင် မျုဝ်၊ ဆေ ဂေ ဘော ကာလာင် ဒီ ဘေ တဝ်း၊ 2 ‘တဲး အေ ဝီ ကြိုပ် ဇဝ်ဖြာ ပေါ အူ ကာဒင်၊’ ဂေ ဘော ဘူင် တဲး ဘေ ဒူပ် ဇဝ်ဖြာ ပီ တူ နပ် ဘေ။ အီ မွှိုမ် အာမ် ပီ ဘျ ဂေ ပီ ဘော ဟဲ့ မှာန် မိူဝ်၊ 3 အာဝ် လုဝ် ထူမ် ဂြုဝ်း ပီ ကာလာင် ဒူအီ ဂေ တီ။ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ထေဝ် ဒီ ယွတ် နဝ်း ဘေ၊ တဲး အန် နပ် ယုဝ် ဘေ ဟဲ့ ရွက့် ဇဝ်ဖြာ ပီ ကြိုပ် ဘေ၊ ယုဝ် န့ ဘာ ဘော နဝ်း ဘော ဖွိုမ် ဘေ။ 4 ဘေ လုဝ် ဒူပ် ဇဝ်ဖြာ ဘော ယုဝ် မီ အန်။ တဲး ဘေ ထူမ် ဂြုဝ်း အန် ဘော ဘူင် ဒူပ် ပီ အိုင် အန်၊ တဲး ဘေ ဘော ကွယ် ကာဒိုက် ကာဒဝ့် ဒီ အန် ဇဝ်။ 5 ယီ မုး ဒူအီ အီ ဘျာန် ဂြုဝ်း ဇဝ်ဖြာ တွိုန် ဘော ဒူအီ အီ နပ် ဒီ ကာတာမ် မ့ဘာဝ် တီ၊ ဘေ လုဝ် ငဝ်း ဝဲန် ဂေ။ ခုဝ်၊ ဂေ ဟဲ့ ကာဆုး ဘေ၊ တဲး ဘေ ဝီ ကာဘး ဒီ ဇဝ်ဖြာ အီ ဟဲ့ ချွတ် လေး ဘေ ခဲင် မိူင် အဲဂိုပ် အီ မုး ဒူင် ပဲ့ ဟဲ့ ဒွိုမ် ကွယ် ဘေ ဘော ဘဲန် မှာယ် အီ ဟဝ်။ ဒူအီ ဇိုဝ် တီ ဟဲ့ ဟာယ် ကာဆဝ်။ ဂေ ဟဲ့ ထေဝ် ဒီ ဘူင် တဲး ဘေ ဝဲန် ဒါရာ ပီ လုဝ် ဒူပ် ဘေ၊ ပီ ကာလာင် အုန် ဇဝ်ဖြာ ဒီ ဘေ။ ခုဝ်၊ ဂေ လုဝ် ယမ်။ ဘေ ဘော လုဝ် ဒိုဝ်း ဝဲန် အီ တူ မွှိုမ် ကာတဲ ဘေ။

6 ဆေ န့ ဘော မုး အီကတ် ဘေ၊ ဝါ ဘေ၊ ဂွန် အီဘိုန့် ဂေ ဂွန် အီမာယ် ဘေ ဘော အီဘိုန့် ပီ ရွက့် ဘေ၊ ဂိုက် အီ ကာလဝ့် ဒီ ဘေ၊ ဆေ ဂေ ဝီ ထေဝ် ဒီ ကာဆုး ဘေ တဝ်း၊ ‘တဲး အေ ဝီ ကြိုပ် ဇဝ်ဖြာ ပေါ အူ ကာဒင်၊’ အီ မုး ဇဝ်ဖြာ ပီ တူ နပ် ဘေ ဘော ပီ တူ ဒွိုမ် နပ် ဂုန့် ဒင် ဘေ၊ ကွဲ့ ထူမ် ဂြုဝ်း ဂေ တီ။ 7 ဘော မုး ဇဝ် ပီ ကြိုပ် အီ ဟဝ် အီ ဟဲ့ ကွယ် ရူပ် ဘေ ဒွန် ဘ့လာက်၊ န့ ဘော မုး ဇဝ် အီ ကွယ် ဒူင် ကာတတ် ဘော ဒူင် ကာတူင့်၊ 8 ဘေ ကွဲ့ တဲး အီ ပွိုန် ဒီ ကဝ် ဘေ။ ကွဲ့ တဲး ဘေ ထူမ် ဂြုဝ်း တီ။ ဘေ မိူဝ် အာဝ် လုဝ် ကာဝေ ဂေ၊ အာဝ် လုဝ် လှယ့် ဂေ။ ဘေ လုဝ် ဝဲန် ဂေ အီ ကာဆုး ဘေ ပါယ် တီ။ 9 ဘေ လုဝ် ငဝ်း ယမ် ဒူအီ ဇိုဝ် တီ အာခါခ်ု။ ဝီ အီ ဟဲ့ ထူမ် ဂြုဝ်း ပီ ကာဆုး ဂေ တွိုန်၊ အန် လုဝ် ဒိုဝ်း မာဝ်၊ ဝိုန့် ဒီ အာတ့် အီ ဟဝ် ဒွန် အီ။ ဟဲ့ ဟွတ့်၊ ဘော ဂေ ဒူအီ ကိူန် လုဝ် ဝိုန့်။ 10 တဲး ဘေ ဝိုန့်၊ တဲး ဒူအီ တီ ကော ယမ်။ ခုဝ်၊ အန် ဟဲ့ ကာဆုး ဘေ၊ တဲး ဘေ ဝး ဇဝ်ဖြာ အီ မုး ဇဝ်ဖြာ အီ ဟဲ့ ချွတ် လေး ဘေ ခဲင် မိူင် အဲဂိုပ် အီ မုး ဒူင် ပဲ့ ဟဲ့ ဒွိုမ် ဘဲန် ဘေ မှာယ် အီ ဟဝ်။ 11 ဆေ ဘေ ဘူင် ပါယ် တီ ဂေ ဒူအီ အီဆာရေလ ဟီ ယိုဝ် လွင် အန် တီ၊ ဂေ ဘောကာဂ့လျီတ် ဒီ ဘော ယုဝ် ကာဆဝ်။ အာဝ် ဟူ မိုဝ်း အာဆေ အီ ယ ဝီ ဘူင် ဟာယ် ဘူင် မိူက် ဇိုဝ် တီ ပေါ အူ ဇေန့်။

12-14 ဝါယ် ဇဝ်ဖြာ ဟဲ့ ဟွတ့် တဲး ဘေ ကွယ် ခဲင် မိူင် ဘဲန် မိူင်၊ ဆေ န့ မိုဝ်း ဒူအီ မင် အီ ကာတဲ ဘေ ခဲင် မိူင် အူ မိူင် အီ ဟဲ့ ဟာယ် ကာဆဝ်၊ ဂေ ဒီ ယဲတ့် ဒူအီ ခဲင် မိူင် ဂေ ကာလိုပ်။ ဆေ ဂေ ဒီ တဝ်း၊ ‘တဲး အေ ဟာဝ် ကြိုပ် ဇဝ် ပီ ကြိုပ် အီ ဟဝ်၊’ အီ မုး ဇဝ် ပီ တူ ဒွိုမ် နပ် ဘေ။ ဆေ ဘေ ယိုဝ် လွင် အန် တီ၊ ဘေ လုဝ် ဒီမွှတ် ဆီချာ ယုဝ် ဟဲ့ မှာန် တူ မှာန်။ ဆေ ဘေ ဘော နပ် ဆီချာ၊ လွင် အီ မွှိုမ် ကာအိး ဇိုဝ် တီ ဟဲ့ မှာန်၊ 15 ဘေ လုဝ် ငဝ်း ယမ် တူတ့် ဒူအီ ခဲင် မိူင် တီ ဘော ဒုဝ် ဆတ်ဒါဝါ ဂေ။ ဘေ လုဝ် ပျာတ့် ဝဲန် မိူင် တီ ဘော မိူင်။ 16 ဘေ လုဝ် ဒိုဝ်း ခဲ့ ကွယ် ကြုဝ်ကြာမ် ဂေ ဘောကာဂ့လျီတ်၊ တး ကာဇု အုန် ဒီဂ့လ ကာတဲ မိူင်။ ဘေ လုဝ် ဒိုဝ်း ဘော ငဝ်၊ ဒုဝ့် မိူင် တီ ဘော ကြုဝ်ကြာမ် ဂေ၊ တဲး န့ ဘဲန် ပီ လှူ ဒီ ဇဝ်ဖြာ အီ ဒုဝ့် ဒီ ငဝ်။ ဘေ လုဝ် ဘ့လေး မိူင် တီ တဲး န့ ရာမ် ဆေဆေ။ အာဝ် ပွိုန် ဝီ ဒဲ ဝီ မ့ပြာယ် ဒေါ မှဝ်။ 17 ကြုဝ်ကြာမ် ပဲ့ ဟဲ့ ဒိူင် ဟဲ့ အေး အုဝ် တဲး န့ လိုဝ် စှိုမ်၊ ဘေ တူ ပွိုန် ဒိုဝ်း အုန် ဒီ ဘေ ခေါ အူ မျုဝ်။ ဆေ ဘေ ဘူင် ဒူပ် ပါယ် တီ ဇဝ်ဖြာ ဒီ ဘော ပီဟြာယ် နဝ်း ရူ အန်။ အန် ဇဝ် ဒီ ဘော ဝီ ကာဝေ ဘေ၊ ဝီ တဲး ဘေ ဘြဲ ကိူန်၊ တဲး န့ ဒူပ် ပီ ဒွိုမ် ကာဆဲန့် အန် ဒီ ဂေ ဂုန့် ဒင် ဘေ။ 18 ကူပ် ထူမ် ဘေ ဂြုဝ်း ဇဝ်ဖြာ ပီ ကာလာင် အုဝ် ဒီ ဘေ အာတိုဝ် နီ ဘော ကူပ် ဘူင် ဒူပ် ဘေ ဒါရာ အန် ဒွန် မျုဝ်၊ အန် ဇဝ် ဒီ ဘော ဘူင် ပါယ် တီ။”