1 အာမုဝ်ဆဲ ဝီ တဝ်း၊ “အာနီ မုး ဒါရာ ပီ လုဝ် ဒူပ် ဘေ ခဲင် မိူင် ပီ ဒီ ဒွါ ဇဝ်ဖြာ ဒီ ဘေ။ အန် ဘော မုး ဇဝ်ဖြာ ပီ ကြိုပ် ဂေ ဂုန့် ဒင် ဘေ။ စုဝ် ကွယ် ဘေ ဒဲင် ကာဒါယ် နီ၊ ဘေ ဘော လုဝ် ဘူင် ဒူပ် ဒါရာ နီ။ 2 ခဲင် မိူင် ပီ ဒီ ဟာဝ် ဒိုဝ်း ဘေ တီ၊ ဘေ လုဝ် ပျာတ့် ဝဲန် တူတ့် ဒူင် ကြိုပ် ဂေ ဒီ ဇဝ် ဘဲန် မျုဝ် ဘဲန် မျုဝ်။ န့ ဘော မုး ဒဲင် နွန် စာ ဘော ဒဲင် နွန် ဒီတျီမ်၊ န့ ဘော မုး ဒီ ဒင် ဟေ တာင်၊ ဘေ လုဝ် ပျာတ့် ဝဲန် တူတ့် ဒွန် ပ့လုဝ့်။ 3 ဘေ လုဝ် ပျာတ့် ဝဲန် ဘော ကာစှူင့် လှူ ဂေ ဘောကာဂ့လျီတ်။ ဘေ ဘော လုဝ် မး ကာလာတ့် မာဝ် ဒူင် ကြိုပ် ဂေ၊ ဘော ဒိုဝ်း ရွင့် နာင် ကာနမ် အီ စိူဝ် အေဆူရာ၊ ဒုဝ့် ခဲင် ငဝ် ဘော ဂ်ု ကေး အာရိုပ် ရာင် ဒွန် မျုဝ်၊ ကွဲ့ တဲး အာဆေ ဆီ နမ်လှုဝ်း ဒူင် ကွယ် ဂေ တီ ဒေါ မှဝ်။

4 ဇဝ်ဖြာ ပီ ကြိုပ် ဘေ၊ ဘေ တူ ပွိုန် ကြိုပ် ပီ ဂေ ဟဲ့ ကြိုပ် ဇဝ် ဘဲန် မျုဝ် ဘဲန် မျုဝ်။ 5 ခဲင် ကာဒါယ် မိူင် ဒီ ဟာဝ် ကွယ် ဘေ ဒွန် ခြိုဝ်၊ ဇဝ်ဖြာ ဒီ ဘော ရဝ်း အူ ပ့လုဝ့်၊ တဲး န့ ဘဲန် ဒူင် ကွယ် အန်။ တဲး ဘေ ပွိုန် ဒီ ကြိုပ် အန် ဒီ တီ။ 6 ဒူင် တီ ဘေ လုဝ် ဒိုဝ်း တး ပီ ဒီ လှူ ဘေ ဒွန် မျုဝ်။ န့ ဘော မုး ပီ လှူ အီ ဒုဝ့် ဒီ ငဝ်၊ ပီ လှူ ဂိုဝ် ဘုန် အူ ဘုန်၊ ပီ လှူ ဘဲန် မျုဝ် ဘဲန် မျုဝ် ပဲ့ ဟဲ့ ကာဆဲန့် ဘေ ဒီ လှူ၊ ပီ လှူ ပီ ဆီ လှူ ဘေ ဘော ပီ လှူ အီ မုး ဂွန် ဂိန့် ဒုဝ် အာလူင့် ခဲင် ဖိုင် မာဘူ ဂေ မာမက် ဘေ။ ဘေ လုဝ် ဒိုဝ်း တး လှူ တူတ့် ဒီ တီ။ 7 ဒီ တီ ဘော ဘေ ဘော ဒူအီ ခဲင် န့ဟူမ် ဘေ၊ ဘေ ပွိုန် ဒီ ကွယ် ဒီ အာတ့် ဇဝ်ဖြာ ဘော ဟူမ် ဒါခိုယ်၊ ဟူမ် ဘျုဝ် ကူပ် ဟဲ့ မွင့်ကာရာ ဒွါ ဇဝ်ဖြာ ဒီ ပီ ရန့် ဘေ။

8 ပန် အန် တီ ဘေ တူ ပွိုန် ဘူင် ပီ ပီ ဘူင် အေ အာတိုဝ် နီ။ အေ ဆီ ဘူင် ဒူပ် ပီ အိုင် အေ ရာင် အာဆေ ရာင် အန်။ 9 ခုဝ်၊ ဘေ ညှမ် ဇမ် ဒူင် ဒီ ပွိုန် ဘေ ဒီလှဝ်။ ဘေ မိူဝ် ညှမ် ပွိုန် ခါဂုန် ပီ တဝ်း ဇဝ်ဖြာ ဒီ ဒွါ ဒီ ဘေ။ 10 ဆေ ဘေ ဟဲ့ ဟွတ့် ကာလုဝ်း အိုမ် ဘ့လဲင် ယောဒါန်၊ ဘေ မိူဝ် ဟဲ့ ဟာဝ် ကွယ် ခဲင် မိူင် ပဲ့ ဟဲ့ ဒွါ ဇဝ်ဖြာ တဲး န့ ဘဲန် ခါဂုန် ဒီ ဘေ။ ဘေ မိူဝ် ဟဲ့ ကွယ် ဒါခိုယ်၊ အာဝ် ဟူ မိုဝ်း ရန်ဆူ၊ အာဝ် ဟူ မိုဝ်း အာဖေ အာရေ မာဆေ။ 11 ပန် အန် တီ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဒီ ရဝ်း အူ ပ့လုဝ့်၊ တဲး န့ ဘဲန် ဒူင် ဒီ တး ကြိုပ် ဘေ ဒီ အန်။ ဒီ တီ ဘေ လုဝ် ဒိုဝ်း တး ပီ ဒွိုမ် ကာလာင် အုဝ် ဒီ ဘေ အီ မုး ပီ ဒီ လှူ အီ ဒုဝ့် ဒီ ငဝ်၊ ပီ ဒီ လှူ ဂိုဝ် ဘုန် အူ ဘုန်၊ ဘော ပီ ဒီ လှူ ပဲ့ ဟဲ့ ကာဆဲန့် ဘေ ဒီ လှူ။ 12 ဒီ တီ ဘေ ဒီ ဘော ဘျုဝ် ဒါခိုယ် ဒီ အာတ့် ဇဝ်ဖြာ။ ဘော ဘေ ဘော လှုက်လှာန် ဘေ ဘော မှာယ် ဘေ ဘော ဂေ ဒူအီ အာလေဝီ အီ ကွယ် ဒူပ် ဘေ ခဲင် မိူင် ဘေ၊ ဂေ အီ တူ ပွိုန် ခါဂုန် ပီ ပွိုန် ဘေ၊ ဘေ ဘောကာဂ့လျီတ် ဒီ ဘျုဝ် ဒါခိုယ် ပါယ် တီ။ 13 ဘေ ယီ လုဝ် ဆာဒိက်၊ ဘေ တူ ပွိုန် လှူ ပီ ဒီ လှူ ဒူင် ဆီ လှူ ဘေ။ 14 ဇဝ်ဖြာ ဒီ ရဝ်း အူ ပ့လုဝ့် ခဲင် ကာဒါယ် ခဲင် ခြိုဝ် ဘေ အူ ခြိုဝ်၊ တဲး န့ ဘဲန် ဒူင် ဒီ လှူ ဘေ ဒီ အန်၊ တဲး ဘေ လှူ ပီ ဒီ လှူ ဘေ မီ အူ ပ့လုဝ့် တီ။ ပီ ဒီ လှူ ဘေ အီ ဒုဝ့် ဒီ ငဝ်၊ ဘော ပီ ဒီ လှူ အာမျုဝ် ဟဝ် ခဲ့ ပီ ဒွိုမ် ကာလာင် အုဝ် ဒီ ဘေ၊ ဘေ ဟဲ့ ပွိုန် လှူ တူတ့် ဒွန် မျုဝ် ဒီ တီ။

15 ပီ ဘော ဟဲ့ ပါယ် တီ မိူဝ်၊ ဘေ ယီ ဟဲ့ ပွိုန် ငဝ်း ဒုဝ် ဆတ်ဒါဝါ ဘေ ခဲင် မိူင် ဘေ ဒွန် ပ့လုဝ့် ဘော ဟူမ် ယင် ဒုဝ် တီ ခဲ့ ဆီ ဟူမ် ဘေ၊ တဲး န့ ဘော ပီ ဘေ ဟူမ် ယင် မင်ဂျီး ဂေ ယင် မာဇ။ ဘော ဂေ အီ ဆီငါ ဒူပ် ပီ ဒမ် ဒါရာ ဘော ဂေ အီ တူ ဆီငါ ဒူပ် ပီ ဒမ် ဒါရာ၊ ဂေ ဒွန် အီ ဟဲ့ ပွိုန် ဟူမ် ယင် တီ၊ တဲး န့ ဒူပ် ပဲ့ ဟဲ့ မွင့်ကာရာ ဒွါ ဇဝ်ဖြာ ဒီ ဘေ။ 16 မာလဲ၊ ဘေ ယီ တူ ပွိုန် ဟူမ် နှာမ် အန်။ ဘေ လုဝ် ဟုး ဝဲန် ဒဲင် ကာဒါယ်၊ တဲး န့ ပီ ဘေ ဟုး ဝဲန် အိုမ်။ 17 ကြုဝ် ပဲ့ ဟဲ့ ဟွတ့် လှူ ဒီ ဇဝ်ဖြာ၊ အာဝ် ပွိုန် ဟူမ် ဒူင် ကွယ် ဘေ။ န့ ဘော မုး ငှုဝ် ဂေ ဘ့လေ မာငုန် ဘော နာမန် အီ မုး ပီ လှူ ဂိုဝ် ဘုန် အူ ဘုန် ဘော မာဘူ ဂေ မာမက် အီ မုး ဂွန် ဂိန့် ဒုဝ် အာလူင့် ဘော မုး ပီ ကာဆဲန့် ဘေ ဒီ လှူ ဘော ပီ ဆီ လှူ ဘေ ရာင် ဘေ ဘော ပီ လှူ ဘဲန် မျုဝ် ဘဲန် မျုဝ်၊ ဘေ တူ ပွိုန် ဟူမ် ဒူင် ကွယ် ဘေ။ 18 ပီ လှူ ဘေ ဇိုဝ် တီ ဒွန် မျုဝ် ဘေ ယီ လုဝ် ဟူမ် ဒီ အာတ့် ဇဝ်ဖြာ ဒူင် ဒီ ရဝ်း ဇဝ်ဖြာ။ ဘော ဘေ ဘော လှုက်လှာန် ဘေ ဘော မှာယ် ဘေ ဘော ဂေ ဒူအီ အာလေဝီ၊ ဘေ ဘောကာဂ့လျီတ် ဟဲ့ ပွိုန် ဟူမ် ရိုမ်၊ ဟူမ် ဒါခိုယ် ဒူင် တီ။ 19 ဘေ ယီ လုဝ် ဆာဒိက်၊ ကွဲ့ တဲး ဘေ ပိဝ် ဂေ ဒူအီ အာလေဝီ စုဝ် ကွယ် ဘေ ခဲင် မိူင် တီ။

20 ဆေ ဇဝ်ဖြာ ပီ ကြိုပ် ဘေ ဟီ ပီဝဝ်း ပီလေး ကာအုန် ကာဒါယ် ဘေ၊ ဆေ န့ ဟဲ့ ဒူပ် ပဲ့ ဟဲ့ ဒွိုမ် ကာဆဲန့် အန် ဒီ ဘေ၊ ဆေ ဘေ ပီ ဝီ တဝ်း၊ ‘အုဝ် ဆီ ဟူမ် ယင်၊’ ကူပ် မွက့် ကာဆဝ် ဘေ ဒီ ယင်၊ တဲး ဘေ ဟူမ် ခဲ့ ပီ ဆီ ဟူမ် ဘေ။ 21 ဆေ ဇဝ်ဖြာ ဟဲ့ ရဝ်း ဒူင် ဒီ ကြိုပ် ဘေ ဒီ အန်၊ ဆေ န့ ဟဲ့ ကာတူင့် ကာဆဝ် ဒီ ဒူင် ကွယ် ဘေ၊ ဘေ ဟဲ့ ပွိုန် ဒိုဝ်း မာဘူ ဂေ မာမက် ပဲ့ ဟဲ့ မွင့်ကာရာ ဒွါ ဇဝ်ဖြာ ဒီ ဘေ၊ ဝီ ငဝ်း ဟူမ် ခဲင် မိူင် ဘေ၊ တဲး န့ ဒူပ် ပီ ကာလာင် အုဝ် ဒီ ဘေ။ 22 တဲး ဘေ ဟူမ် ပီ ဘေ ဟူမ် ယင် မင်ဂျီး ဂေ ယင် မာဇ။ ဘော ဂေ အီ ဆီငါ ဒူပ် ပီ ဒမ် ဒါရာ ဘော ဂေ အီ တူ ဆီငါ ဒူပ် ပီ ဒမ် ဒါရာ ဟဲ့ ပွိုန် ဟူမ် ဒွန် အီ။ 23 မာလဲ၊ ဘေ ကွဲ့ ဟူမ် နှာမ် အန်။ ခုဝ်၊ အာဆာက် ကွယ် ခဲင် နှာမ်။ အာဝ် ပွိုန် ဟူမ် အာဆာက် ဒူပ် ယင်။ 24 ဘေ ကွဲ့ ဟူမ် နှာမ်။ ဘေ လုဝ် ဟုး ဝဲန် ဒဲင် ကာဒါယ်၊ တဲး န့ ပီ ဘေ ဟုး ဝဲန် အိုမ်။ 25 ဆေ ဘေ ဘော ထူမ် ဒါရာ တီ၊ န့ ဒီ ဘော လဝ့် နဝ်း ဇဝ်ဖြာ။ န့ ဒီ ဘော ဘဲန် နာ ဘွတ် နာ မွှိုမ် ဒီ ဘေ ဘော ဒီ လှုက်လှာန် ဘေ။

26 တဲး ဘေ ဘော ဒိုဝ်း ပီ ဒီ လှူ ဘေ ဘော ပဲ့ ဟဲ့ ကာဆဲန့် ဘေ ဒီ လှူ၊ ဟာဝ် ဒူင် ရဝ်း ဇဝ်ဖြာ၊ တဲး ဘေ ပွိုန် ဒီ ကြိုပ် အန်။ 27 တဲး ဘေ လှူ ပီ ဒီ လှူ အီ ဒုဝ့် ဒီ ငဝ် ဒဲင် ကာစှူင့် လှူ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ ဘော ယင် ဘော နှာမ် တဲး ဘေ လှူ ဒဲင် ကာစှူင့် တီ။ နှာမ် ဘေ ယီ လုဝ် ဟုး ခူပ် ကာစှူင့် တီ။ အီ မုး ယင်၊ ဘေ ပွိုန် ဟူမ်။ 28 တဲး ဘေ ဂျုဝ်ဂျာ ဒီ ဒူပ် ပီ ဒမ် အုဝ် ဒီ ဘေ တီ ဒွန် မျုဝ်။ တဲး န့ ဘော ဘဲန် နာ ဘွတ် နာ မွှိုမ် ဒီ ဘေ ဘော ဒီ လှုက်လှာန် ဘေ ဆေဆေ။ ခုဝ်၊ ဘေ ဒီ ဘူင် အီ မုး အီ မှာန် အီ လဝ့် နဝ်း ဇဝ်ဖြာ ပီ ကြိုပ် ဘေ။

29 ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဒီ ဘော ပျာတ့် ဝဲန် ဂေ ဒူအီ အီ ကွယ် ခဲင် မိူင် ဒူင် ဒီ ဟာဝ် ဒိုဝ်း ဘေ တီ။ ဘေ မိူဝ် ဒီ ဘော ပွိုန် ဒီ အိုပ် ဒီ ဘိုင် မိူင် တီ။ 30 ဝါယ် ဟဲ့ ဟွတ့် တဝ် ဒူအီ ဂေ တီ ဒီ အာတ့် ဘေ၊ ဝါယ် ဟဲ့ ကွယ် ဒါခိုယ် ဘေ ခဲင် မိူင် ဂေ၊ ဘေ ကွဲ့ ဝီ ဒီမွှတ် လွင် ဇဝ် ပီ ကြိုပ် ဂေ။ လွင် အန် တီ၊ န့ ဒီ ဝီ ဘဲန် ပီ ယွတ့် ဂေ ခိူမ် ဒီ ဘေ။ အာဝ် လုဝ် ဒီမွှတ် တဝ်း၊ ‘ဒူအီ ဂေ နီ၊ မှဝ် ဂေ ပါယ် ဒီ ကြိုပ် ဇဝ်ဖြာ ဂေ။း ဆော ဆီ ထေဝ် ဒီ ညိုင် ဂေ။’ အာဝ် ပွိုန် ဘူင် ပါယ် တီ ဒေါ မှဝ်။ 31 ကွဲ့ တဲး ဘေ ကြိုပ် ဇဝ်ဖြာ ပီ ဂေ ကြိုပ် ဇဝ် ဂေ။ ခုဝ်၊ ဂေ ဘူင် ဘဲန် မျုဝ် ဘဲန် မျုဝ် ပီ ကာအိး ဘော ပီ ဇွင့် ဇဝ်ဖြာ။ ဂေ ဘော နပ် ဒီ ဒိုဝ်း ဂွန် အီဘိုန့် ဘော ဂွန် အီမာယ် ဂေ၊ ဒုဝ့် ခဲင် ငဝ်၊ လှူ ဒီ ဇဝ် ပီ ကြိုပ် ဂေ။

32 တဲး ဘေ ဘူင် ဒူပ် ဆီချာ ခဲ့ ပီ ကာလာင် အုဝ် ဒီ ဘေ နီ။ ဒဲင် တီ အာဝ် လုဝ် ဝီ ပွါ။ ဘော ခဲ့ တီ အာဝ် လုဝ် ပီယူမ်။”