1 အာမုဝ်ဆဲ ဝီ တဝ်း၊ “တဲး ဘေ ရွက့် ဇဝ်ဖြာ ပီ ကြိုပ် ဘေ ဘော ဘူင် ဒူပ် ဆေဆေ ဒါရာ အန် ဒွန် ညွင့် ခဲ့ ပီ ဒမ် အန် ဒီ ဘေ၊ ခဲ့ ပီ ကာလာင် အုန် အန် ဘော ပီ စ်ု အန် ဘေ ဘူင်။ 2 အာတိုဝ် နီ၊ တဲး ဘေ လှုဝ်း လွင် ပဲ့ ဟဲ့ မာနုဝ် ဇဝ်ဖြာ ပီ ကြိုပ် ဘေ ဒီ ဘေ။ န့ မုး ဘေ အီ ဟဲ့ ယိုဝ် အီ ဟဲ့ ခမ် လွင် အန် တီ။ အာဝ် မုး လှုက်လှာန် ဘေ။ ဘေ ဟဲ့ ယိုဝ် ခဲ့ ဟဲန့် ပီ ဘူင် အန်၊ ခဲ့ တာင် ပွုန် အန် ဘော အာဖုင် ဒင်ခုဝ် အန်။ 3 ဘေ မိူဝ် ဟဲ့ ယိုဝ် အီ မွှိုမ် အာမ် ကာဆဝ် ပဲ့ ဟဲ့ ဘူင် အန် ခဲင် မိူင် အဲဂိုပ်။ ဘေ ဟဲ့ ယိုဝ် ဘော ပဲ့ ဟဲ့ ဘူင် အန် ဇဝ် ဒီ ခုန်ဒီခမ် ခဲင် မိူင် အဲဂိုပ် ဘော ဒီ မိူင် ပီ အိုပ် အန်။ 4 ဘေ မိူဝ် ဟဲ့ ယိုဝ် ခဲ့ ပီ ဘူင် အန် ဒီ ဒါ ဆိုက် ဂေ ဒူအီ အဲဂိုပ် ဒေါ ခုင်ခြး ဂေ ဒူပ် ဒီ ပန် ဘေ။ အန် ဇဝ် ဟဲ့ တဲး အိုမ် ဒီ နှူင် ရေန့် ဝီ မ့ပုန် ဂေ ဘော လက်လဝ် ဘော မင်ပြွင့် ဂေ၊ တဲး ဂေ လိုဝ် စှိုမ် တူတ့်။ 5 ဘေ မိူဝ် ဟဲ့ ဟွတ့် ယိုဝ် တူတ့် ပဲ့ ဟဲ့ ဘူင် ဇဝ်ဖြာ ဒီ ဘေ၊ တဲး န့ ကော ဝီ ဇမ် ဒေါ တး ကွယ် ဘေ ဒီ နီ။ 6 တဲး ဘေ လှုဝ်း ဘော ပဲ့ ဟဲ့ ဘူင် အန် ဇဝ် ဒီ အာဒါထာန် ဘော ဒီ အာဖီရမ် အီ မုး ဂွန် အာအေလီအာပ် ခဲင် ခြိုဝ် အာရူဘေန်။ ဘေ ဒွန် အီ ဟဲ့ ယိုဝ် ကာဒါယ် ဟဲ့ မာအ ညွှတ် ဂေ ဒီ အာတ့် ဘေ။ ဟဲ့ ညွှတ် ဘော ဒူအီ ခဲင် န့ဟူမ် ဂေ၊ ဘော ထိုပ် ဘိက် ဂေ၊ ဘော မှာယ် ဘော ဒုဝ် ဆတ်ဒါဝါ ဘော ကြုဝ်ကြာမ် ဂေ ဘောကာဂ့လျီတ်။ 7 ဟဲ့ မုး ဘေ နီ အီ ဟဲ့ ယိုဝ် အီ မွှိုမ် အာမ် ကာဆဝ် ပဲ့ ဟဲ့ ဘူင် ဇဝ်ဖြာ ဇိုဝ် တီ ဒွန် မျုဝ်။

8 ခုဝ်၊ တဲး ဘေ ဘူင် ဒူပ် ဒါရာ ဇဝ်ဖြာ ပီ ကာလာင် အုဝ် ဒီ ဘေ အာတိုဝ် နီ ဒွန် မျုဝ်။ ဆေ ဘေ ဘူင် ပါယ် တီ ဘေ ဒီ မိုဝ်း ပ့လူမ် မိုဝ်း ဟဲန့်၊ တဲး ဘေ ပွိုန် ဒီ ဟာဝ် ကာလုဝ်း အိုမ် ဘ့လဲင် ယောဒါန်၊ ဒိုဝ်း မိူင် ဒူင် ဒီ လိုပ် ဟာဝ် ဘေ တီ။ 9 တဲး အာဆာက် ဘေ တူင့် ဒေါ ကွယ် ဘေ ခဲင် မိူင် ဘွတ် မိူင် မွှိုမ်၊ မိူင် ပဲ့ ဟဲ့ ဒိူင် ဟဲ့ ကာဆဲန့် ဇဝ်ဖြာ ဒီ ဒွါ ဒီ ဂုန့် ဒင် ဘေ ဘော ဒီ လှုက်လှာန် ဂေ။ 10 မိူင် ပီ ဒီ ဟာဝ် ဒိုဝ်း ဘေ တီ၊ န့ တူ ပီ မိူင် အဲဂိုပ်၊ ဒူင် ဟဲ့ ဒွိုမ် ကွယ် ဘေ။ ခဲင် မိူင် အဲဂိုပ် တီ၊ ဘေ ဟဲ့ ဒွိုမ် ဆမ် ငှုဝ် ဘေ ဘော ရိုက် အိုမ် ဒီ ဒူင် နာ ဘေ၊ တဲး န့ ပီ ပီ ဘူင် ဘေ ခဲင် ကာပိုမ် ပီ ဆမ် ဘေ ဒဝ်။ 11 အီ မုး မိူင် ဒူင် ဒီ ဟာဝ် ကွယ် ဘေ တီ၊ န့ ဘော မိုဝ်း ဒီလယ့် မိုဝ်း နွန်။ န့ ဘော မုး ကာဒါယ် အီ ဒူင့် ဆီချာ အိုမ် ဂ့လာယ်။ 12 ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဒီ ယွတ် လိုမ်လာ ကာဒါယ် တီ။ အန် ဒီ ယွတ် မဲန် ကာဒါယ် တီ ဆိန့် ဂိန့် ဆီနမ်၊ တဲး န့ ကော ဇမ် ပန် ဒီ တူတ့် ဆီနမ်။

13 ပါယ် တီ တဲး ဘေ ထူမ် ဆီချာ ဒါရာ ပီ ကာလာင် အုဝ် ဒီ ဘေ အာတိုဝ် နီ၊ တဲး ဘေ တဲး ဘော နဝ်း ဘော ဖွိုမ် ဘေ ဘော တူတ့် ရွက့် ဇဝ်ဖြာ ပီ ကြိုပ် ဘေ ဘော ဘူင် ဒူပ် ပီ ကာလာင် အန် ဒီ ဘေ။ 14 ဆေ ဘေ ဘူင် ပါယ် တီ ဇဝ်ဖြာ မိူဝ် ဒီ တဲး ဂ့လာယ် စုဝ်း ဒေါ မုး အာခြာဝ် အန်။ ဘော ဂ့လာယ် အာခြာဝ် ဒီယာင် ဘော ဂ့လာယ် အာခြာဝ် ဒီရဝ်၊ တဲး ဘေ ဘော ပွိုန် ဒီ ဂဲပ် အုန် ငှုဝ် ဘေ၊ ဘော ဘ့လေ မာငုန် ဘော ဘ့လေ နာမန် ဘေ။ 15 အန် ဇဝ် ဒီ တဲး ဘော ပေတ့် လတ့် ခဲင် ဂ့လင်၊ တဲး န့ ဘဲန် ပီ ဒီ ဟူမ် ဒုဝ် ဆတ်ဒါဝါ ဘေ။ အန် ဒီ တဲး ဘော ဘေ ပွိုန် ဒီ ဟူမ် ဖဲ။

16 တဲး ဘေ ဆာဒိက်၊ ကွဲ့ တဲး အီ ဟဝ် ကာဆုး ဘေ ဟာဝ် မုတ် ကြိုပ် ဇဝ် ပေါ ကာဒင်။ 17 ဆေ ဘေ ဘူင် ပါယ် တီ ဇဝ်ဖြာ ဒီ ရူ ကာဆဝ် ဒီ ဘေ။ အန် ဇဝ် မိူဝ် တူ တဲး ဂ့လာယ် စုဝ်း၊ တဲး ကာဒါယ် ဒူင် ရန့် ဘေ ကာဟဝ်း တွင့်၊ အာဝ် ပွိုန် ဆမ် ဒီ ဟူမ် မာဆေ။ ဘေ မိူဝ် ဒီ စေဝ် လိုဝ်၊ စေဝ် စှိုမ် ခဲင် မိူင် ဘွတ် မိူင် မွှိုမ် ပီ ဒွါ ဇဝ်ဖြာ ဒီ ဘေ တီ။ 18 ဘေ လုဝ် ဒိုဝ်း ဂြုဝ်း ပီ ကာလာင် အုဝ် နီ၊ တဲး န့ လိုပ် ခဲင် နဝ်း ခဲင် ဖွိုမ် ဘေ။ ဘေ ဘော လုဝ် ဒိုဝ်း ဒါရာ တီ၊ ပက် ဒီ ဒဲ ဘေ ဘော ဒီ ကာတဝ်း ဘေ၊ တဲး န့ ဘဲန် အီ ဒွါ ဆာဒိက် ဒီ ဘေ။ 19 တဲး ဘေ ဝီ မာနုဝ် ဒါရာ တီ ဘော ဒီ လှုက်လှာန် ဘေ။ ဘေ ဘော ကွယ် ခဲင် ကာင်၊ ဘေ ဘော ဟာဝ် ဒူပ် န့တေန့်၊ ဘေ ဘော ဒီလှဝ် ဘော ယိတ့်၊ တဲး ဘေ လာယ် ကာမွုန် လာယ် ခဲ လွင် ဒါရာ တီ။ 20 တဲး ဘေ ဒဲမ် ဒါရာ တီ၊ ဒိုက် ဒီ ရွင့် မာလုဝ်း ကာင် ဘေ ဘော ဒီ ရွင့် ဘာင် မာလုဝ်း ဝဲင် ဘေ။ 21 ဆေ ဘေ ဘူင် ပါယ် တီ ဘော စုဝ် ဘေ ဘော စုဝ် ဂွန် စုဝ် လှာန် ဘေ၊ ဘေ ဒီ ဘော မိုဝ်း အာဆာက် တူင့် ဘော ပွိုန် ကွယ် ခဲင် မိူင် ပီ ကာဆဲန့် ဇဝ်ဖြာ ဒီ ဒွါ ဒီ ဂုန့် ဒင် ဘေ။ န့ ဒီ ဘော လှေန့် ခဲ့ ကွယ် ဘ့လေန့် အီ ပ့လိုက် ကာဒါယ်။

22 တဲး ဘေ ဆာဒိက် ဒီ ဘူင် ဒူပ် ဒါရာ ပီ ဒွါ အန် ဇဝ် ဒီ ဘေ တီ။ တဲး ဘေ ရွက့် ဇဝ်ဖြာ ပီ ကြိုပ် ဘေ ဘော ဘူင် ဒူပ် ဒါရာ အန် ဒွန် မျုဝ် ဘော ကွယ် ကာဒိုက် ကာဒဝ့် ဒီ အန် ဇဝ်။ 23 ဆေ ဘေ ဘူင် ပါယ် တီ ဇဝ်ဖြာ ဒီ ဟုဝ် ဝဲန် အာမျုဝ် ဒူအီ ဂေ တီ ပန် ဒီ လိုပ် ဘေ ခဲင် မိူင် ဂေ ဒူအီ အီ ကိူန် လွှိုမ် ဘေ ဘော မိုဝ်း ပ့လူမ် ဂေ ဟဲန့် အီ ကိူန် လွှိုမ် ဘေ။ 24 ကာဒါယ် ဒူင် ညဲတ့် ဟာဝ် ဘေ တီ ဒီ ဘော ဘဲန် ကာဒါယ် ဘေ။ မာန် မိူင် ဘေ တီ၊ န့ ဒီ ဘော ပီဝဝ်း ပီလေး၊ စုး ဒီ ပြဲ ကာဟဝ်း အီ ကွယ် ဘ့လာက် နာ တေတ့်၊ ကော ဝီ ဟုဝ့် ဇမ် ဒီ နွန် လေဘာနုန် အီ ကွယ် ဘ့လာက် နာ ကွာ။ နာ လေး ဆီငဲ မိူဝ်၊ န့ ဘော စုး ဒီ ဘ့လဲင် အိုမ် အူဖာရာတ် ကော ဝီ ဇမ် ဒီ အိုမ် နမ်မုက်ဆာရာ အီ ကွယ် ဘ့လာက် နာ ဂေတ့် ဆီငဲ။ 25 ခဲင် မိူင် ဒူင် ဒီ ဟာဝ် ကွယ် ဘေ တီ၊ ဘေ ဘော ဟာဝ် ဇမ် ဒီ မှဝ် မိူဝ်၊ ဇဝ်ဖြာ ဒီ ဘူင် တဲး အီ ဟဝ် ယုဝ် ဘေ၊ ကွဲ့ တဲး န့ မိုဝ်း အာဆေ အီ ယ ခြဲ ယ ရဲ ဘေ။ န့ ဒီ ဘော ဒူပ် ခဲ့ ပီ ဒွိုမ် ဒွါ အန် ဇဝ် ကာဒိက် ဆတ်ဇာ။

26 အာတိုဝ် နီ အုဝ် ဟဲ့ ကာလာင် ဘော လွင် ပီ မွင့်ကာရာ ဘော လွင် ပီ ဒီ ဒိူင် ဇဝ်ဖြာ ဒီ ဘေ။ 27 ဆေ ဘေ ဘော ဘူင် ဒူပ် ဒါရာ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ ဘူင် ခဲ့ ပီ ဒမ် အုန် အုဝ် ဒီ ဘေ အာတိုဝ် နီ၊ ဘေ ဒီ ပွိုန် မွင့်ကာရာ ပီ ကာဆဲန့် ဇဝ်ဖြာ ဒီ ဒွါ။ 28 ဆေ ဘေ ယီ တူ ထူမ် ဒါရာ အန်၊ ဝီ ဝး န့တေန့် အန်၊ ဝီ ဟာဝ် ကြိုပ် ဇဝ် ပေါ ကာဒင် ပီ တူ ဒွိုမ် ကြိုပ် ဘေ၊ ဘေ ယီ လုဝ် ခမ် ကာဆမ် ဒိူင်။ 29 ဒေါ ဟဲ့ ဟွတ့် ဇဝ်ဖြာ ယဲတ့် ဟာဝ် ဘေ ခဲင် မိူင် တီ၊ ဘေ လုဝ် ဒိုဝ်း ဂြုဝ်း မွင့်ကာရာ တီ၊ ဝီ ဟာဝ် ကာလာင် ဒဲင် နွန် ဂီရာစေမ်။ အီ မုး ဂြုဝ်း ကာဆမ် ဒိူင် တွိုန်၊ ဘေ လုဝ် ဝီ ဟာဝ် ကာလာင် ဒဲင် နွန် အေဘာန်။ 30 နွန် အာ ဘူင့် တီ ကွယ် နာ ဂေတ့် ဆီငဲ ဝါယ် ဟဲ့ ကာလုဝ်း အိုမ် ဘ့လဲင် ယောဒါန်။ န့ ဘော မုး ခဲင် မိူင် ဂေ ဒူအီ ကာနန့် အီ ကွယ် ခဲင် ဂ့လင် အီ စိူဝ် အာရာဖ ခူပ် ဟေ တာင် ပီ ကြိုပ် ဂေ။ န့ ဘော ကွယ် ကာတတ် မိူင် ဂီလဂါ။ 31 အီ မုး ဘေ၊ အာဝ် လှေန့် ဘေ ဒီ ကာလုဝ်း အိုမ် ဘ့လဲင် ယောဒါန်၊ ဟာဝ် ဒိုဝ်း မိူင် ပီ ဒီ ဒွါ ဇဝ်ဖြာ ဒီ ဘေ။ ဆေ ဘေ ဟဲ့ ဟွတ့် ပွိုန် ဒီ အိုပ် မိူင် တီ၊ 32 ဘေ လုဝ် ဆာဒိက်၊ တဲး ဘေ ဘူင် ဒူပ် ဒါရာ ဘော ပီ ဒမ် ဇဝ်ဖြာ ဒွန် မျုဝ် ပီ ကာလာင် အုဝ် ဒီ ဘေ အာတိုဝ် နီ။”