1 အာမုဝ်ဆဲ ဝီ တဝ်း၊ “ဒေါ အန် တီ ဇဝ်ဖြာ ဝီ တဝ်း ဒီ အုဝ်၊ ‘တဲး မဲ ဝီ ဒဝ်း မာဝ် ပေါ အာ ဒီဖ့လာင်၊ တဲး န့ ပီ ခါ အာတ့် တွိုန်။ ဟဲ့ ဟွတ့်၊ မဲ ဘော ဝီ ဟုဝ့် ဒူင် ကွယ် အုဝ် ဒဲင် နွန် နီ။ မဲ ဘော လုဝ် ဝီ ဒိုဝ်း ဟေ၊ ဘူင် ဘော ဇီဒိူက် ဒူင် ဒီ အုန် မာဝ် တီ။ 2 ဂြုဝ်း ပီ ဒဲမ် အုန် အုဝ် ဒီ မာဝ် အာ ဒီဖ့လာင် ပဲ့ ဟဲ့ ဆတ့် ဝဲန် မဲ တွိုန်၊ အုဝ် ဒီ ဝီ ဒဲမ် ဒိုက် ဒီ မာဝ် တီ၊ တဲး မဲ ဝီ အုန် ခဲင် ဇီဒိူက် တီ။’

3 အုဝ် မိူဝ် ဒိုဝ်း ဟေ ကာထိန်၊ ဝီ ဘူင် ဇီဒိူက်။ ဟဲ့ ဟွတ့်၊ အုဝ် ဝီ ဒိုဝ်း မာဝ် အာ ဒီဖ့လာင် အီ ဟဲ့ ပီ မာဝ် ခါ အာတ့် တွိုန်၊ ဝီ ဟုဝ့် ဒဲင် နွန်။ 4 ဇဝ်ဖြာ မိူဝ် ဝီ ဒဲမ် ဒိုက် ဒါရာ ဂိုဝ် ညွင့် ဒီ မာဝ် အာ ဒီဖ့လာင် တီ၊ တဲး န့ ပီ ဂြုဝ်း ပဲ့ ဟဲ့ ကာလာင် အန် အီ လေး ခဲင် ငဝ် ဒေါ ကွယ် ဘေ ဒီ ဒင် နွန် တွိုန်။ ဟဲ့ ဟွတ့်၊ အန် ဇဝ် ဝီ အာပ် မာဝ် တီ ဒီ အုဝ်။ 5 အုဝ် မိူဝ် ဝီ လူင် ဒဲင် နွန် တီ အူ ဇေန့် ဘော ဟပ် အုန် မာဝ် တီ ခဲင် ဇီဒိူက် ပီ ဘူင် အုဝ်၊ တဲး န့ ဒူပ် ခဲ့ ပီ ကာလာင် ဇဝ်ဖြာ ဒီ အုဝ်။ မာဝ် အာ ဒီဖ့လာင် တီ ဆီ ကွယ် ကော ဇမ် အာတိုဝ်။

6 ဂေ ဒူအီ အီဆာရေလ ဘော ယိတ့် ဒီ အိုမ် ခိုမ် ဒူအီ အာယာကာန်၊ ဝီ ဟာဝ် ဒူင် စိူဝ် မုဝ်ဆာရာ။ အာရူန် ဘော ယမ် ဒီ တီ။ ဂေ ဘော ဒိပ် ဒုဝ် အန် ဒီ တီ။ ဂွန် အီမာယ် အန် အီ စိူဝ် အာလေအာဆာ ဘော ဝီ ဘဲန် ဒါ အီ လှူ ဒီ ဇဝ်ဖြာ၊ ဝီ ပ့လု အန်။ 7 ဂေ ဘော ယိတ့် ဒီ တီ၊ ဝီ ဟာဝ် ဒူင် စိူဝ် ဂုဝ့်ဂုဝ်တာ။ ဂေ ပီ ဝီ ယိတ့် ဒီ ဂုဝ့်ဂုဝ်တာ တီ၊ ပီ ဝီ ဟာဝ် ဒီ ဒူင် စိူဝ် ယုတ်ဖာဆ ဒူင် မိုဝ်း ဘ့လဲင် အိုမ်။ 8 ဒေါ အန် တီ ဇဝ်ဖြာ ဘော ရဝ်း လေး ဂေ ဒူအီ ခြိုဝ် အာလေဝီ၊ တဲး ဂေ ဘဲန် ဒူအီ အီ ကာဂွတ် ဇီဒိူက် ဇဝ်ဖြာ၊ ဘဲန် ဘော ဒါ အီ ဘူင် ဂါန် ဇဝ်ဖြာ ဘော မွင့်ကာရာ ဒွါ ဒီ အီ ခဲ့ ပီ ဆီ မွင့်ကာရာ ဒွါ ဇဝ်ဖြာ ဒီ ဂေ ကော ဇမ် ဒေါ တီ နီ။ 9 ကူပ် န့ ပါယ် တီ ဂေ ဒူအီ အာလေဝီ တူ မိုဝ်း ကာဒါယ် အီ ဘဲန် ခါဂုန် ဂေ ပီ အီ ဟဝ်။ န့ မုး ပီ ဂေဇူ ဇဝ်ဖြာ ဒီ ဂေ အီ ဟဲ့ ဘဲန် ခါဂုန် ဒီ ဂေ၊ တဲး န့ ဒူပ် ပဲ့ ဟဲ့ ဒွိုမ် ကာဆဲန့် ဇဝ်ဖြာ ပီ ကြိုပ် ဘေ ဒီ ဂေ။

10 အုဝ် မိူဝ် ဟဲ့ ကွယ် ဒဲင် နွန် တီ အာဒါ ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ် ပီ ခါ အာတ့် တွိုန်။ ခါ နီ မိူဝ်၊ ဇဝ်ဖြာ ဟဲ့ ထူမ် ဂြုဝ်း ပီ ဆာခိုဝ် အုဝ်။ အန် တူ ဆီ ပျာတ့် ဘေ။ 11 အန် ဝီ တဝ်း ဒီ အုဝ်၊ ‘တဲး မဲ ယဲတ့် ဟာဝ် ဒူအီ ဂေ တီ၊ တဲး ဂေ ဇမ် ခဲင် မိူင် ပဲ့ ဟဲ့ ဒွိုမ် ကာဆဲန့် အုဝ် ဒီ ဒွါ ဒီ ဂုန့် ဒင် ဂေ။’”

12 အာမုဝ်ဆဲ ဝီ တဝ်း၊ “အိုယ် ဘေ ဒူအီ အီဆာရေလ၊ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ ဟဲ့ စ်ု ဘေ၊ တဲး ဘေ ရုဝ်ဆေ အန် ဘော ဘူင် ဒူပ် ပီ စ်ု အန် ဒီ ဘေ ဘော ရွက့် အန်။ ဘေ ဘော လုဝ် ဒိုဝ်း ဘော နဝ်း ဘော ဖွိုမ် ဘေ ဘော တူတ့် ဒွန် မျုဝ်၊ ဝီ ကြိုပ် ဇဝ်ဖြာ။ 13 တဲး ဘေ ဘူင် ဒူပ် ဒါရာ ဇဝ်ဖြာ ဘော ခဲ့ ပီ ကာလာင် အန် ဒီ ဘေ အာတိုဝ် နီ။ ခုဝ်၊ န့ ဒီ ဘဲန် အာဂျိုဝ် ဒီ ဘေ။

14 ဇဝ်ဖြာ ပီ ကြိုပ် ဘေ အန် အိုပ် တူတ့် ဘော ခဲင် ဂါင်ဟြာဝ် အီ စာ ကာဆဝ် ဘော ဒဲင် ကာဒါယ် ဘော ဒွန် မျုဝ် အီ ကွယ် ဒဲင် ကာဒါယ် နီ။ 15 ပီ ဘော ဟဲ့ ပါယ် တီ မိူဝ်၊ ဇဝ်ဖြာ ယီ ရွက့် ကာဆဝ် ဂေ ဂုန့် ဒင် ဘေ။ အန် ဇဝ် မိူဝ် ရဝ်း ဘေ အီ မုး လှုက်လှာန် ဂေ၊ တဲး ဘေ ဘဲန် ဒူအီ ပီ အိုပ် အန် ဇဝ် ကော ဇမ် ဒေါ တီ နီ။ 16 ပါယ် တီ တဲး ဘေ ဝဲန် အီ တူ မွှိုမ် ခဲင် နဝ်း ဘေ၊ တဲး န့ ပီ အီ ဆွာ့ ဝဲန် ဟုန် လခါနာ။ ကွဲ့ ဟူ တဲး ဘေ ဒိူဝ် ကာဆဝ်။ 17 ခုဝ်၊ ဇဝ်ဖြာ ပီ ကြိုပ် ဘေ၊ အန် တာင် လွှိုမ် ဒွန် မျုဝ်။ အန် ဘော မုး ဒါ ကာညာ အီ အိုပ် ဒါ ကာညာ ဘောကာဂ့လျီတ်။ အန် မုး ဇဝ်ဖြာ အီ ဘွတ် မျာတ် ကာဆဝ်၊ အီ မိုဝ်း ပွုန် ဂေ အာဖုင် ဒင်ခုဝ် တာင်၊ ဟဲ့ ကာအာပ် အီ ရုဝ်ဆေ အန်။ အန် ဇဝ် မိူဝ် တူ မိုဝ်း ဒူင် ရွက့် ဒူင် ဇွင့်၊ အန် တူ ဒိုဝ်း ပီ ပြာ အီ ဒီ ဒွါ။ 18 အန် ဇဝ် မိူဝ် ဆုင်ဖျာတ် နာ မုး နာ မှာန် ဒီ ဂေ အီ တူ မိုဝ်း ဂုန့် မာ၊ ဘော ဂေ ယာ ဆီပြး။ အန် ဇဝ် မိူဝ် ရွက့် ဂေ ဒူအီ အာမျုဝ် ဟဝ် အီ မုး ခဲတ့် အီ ကွယ် ခဲင် မိူင် ဘေ။ အန် ဘော ယွတ် မဲန် ဂေ၊ တဲး ဂေ မိုဝ်း ဒီ ဟူမ် ဒီ တာ။ 19 ပါယ် တီ ဘော ဘေ လုဝ် ရွက့် ခဲတ့် ဂေ တီ။ ခုဝ်၊ ဘော ဘေ ဟဲ့ ဒွိုမ် ဘဲန် ခဲတ့်၊ ကွယ် ခဲင် မိူင် အဲဂိုပ် တွိုန်။ 20 တဲး ဘေ ရုဝ်ဆေ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ တဲး ဘေ ဘူင် ဂါန် အန် ဘော ဒိူင် ကာဆဲန့်၊ တဲး မီ အန် ဇဝ် ထူမ်။ 21 န့ ဟဲ့ ကာအာပ် ဘေ အိူပ် မျုက် မီ အန်။ အန် ဘော မုး ဇဝ်ဖြာ ပီ ကြိုပ် ဘေ။ အန် မိူဝ် ဟဲ့ ဘူင် အီ မွှိုမ် အာမ် ကာဆဝ်၊ တဲး ဘေ ယိုဝ်။ 22 ဒေါ ဂုဝ် ဒေါ ဟာဝ် ဂုန့် ဒင် ဘေ ခဲင် မိူင် အဲဂိုပ် တွိုန်၊ ဂေ ဘောကာဂ့လျီတ် ကွယ် ဘူ ဂိုဝ် ဝီ။ ဒေါ တီ နီ ဇဝ်ဖြာ ဟဲ့ ဝီ တဲး ဘေ ဘြဲ ကိူန် ကော ပီ ဆီမန့် အီ ကွယ် ခဲင် ဘ့လေန့်။”