1 အာမုဝ်ဆဲ ဝီ တဝ်း၊ “အိုယ် ဘေ ဒူအီ အီဆာရေလ၊ တဲး ဘေ ထူမ်။ အာဝ် လှေန့် ဘေ ဒီ ကာလုဝ်း အိုမ် ဘ့လဲင် ယောဒါန်။ ဘေ ဒီ ဘော ဟာဝ် ဒိုဝ်း မိူင် အာမျုဝ် ဒူအီ အီ ကိူန် လွှိုမ် ဘေ။ ဂေ မိူဝ် မိုဝ်း ပ့လူမ် ဂေ ဟဲန့် လွှိုမ် ဘေ။ မိူင် ဂေ တီ မိူဝ် မိုဝ်း ရဲင် အီ စာ ကာဆဝ် ကော ဒုး န့အု။

2 ဒူအီ အာမျုဝ် ဂေ တီ မိူဝ် ဟဲ့ စာ ကာဆဝ် ဘော ဟဲန့် ကာဆဝ်။ န့ ဘော မုး ဒူအီ အာမျုဝ် အာနာခိမ်။ ဘေ မိူဝ် ဟဲ့ ဒွိုမ် ယိုဝ် အီ တဝ်း၊ အာဝ် မိုဝ်း အီ ပွိုန် ပဲ ဒူအီ ဂေ တီ။

3 ခါ နီ ဘေ ဒီ ယိုဝ် ဒီ ငါယ် ဘေ၊ ဇဝ်ဖြာ ဒီ ယဲတ့် ဒီ အာတ့် ဘေ၊ တဲး န့ ကော ပီ ငဝ် အီ ကာဆိုမ် တူတ့်။ ဒေါ ဒီ လိုပ် ဘေ ခဲင် မိူင် ဂေ တီ၊ အန် ဇဝ် ဒီ ကာဂုဝ်း ဒီ ဂေ ဘော ပဲ ဂေ။ ဘေ ဒီ ဟုဝ် လေး ဂေ ဘော ပျာတ့် ဂေ၊ တဲး န့ ပီ ပီ ဒွိုမ် ကာဆဲန့် အန် ဇဝ် ဒီ ဘေ။ 4 ဝါယ် ဟဲ့ ဟွတ့် ဟုဝ် တဝ် ဇဝ်ဖြာ ဒီ ဂေ ခဲင် မိူင် တီ၊ ကွဲ့ တဲး ဘေ ထာင် ခဲင် နဝ်း ဘေ တဝ်း၊ ‘ကူပ် ဟဲ့ ဘူင် ယေ နာ မုး နာ မှာန်၊ ဇဝ်ဖြာ ဟဲ့ တိုယ် ယေ တး ဘိုင် မိူင် နီ။’ အာဝ် မုး ပါယ် တီ။ ဇဝ်ဖြာ ဒီ ဟုဝ် တဝ် ဂေ ဒီ ဘေ ကူပ် ဟဲ့ ဟာယ် ဟဲ့ မိူက် ကာဆဝ် ဂေ။ 5 အာဝ် မုး ဇဝ်ဖြာ တဲး ဘေ ကွယ် ခဲင် မိူင် တီ ကူပ် ဟဲ့ ဘဲန် ဘေ ဒူအီ ဘွတ် ဒူအီ မွှိုမ် ဘော မိုဝ်း နဝ်း ဆိူဝ် နဝ်း မှာန်။ ဇဝ်ဖြာ ဟုဝ် တဝ် ဒူအီ ဂေ တီ ကူပ် မုး ဂေ ဒူအီ ဟာယ် ဒူအီ တူ မွှိုမ်။ ဇဝ်ဖြာ ဒီ ဘူင် တဲး န့ ဒူပ် ပီ ဒွိုမ် ကာဆဲန့် အန် ဒီ ဂုန့် ဒင် ဘေ အီ မုး အာဘြာဟမ်၊ အာဆဲက် ဘော အာကူပ် တွိုန်။

6 ဇဝ်ဖြာ တဲး ဘေ ကွယ် ခဲင် မိူင် ဘွတ် မိူင် မွှိုမ် တီ၊ အာဝ် မုး ကူပ် မိုဝ်း ဘေ နဝ်း ဆိူဝ် နဝ်း မှာန်။ တဲး ဘေ နပ်၊ ဘေ မုး ဒူအီ ဒိူဝ်။ ဘော မာနုဝ် ဘေ ဟဲ့ ညှာပ် ကာဆဝ်။

7 တဲး ဘေ နုဝ်၊ ကွဲ့ တဲး ဘေ ပိဝ်။ ဒေါ ကွယ် ဘေ ခဲင် ပြဲ ကာဟဝ်း တွိုန်၊ ဘေ ဟဲ့ ဘူင် တဲး ဇဝ်ဖြာ ပီ ကြိုပ် ဘေ ဘဲန် နဝ်း ရူ ကာဆဝ် ဒီ ဘေ။ ဆိန့် လေး ဘေ ခဲင် မိူင် အဲဂိုပ် ကော ဝီ ဇမ် တး ကွယ် ဒီ နီ၊ ဘေ ဟဲ့ ကာဘး ဒီ ဇဝ်ဖြာ။ 8 ဒေါ ကွယ် ဘေ ဒီ နွန် ဆီနာယ် တွိုန် မိူဝ်၊ ဘေ ဟဲ့ ဘူင် တဲး ဇဝ်ဖြာ ရူ ကာဆဝ် ဒီ ဘေ၊ တဲး အန် ဇဝ် ကော ရိန် ဒီ ဝဲန် တူတ့် ဘေ ဘောကာဂ့လျီတ်။ 9 အုဝ် မိူဝ် ဟဲ့ ဟုဝ့် ကွယ် ဒဲင် နွန်၊ ဘ်ု ဒီ ဒိုဝ်း မာဝ် ပီ ဒဲမ် ဇဝ်ဖြာ ဂြုဝ်း ကာဒိက် ဆတ်ဇာ ပီ လာယ် ကာဆဲန့် အန် ဒီ ဘေ။ အုဝ် ဟဲ့ ကွယ် ဒီ တီ ကော နုဝ့် ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ်။ အုဝ် မိူဝ် တူ ဟူမ် မာဆေ၊ တူ ဒျီင် အိုမ်။ 10 ဒေါ အန် တီ ဇဝ်ဖြာ မိူဝ် ဟဲ့ ဒိုဝ်း မာဝ် အာ ဒီဖ့လာင် ပဲ့ ဟဲ့ ဒဲမ် အန် တာ ဒဲ အန်၊ အာပ် ဒွါ ဒီ အုဝ်။ မာဝ် အာ ဒီဖ့လာင် တီ ဟဲ့ ဒဲမ် အုန် ဂြုဝ်း အီ လေး ခဲင် ငဝ် ဒေါ တး ကာဇု ဘေ ဒဲင် နွန် တွိုန်။

11 ဒေါ ဟဲ့ နုဝ့် ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ်၊ ဇဝ်ဖြာ မိူဝ် ဒိုဝ်း မာဝ် အာ ဒီဖ့လာင် အီ ဟဲ့ ဒဲမ် ကာဒိက် ဆတ်ဇာ တီ၊ အာပ် ဒွါ ဒီ အုဝ်။

12 ဇဝ်ဖြာ မိူဝ် ဝီ တဝ်း ဒီ အုဝ်၊ ‘တဲး မဲ လေး လူင် ဒဲင် နွန် နီ။ ခုဝ်၊ ဒူအီ ပဲ့ ဟဲ့ ယဲတ့် လေး မဲ ခဲင် မိူင် အဲဂိုပ် တွိုန်၊ အူ ကာစန် ဂေ ဟဲ့ ဟွတ့် ဝး န့တေန့်၊ ဘူင် အီ ဟာယ် အီ မိူက် ကာဆဝ်။ ဂေ ဟဲ့ ဝဲန် ဂြုဝ်း ပီ ကာလာင် အုဝ်၊ ပီ စ်ု အုဝ် ဂေ ဘူင်။ ဂေ ဟဲ့ ဝီ ကြိုပ် အာရိုပ် ရာင်။’ 13 ဟဲ့ ဟွတ့်၊ ဇဝ်ဖြာ ပီ ဝီ ကာလာင် ဒီ အုဝ် တဝ်း၊ ‘အုဝ် ဟဲ့ ဟွတ့် နပ်၊ ဒူအီ ဂေ နီ၊ ဂေ မုး ဒူအီ အီ ဒိူဝ်။ ဘော မာနုဝ် ဂေ ဟဲ့ ညှာပ် ကာဆဝ်။ 14 ကွဲ့ ခြဲ အုဝ်။ အုဝ် ဒီ ဝဲန် ဂေ တဲး ဂေ စှိုမ် တူတ့်၊ ကွဲ့ တဲး န့ ဆီ မိုဝ်း အီ နမ်လှုဝ်း ဂေ။ အီ မုး မဲ၊ အုဝ် ဒီ တဲး မဲ ဘဲန် ဒူအီ အာမျုဝ် တာင်၊ တဲး မဲ ဘြဲ ကိူန် လွှိုမ် ဂေ။’

15 ဒေါ အန် တီ အုဝ် မိူဝ် ဒိုဝ်း မာဝ် အာ ဒီဖ့လာင် တီ၊ လူင် ဒဲင် နွန် တွိုန်။ အာခြာဝ် အန် တီ ငဝ် ဟဲ့ ပ့လိုက် ဘော နွန်။ 16 အုဝ် ဘော ဝီ ယိုဝ် ပီ ပါယ် ဘေ။ အူ ကာစန် ဘေ ဟဲ့ ဟွတ့် ဝဲန် ဒါရာ ပီ ဒွါ ဇဝ်ဖြာ ဒီ ဘေ၊ ဟဲ့ ဟွတ့် ကာလိုပ်။ ဘေ ဟဲ့ ဝီ လှုဝ် ဒီ ကြိုပ် အာရိုပ် မာမက်၊ တဲး န့ ဘဲန် မှာပ် ကိူန် ဒီ ဘေ။

17 ကူပ် န့ ပါယ် တီ အုဝ် မိူဝ် ဆတ့် ဝဲန် မာဝ် အာ ဒီဖ့လာင် တွိုန်၊ တဲး န့ ကာလာတ့် တူတ့် ဒီ အာတ့် ဘေ။

18 ဟဲ့ ဟွတ့်၊ အုဝ် ပီ ဝီ ဟုဝ့် ခြိုပ်ခြဝ် ဂိုပ် ဒီ အာတ့် ဇဝ်ဖြာ ပေါ ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ် ပီ ခါ အာတ့် တွိုန်။ အုဝ် မိူဝ် တူ ဟူမ် မာဆေ၊ တူ ဒျီင် မာဆေ ကူပ် မှာပ် ပဲ့ ဟဲ့ လုတ့် ဘေ ဒီ ဇဝ်ဖြာ။ ဘေ ဟဲ့ ဘူင် ဒီ ဇဝ်ဖြာ အီ ဟာယ် ကာဆဝ်၊ တဲး ဇဝ်ဖြာ ကော ရူ ကာဆဝ် ဒီ ဘေ။ 19 အုဝ် ဘော ယုဝ် ကာဆဝ် ကူပ် ရူ ဇဝ်ဖြာ ဒီ ဘေ။ အုဝ် ယုဝ် အန် ဒီ ဘူင် တဲး ဘေ စှိုမ်၊ တဲး န့ ကော တူတ့်။ မာလဲ၊ ဇဝ်ဖြာ ဘော ဝီ ထူမ် ဂြုဝ်း အုဝ် ပေါ အူ ဇေန့်။ 20 ဘော ဒီ အာရူန် ဇဝ်ဖြာ ဟဲ့ ရူ ကာဆဝ်၊ ဟဲ့ တဝ်း ဒီ ဘူင် တဲး အန် ယမ် အူ ဇေန့်။ ဒေါ အန် တီ၊ အုဝ် ဘော ကာဒုး ဒီ ဆာခိုဝ် ဒါင် အန်။ 21 အုဝ် ဘော ဒိုဝ်း ကြုဝ် အီ တူ မွှိုမ် အီ မုး အာရိုပ် မာမက် ပီ ဘူင် ဘေ တီ၊ အီ တဲး ဘေ မိုဝ်း မှာပ် ကိူန်၊ ဝီ ဒုဝ့် ခဲင် ငဝ်။ အုဝ် ဘော မး ဘော ဒုး တဲး န့ ကော ကာလာတ့် ကာမွတ့် တူတ့်။ အုဝ် ဘော ဝီ ဒိုဝ်း ကာမွတ့် အန် တီ၊ ဝီ ဟာဝ် ဝဲန် ခဲင် အိုမ် အီ လှဲ တး ဒီ နွန် တွိုန်။

22 ဒေါ ကွယ် ဘေ ဒီ ဒူင် စိူဝ် ဒါဘီရာ၊ ဒူင် စိူဝ် မာဆာ ဘော ဒီ ဒူင် စိူဝ် ဂီဘာရုတ်ဟာတာဝါ တွိုန် မိူဝ်၊ ဘေ ဟဲ့ ဘူင် တဲး ဇဝ်ဖြာ ရူ ကာဆဝ် ဒီ ဘေ။

23 ဒေါ ဟဲ့ ယဲတ့် လေး အန် ဇဝ် ဒီ ဘေ ဒီ ဒူင် စိူဝ် ကာဒေဘာနာ၊ အန် ဇဝ် ဟဲ့ စ်ု ဘေ ဟာဝ် ဖာတ် မိူင် ပီ ဒီ ဒွါ အန် ဒီ ဘေ။ ဘေ ယီ ဟဲ့ ကာဘး ဒီ ဂြုဝ်း ပီ ကာလာင် ဇဝ်ဖြာ ပီ ကြိုပ် ဘေ။ ဘေ မိူဝ် တူ ညှိုမ် တူ ထူမ် ဂြုဝ်း အန် ဇဝ်။ 24 ဆိန့် ဒေါ နပ် အုဝ် ဒီ ဘေ၊ ဘေ ဘော ကာဘး ဒီ ဇဝ်ဖြာ ပါယ် တီ။

25 ကူပ် ဘူင် ဘေ ပါယ် တီ အုဝ် ဘော ကာဒုး ဒီ မုတ် ဂိုပ် ဒီ အာတ့် ဇဝ်ဖြာ အာဒါ ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ် ကူပ် ဟဲ့ နပ် အုဝ် အန် ဇဝ် ဟဲ့ တဝ်း ဒီ ပျာတ့် ဝဲန် တူတ့် ဘေ။ 26 အုဝ် ဘော ဆာခိုဝ် တဝ်း၊ ‘အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ မဲ ဟဲ့ ယဲတ့် လေး ဒူအီ ပီ အိုပ် မဲ ခဲင် မိူင် အဲဂိုပ်၊ တဲး န့ ဘျ ခဲ့ တာင် ပွုန် မဲ။ အုဝ် မှာန့်၊ ကွဲ့ တဲး မဲ ဇဝ် ပျာတ့် ဝဲန် တူတ့် ဂေ။ 27 အုဝ် မှာန့်၊ တဲး မဲ ဇဝ် ဝီ လှုဝ်း ဒဲစေန့် မဲ အီ မုး အာဘြာဟမ်၊ အာဆဲက် ဘော အာကူပ် ဂေ တွိုန်။ ကွဲ့ တဲး မဲ ဇဝ် နုဝ် မှာပ် ပဲ့ ဟဲ့ လုတ့် ဒူအီ ဂေ နီ။ ဂေ ဘော ဒိူဝ် ဘော ဟာယ် ကာဆဝ်။ 28 အုဝ် ယုဝ် ဂေ ဒူအီ အဲဂိုပ် ဝီ တဝ်း၊ “ကူပ် ဇဝ်ဖြာ အာဝ် ဟူ ပဲ ဒီ ယဲတ့် ဟာဝ် ဂေ၊ တဲး ဂေ ဇမ် ခဲင် မိူင် ပဲ့ ဟဲ့ ကာဆဲန့် အန် ဒီ ဒွါ ဒီ ဂေ၊ ဘော ကူပ် ဟဲ့ ဇွင့် အန် ဒီ ဂေ၊ အန် တဲး ဂေ လေး ခဲင် ပြဲ ကာဟဝ်း နီ၊ တဲး အန် ပွိုန် ဒီ ငဝ်း ယမ် ဂေ။” 29 ဒူအီ ဂေ နီ၊ ဂေ မုး ဒူအီ ပဲ့ ဟဲ့ ရဝ်း မဲ ဇဝ်။ ဂေ ဟဲ့ ပီ ခါဂုန် မဲ ဇဝ်။ မဲ ဇဝ် မိူဝ် ဟဲ့ စ်ု အာဖုင် ဒင် ခုဝ် မဲ ဘော ပွုန် တာင် မဲ ယဲတ့် လေး ဂေ ခဲင် မိူင် အဲဂိုပ်။’”