အာမုဝ်ဆဲ ဝီ တဝ်း၊ “ဘေ လုဝ် ဘူင် ဒူပ် တူတ့် ဒွန် မျုဝ် ခဲ့ ကွယ် ဒါရာ ပီ ကာလာင် အုဝ် ဒီ ဘေ အာတိုဝ် နီ၊ တဲး ဘေ ဘော ပွိုန် ဒီ ကွယ် လှေန့် ဘော ဘြဲ ကိူန် ခဲင် မိူင် ပဲ့ ဟဲ့ ကာဆဲန့် ဟဲ့ ဒိူင် ဇဝ်ဖြာ ဒီ ဒွါ ဒီ ဂုန့် ဒင် ဘေ။

2 တဲး ဘေ လှုဝ်း အီ ဟဲ့ ပွုန် တး အာတ့် နီ။ ဇဝ်ဖြာ ပီ ကြိုပ် ဘေ ဟဲ့ ယဲတ့် တဲး ဘေ ဟာဝ် ဒူပ် န့တေန့် တူင့်၊ ဟာဝ် ခဲင် ပြဲ ကာဟဝ်း အာဒါ ဖွုန် ဂိုဝ် ဆီနမ်။ အန် ဇဝ် မိူဝ် ဟဲ့ ဘူင် တဲး ဘေ မိုဝ်း နဝ်း ဂူမ်၊ တဲး အန် နပ် ယုဝ် ဘေ မိုဝ်း တူ မိုဝ်း နဝ်း အီ ဆီ ဒူပ် ဒါရာ အန်။

3 အန် ဇဝ် ဟဲ့ ဘူင် တဲး နဝ်း ဘေ နှိမ်၊ တဲး ဘေ အေတ့် ပီ ဒီ ဟူမ်။ ဟဲ့ ဟွတ့်၊ အန် ပီ ဝီ ဒွါ ခါမုန် မာနာ ပီ တူ ဒွိုမ် နပ် ဘေ၊ ပီ တူ ဒွိုမ် ယိုဝ် ဂုန့် ဒင် ဘေ။ အန် ဒိုဝ်း ခါမုန် တီ၊ ဝီ ဟျီင် ဘေ ဟူမ်။ ပါယ် တီ အန် တဲး ဘေ နပ်၊ ဆေ ဒူအီ မိုဝ်း မီ ပီ ဒီ ဟူမ် အူ မျုဝ်၊ အာဝ် ဂ့လိုမ်။ န့ ဆီ လုဝ် ဘော ဂြုဝ်း ဇဝ်ဖြာ ဒွန် ဒုဝ် အီ လေး ခဲင် မူတ့် အန်၊ တဲး န့ ဟျီင် ဘော နဝ်း ဖွိုမ် ဒူအီ။

4 အာဒါ ဖွုန် ဂိုဝ် ဆီနမ် တီ၊ ခြိုင် ပီ တာ ဘေ တူ ရာမ်။ ပ့လဝ် ဘေ မိူဝ် တူ အဝ်း။

5 တဲး ဘေ နပ် ခဲင် နဝ်း ဘေ၊ ဇဝ်ဖြာ ဟဲ့ မာနုဝ် ဘေ၊ တဲး န့ ပီ ဂုန့် မာနုဝ် ဂွန် အန်။

6 ကူပ် န့ ပါယ် တီ တဲး ဘေ ဘူင် ဒူပ် ဒါရာ ပီ ကာလာင် အုန် ဇဝ်ဖြာ ဒီ ဘေ၊ တဲး ဘေ ဒူပ် ပီ ဘျ ဇဝ်ဖြာ ဒီ ဘေ ဒွန် မျုဝ် ဘော တဲး ဘေ ရုဝ်ဆေ အန် ဇဝ်။

7 ခုဝ်၊ ဇဝ်ဖြာ ပီ ကြိုပ် ဘေ ဒီ တိုယ် ဘေ ဇမ် ခဲင် မိူင် ဘွတ်၊ မိူင် မွှိုမ်၊ မိူင် အီ မိုဝ်း အိုမ် ဘ့လဲင် ဂေ အိုမ် တုဝ်း ဒွန် ဒီလယ့် ဘော ဒွန် နွန်။

8 န့ မုး မိူင် အီ မိုဝ်း ခဝ်ချုင် ဂေ ခဝ်ဘာလီ။ န့ ဘော မိုဝ်း ဘော ဟေ မာငုန်၊ ဟေ ဒီပူ၊ ဟေ မာစက် ဘော ဟေ နာမန် ဘော ငါမ် မာဖျီန် အီ လိုင် ကာဆဝ်။

9 ခဲင် မိူင် တီ၊ ဘေ မိူဝ် အာဝ် ဟူ ဇုတ် လုတ် မာဆေ။ ဘေ ဒီ ဘော ပွိုန် ဒီ ဟူမ် ဖဲ ဆေဆေ။ ခဲင် မာဝ် န့ ဒီ မိုဝ်း ဟိန်။ ဘေ ဒီ ပွိုန် ဒီ ဂိုဝ်း လေး ဘော မာလွင့် ရေန့် ဒီ နွန် ခဲင် မိူင် တီ။

10 ဆေ ဘေ ဟဲ့ ပွိုန် ဒီ ဟူမ် ဖဲ၊ တဲး ဘေ အိူပ် ဇဝ်ဖြာ ပီ ကြိုပ် ဘေ။ ခုဝ်၊ အန် ဇဝ် ဟဲ့ ဒွါ မိူင် ဘွတ် မိူင် မွှိုမ် ဒီ ဘေ။

11 တဲး ဘေ ဆာဒိက်၊ ယုဝ် ဘေ ပိဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ ကွဲ့ တဲး ဘေ ဝဲန် ဒါရာ ဘော ပီ ဒမ် အုန် ဇဝ်ဖြာ ဒွန် မျုဝ် ပီ ကာလာင် အုဝ် ဒီ ဘေ အာတိုဝ် နီ။

12 ဆေ ဘေ ဟဲ့ ဟွတ့် မိုဝ်း ဒီ ဟူမ် လိုင် တာ လိုင်၊ ဟဲ့ ဟွတ့် ဘူင် ဘော ကာင် အီ စှိတ်၊ ကာင် အီ ဆီချာ၊

13 ဆေ ဖိုင် မာဘူ ဘော ဖိုင် မာမက် ဘေ ဘော ရွိုန် ခြိဝ် ဘော ကြုဝ်ကြာမ် ဘေ ဟဲ့ ဘြဲ ကိူန်၊

14 တဲး ဘေ ဆာဒိက်၊ ယုဝ် ဘေ ဝီ မိုဝ်း နဝ်း ပီခိုက်၊ ဝီ ပိဝ် ဇဝ်ဖြာ အီ ဟဲ့ ချွတ် ဘေ လေး ခဲင် မိူင် အဲဂိုပ် အီ မုး ဒူင် ဟဲ့ ဒွိုမ် ဘဲန် ဘေ မှာယ် အီ ဟဝ်။

15 ဇဝ်ဖြာ ယီ ဟဲ့ ယဲတ့် ဘေ ကာလုဝ်း ဟာဝ် ခဲင် ပြဲ ကာဟဝ်း အီ တာင် အီ ငွင့်။ ဒီ တီ န့ ဘော မိုဝ်း ဘော မာဟန့် အီ ဟာယ် ဘော မာမဲင်ငဝ် အီ မိုဝ်း အာယ် ဟဲန့်။ ကာဒါယ် မိူဝ် ဟဲ့ ကာဟဝ်း တွင့်၊ အာဝ် မိုဝ်း အိုမ်။ ဇဝ်ဖြာ ယီ ဟဲ့ ဝီ တဲး အိုမ် လေး ခဲင် ဒါအာင် မာဝ်၊ တဲး ဘေ မိုဝ်း ဒီ ဒျီင်။

16 ခဲင် ပြဲ ကာဟဝ်း တီ၊ ဇဝ်ဖြာ ဟဲ့ ဟျီင် ဘေ ဟူမ် ခါမုန် မာနာ ပီ တူ ဒွိုမ် ဟူမ် ဂုန့် ဒင် ဘေ။ အန် ဇဝ် ဟဲ့ တဲး ဘေ ခမ် ဒုက် အီ ညှာပ် ကာဆဝ်၊ တဲး န့ ထေဝ် နဝ်း ဘေ၊ တဲး ဘေ ဝီ မိုဝ်း နဝ်း ဂူမ် နဝ်း တျီမ်၊ တဲး ဘေ ဝီ ပွိုန် မွင့်ကာရာ ဘွတ် ဝါယ် အန် တီ။

17 ဆေ အာဝ် ပါယ် တီ ဘေ ဒီ ဘော နပ် ဒီ တဝ်း၊ ‘န့ မုး ပွုန် အုဝ် ဘော ကျ အုဝ် အီ ဟဲ့ တဲး အုဝ် ခြမ် ခဲ့ နီ။’

18 တဲး ဘေ ယီ လှုဝ်း ဆေဆေ၊ န့ မုး ပွုန် ဇဝ်ဖြာ အီ ဟဲ့ တဲး ဘေ ပွိုန် ဒီ ဘူင်၊ တဲး ဘေ ဝီ မိုဝ်း၊ ဝီ ခြမ်။ ပါယ် တီ ဇဝ်ဖြာ ဟဲ့ ဘူင် ဒူပ် ကာဒိက် ဆတ်ဇာ ပဲ့ ဟဲ့ ဒွိုမ် ကာဆဲန့် အန် ဒီ ဂုန့် ဒင် ဘေ။ ပါယ် တီ န့ ဟဲ့ ဟွတ့် ဘဲန် အာတိုဝ် နီ။

19 ဆေ ဘေ ဝီ ပိဝ် ဇဝ်ဖြာ ပီ ကြိုပ် ဘေ၊ ဆေ ဘေ ဝီ ဂူမ် ဝီ ကြိုပ် ဇဝ်ဖြာ ပေါ ကာဒင်၊ အာတိုဝ် နီ အုဝ် ကာလာင် ဒီ ဘေ၊ ဘေ ဒီ လိုဝ် စှိုမ် တူတ့် အာခ်ု မှာန်။

20 အန် ဇဝ် ဒီ ဘူင် တဲး ဘေ လိုဝ် စှိုမ်၊ တဲး န့ ပီ ဂေ ဒူအီ အာမျုဝ် ဟဝ် ဟဲ့ လိုဝ် စှိုမ် အာတ့် တး လိုပ် ဘေ ခဲင် မိူင် ဂေ တွိုန်။”